ديوان الشاعر ربيع عريمان السحيمي

لوفائه مع الوطن والمؤسس الأول

ملك مكانته مع ولاة الأمر وفي قلوب حرب

وهو الشيخ ابن مبيريك رحمه الله

سلام يابيت الدفا والجنب من ياليه فالميقاف دافي

بيت بناه العود يوم ان الليال سمان تاكلها العجافي

واليوم بيبانه وسوره من ذهب والعهد والميثاق وافي

عساه يبقى فخرنا ويعيش من واصل مسيرتنا يعيش

والـــثــــانــيــــة

ربعي سحيم ان جات وقفات القبايل ماادرقنا

والطيبة نسعالها فالبر والا في أعماق البحر ما نخشى غرقنا

لو راح مال الرجل كله بس تبقى قيمته مرفوع راسه محترقنا

فينا الشهامة والوفا مادام فوق الطير ريش

قال الشاعر / ربيع بن عريمان السحيمي

إن اقل ما نقدمه لرموز الوطن والقبيلة أبيات في ذكرهم تبقى ذكرى لمن بعدهم

ياباب حرب اللي على البحر الأحمر
	يا بيتهم من يوم ما فكوا الباب
ياسيفهم في مقدم الخير والشر
	يا فزعة المظلوم في عتق الارقاب
حنا نصينا البيت والجو مغبر
	والادمي دايم معرض للاسباب
غيم سما الرجال والجو ممطر
	ولاباقي الايدبي الذر والداب
جاهك وتوجيهك له اليوم ننظر
	واهل القيم تعرف مفاتيح الابواب
جدك وابوك إلهم فعايل تذكر
	ترفعلهم رايه على كل مرقاب
راية شرف تظفي على البحر والبر
	فيها الذرا للي من الوقت منصاب
يرحمك ياعودٍ زرع زرع واثمر
	لو غاب قالت حرب فالقلب ماغاب
يوم الزمان الي به الكر والفر
	مدهال للصاحب ومزبن للاجناب
وهذى مسيره بالمفاخر تعطر
	والعهد يارث فيه شيبان واشباب
وحنا بحاضركم نباهي ونفخر
	شيوخ حرب اللي يفكون الانشاب
جمالها اللي بالمهمات تظهر
	تفزعبهم لا سرت للحق طلاب
وايمانهم تعطي و تثقل وتكبر
	جزل العطاء لا كشر الوقت بالناب
وان قلت تكفى جوك ما احدٍ توخر
	يشهد بها التاريخ واكتب ياكتاب

في إحدى الأمسيات الشعرية ورد في كلمتي الشيخ حضاض شيخ بني يزيد فرد علي
حضاض بقولة أن الشيخ هو والدي حمدان وهذا ما قصدته في البيت الثاني من القصيدة

وقد تشرفت بزيارة الشيخ حمدان في منزلة وأعددت هذه القصيدة حتى تكون هي
العذر والجواب

سلام يا شيخ من الروح لروح
	تسليم من قلبي وسلمت روحي
زلت لسان وعفوها قول مسموح
	الشيخ أبو حضاض دايم سموحي
كلمة وفيها رد حضاض بوضوح
	الشيخ هو حمدان لاجل الوضوحي
وقلنا الكرم والطيب من بيته يفوح
	نرفعله البيضاء وطيبه يفوحي
وانتم شيوخ ومدحنا فعل مجروح
	لكن فعايلكم تداو الجروحي
يوم اليدين اطلاق ذابح ومذبوح
	عدوكم على صديقه ينوحي
اسقوه في الميدان من سم ذرنوح
	ليلة تشب النار فوق السطوحي
والشعر له باب على الناس مفتوح
	مثل الخيال الي بروقه تلوحي
ان كان مالك سد الابواب مصلوح
	لاتطرق الابواب فيها تروحي
رجلَ بليا عقل عده بلا روح
	لو ترسله يرجع مثل ما يروحي
وحنا الحروب وجدنا هود من نوح
	يحكيلنا التاريخ من عصر نوحي
جنوبنا فيه اليزيدي ومسروح
	وشمالنا لسالمي لا تروحي
ولاصبحت بين اثنين مطروح مطروح
	هجاد والا حولوها سروحي
هذى عبارة ما بها هرج ومزوح
	مصدر خطر لا تحتسبها مزوحي
إن كان مالك سد الابواب مصلوح
	لا تطرق الابواب فيها تروحي

تشرفت بإلقاء بعض العرضات على الشيخ حمدان وربعه وأهديته إياها لتبقى للذكرى في منزله

