ديوان الشاعر موسى مناور السحيمي

هذه القصيدة وصلت من غازي بن غويزي بن نمائي الجابري وهي تعبر عن نفسها

اتعبت عيني بالسهر ماني مريح	والضيق في نفسي عسى ضيقي يزول
مشغول فكري كل قلبي مجاريح	معقول شي وشي ماهو بمعقول
الدمع من عيني على خدي يسيح	اليوم مثل الحول لاحول لاحول
الوقت رشحني للأوجاع ترشيح	مايلومني رجال في كل مايقول
العلم واضح مايبي العلم توضيح	ماهو على كل الرياجيل مرسول
سلام مني للرجال الطحاطيح	اللي على كلامها القول مفعول
منهم ابو نواف لاقام مايطيح	ياجعل من جابه على النار مايحول
وقت الشدايد كان ولا الممازيح	موسى مناور للوفا دائم ينول
ماتهزه الايام ماتهزه الريح	مثل الجبل ثابت محله على طول
ماهو من اللي في مدح نفسه يبيح	لأن مدح النفس ماهو بمقبول
يشتاق له مجلس على هبت الريح	يوما يغيب عنه محسوب بالحول
المفلح يحب الوجيه المفاليح	من ماضي الدنيا على العرض والطول
اسمع كلامي يازبون المفاطيح	يقول غازي والبشر كلها تقول
الباب مايفتح بدون المفاتيح	والباب من دون المفاتيح مقفول
تكفى يابو نواف جيب التصاريح	ماقدر اقول ان نايف اخوي مشلول
من عقب ماهو يستطيع المراويح	اليوم مايقدر عسى الحمل محمول
كتبت ماكنه على قافية ايح	وختام ماقوله عسى الامر محلول
واعداد من صلى صلاة التراويح	صلى الله وسلم على خير مرسول

الحمد لله رب العالمين والصلاة والسلام على اشرف الأنبياء والمرسلين نبينا محمد ،هذه القصيدة رد على قصيدة أخي وابن أخي وحبيبي /الشيخ غويزي بن غازي بن نمائي الأخ غازي بن غويزي الجابري بعد ما وصلتني قصيدته الجزلة التي أثرت عليه كثيرا فكان هذا الرد الذي ارجوا أن يكون رد وافي والله ولي التوفيق والقادر عليه سبحانه وتعالى .

يا رب لك حمدي وشكري وتسبيح	يا مهلك كسرى وقيصر وأبا الهول
لنار والجنة بيدك المفاتيح	وانت العظيم اللي منزه على طول
يا خالق الجنة للأحزان تفريح	للي بغفرانك مكرم ومشمول
والنار خالقها لهأيب وتجريح	لطاغي الظالم سلا سيل وغلول
وحي الجواب وكلبوها تساميح	والله يقدرني على الفعل والقول
والله يكافيني عيون المشافيح	سود الوجيه اللي بها الحكي معسول
والبارحه سهران تحت المصابيح	وافكار راسي تشتغل تقل مهبول
هاذي ادونها وها ذيك تسريح	وتصول في صدري مع الدم وتجول
مبنية على عزاز وتسليح	مافيه مسروقه ولا فيه منقول
اقطف ثمرها مثل قطف التفافيح	وافرشلها صدري معاميل وزلول
ومعطره بالورد والمسك والشيح	ومن الذهب مكتوبة والورق لول
أبيات شعر مبعدات المساريح	تلفي على رجل مقدر ومجلول
انتم يا بن نمائي ربعا زحازيح	اهل المواقف بين واضح ومجهول
مواقف ماهي مواقيف سرسيح	اللي على النمات ناشي ومجبول
مواقف أحلى من حليب المصاليح	وأحلى من الرمان لا صار مشخول
يا غازي بيوتك سهاما جواريح	فجت نحر قلب من الهم معلول
والله من قلب سوات المراجيح	تلعبه الاحزان والحظ مقلول
قلب همومه ساطيات لواميح	متربعه عيت تغادر ولا تزول
وانا رجل واكتم علومي ولا بيح	وصدري من الاسرار مملي ومشمول
وشعرك علي يفتح الحزن تفتيح	وانا البعير اللي مقيد ومعقول
وضعي يشابه وضع بعض الفلاليح	تزرع ولا تجني من الزرع محصول
والله ما غير أصلح الوضع تصليح	وحسابنا في البنك سالب ومقفول
لكن بفزع للوجيه المفاليح	اصحابي اللي تجعل الحبل مفلول
وأروح لسحمان واقوم واصيح	واستفزع أهل العلم والرأي والقول
ربعي حزامي عندهم هبت الريح	وراع الحموه عنده القول مفتول
ومن كان ربعه مثل ربعي فلا يطيح	ربعي سنادي كلها جمال وزحول
سحمان والله يبعدون الملاويح	نقلط على الجزلات والخصم مذلول
وبحول ربي يجهزن التصاريح	ونجيب تصريح السفارة ومقبول
ونايف عسى دربه زهور مفاتيح	ويمشي بعد ما كان جالس ومشلول
وصلاة ربي عد ما هبت الريح	على الحبيب المصطفى خير مرسول

.لكم كل الود والتقدير

[/poem]