اوراق .. اوراق .. لـ (مناور)

السلام عليكم ورحمة الله وبركاته

اسعد الله اوقاتكم بكل خير .. يامن تنتمون لهذا الصرح
يسعدني بل ويشرفني انضمامي ومشاركتكم بشيء من الشعر
الذي اتمنى ان يصافح قلوبكم قبل اعينكم من خلال هذا المتصفح

اخوكم

نص قديم كُتِب
حين عودة سيدي خادم الحرمين الشرفين اطال الله بعمره الى الارض الوطن سالما معافا

الشعر تثمينه ماهو بي تثمين

لاصار بك ياللي تزيده صلابه

ياخادم بيوت الله وحامي الدين

ياللي على نهج النبي والصحابه

يالقايد الغالي حبيب الملايين

الله عطاك امْن الوقار المهابه

محبتك لقلوب شعبك عناوين

والعارض اللي جاك جاه وأصابه

بالمملكه من رحت ماغافيه عين

حتى مناطقها غشتها الكآبه

ندعي لك الله وترفع له يدين

يالله عسى دعواتنا مستجابه

يمد لك بالعمر والصحه سنين

سنين ماتحصر بقول وكتابه

لنك عديم وفارقٍ بالبراهين

والشعب كله تحت رايتك لابه

جيت وتباشرنا وقمنا مهلين

يامرحبا به سيدي / مرحبا به

وبادرتنا بالحب والعطف واللين

عوايدك ماهي عليك بغرابه

ياللي بعدلك ماتميل الموازين

مافيه شي إلا تطرقت بابه

حتى السجين اللي كسر ظهره الدين

اطلقته وتطلب من الله ثوابه

من لامنا ف مْحبتك جعله البين

ويمسي لصلفات الليالي نهابه

واللي مع الفتنه ورقص الشياطين

ياسيدي والله ماحدٍ درابه

متكانفينه هالرتب والنياشين

تقضي عليه ومن معه من عصابه

تامر يابو متعب وحنا ملبين

إن كانها بالسلم ولا الحرابه

يوم الشعوب تزيح حكم السلاطين

حنا معك نرقى متون السحابه

/

الفكره اللي حايمه في ثرى القاع

اكبها وارقى متون السحابه

واجلب بيوتٍ مالها شكل , وانواع

تطربك غصب بدون عود وربابه

قريتني !! شاعر إلى حد الامتاع

شاعر بيوته حاضره في غيابه

ــــــــــــــــــــــــــــــــــــــــــــــــــ ـــــــــ

القلب نبضاته له لسان .. ويقول!!	ياللي غيابك فوق مانا اتحمل
اليوم في غيبتك عندي 100 حول	والهم من بعدك كريم وتجمل
مغطي بدوره على الاربع فصول	ليتك لحالي تلتقت وتأمل
يمديك جيت بدون ماتبحث حلول	وترجع على درب الغرام .. ونكمل

ــــــــــــــــــــــــــــــــــــــــــــــــــ ــــــــــ

ياللي عشانك للمسافات ماقيس

لوهي على حد النجوم .. وبعدها

دامك تربعتي على عرش بلقيس

ياسالفه بين الورود وشهدها

باعانقك غيمة شعور واحاسيس

يحيي عروق القلب صاخب رعدها

______________________

لاتسأليني وش مضى لي من ايام	من يوم غبتي والسهر مبتليني
لني وربي كل ماجيت ابنام	صورتك تثبت بين رمشي وعيني

______________________

ياصاحبي شفني هنا

بين المواجع والطعون

احيان اقول اني / انا

واحيان مدري مين اكون

______________________

لاتفهق الصبح .. دام الصبح به سلوى	لاتزبن الليل .. ثم ايجيك بظنونك
مادام عزمك قوي / وشلون ماتقوى	كف الدموع اللي تسابق من عيونك

______________________

الهم سلطن لين هيمن على الروح

وانا احسب ان الهم ماله علي درب

شفني تنفست الالم / شفني جروح

لين الحزن صار بسما ناظري سرب

قلبي على حد الشقى منك مذبوح

هذا وانا سحيمي واصل لابتي حرب

ــــــــــــــــــــــــــــــــــــــــــــــــــ ــــــــــ

حي الفلاح اللي وصلني رغم بعدي صداه	منه انتشيت بفرح .. بعد استعديت له
يرق قلبي لو إن القلب مثل الحصاه	لاشفت بيت الله فبالي .. وحنيت له

