ديوان الشاعر ربيع عريمان السحيمي

نبارك للشيخ عوض عاتق بمناسبة زفاف ابنه / عادل
ونقول له ألف مبروك مع تمنيتنا له بمستقبل سعيد

يا مرحبا ترحيب فرحات وإعجاب
	فرحة هل الديرة لامطر مطرها
ترحيب بالداخل وبرا على الباب
	بلسان شاعرها وقلب ذخرها
بضيوف حفلتنا ومجموع الأصحاب
	وصلت تهاني واحد ماحضرها
من قدم المعذار مانحسبه غاب
	ومديون للي خطوته ما قصرها
الطيب نبديله على كل مرقاب
	ولاله طريق ألا قدمنا عبرها
وألا الردى ماله مع الناس طلاب
	تابس غصونه مايخضر شجرها
اليوم كل الناس صدقان وانساب
	دين وطن خيرات يحصد ثمرها
وحنا لنا في المجد تسعين محراب
	نصعد سلالمها وندهم خطرها
رجالنا يا كبر قدره ليا شاب
	وشبابنا يغلب عليها سطرها
دون الخوي والجار مانهاب الاصعاب
	والضيف يقلط فوق واسع سفرها
يوم الليالي عجاف والوقت ملهاب
	أجدادنا بالمجد كل ذكرها
لشد قال اعمل على النار شباب
	هاتو ثلاث ليال ضيف خطرها
الضيف لوحله من النار مشهاب
	علامة للضيف يمشي قطرها
وان صاحت العذرى لعكفان الاشناب
	كم فزعة قامت ترمي غترها
قالت عدايلنا تحت سيف الأجناب
	خلفاتها والي مقبع وبرها
لحقوا على الزلبات تسعين ركاب
	من خلفها والي وقف في نحرها
وشبع الثعل والذيب والضبع أبو ناب
	منا ومنهم مير ما الله نصرها
واليوم في دولة رخا والخطر غاب
	فظلال أبو متعب دياره عمرها
كل الدول قالوا ترانا لك أحباب
	نظراتهم من نظر عينه كسرها
وسامح لكن ماتفيد فذناب الإرهاب
	الله يلعنها ويطفي خطرها
وباقي قمرنا في هذا الليل ما غاب
	كل العيون تلد يمه نظرها
سماك عادل والدك كلمة إعجاب
	والعبد يحمل حاجة ما قدرها
العادل الخلاق هو رب الأرباب
	عساك تعرفها وتفهم سررها
وختامها من يطلب لرب ما خاب
	نطلبلك التوفيق ذا مختصرها

زمان أول

راكب اللي معه تسريح الإمارة
	لو وطى كل المراكز ماوقفنه
منوة اللي منتوى يمة دياره
	مركني والمركني يازين فنه
من حفيزه مانزل سوق التجارة
	هاف سته منتقينه من مغنه
عقربه زايد قليل عن غماره
	صورة التاجين في زيكه زهنه
ماحلا مع سهلتاً سمكة غباره
	وان عطاله رملته يازين حنه
سايقه جبار ماهر بالشطارة
	لامشى يقصاه ماعنده محنه
لاعطاله دبلتينه مع غياره
	صاح سيره والمحاقن جاوبنه
والكفر كوهام وازنا عياره
	مع خطات الخط ماحسن جلدهنه
والاديتر قص ماتقوم الحراره
	والريش ست بهواهن ثلجنه
من خريص مسافر بأول نهاره
	والعصير قصور بحره شرق منه
عند حمدي وقفه بجنب داره
	عند ريف أهل الركايب لا لفنه
يحكر الفجال ويزود بهاره
	لاخذيت اثنين راسك يقعدنه
كامل الطولات ما يحسب الخسارة
	كم جميل يدي حمدي قدمنه
سلمه مكتوبنا واحكوا باثاره
	واشرح الموضوع لاتخفيه عنه
قالها اللي شارب كاس المراره
	والطواري والهواجيس اخلفنه
دوك قلبي محرقه كانه سيجاره
	لين رحت اقرع تقول اقراع شنه
من غزالٍ حطني يلقرم شارة
	قايد الغزلان دايم يتبعنه
عينها عين أشقر في رأس قاره
	لو نظرها مفتي الدين اخلفنه
لي ثمان سنين صابر بانتظاره
	لاذ كرته بالمنام اجر ونه
حدني عن جيه يالقرم جاره
	بالبريد خطوطنا ما ياصلنه
لو بغيت أنساه واصبر من عواره
	ثارت الأعصاب غصب يقومنه
وعذاب القلب منهن ودماره
	وعذاب اللي سطابه حبهنه

