ديوان الشاعر عبد الرحمن بن سعد مبيريك السحيمي

السلام عليكم ورحمة الله وبركاته
يسعدني ويشرفني ان اكون احد المشاركين في منتدانا ملتقى قبيلة السحمان من حرب
واتشرف بطرح قصائدي بين ايديكم واتمنى ان تنال على اعجابكم .....
ودمتم بالف خير ،،،،،،،

برق الحياء لا لاح للضايق أعلاج
	وصوت الرعد والوبل بلسم علاجه
في ديرتاً لا هم فيها ولا إزعاج
	تنسى هواجيس الفكر وانزعاجه
مع صاحباً لا ضقت في أيديه مخراج
	وكلاً على ما قيل يعرف خراجه
راع الوفاء ما بيني وبينه أسياج
	والطيب يبني عز عالي سياجه
يرقى على الهامات وأطوال الأبراج
	ولا هزت أرياح الليالي براجه
بالفعل والتقدير والمرجله تاج
	يصعب على بعض اللحي لبس تاجه
ولا الردي دايم عن الطيب منعاج
	مهما تعدل فيه تلقى انعواجه
والعلم واضح كنه النور في سراج
	يضوي على كل البسيطة سراجه
أحدن خذا من صافي الوقت ما حتاج
	واحدن محاصلّة من الوقت حاجه
هذا مع الصدقان له فله أحجاج
	وهذاك من همه معقد حجاجه

يا فكري الطف بحالي بس لو مره
	عطني جزيل الشعر يا طيب الفالي
أنا مضيع ذهيب ولا قي الجره
	وأتعبت الأقدام في حلي وترحالي
الشمس غابت وأنا متوسق الحره
	والبرد يلفح عيوناً دمعها سالي
والنفس من جمرة الأشواق محتره
	وزادت عليه همومي فالخلا الخالي
العام نكتب رثاء في محمد الدره
	واليوم شعري من أحزاني رثاء حالي
والوقت دوار والأيام مفتره
	وشمساً تغيب وقمرنا يرجع اهلالي
شهر يجر الشهر وسنين مجتره
	ويا لله تعلي مع الأيام منزالي
يا كثر ما عدت أنا الكره وراء الكره
	لكِن عيت ظروفي لا تهيالي
من واقعاً قل خيره وانتشر شره
	وأزريت أميز ما بين المر والحالي
أقول ما كل مرة تسلم الجره
	أثره صحيح الحمول اخفاف وثقالي

يا هيه ما ني للمقفين تباع
	وش حاجتي باللي لا جيناه قفا
ترى الرفاقه عزهم بالتجماع
	واللي لحاله من عنى الوقت هفا
من فضل ربي طيبنا فالملا شاع
	والطيب عندي منبعه ما يجفا
راع الوفاء لو مات له ذكر ما ضاع
	وراع الرداء لو عاش ذكره توفا
خمسة سنين أقول كب التمطاع
	ياللي على جمرة عضايا تهفا
تبخص على الصاع واوفيلك الصاع
	ولا من بغيتك فاللوازم تخفا
فرشتلك في داخل الصدر مرباع
	يعني على ما قيل دايم موفا
كم مرتن وأنا من الوضع مرتاع
	بردان وأنتا من عباتي تدفا
أما تصافيني على كل الأوضاع
	ولا ترى اللي جاك وفا وكفا

يا شين لا حدك زمانك على اقصاك
	وارخى ستار الياس قدام عينك
واركى عليك الهم حمله وخلاك
	تصفق مع العبرات راحت يدينك
في معزلاً عن باقي الناس دنياك
	ولحدن على فرقاق يسئلك وينك
تبقى الاسير وحلو الايام تنعاك
	وتقرى تجاعيد الزمن في جبينك
واصبحت ترقب في ذرا الليل مثواك
	وتبدا تعيد اللي مضى من سنينك
وتسوقك الذكرى وتاقف بك اخطاك
	على بيوت الصاحب اللي يعينك
الصاحب اللي كل ما جيت حياك
	يا قف معك في وقت عسرك ولينك
اللي على نهجك وفكرك ومبداك
	ودايم قرينه متفق مع قرينك
فالحرب مثل السيف ترع به اعداك
	وينصحك وقت السلم بامور دينك
وتشوف رجمً كل ما جيت بكاك
	لانه تحت ضله ثرا والدينك
ولانه تحت ضله ثرا من تمناك
	راحت وجمر الشوق بيح كنينك
وتصحى من الذكرى على حيد مركاك
	وتودعك واللي بقالك حنينك

