نسبه وقصصه ذياب بن غانم من الزغبا من بني هلال

نسبه وقصصه :

ذياب بن غانم من الزغابا من بني هلال .

(1)

أبوه غانم ويلقب ب(النواق) لأنه رجال وعنده مال وحلال والله رازقه ولكنه أبطى ماتزوج وهو مع عيال عمه بني هلال لأنه رجال وعنده مال وحلال والله رازقه ولكنه أبطى ماتزوج وهو مع عيال عمه بني هلال ذا قطنوا على الماءوعزبت البل واجنبوا معها الفرسان ياخذون لهم ذبيحه من أباعر النواق وإذا وردوا أباعر النواق أخر من تسقى من البير وتشرب منه يعني الرجال كان مظلوم ومأخوذ حقه بسبب ماقلت مسبقاً أنه أعزب وشايب وماعنده عيال وفي يوم من الأيام مرت عجوز من بني هلال إلا هي تشوف غانم النواق في مراح البل جالس ويبكي على حاله ويشتكي ضعفه وقالت له :

إن كنت من ضيم الرجال بتجزعي .................. عليك بأوراك الصبايا الرجعي


ناداها غانم وقال لها : دبريني وأنا رجال من يدك هذي ليدك هذي وابد ماعصى شورك .
قالت العجوز : هذا فلان وسمته بإسمه عنده بنته عزبه (مطلقه) اخطبها عسى الله يجيب منها ولد يشب نارك ويحييها لأن قبل الحياه صعبه واللي ماعنده عيال يروح عزه لو كان من كان .
وغانم يقول الرجال مهوب مزوجني .أشارت عليه العجوز وقالت له : أجمع كبار بني هلال خلهم يصيرون جاهه ويبدون على الرجال ويزوجك .

ويروح غانم النواق ويجمع كبار بني هلال ويبدي بهم على أبو البنت ويقال أنهم جلسوا عنده من طلعة الشمس إلى المغيب وهم يحاولون فالرجال يزوج غانم بنته ويالله وافق بالشفاعات والوجاهات .

تزوج غانم بنت بن سرحان وشيب وجاب منها ولد وسماه ذياب ويقولون أنه ولدهم الوحيد وفيه ناس يقولون أن له ولد إسمه زيدان بن غانم .
عاد وصل عمر ذياب بن غانم لأربع طعش سنه وكانوا في وقت الربيع والعرب مربعين وشرى غانم لولده فرس طيبه من مربط الدهما( وهالمربط معروف أنه لقبيلة هوازن وخاصةً فخذ عامر بن صعصعه اللي ينحدر منها بعض القبايل مثل عتيبه وسبيع ) يبغاه يعسفها إلا ذياب طريقته ماعجبت غانم ولاكأنه طلع مطلاع الرجال الفريس اللي ينشد بهم الظهر طلع ابن حلال خبيل وبارد .
وجاء وقت القيض (المقطان يكون في هالوقت عند الباديه ) وأم ذياب تعد العده سوت المحص (الرشا) من جلد البل والدلو جلد ناقه لقيه (3 سنين ) وامرحوا العرب ,ويوم قاموا واصبحوا الصبح وإلاهم يبون ياردون الما وامه وابوه عايفين طريقته وبروده وقعدوا قدام البيت يتلاومون .
أمه تقول :
لاوبني ياهلامه مقصر ................. ماعاد لك فالطايلات نصيب

وغانم يقول :

عشرين من بني هلال نقيتهم ............. وقعدت بهم عند ابوك خطيب
من طلعة الشمس وحنا نطلبه ............ ولاعطانا لين جات تغيب
وزرعت لي زرعٍ دقاق إرقابه .......... وارجي عسى زرعٍ زرعت يطيب

وإلا ذياب يسمعهم وقال أصبحوا أصبحوا :

وليا أصبح المصباح وانا بن غانم ............. يبدي فرجٍ مابدا به ضيق

وذياب يسري على أباعرهم في المراح وأطلقها ويصيح على عبيد أبوه وكلنا عبيد لله يقول وردوها الماء

والعبيد تورد البل على البير وذياب معه دلوه ورشاه وهو يرد على الماء قبل بني هلال وهو كذا يكسر الشيء والعاده اللي تعودوا عليه بني هلال وجوا بني هلال واستغربوا من هالشي ويلقون ذياب ويجادلونه ويلجونه وشهوله تورد البل قدامنا ومن خلاك تورد وذياب ساكت ومايكلمهم ولايرد عليهم وهو يهوبل (الهوباله غناء لأبيات القصيد بطريقه جميله ) :

اردي ...كبي المردي ...... وجهه يردي ................ اردي .. كبي المردي .... وجهه يردي

ويجيه خاله حسن بن سرحان أمير بني هلال وإلا ذياب مهوب مهتم لأحد وأباعره ترد الما ويقرب منه خاله ويبي ياخذ منه الرشات إلا هو مهوب زي ذياب فالقوه وماقدر ياخذ منه الرشا ويلتفت حسن لبني هلال ويقول : يابني هلال خلوا اباعر ذياب تشرب والله الظاهر ان تاليكم عنده .

وبني هلال يتباعدون عنه لين شربت أباعر ذياب وصدرت البل وهو معها على الدهما يلوح ويقود معها .
ومن عادت الجنب من بني هلال مثل ماذكرت أنهم من عادتهم أخذ الذبيحه من أباعر النواق .
أرسلوا لهم صانع من صناع بني هلال يجيب الذبيحه لأنهم أستوحشوا من فعلة ذياب بن غانم فيهم ماقدروا يروحون وعشان كذا أرسلوا الصانع وعطوه حصان والصانع ركب حصانه وراح يم أباعر النواق وإلا ذياب عند البل على الدهما وقال الصانع : ياذياب الجنب يبون ذبيحتهم من البل .
وذياب ساكت مايكلمه وراح الصانع ويهمز له لقيه يبي يقودها للجنب ويوم استاق اللقيه إلا ذياب معه على الدهما ويطير راسه بالسيف وياخذ راسه ويربطه في عرف الحصان ويرسل الحصان للجنب ويوم شافوها وإلا خافوا من فعلة ذياب ومن بعدها ظهر ذياب وطلع مطلاع الرجال .