نواد ابيات

وش خانت الرجال من دون قيمه
	وش يفرقه عن الحصاني والابساس
لاعاد ما عنده كرامه وشيمه
	عده بدار ٍخاليه مآبها وناس
كلمة ولد رجال كلمة عقيمه
	لا عاد مابه فعل يذكر مع الناس
بيض الثياب تحط فوق الهشيمه
	خضراء ولا ينظر لها عقب الايباس
يانمر روحوا للعدود السليمه
	اقل شي يقال للرجل لاباس
علم ولدك بكل شي يظيمه
	من شان لا يدخل على القلب وسواس
ولاجتهدت الي على الله يقيمه
	وأهل القيم قالوا ترى العرق دساس

تم إلقاء هذه القصيدة
بمناسبة تعيين صاحب السمو الملكي عبد العزيز بن ماجد
أميرا على منطقة المدينة

نور المدينة زاد نور على نور
	من غرب سلع وشرق هضبة وعيره
يا مرحبا ترحيب بورود وزهور
	عد السحاب وعد ممطر غزيرة
ترحيب بالحضار من دون مقصور
	عدت حجيج البيت من كل ديرة
ترحيبنا يكمل فرحات وسرور
	يا مرحبا بأحفاد صقر الجزيرة
عبد العزيز اسم معزز ومشهور
	عبد العزيز وغيره أسماء كثيرة
من ماكرا عالي وللمجد ماثور
	ماكر حرار ومن مواكر شهيرة
وأنت بعد في سيرته منت معذور
	الشبل وابن الشبل تسمع أزيره
أرسى قواعدها على عالي الطور
	عن اليدين الطايلة والقصيرة
يالله عسى ذنبه من الرب مغفور
	آمين قولوا يا الوجيه السفيرة
يطلع من الماكر شواهين وصقور
	كلن على دوره يقود المسيرة
سعود اخذ دوره وفيصل بنى السور
	كل الدول من حكمته تستشيره
جت خطة الخمسين بهجات وسرور
	بريرة ياحلوها من بريرة
وخالد تسلمها على كل مقدور
	واخبربها من لايبيح السريرة
قام الفهد بالدور ما أحلاه من دور
	المستحيلة قال ما هي الأخيرة
صلح على الصحراء بساتين ونهور
	والماء يحلى من بحور غزيرة
حتى الفضا حنا طلعنا له عبور
	وصله مراسلنا ومنا سفيره
والأرض فيها أشهر مهندس ودكتور
	وطيار يصعد للسماء بالذخيره
وأعلن مسمى خادم البيت بسطور
	ويشرف اللي من بعده تعميره
اليوم أبو متعب به الشعب مسرور
	دون الوطن والشعب عقله شويره
خلى الفقير اليوم تاجر وميسور
	يأخذ معاشه فوق بارد سريره
راح الزمان اللي به الرجل معسور
	وان فاز يمكن رأس ماله بعيره
واليوم ملياردير وبنوك وقصور
	وبورصة وسوق أموال للي يديره
واللي يبي يعمل على الدين ديكور
	الدين ما هو بالفمي الشريرة
الدين دين الرب والبيت معمور
	يا أهل الخنى اللي تدعون البريره
مغويكم الشيطان وعيونكم عور
	مغسول مخك عند قوم الخميره
مغطيا راسة ينقرض كما الفور
	وفا الواجهة تهدم عليه الحظيره
هذا الوطن دونه حسابات وكسور
	من لا حسبها ما يقرر مصيره
فوقه تربينا وفوقه لنا دور
	وكم شايبٍ فوقه يوصي صغيره
هي دارنا هي أمنا حورت الحور
	ماني ولدها كان مافي غيره
كم زارها طامع وكم راح مقهور
	جاها بصير وراح ماله بصيره
ماجات بالتجميع كوعد بلفور
	جاتنا بيوم عابس قمطريره
أفتكها راع البويضا من الجور
	بالرمح والبندق وسيفٍ شطيرة
يا الله ياجاعل من الأرض طهور
	من فوقها اذهب كل خاين ضميره
يا أمير فيه عهود بسنيين وشهور
	واليوم تافيبه شيوخ العشيرة
أجدادنا مع جدكم دورهم دور
	وحنا معك يا أمير تحيا المسيره
صلوا على من بالرسالات مأمور
	فالغار قال وكلمه في دثيره
جاب القران اللي لنا خير دستور
	شفيعنا في يوم نسمع نذيره

