ديوان الشاعر مسلم بن غالي السحيمي

بسم الله الرحمن الرحيم
السلام وعليكم ورحمة الله وبركاته

يشرفني في هذا الملتقى الشامخ في وجود رجال القبيله قبيلة السحمان حفظ الله الجميع
ان اضع في هذا الموقع بعض قصايد من ديوان الخال العزيز الغالي ابو غالب حفظه
الله الشاعر مسلم غالي السحيمي

هذه القصيده عند ماجاء الشاعر مسلم غالي السحيمي دياره اللي ترباء بها هو ووالده رحمة الله عليه وربعه تذكر وجاشة قريحته

رحت اتمشى ودي اوسع البال
	بديارنا اللي قد سكنا زماني
وقامت اعيوني تذرف الدمع همال
	من ماطرالي يالله المستعاني
وقمت اتذكر دنت النجرورجال
	على دلال ابوي في هالمكاني
يومن ابوي يقول قم سو فنجال
	وشكل ابهاره هيل مع زعفراني
والى لفانا ضيف قال هيه ياعيال
	خلو عشاكم من غنمنا السماني
واليوم ربي بدل الحال بالحال
	ديار ماكنه سكنها وكاني
ولاكن فيها صار راحل ونزال
	ولاكن فيها شيدن المباني
ابيوت ماتوجد لها باب واقفال
	بيت الشعر دائم لقاصي وداني
والبدو محلا طبعهم ماله امثال
	دين وكرم واخلاق وايضا حناني
يكرمون الضيف والحق ينقال
	ودخيلهم لايمكن انه يهاني
والجار له مقدار في كل الاحوال
	عند البدو محسوب مثل الاخواني
ماهو طرب والله سويت الامثال
	ولاني ملحنها على العود اغاني
قمت اتذكرمن لهم حب وافعال
	راحم عساهم كلهم للجناني
ياهل الكرم والدين يارجال عقال
	تفهموا بنهاية المودماني
تفني اجيال وبعدها تنشي اجيال
	واللي نشاء لابد مع الوقت فاني
يارب تغفر يوم حزات الهوال
	وانك تذكر بالشهاده لساني

البارحه ماجاني النوم ياحول
	من هالزمان المختلف واعامانا
على دلالي جالسن تقل معزول
	وهذي طبيعه شفتها بقصرانا
والى عزمته قال انا اليوم مشغول
	وجاب العذر اللي يقنع الحانا
والمشكله يارجال ماهو بمعقول
	خرب علينا هالمطاعم انسانا
فطورنا تميز مع جرت الفول
	ودايم من المطعم عشانا وغدانا
يالله عساها نعمة دوم ماتزول
	وتحفظ بلدنا من بلاوي اعدانا

يقول مسلم له بيوتن ثمينه
	حافظ لسانه مايزل بكلامه
ياخذ جزيل من الكلام وسمينه
	يترك رذيل القول ويترك هلامه
ياهل العقول الفاهمه والرزينه
	المحترم يفرض علينا احترامه
قريبنا لايمكن انا نهينه
	نصبر عليه اللي عزيزن مقامه
هذا كلام الصدق يافاهمينه
	واللي يعده ماعليه الملامه
وتراء السحيمي بالوفاء خابرينه
	اهل السلوم الطيبه والكرامه
وقيلن وقال بين الجماعه ياشينه
	ماهي صفتكم يارجال الشهامه
ولاانتم من اللي حقهم رافضينه
	اللي يخلطون الحلال بحرامه
زماننا متغيراتن سنينه
	يارب تسترنا منه بالسلامه
الشاب لاصار اهله تاركينه
	خطرن ويخطف مثل خطف الحمامه
يااهل القلوب الواعيه والفطينه
	وشعاد باقي من قيام القيامه

هذه القصيده رد الشاعر مسلم غالي السحيمي على قصيده للشاعر
سبيل ابن تنيظب السحيمي رحمة الله عليه ولاتحظرني القصيده المرسله

يامرحبا باللي يبي مني اعلام
	عز الله انه من عزيزين قومي
واجداه ياجمع القبيله على الحام
	ولد السحيمي كلبوهم عمومي
هذا كلام الصدق ماني بزوام
	والله يقلع من كلامه بزومي
ماني بكذاب ولااني بنمام
	ولااحب انا هرج القفا باللحومي
واصل القرابه فارضه دين الاسلام
	وهذي طبايع طيبين السلومي
انا الذي ينشوني بعض الالآم
	غديت مثل اللي في بحرن يعومي
مابه مجيب للمصيح ولو قام
	صارت نصايحنا سوات الحلومي
وكلن على رايه موقع بالابهام
	ويقول انا والله مصمل عزومي
ولايسلم المخلوق من جزر وافحام
	ولف القلوب اليوم صار معدومي
وراحو علينا اللي عزيزين واحشام
	عوض وصالح والربوع القرومي
وفرحان مع فرحان ضادين الاخصام
	وقال المثل ماكل طيب يدومي
ويارب عفوك عند صرات الاقلام
	تغفر لنا يارب وانت الرحومي
وصلو عدد من حج وطافو بالاحرام
	على رسول من الخطايا معصومي