/

ياراعي الطيبه .. ويامنبع الجود

ياصل الوفا والمرجله والشهامه

تشهد لك فعولك / وخلق الله شهود

ياسيف تعجب سلته وانصرامه

انت النقا , والك الغلا دايم يزود

من هو كسب عرفك كسبت احترامه

وانت القصايد فيك تحتاج مجهود

لاتلوم مثلي لا ارتبك في كلامه

وانا ليا هبت على راسي النود

والجسم عجزت لاتشيله عظامه

انت الذي من بدت الناس مقصود

مزبان في وقتٍ تزايد عسامه

طاريك اطيب من شذا الورد والعود

ياقامةٍ فاقت على كل قامه

________________________

ياراسي اللي كل شيٍ يشاطنك	انا اشهد انك ماتعرف المباتي
سلم على اللي حط للمرجله بنك	مطنوخ وادعي له وانا في صلاتي
ووالله ياعمي وحالي من الضنك	دايم تردى مابقى الا وفاتي!!
ضاقت علي وقلت زابنك .. زابنك	لا يارصيدي فالحياه وغناتي
المرجله لو ارصدتها .. مخازنك	فانا بناخي لك وهذي صفاتي

______________________

يقولون : ابو نواف , مداته سمان

واقول ماجيتوا بعلمٍ جهلته

هذاك هو رمز العطا , كف الاحسان

ياما .. وياما فيض جوده دهلته

ــــــــــــــــــــــــــــــــــــــــــــــــــ ــــــــــــ

انا ل ابو نواف مجدي تليدي

الهرج مازعزع ثباتي وانا اخوك

الزود زود المرجله في رصيدي

ماهوب زود القرش لاحط فالبوك

/

(شـمـوخ راسـي)

ابدا وخير المبتدا في كلامي

بسم الله المعبود , وابليس ملعون

اللي له عباده صيام , وقيامي

واللي نساله عفوه ونطلب العون

من بعدها يامرحبا .. ياسلامي

اعداد من يدعي ومن هم يصلون

واعداد من طاف ولبس للحرامي

واعداد من بالحج وقفو يلبون

للوافي الطيب رفيع المقامي

اطهر قلوب الخلق وابيضهن اللون

اصل الكرم , والمرجله , والتسامي

ترفع له البيضا على دق ولحون

من هو نصاه من العنا مايضامي

ياقل من مثله بفعله يسوون

غيث الكبود الحايمات الضوامي

من فيض جوده يصدّر ويردون

ولاجا نهارٍ فيه زرق السهامي

اسمه قبل كل الاسامي يعدون

هذاك عمي ياكبار الاسامي

لا واهني من هم على اسمه يسمون

( عبدالكريم ) اليا كفخ ثم حامي

مدهاله الجوزا بعيدٍ عن الدون

ومااظن مثلي لاتغنى يلامي

واهو الذي لي قلب , ولسان , وعيون

قلته وانا جسمي تشيله عظامي

وشموخ راسي لن ذكره لي متون

وقلته وانا ببصم , ببصمة ابهامي

ومانيب من يسمع وكالة يقولون

عمي وبس اللي عليه الكلامي

وقصيدتي شيٍ مبسط وعربون

ومن عادة النشمي لو الجو (حامي)