نوفي ونبغى الوفاء وانبلشنا بالجحود
	كل ما نخلص نشوف الوجيه مكدره
في سماهم للحقايق بروق بلا رعود
	ويفرحون بهرجه الجاهل المتحدره
فالسعه نيبانهم مثل نيبان الاسود
	ولا دعى الداعي تشوف القلوب مصدره
زمرتة(ن) لا من سرت يا عساها ما تعود
	ومن يقدرنا ترانا لزوم انقدره
وما تعلا راية(ن) بين حاسد ومحسود
	والسهوم الطايشه كل حي اتخدره
يا الله اني طالبك يا كريم ويا ودود
	تهدي الغاوي وغل الصدور اتندره

يا ابو يزيد الله يديمك ويرعاك
	يالنادر اللي ما ندور بديله
شد الشفر يا صاحبي لا عدمناك
	ولا تهمك الطرقه ولو هي طويله
سقها وأنا بالدرب ممشاي ممشاك
	مخالفك في كل برق ( ن ) تخيله
حث الركاب وسمح الله مسعاك
	يا راعي الهمه وراع الجميله
من مفرق ( ام سدره ) عسى الله ياقاك
	افرق يسار وعط بليهان حيله
ترى الطريق ايضيق والجرف يبراك
	وليا وصلت الزلفي اقدح فتيله
( ومشاش ) و( حميضة جراب ) اتمناك
	عطها السلام ولا لها فيك حيله
قدامك ( ام رقيبه ) اللي تحراك
	فيها البيارق والسيوف الصقيله
فازتبها ابكار الطهيمي وما ادراك
	فوز( ن ) نعده فوز كل القبيله
لا عرضت من زينها تاقف اخطاك
	وقفت خليلا( ن ) مبطي ( ن ) عن خليله
اتوسع الخاطر وترهب بها اعداك
	ابكار من يشعى على العز خيله
وضح الكريم اللي على الطيب ناداك
	في مجلس ( ن ) يفوح بنه وهيله
عنده علوم الطيب ورجال شرواك
	تاقف مواقيف الزمان الثقيله
معروف طيبك يا رفيقي ومبداك
	وافعالك اللي ما تجيب الهزيله
دام الوفاء يا ضحلنا من محياك
	ما همنا كثر الكلام وقليله

تشرق علينا الشمس ساعات وتغيب
	ونرقب قمرنا والرجاء في طلوعه
يا ماجد ابوصيك خلك كما ذيب
	يصبر على ما به ويسري بجوعه
حث الركاب وادب النفس تأديب
	وارقى سماء والليل وقد شموعه
واصل ربوعك وامسح الجرح ويطيب
	والرجل عزه من معزة ربوعه
وليا نصاك الضيف عطه المواجيب
	الكيف سوقه له وقدم قدوعه
فل الحجاج وكثر امن التراحيب
	من شان لا قفا ما يبطي رجوعه
والضيف ما له غير حكم المعازيب
	كمل مواجيبه وقدر خضوعه
والرجل ما يدخل به الشك والريب
	يثبت على رايه ونهجه وطوعه
شبنا وحنا نخطي الدرب وانصيب
	والنفس ما تقنع ودايم جزوعه
حنا بشر يا بوك ما نعلم الغيب
	يارب ترزقنا بنفساً قنوعه
مرت علينا اظروف مثل اللواهيب
	اصعب على الانسان من حب كوعه
اعزومنا شبت على الطيب واتشيب
	وطموحنا ما فيه شياً يروعه
نتعب على الجزلات والعز والطيب
	لو الدهر شانت علينا طبوعه

قصيده للشاعر عبدالرحمن سعد في خواله الجعده من عتيبه

بني جعيد اللي نباهم يسلي
	أهل الوفا والمرجله والتراحيب
اليا دخلت بيوتهم ماتملي
	تلقى الكرم والطيب تلقى المواجيب
عزن على أطوال الشواهيق حلي
	ودايم مكانه فوق روس المراقيب
عتبان من جاء بينهم مايذلي
	أهل الشجاعه مابهم شك أو ريب
وقفاتهم وقفت شجاعن يسلي
	سيفه ولايلحق قصيره ذواريب
وليا حضروا مثل السحاب المظلي
	يروي ضما الضميان حلو المشاريب
ذولا خوالي لاعصى الوقت من لي
	انشهد انهم فالوازم شواهيب
والله يبيض وجه راع المحلي
	اللي بنى بيته على العز والطيب
محمد اللي غيث طيبه يهلي
	على بني عمه وحتى الصواحيب
له من ضميرن صادق الوقت كلي
	هذا كلام الطيب زين المكاتيب

رائعه أخرى للشاعر عبدالرحمن سعد وأبيات قليله كقصيده مكتمله

جبر الخواطر يابن عمي لازم
	لاتصير في كل المواقف حازم
ترى قلوب الناس ماهي وحده
	قلبن رخو والقلب الآخر عازم
وانا من الاثنين جتني حيره
	واحد يجاملني والآخر جازم
وبعض الوجيه ان شفتها ملتويه
	اعرف تراها ماتسد اللازم