سلام يا قصر ٍ رصيده من ذهب في العام الأول

واليوم بيبانه وسوره من ذهب وان دارت الأيام مول

ساسه على منجم ذهب ومثبته راعيه الأول

عساه يبقى فخرنا ويعزك الله يا بيوتٍ ثابته بوجود أهلها

والثانيه ربعي سحيم اللي لهم فالطيبة مركز وعاده

في قاسي الأيام وألا في السعادة

والنا قصور ثابته والنا قيادة

والناس تعرف ما يقدم للحمول إلا جملها

يا شيوخ حرب انتم مقاديم القبيله

والنا عليكم حق لاجات الثقيله

يومً ولد اللاش يهرب عن دخيله

ماللحمول إلا الجمال الباركات

إن جالك المقسوم وألا أنته تجيله

لابارك الله فيك يااليمنى الذليله

الموت للرجال اخير من الفشيله

تحكيبه الأيام فالحاضر وباقي المقبلات

غزلية من محاولات يائسة

يا نمر سيرت مسيار لا عاد المسير
	شفتلي مخلوق ما شيفته مثل البشر
ظاعت أفكاري وقمت اسال الطفل الغرير
	ما اسم اهلك وما اسمك أنت يثمره يازهر
لد فيه وقلت ياساتر الماقف خطير
	من نظر عينه توقعت أنا الموت الحمر
قلتله يا صاحب العقل والقلب الكبير
	لا تواخذ واحد لد في نور القمر
وابتسم ليه شويه وقررت المسير
	بشروني بشروني عسى زال الخطر
بس لايجرح لسانك شفايفك الحرير
	خلو لساني وقايه لها لو يندمر
ليت منهو مصها مص قوطي العصير
	من عنابر برتكان بعد لج الثمر
عاملوني كالصغير على صدر الكبير
	والصغير يعرف الحب لمنه كبر
إن بغيتونى غطى وان بغيتونى سرير
	المهم أرضاك والغيث من نقطة مطر

عيسى عويلي

لاواهني منه لا بغى فله حجاج
	كمل بشنطة موتره كل عازه
وحمل جميع اغراضة بظهر سهاج
	جيبٍ جديد وفل كامل طرازه
وليا ابتعد عن ذبذبة روس الابراج
	يشغل الكنود ويغلق جهازه
يأخذ شهر شهرين في البر دوج
	ماهو مقيد في قرار الاجازه
يشوي لحم صيده على جمر وهاج
	ماهو على فرن البخاري وغازه
وينك يابو نمر ترى الصدر محتاج
	طرقة تشفي الحشا واشمزازه
يذكر ورى بير الغنم روض وفجاج
	وعلى غدير الماء تغنى وزازه
قفرن خلي مافيه صحبه ولا ازعاج
	مواقفن عن الخلايق محازه
هذي ثلاث ليال والبرق لعاج
	يمدي غزيز السيل لين عزازه
يبغا لنا لدار هذيك منهاج
	خابرك حر ليا بغا درب جازه
قصيدتي لاتحطها وسط الأدراج
	ان كان عندك للمعاني حيازه

الــــرد

لايسير ياعيسى على القلب رجراج
	إن كان لك في غاية القنص عازه
القنص هو يومين لا سرت محتاج
	وأنت تقول أسباب قل الاجازه
ودك على المسبار والصبح مانباج
	والريح هادي وأنت باعلى محازه
مسلوبت التاجين وان كان أبو تاج
	العامل الوحيد صوب ارتكازه
وعاكس مهب الريح لو كان مافاج
	ناظر ورق شجراتها واهتزازه
في نايفاتً حولها الورع ماداج
	ولاشايب مثلي مطوف جوازه
إلا ولد ينهجلها كل منهاج
	مثلك عرف قصيدها مع الغازه
عليك باللي قرنها تو مانعاج
	لاسار مسبارك جويد حرازه
وان كان جات تمرك أفراد وأفواج
	ماعاد باقي للخيارات عازه
قدملها والرزق للعبد دراج
	واحذر دروب الصيد ماهي مهازه
وان كان ودك بالهوى الطلق هراج
	رنه على الهاتف كذا بانغمازه
وتشوف نظراتي لكم مثل الأمواج
	عجل وهات الجيب واقفل قزازه

الشاعر / ربيع بن عريمان السحيمي

العيون الخجولة

ألي يحسب الحب عرضه وطوله
	ويعرف تضاريسه ويعرف خفاياه
قدمت له ما نملكه من رجولة
	وسلمت له مفتاح قلبي من أقصاه
وتركت حب أم العيون الخجوله
	وان قالت ألي فات قلنا نسيناه
إن ناظرتني قلت ذي مهبوله
	وان كان قفت قلت ويلاه ويلاه
لا مشت كن الوطى به ميوله
	وان وقفت قلنا مع الألف مركاه
قالوا طويلة قلت منهو يقوله
	قالوا قصيرة قلت ما احد يتعداه
قال العنب حامض لجل مايطوله
	ومن ذاق حب السلهمه ما تنساه
يا بنت دنيا الحب دنيا خذوله
	ماكل رجل يحصل اللي تمناه
إما اعملي راسي محل الطفوله
	وألا اتركي راسي ورزقي على الله
قال العنب حامض لجل ما يطوله
	ومن ذاق حب السلهمة ما تنساه

