| قالوا : تغزل قلت: في عزة الدين |
العز كله في تعاليم ديني |
| قانونه القرآن خير القوانين |
حكم ومواعظ تعجب السامعيني |
| دين(ن) حنيف وقاهر(ن) للشياطين |
شامخ ولاتثر عليه السنيني |
| ترسم لنا الوحده صفوف المصلين |
وتبصم لنا الطاعه سجود الجبيني |
| صوت الحجيج يحث للطف واللين |
يدعون رب البيت متذلليني |
| تجمعوا من كل فج(ن) ملبين |
مجردين اللبس وموحديني |
| يالله ياخالق بنآدم من الطين |
تغفر ذنوب عبادك التائبيني |
| يانفس توبي لاتقولين بعدين |
ترى الامل هو العدو المبيني |
| مالك ومال اللي عن الحق غاوين |
ساروا على خطة بليس اللعيني |
| واوصيك يانفسي على غضاية العين |
عن كل ماحرم على شوف عيني |
| عليك بالتقوى ترى فالها زين |
وصلي وصومي قبل لاتدفنيني |
| تراك في لحظه يانفسي تموتين |
ويوم الحساب ال ربكي تبعثيني |
| يسألك رب الناس وانتي تجيبين |
في يومها يانفس ماتجهليني |
| هاذي نصيحه واعتبرها من الدين |
لعلكي من بعدها تنصحيني |
| وانصح جميع الناس واخص الادنين |
ترى النصيحه تنفع المؤمنيني |
| انصحك ياخويه نصيحة محبين |
ماقلتها من شان مدح(ن) يجيني |
| صل الصلاه وربك الخالق يعين |
وخلك رضي في طاعة الوالديني |
| واحرص على التقوى وحب المساكين |
ترى جموع إبليس متكبريني |
| واعرف ترى للجار ياخوي حقين |
حق الجوار وحق للمسلميني |
| وارجوك لاتدخل بيوت الرديين |
ترى الردي يرديك لو بعد حيني |
| سير على اصحاب العقول الفهيمين |
قدام لاتشمت بك الشامتيني |
| وإن طعتني لاتلتفت للمقفين |
مادام به ناس(ن) لكم مقبليني |
| خلك مع المقبل ترى الخافي إيبين |
الشمس تطلع والخوافي تبيني |
| تلقى عدو من الربوع القريبين |
وانته منول تحسب إنه عويني |
| وتلقى صديق من الربوع البعيدين |
يحزن لاشافك في حياتك حزيني |
| وإياك والدنيا تراها بوجهين |
دنياك ماتسوى لها ركعتيني |
| ولاينشغل بالك بجمع الملايين |
ترى مصير المال للوارثيني |
| اشوف لي ناس(ن) عن الموت لاهين |
والموت مايغفل عن الغافليني |
| ناس(ن) مجالسهم على الساير الشين |
وعلى إغتياب التاس متعوديني |
| غرتهم الدنيا وشامت لهم لين |
صاروا بها بالحيييل متعلقيني |
| تم وصل الله على داعي الدين |
وصلوا على المبعوث للعالميني |
18-04-2012, 06:29 AM
،،، (( عزة الدين )) ،،،
المواضيع المتشابهه
العرض الشجري