يقول مسلم حاف قافه وسواه
	مثل العسل اللي مصفى رحيقي
خط لفاني من عزيزن قريناه
	موضحن فيه الكلام الحقيقي
هذا الجواب اللي بعد ماسمعناه
	وفل شعاع الشمس يبرق بريقي
مافيه غش ولاخداع لقيناه
	واهل النمايم جعلهم للحريقي
وابو معلث يكرم الضيف لاجاه
	ويفرح الى جاه الرفيق وشفيقي
وقولو ترا معذار يوم اتعداه
	ماهي كبارت نفس ولاهو بضيقي
هذا كلام الصدق والصدق محلاه
	ولاشيل حقدن لابن عمي شقيقي
ولااحب انا قرب المنافق ولاادناه
	ولااني من اللي يبغضون الرفيقي
وصلو على اللي عند مولاه له جاه
	نبينا شفيعنا بالمضيقي

ياعيالي أنا قرب العمر سبعين
	والموت ماضنيت عني بعيدي
لاكان أمانه خلصوا عني الدين
	قدم ملك الموت يمسك وريدي
ووصيكم أنا الدين ياعيالي الدين
	تذكروا يومن ثقيل وشديدي
وبالأخره أما بنارن وحريقين
	ولا بجنه لي منكم سعيدي
وتصدقوا من مالكم للفقيرين
	والمال لاطلع زكاته يزيدي
ثم واصلوا شيابكم والقريبين
	وعوراتكم لايشتكن الزهيدي
ومن لانفع ربعه لهم حق عانين
	عافوه مايسواء لونه هريدي
ولامات ماهم قايلين على الزين
	قالوا مهفه هذا فرقاه عيدي
ثم إحذروا والجار لايشتكي الشين
	تجملوا يالين يرحل بعيدي
ويالله ياعلام خافي وما يبين
	يامحيي عظاما رمادن سميدي
تغفر ذنوبي عبد ضعيف مسيكين
	وأنت الذي بيديك عفو العبيدي
إلى دفنوني ثم راحوا مقفين
	وجلست أنا وحدي لحالي فريدي

هذه قصيده للشاعر مسلم غالي السحيمي مدح للأخ سالم رباح السحيمي

مسلم بن غالي عليكم يسلم
	سلامه أحلا من حليب البكاراء
عساك ياسالم من السقم تسلم
	وعساك دائم من أطوال العماراء
ياراعي المدات يالحر الأقطم
	هذا كلام الصدق سر وجهاراء
يابن رباح والله يوم أتكلم
	ماني بعاني مدحه ولاهو قماراء
لاكن محبت قلب والله يعلم
	مشهور طيبك مع رجالن كثاراء
ياكم والله ياسحيمي وياكم
	وعساه في حسناتكم لك ذخاراء

هذه القصيده نظمها الشاعر مسلم غالي السحيمي في قبيلته أهل النخوه قبيلة السحمان من حرب

بديت بسم الله مخزيك شيطان
	ويارب تامرنا على كل خيره
إن كان ماجاء البيت معنا ومليان
	ولاتراء ينقص بنشر الجزيره
هذا كلام الصدق من قلب وإنسان
	وردوه عني يالوجيه السفيره
معلوم بالسحمان ذرفين الإيمان
	فعولهم عند القبائل شهيره
ياهل الكرم والدين ياعيال نجوان
	وإن جات نخوه جوك نارن صعيره
ودخيلهم سليم في عز وأمان
	ماهمهم لو كان قصه كبيره
وقصيرهم والضيف مايجيه نقصان
	والكل منهم ريف على قصيره
وكلن على ماقال في ماضي الأزمان
	قبايلن لها فعولن كثيره

هذه القصيده للخال العزيز الشاعر مسلم غالي السحيمي ينصح بها ابنه الدكتور يوسف مسلم عندما كان مبتعث بالخارج

البارحه يوم الخلايق رقودي
	قمت أتذكر غائب ارجيه محبوب
يالله عسى يوسف علينا يعودي
	ياعايدن يوسف على أبوه يعقوب
وتكفنا من شر حسد الحسودي
	ياعالمن بالغيب والأجل مكتوب
تكفا يايوسف ياعريب الجدودي
	تراك من ربعن عزيزين منجوب
من طاع نفسه للمهالك تقودي
	ومن قادته نفسه من العقل مسلوب
هذا كلامن مايبيله شهودي
	لله يامنا نقصت العقل عذروب
وتراك لك مقدار ماله حدودي
	وتراك عند أبوك والربع محسوب
وباغيك لا قالوا تخرج سعودي
	قالوا سحيمي ذاك دكتور موهوب
وباغيك تمشي بالعلا والسنودي
	بالعلم مع دينك هذا منك مطلوب
والعلم كلن باغين منه زودي
	حتى العذاراء لابساتن منه ثوب
ومالي ومال الصادره والورودي
	أبطلب الله يغفر الذنب وأتوب
والخوف والله لادخلت اللحودي
	يارب تغفر ماعليه من ذنوب
وصلوا عدد مابان مزن الرعودي
	على نبين جاء بالإسلام مندوب