يوفي ولو بشوي للي يوفون

وهذا زباد الشعر فيه احترامي

للي قرا شعري / وللي توحون

وصلاة ربي كثر , كثر الحمامي

وكثر الشجر , واعداد ماتومي غصون

على النبي المصطفى والامامي

اللي بنوره نور الحق والكون

شفيع الامه في نهار الزحامي

نهار ماندري وش الكاين يكون

/

اطرب حزن واحن شوق وغرابيل

واشبع وهم .. وادور احساس ثاني

احاول اكتب عن شقى الروح لليل

والليل مابه شخص مثلي يعاني

كنت احسب ان الليل جوه تعاليل

ويملا صدور الناس حب واغاني

والليل والله مايعرّف التساهيل

اقصى نجومه حارقه للمحاني

اسامر اسكونه وانا مامعي حيل

ادور دروب الامل والاماني

انحت على صدره لحون ومواويل

وارمي له احلامٍ رفضها زماني

وارسم ملامح فرحتي دون تفصيل

بس الملامح تنمحي في ثواني

كحلت عيني من سواده وانا اشيل

جروح نص الكون داخل كياني

بسبة اللي مايعرف البهاذيل

خلاني اتبهذل وراح ونساني

ماكنت انا هاقي عن الحب بيميل

والهقوه اللي جات في شخص اناني

بذرت له شعري ووقت المحاصيل

جنيت جمرٍ يتقد في لساني

ياليل روقني وانا اروق ياليل

مادام ربي في سهرك ابتلاني

ولا اقول ان كان جوك غرابيل

اتركني ودوْر على شخص ثاني

سهرت بك حتى لقيت التهاويل

لين السهاد اللي بوجهي غشاني

وشبيت فيك من الدموع القناديل

وشفت الظلام اللي نهيته بداني

خلاص ابنسى اللي يجي بالمحابيل

واهدم غلاه ان كان كبر المباني

/

لو اشتكي من جور صلفات الايام

اللي تشتت من عيوني نظرها

ما أظن توصفها القصايد والاقلام

وانا القوافي عايمٍ في بحرها

اتوه فالواقع وافكر بالاحلام

واجمع بقايا اللي بقى من اثرها

وعيت بي !! مرمي على كل الالام

اللي من همومي لجرحي سفرها

سبايب اللي كاسبه شوق وهيام

راحت وانا في كل يوم انتظرها

راحت وانا ماني تماثيل وحطام

راحت وجرحي لاتناسا ذكرها

راحت وانا للحب فارس ومقدام

ومثلي اذا راحت بقلبه قبرها

ياليت لو جدواي في عض الابهام

وياليت لو يجدي مطالع صورها

مزون دمعي تشبه لضحك الايتام

من صدقها ينبت بصدري مطرها

ماقوى على النومه اذا جيت ابنام

عيني لنجم الصبح تشكي سهرها

والحب لو هو خرافات و اوهام

ماكان بهذلني وحالي دمرها

مالومني منظام منظام منظام

وانا اشهد ان الروح جابت خبرها

/

ابيات كيبورديه من موضوع (نداء لكل شاعر) .. (1)

يشوش راسي ليا من قيل يا مناور

من يوم يومي الين اموت ب افخر به

ه الاسم هذا ب وسط ظلوعي مجاور

قلبٍ ليا منْه انكسر غصب يتجبر به

/

تبت يدين الفراق اللي عليّ طالت	طعونها في ضلوعي ياندى قيّلت
لو ان نفسي على غير الهوا مالت	تبطي دموعي على الخدين ماسيّلت

/

هذي جفوني كراسي للسهر والدموع

عدت سنه ياطلال وحالتي حاله

فيها النفس كنه عن الجوف مقطوع

وان قلت داله صدق / مانيب داله

/

بيديك وحدك .. للمفارق خناجر !!	تربعت صدري طعونك يانسرين
ماكنت احسْب الشوق .. يابنت فاجر !!	إلا بعد طعناتك انتي .. بيومين

/

انا من جيل لا منه

تكلم .. كنه يغرد

يحقق حلمه بمنه

بداره عاش متشرد !!

/

الملتقى ماهو مرورك وروحتك	الملتقى يعني تشارك معانا
هنا بني عمك , وربعك , وعزوتك	وهنا تشاهدنا جميع اصدقانا

/

حضرت كنّي وعد

من شيخ صلى وصام

وفكيت صمتي بعد

زرّيت كل الكلام

/

شاعر واجيكم بالجديد	وقديم شعري / جديدي !!
ولو كان فعلي بالقصيد	لا بارك الله في قصيدي

/

من (نداء لكل شاعر) .. (2)

الليله الليله مطر

يروي مشاعر ضاميه

سحابته ماهي سطر

سحابته متراميه

/

انا اسير الغياب بكل لحظة حضور	وانا احتفال الجروح بكل حزة فرح
حلمي القى مساحه لو على ارض بور	هذا الزمن شد حيله فْيّ .. حتى نجح !!

/

تشملني الغربه بكل النواحي

ان كنت نايم صدق وان كنت صاحي

ابعدت عن ضعف العقول ومرضها

واليوم شقيت السحاب بجناحي

/

كثر المهايط جابني صدق ل.. اقصاي	وانا لزوم اسكت مع اللي يهايط
إن كان مافعلي يكفي عن حكاي	اليا حضرت اضرب بي بعرض حايط

/

ثارت بواريد الملاقى مع اللي

ماينعرف زوله ولا اسمه مع الناس

وانا , وانا بيّن وواضح محلي

بس الذهب بِدل بهالوقت بنحاس

/

ان مارتقينا فكر

وش له نكمل هنا

اما بفكره بكر

ولا بلاش العنا

/

ضلعان لكن بها حصن الشرف يالفطين
كم عابر(ن) مرها فتش مغاراتها

اصحابها من يسار ولا بعد من يمين
قامت تهايط وتفتل في شنباتها

وماهم بمجلاسهم معنا بمتساويين
شف هالنجوم السما تظهر مساراتها

اخر شطر ذا مثل واظنكم عارفين
ماهم بحول النجوم ولا سماواتها

والله عطانا صبر ولغيضنا كاضمين
مانبغي نجاري انفسنا ومشهاتها

ولا نتل اليدين اللي تتل اليدين
ونطير الروس من يكثر تلفاتها

ونطلق عبيد العرب / نستعبد السايدين
ومانعترف في مشالحهم وساداتها

لكننا عابدين بربنا مؤمنين
وصلاتنا مانوخرها عن اوقاتها

ماحن بقوم الردى تباعة الآثمين
اللي على ابليس توجيهة صلاواتها

وياسلامي سلام وعارف يروح وين
للي فعوله محال احد(ن) مجاراتها

اليا جلس مثل ليث وعاشق(ن) له عرين
واليا وقف تبسط الدنيا مساحاتها

باحدى كفوفه كرم ماشيف مثله بعين
والخير مستوطن كفوفه وراحاتها

عبدالكريم المراجل والذرا والعوين
لاهبت العاصفه بكل اتجاهاتها

والله لا اغني بفعله لين ماهي تبين
بقعا علي وتصك بكل حلقاتها