لنا في قمة المجد مجلاس

البارحة فالليل ولعت ضوي
	والضو ولع داخل القلب هوجاس
لجات من روس العرب وش تسوي
	مالك مشاريهً على باقي الناس
بركت للحمل الثقيل المدوي
	منشان خلفي ربع نيبان وأضراس
من كبني والسيف خلفي وتوي
	في صفحته سجلت معدوم الإحساس
ام يجون عيال جدي واسوي
	والا افترقنا لو على قطع الأنفاس
من سار بين الحاوية والمكوي
	فوقه تعشن الحصاني والابساس
والي عمل عملت إبليس المغوي
	له يوم يصبح حبةٍ وسط محماس
وحنا لمنا بنينا نسوي
	بنيت شرف دايم تثُبت على ساس
ياهيه من دون الفضا غلاف جوي
	وحنا لنا في قمة المجد مجلاس
قولوا لراع البل لازم يضوي
	وألا يبطل عزوةٍ مالها ساس

تم إعداد هذه الفصيدة بمناسبة زواج الأخ / صالح علي السليمي

سلام تسليم محلى من الدر
	در البكار ان بينها الشعب نور
إعداد ما خيل من المزن وأمطر
	على الحضور ومن زواجه منور
موسى دعاني قال للحفل تحضر
	وأنا حضرت وشيكنا ما يجور
لأهل البيوت الي عن البرد والحر
	مزبان منهو طاح وألا تعور
بني سليم اللي لهم فعل يذكر
	من واقع التاريخ ما هو مزور
يوم الزمان اللي به الكر والفر
	يثنون فوق الخيل دون المعور
مركاضهم يشبع به الذيب والذر
	ومعوادهم من رايب الدم كور
قطعانهم يرعن في الروض الأخضر
	ويردن وقبات بها الذيب سور
يومنها صحراء وقلبان وحفر
	واليوم دولة وسطها الخير ثور
في ظلال أبو متعب به الخير يكثر
	على العدو رده كذا لاتهور
هذا وطنا دونه الموت الاحمر
	والجيش يعمل بالسلاح المطور
فيه الوفا كالنهر يجري ويكبر
	ماهو قليب إن قالو الناس غور
وان جت حروب حروب مانقبل المر
	لا مالت الأوقات والميل جور
دايم لنا في قمة المجد منبر
	مصدر خطر موجود ما هو مدور
والطيب ما يطلع من البحر للبر
	وألا على بابور في البحر دور
الطيب له روس الرياجيل مصدر
	وألا الردى عكسه على ماتصور

يا زين أنا في حبكم صرت ضميان
	اشرب ولا يقطع ضماي البرادي
ما تدري إني فيك مغرم وشفقان
	وأنت دوا قلبي وغاية مرادي
من أحلى المنام أفز في بعض الأحيان
	واذكر مقالك لي شخص اتحادي
سهرت حتى بان للصبح مابان
	حتى بدا للفجر ونادى المنادي
قالوا وراك الناس ساهر وزعلان
	قلت آه من فرقا هواي ومرادي
وقالوا من الممكن نشوفه علشان
	ما تنتحر في حبهم بالأيادي
قلت آه غيري مايشوفه ولا إنسان
	ولا هو لكل الناس مخلوق عادي
قالوا نبي وصفه وزينه والألوان
	قلت آه مايوجد في حضر وبوادي
راعي جديل ناثرة فوق الأمتان
	وخده سوات البدر لاصار بادي
وله مبسم مصنوع لؤلؤ ومرجان
	ورموش عينه من سيوف حدادي
يطلق من النظرات صاروخ ميدان
	وشكل على قلبي هجوم وكادي
حبه بنا في القلب تسعين دكان
	ومليون فله من طراز جدادي
كن القمر مبدآه من بين الأعيان
	لابدا مايجلا جميع السوادي
لو حطله بالزين تجاره وبستان
	يمكن يبيعه في جميع البلادي
ولو قسمو زينة على كل الأوطان
	غطا الوطن وأيضا على الناس زادي
وتر علاقتي مع الناس يااخوان
	من عقب ماوضعي مع الناس هادي
أشح باسمه قبل روغات الأذهان
	وأخاف وأخشى نشرته بالرادي
لكن رمز الميم والرا وكتمان
	ولو سال زينه ضاق به كل وادي