(2)

كان ذياب حاصل بينه وبين خواله السراحين أمراء بني هلال زعل وحساسيه والنفوس مهيب صافيه والسراحين نسووه وخلوه بدون سلاح وأعزل ومايروح ويجي إلا تحت نظرهم . إلا فيه وحده مزيونه وعزبه من قبيله ثانيه تسمع بصيت ذياب بن غانم ولاشافته وودها تشوفه لدرجة أناه رصدت جمالها الثلاثه للي يوريها ذياب بن غانم وكانت تصيح بين الرجال من يوريني ذياب وله جمالي الثلاثه وطلع لها واحد وقال أنا أوريك ذياب بن غانم وعطته الجمال الثلاث وراح الرجال .والبنت تزينت وراحت لذياب وتمشي عشان تلفت إنتباهه إلا يوم شافته إنصدمت فيه وطلع غير اللي توقعته طلع رجال شايب قصير وكان متحيزم ويطلى له ناقه صايبها جرب قالت :

لاواجمالي ياذياب بن غانم ................. ماعاد لي يوم الرحيل جمال
لانته بزينٍ تعشق البيض زينك ............ ولامن ذرا قومٍ ولا لك مال

قال ذياب :

حنا ليا شبنا غدينا عوارف ............................ واخذت من شبانكن غزال
وانتن ليا شبتن غديتن سوارف ....................... ولافالكن للطيبين بفال

راحت من عنده ولاجاز لها ذياب (سبحان الله تبي المظاهر بس ماهنا مظاهر )


(3)

عقب مده من هالسالفه مر ذياب بن غانم صانع بني هلال في بيته .
قال ذياب بن غانم للصانع : أنت تعرف أن خوالي جردوني من سلاحي وماعندي اللي يفكني من الحنشل ةأنا جايك أبيك تصلح لي دبسا (عجرا) من حديد ولاتعلم احد وان صلحتها والله لأجازيك بشي ماقط ذقته في حياتك .

طمع الصانع ونسى وصاة عمانه وقال:خذ يومين وارجع لي . وراح صلح له دبسا ومره ذياب وقال بختبرها ويضرب بالدبسا في زبرة تراب عند الصانع والا الدبسا منكسره قال ذياب هذي ماتصلح سو لي وحده اطيب
قال الصانع: خذ يومين وتعال .
جا ذياب بعد يومين إلا الصانع مسوي له دبسا واختبرها ذياب وإلا الدبسا قويه .
هنا الصانع قال : عطني شرطي (أجري) .
قال ذياب : أبشر . وذياب راح ورا الصانع ويضربه بالدبسا على راسه والصانع مات وقال ذياب : هاذق اللي ماقط ذقته في حياتك >

ويروح ذياب لخاله حسن ويقول له : ياخالي حسن وهو يبكي .
قال له خاله :وش فيك ياذياب .
قال ذياب : خالي أبو زيد (الهلالي) زعلان علي ويتهددني يبغا يذبحني وابغاك تروح تتوسط لي عنده .

قال حسن: يعقب أبا التركات والفعلات مايخسى إلا هو .
مشى حسن مع ذياب ويوم أنتصفوا الطريق وذياب يجي حسن من ورى ويضربه إلاهو ميت .
وراح ذياب لأبو زيد ويناديه :ياخالي أبو زيد خالي حسن زعلان علي ويتوعدني وماقدرت ارقد الليل وابغاك تتوسطلي عنده كود يسامحني .
راح معه أبو زيد ويوم أقبلوا على مكان حسن اللي ذبحه فيه ذياب ويجي ذياب من ورى أبو زيد ويضربه بالدبسا

وقال أبو زيد :
لاواسنوني من جماتي تناصلت ............ لاوادماغي تقل لقمة زاد

ويطيح إلاهو ميت .

(4)


وحكم ذياب تونس الخضراء وعثا في السراحين قتل وتعذيب كل ولد صغير من السراحين يذبحه ويقومون حريم السراحين ويدسون العيال الصغار بالبنات وهم حوالي الثلاثين ويعلمون العيال الفروسيه وركوب الخيل في الليل ويدسونهم في النهار وكبروا العيال وجاء وقت الأخذ بالثار من ذياب إلا ذياب شايب معاد فيه حيل يقوم وجوه على الخيل وقالوا ربع ذياب : جتنا خيل أنكريه ..!
قال ذياب أرفعوا جفوني عن عيوني خلوني أشوف هالخيل اللي جتنا ويوم عصبوا راسه عشان يشوفهم ويقول ذياب :

خيلٍ عليها من السراحين ركبه ............. جوانا حماقا يبون ذبح ذياب


ووصلوا لذياب وكل مانزل عليه واحد يبغا يذبح ذياب قال : عود مافي فود ارفع جفوني عن عيوني .
رفعها عنه وخلاه عايفه مايبغا يذبحه الشايب إلا فيه واحد من السراحين ولد جاريه وصل لذياب ونزل عليه من ظهر الفرس وقال له ذياب : عود مافي فود ارفع جفوني عن عيوني . قال له ولد الجاريه : عود وفي بطنك جمل (يعني أن عندك ثار لنا ونبغا ناخذه ) ويضرب ذياب ويذبحه .

م/ن