استهزاء بالكفار عندما ذكروا أنهم وصلوا الفضاء قبل العرب

قالوا على المريخ حنا وصلنا
	وألا العرب ما تاصل اليوم وألا أمس
ما يعرفون أن البحر فيه حنا
	نعبر من المغرب لمطلع الشمس
في داخله عشنا سنيين بعملنا
	ماش أكسجين وماش كمام يلبس
واللي عبر كل الفضاء ذاك منا
	والكفر ما لمسوه قدامنا لمس
قدام ماكانوا على الأرض كنا
	ومراسلين من الفضاء والجن والأنس
كل الرسايل عندنا في وطنا
	ما عندهم غير الخبيثات والجنس

[/poem]

رد فعل وعتاب

يافايز الي صار ما يمكن يصير
	حلمت كيف اصحي وأحقق حلومي
بعض الحلوم تروح من دون تعبير
	تهوي ورى القشران مهوى النجومي
والمشكلة لوقفن الطوابير
	تدرى القروم ويذهلون الرخومي
تدفعني الهقوى على دمة البير
	وأخاف وأخشى يزعلون القرومي
والطير ذاك العام ما يمكن يطير
	يحوم وألا فالسماء مايحومي
لكن دونه ياقفون المناعير
	وأصبحت أحول عن مبادي الرجومي
عيا القلم في بعض الأوقات لايسير
	يامن يودي للنشامى علومي
أقوم وابدي في علو المسابير
	ومن ماحصل قامت تردى عزومي
منشان أخاف يسير فالعلم تغيير
	وينضر فيها أهل الشرف والزومي
لكن الردى قالوا كما نافخ الكير
	لاريحةٍ زينه ويحرق هدومي
والطيب قالوا له قياس ومعايير
	تشريه وألا ريحته فالخشومي
لكن بعض الناس صوت على زير
	والوز في غير البحر مايعومي
يعجبك لو فالرجل دقة مسامير
	وايظا اليدين ومن قراها محشومي
رافق كليب وعاش مع سالم الزير
	ومن قو عزمه مايهاب السهومي
لو الرياح تجيب عج ومعاصير
	مهتز ضلع ويمطرن الغيومي
ولاحرك الاشجار صوت العصافير
	والحر الاشقر مايجي فرخ بومي
والرجل نوع من الحرار المشاهير
	لاضاق جوه مايعاود يحومي
وقبل تحياتي على كل تقدير
	وسلم على فواز جعله يدومي

نقل إلى بعض الأشخاص أن احدهم امتدح جمال المغربيات وفضلهن على بنات الخليج

بقولة ( أخير من هيفاء وخشت منيرة ) فرددت عليه بهذه القصيدة لعدم وطنيته

كتفان غنى يوم ناظر للأكتاف
	شاهد على الدفرنس صرة كبيرة
نسي الأصول ودار أهلنا والأسلاف
	أهل الشهامة والشرف والبصيرة
الحر طلعه قدام ما ينظر خلاف
	يوم الغراب غذاه طفيلي حميرة
ترا الحياة بدون الإحساس تنعاف
	لعاد ما عنده على الدم غيرة
مثل البهيمة عايشه وسط الأعلاف
	حتى الجمل لا هاج تسمع هديرة
صاحي ونايم فوق كرسي الإسعاف
	محمول بر ويحسبه في سريرة
أسماء ذكرها كلها أحلام ما شاف
	غيم سماه وقالها في تعبيره
لا تزعلن يالبيض ما قال الإنصاف
	يمكن حصله في ذخيرة ذخيرة