فعرضت المقصود بها على شاعرة صديقة لها فردت قائلة :

ياورد ريحان ياثمر الأغصان
	ياشجرة ما لمست بالأيادي
أسقيتني من مبسمك شي ماكان
	و شبيت نارك في مثاني فؤادي
أهديك خاتم تلبسه فوق الأيمان
	واسعالك بالصلح فوق الشدادي
لاتردى الحظ ماأنته بزعلان
	ماسجل المكتوب رب العبادي

قصيدة مهداه إلى الأخ / محمد الخنفري

راكب اللي سفرته من هلال لياهلال
	والمعاني كلها جاهزة في دبته
كن ضريت بستمه ضرب نون فالخيال
	الرياح تسيره والمخيله صبته
والتوانك شاركه من يمين ومن شمال
	واحتياطه فالظهر و المحطه عبته
سايقه جبار مرتبه أيام وليال
	كم لياليٍٍِ تالي الليل طفا اسطبته
مايوقف غير قدام قرم من العيال
	عاش أبوه وعاشت أمه وعذراءً حبته
شايبه تلقاه جالس على حيد الدلال
	كل ماتجهز محمد يقوم بصبته
دلته دايم حطبها الجزيلة والجلال
	ضوها جذاب للنفس محلى شبته
اشهد إن الطيب مغروس في بعض الرجال
	والله اللي يغرس الطيب والله نبته
اعشقن القرم يا البيض زاهية الجمال
	عنق ريميٍ سقا الله ديار ربته
والجدايل فوق الأكتاف كلف الحبال
	تلفت الأنظار لو بالعبايه خبته
ليت منهو شاف جيران بيته بالحلال
	ثم يعود العمر ليه بداية شبته
بلغ مناحي سلامي وبلغه المقال
	ثم رد لحمدي أزكى سلام وثبته

وهذه القصيدة مهداة من الشاعر / محمد بن عبدالرحمن الخنفري القحطاني
إلى الشاعر ربيع عريمان السحيمي

راكب اللي يطوي البعد لو الخط طال
	مثل سباح البحر لا ضرب في غبته
موقفه موقف معزه وفي مشيه جلال
	والمواتر كلها تكرهه ما حبته
لانها ماتقدر تنافسه في كل حال
	لا قطع له حبل عرق وطب بغبته
روحت عن دربه تجنب يمين وشمال
	يوم راح وهي ما راحت بدربه هبته
هذا هو الفكسار ما فيه هرج ولا جدال
	اليهود القطم وسط المصانع صبته
لا عطا الخط المزفلت وصدعنه الرمال
	وجاب كل اللي في بطنه وطق مثبته
ينحر العوفي كريم المعرفة والسبال
	شاعرا وصل لنا شكر ومحبته
ياربيع طيب الساس ياوافي الخصال
	الوفاء ضلع وكل يحاول ذبته
لاكن لا شكر على الواجبه يابن الحلال
	من قصر عن واجب الطيب يضمن كبته
والجماله عندكم كنز مع طول الليال
	قلتها وعلومكم ثابتة ومثبته
ليت من يذكر هل الطيب لعيال خوال
	مثل ابو عريمان راعي الوفا من شبته
النهاية ياولد عوف ما فيها جدال
	مطلبي نسبك والطيبات مثبته

قصيدة غزلية

يا نمر كيف القصر مايدرق الريح
	الريح جاني من ورا القصر برا
ذبحتني يابو عيون ذوابيح
	لو اسعيد الي عليكم تذرا
روحت حول القصر عدة مراويح
	طير الياما سفر الصبح فرا
اسهر الين يقربن المصابيح
	على كلام زود القلب حرا
واليا زعلت وقلت لناس بصيح
	قالولي اسكت لانعكس الخير شرا
أصبحت مثل امسح الديد تمسيح
	مابه لبن لاكن حمر ودرا
ولمحتله في بادي الامر تلميح
	واشر برمش العين ثم استقرا
و أهل الهوى تعرف دروب المفاتيح
	والورع يبكي للحلاوة مضرا
ويشوتني بالرجل من دون تجريح
	واصبر على الأهداف لجل اتجرا
كوره قدم فالعارض من مصيبيح
	لاخشت المرمى ولا جات برا
وألف حول الباب وأقوم وأطيح
	جالس بحيد الباب كني مغرا
لو قالو ادخل قلت مافيه تسريح
	واخاف من هرج الغلط والمغرا
ياللي تراعي للنجوم المدابيح
	وأنا عيوني في عيونك تمرا