من العبقرية

لا والله إلا غيم الجو وأمطر
	غيم سماه وساق قلبي نسيمه
واخيل براقه ومزنه تهصر
	على هوى نفسي كثافة غميمه
يا خالد المرسال وشبه توخر
	وهجوس قلبي فوق قلبي مقيمه
من عصر أنا جاعان لكن اتصبر
	صبر اليتيم اللي وليه يتيمه
يالله ببيت صاحبه فيه يشكر
	رجل كريم ومن سلاله كريمة
ولاشافنا رحب تراحيب وأكثر
	جينا ضيوف ولا عزمنا عزيمة
حط الحطب فالنار حتى تكسر
	حتى برز جمره وحمر هشيمه
ودله على المحماس والبن الأخضر
	في حمسته ماتغتشيه الظليمه
ظلا يحمسه لين بنه تشقر
	حتى قنعت بحمسته وتعليمه
لا محرقن بنه ولا هو محمر
	دم الغزال ليا اندفق من صميمه
مع زعفران وهيل والعود الأسمر
	في وارد الرسلان ماهي قديمة
وكبش من المعلاق قام يتهصر
	من نسل حيل مربيتهن حليمة
لاشافت المحتاج قامت تجبر
	تمدح غنمها جعلها لثليمه
قال اطلبي والأمر كله ميسر
	العمر فاني والليالي مقيمة
خاله وأبوه الهم فعايل تذَكر
	والهم على العادات شيمه وقيمة
وهوه بعد بافعالهم قام يفخر
	من عقبت حلياه ماهي عقيمه
يالله عسى دار الكريمين تمطر
	وتسني ديار أهل الردى والنميمة
بيوتهم دايم هجافه بها الذر
	بأطرافها مافيه ريح الوليمة
رجالهم بين المخاليق يفتر
	يومي برأسه مثل رأس البهيمة
واليا حصل عرماشة ٍ قام يزمر
	حصل عشاه وقال جبت الغنيمة
حليلته زايد على كبدها المر
	تهل دمع العين وهي هميمة
شافت فعول سنيد وعبيد وعمر
	تعلمت وهي من أول غشيمة
قالت حرام لمثل هذا أتعطر
	إن ماهدمت مبناه ماهي سليمة

إهداء للمتفوقين والطيارين من قبائل السحمان

اعز لحظة عشتها في حياتي
	وأغلى زهور العمر مبدأ هذا الليل
يا مرحبا ترحيبةٍ من شفاتي
	ترحيبةٍ قدامها البن والهيل
في حفل ربع ٍ تعرف الطايلات
	وأفعالهم تعرف كما يعرف سهيل
متفوقين وقادة الطايراتي
	اللي على العدوان ترمي محاميل
حيوا صقور الجو في مقاتلاتي
	درع الوطن لايشرهون المهابيل
عهد لنا في أيامنا الماضياتي
	وفالحاضره نبدي مع العهد تكميل
حنا جبال بالوطن راسياتي
	وان عالوا العدوان من حقنا نعيل
ربعي سحيم إن عودت للعصاتي
	أعصى عرب ونجازي الكيل بالكيل
وان عودت للطيب سكر نباتي
	حلو المذاق وورث جيل بعد جيل
وليا بغينا نفعل المعجزاتي
	مصدر خطر في مطلع الصبح والليل
كبارنا تازن جبال السراتي
	وصغارنا ضلعان تزمي عن السيل
من مات منا ما حسبناه ماتي
	ومن عاش قدمه من يسوق الفناجيل
هاذي محاسنا وهاذي سواتي
	وعيب على الرجال سب الرجاجيل

شكروثناء لله واجلال وعجاب
	في عزوتي لجاء نهار العزاوي
ان قلت هيا جوك ما واحدً غاب
	شيوخ قوم وياصلون الحراوي
ترفعلهم رايه على كل مرقاب
	راية شرف يرويبها كل راوي
ما خاب من يسند على حرب ما خاب
	يلجيلهم فقري ويصبح غناوي
شيوخ حرب الي يفكون الارقاب
	اجمالها لاجات بعض البلاوي
تجمعوا بالراى واخذوا بالاساب
	وكلً على ما يرفع الراس ناوي
وتباشروا بالنصر عكفان الاشناب
	وهذا هواي ان قالوا انته هواوي
وهذا هوى المتحري الي وراء الباب
	فزعة وعز ومرجلة كم تساوي
ربع الياحدك من القيض ملهاب
	خاويتهم وانت تعرف من تخاوي
رجالهم يقلط على الجمع ما هاب
	وخويهم ما خاب من له رجاوي
أي والله انا للخوي درع وحجاب
	قول وفعل ماهي مجرد هقاوي
تفزعبهم لاسرت للحق طلاب
	لاطار عن بعض الوجيه الغطاوي
بدون نقص بالقبائل والانساب
	الي عرف وشلون يجرح يداوي
واليوم كل المجتمع ربع واحباب
	في ظلال من يحكم بدين التساوي
وحنا ولانا مالنا عنه مجناب
	نمشي وحنا واثقين الخطاوي
لا والله انا كلنا ضد الارهاب
	ما هو نفاق امر من الله سماوي
رجالنا ياكبر قدرة لياشاب
	وشبابنا يصدر دروس وفتاوي