ديوان الشاعر عبدالله بركات عوض السحيمي

اتشرف ان اضع ديوان ابن العم الشاعر عبدالله بن بركات بن عوض السحيمي
وهو شاعر محاوره وشاعر نظم وله مشاركات عديده

الأوله ياخالق الإنس والجان	تحمي حصون المملكه وتحمانا
الثانيه جعل الوطن بامن وأمان	ويالله على عز الوطن اتهدانا
والثالثه مني على طول الأزمان	هلا بعبدالله ملكنا ذرانا
شعبك على اعصابه وبشوفتك شفقان	متشفقين للشوفتك هي شفانا
ياسيفنا القطاع ياعالي الشان	عودتك خير وقت الأشعار حانا
سلام عد الناس في كل الأوطان	وعد النجوم البارزه في سمانا
تنصى لوجه الخير والطيب سلطان	اللي مسح دمع اليتيم بحنانا
ياسيدي حبك ترى فاق الأثمان	في قلب شعبك ياحفيظ الأمانا
سلام يانايف عدد وبل الأمزان	ياقاهر العدوان علمك اسمانا
أنت وزير الداخليه ولك شان	ولو مانحبك مانبين رضانا
سلام يامحمد ولافيه نقصان	معطرن بالعود والزعفرانا
انت الوطن وأصل الوطن يابليهان	من عهد ابوفيصل إلى منتهانا
سلامتك يامير والشعب زعلان	بما حصلك من فعايل عدانا
واللي نواك بشر يبشر بخذلان	ماهمنا مادام ربي معانا
مانسى سمي صقر الجزيره كحيلان	اميرنا اللي بالفعل ماخفانا
عبدالعزيز الحر في كل الاحيان	مانجهله وقت القسى والليانا
امير طيبه بشوفته خاطري زان	ونور المدينه زاد من يوم جانا
حنا حماة شعار نخله وسيفان	وسمعن وطاعه يارفيع المكانا
سلام لال سعود ذربين الأيمان	اللي ذكر واللي نساها اللسانا
حنا قبايل حرب بالحرب شجعان	اللي فعايلنا تجمل لحانا
نقابل العدوان في كل ميدان	ونعمي عيون اللي نوى في عمانا
من دون قاصر بالقبايل بقيفان	كل القبايل كفو والعمر فانا
البيت مايبنى على غير سيسان	وحنا لولاة الأمر نعلن ولانا
قد قالها لافي وأنا اقولها الان	صعبه يثور سلاحنا في خبانا
الحين انا بقولها بقلب ولسان	الله يعز المملكه ويحمانا

قصيده بمناسبة زاواج شاكر ورمزي ابناء مهل بن خلف السحيمي

الفكر شاش وعادتي كل ماششت	ماجيبها اقصاد دايم وهي كاش
وفي ماقفي وفي ماقف الربع مادشت	يالله تجملني من الجاش للجاش
الشعر إن ماجا من القلب لاكشت	وش عاد ابيبه جعله بذكر ماعاش
يامرحبا عداد من يلبس البشت	وعداد نجمن بألسما ينعش انعاش
لضيوفنا والعقل لاناشني نشت	اقدم الترحيب ابيض من الشاش
عن واجبي ياهل المواجيب ماانحشت	يومن غيري لجل رغباته انحاش
أن كان غيري طايش الفكر ماطشت	قال المثل من ناش الأخيار يناش
مبروك يارمزي عسى بالفرح عشت	ولايهون شاكر والشعر يدهش ادهاش
بالحفله اللي اشهد إني بها اعتشت	يومن غيري في قصايده يعتاش
يكفيني إني عند الأقراب ماحشت	غير الوفى والطيب وللكيف شياش

تسمعوا قصيدتي ياهل الأذواق	قصيدة(ن) تصعب على من طرقها
عنوانها الأخلاق والعلم ينساق	حبيت ابينها لكم في طرقها
الكلمه الزينه لها صرت مشتاق	شوق العشيق لعشقته لافرقها
احرص على الطيب وبالطيب سباق	الله خلق خلقه ولكن فرقها
إما على الفطره تجي بامر خلاق	والا بلاش الأدمي يخترقها
الطيبه من هو توفقبها ضاق	صدره من الرديان يومه غرقها
في طيبته والناس بايق وبواق	والا الردي تتعبه لامن زرقها
ومن الكرم كم يبست ارياق وارياق	وراع الكرم في عادته ماحرقها
قد قال ابن جدلان في بيض الأوراق	واعيد ماقاله وقولوا سرقها
الأدمي لولا المكارم والأخلاق	كالحنظله من ساسها لا ورقها

مالي ومال اهل العلوم الغامضه	اللي سوالفهم تغث المسلمين
وانا سلاحي في يديني قابضه	تارك يسار الدرب وامشي باليمين
قدم لي الشينه شبيه الرابضه	من بعد ماقدمت له شي(ن) ثمين
معروف فرق الحلوه من الحامضه	عرفت قدري عندهم في ساعتين
يابو علومن كلها متناقضه	الناقصه ماهي لنا يالجاهلين
طبعه يذكرني بطبع الرافضه	لا يحسبون إن العباد مغفلين
اخر كلامي ايالقلوب النابضه	المرجله في هالزمن ضلع متين

وارث الطيب صيته عند الأجواد شاع	مات لكن ذكره باقي(ن) في سراه
قدم الطيبه يوم الردي ماستطاع	ومن يسوي سواته عند ربي جزاه
أشهد إني ماشفته مير ذكره يذاع	في لسان العرب يوم حان موجز نباه
انبهرت بصفاته وأشهد إنه شجاع	مايذكرني إلا بخالي بالأتجاه
بادي اللي يحب الخير والاجتماع	دايم(ن) فزعته لله وهذا غناه
لافزع مايدور من وراها انتفاع	من بداية حياته لين ساب الحياه
خالي اللي اقتدابه اشهد إنه ماضاع	كل ماجاله المضيوم يلقى دواه
يشهدون الرجال اللي تعرف السناع	الصقر من نكر فعله بناره شواه
جعلهم في جنانك يالولي المطاع	دعوة(ن) من ضميري جعلها لهم ذراه
اختصرت القوافي بالدروب الوساع	النهايه عسى الله يرحم اهل النقاه

يابدر جيتك ناوي اسرد لك علوم	لاتحسبنها علوم من غير فودي
كرامتي افضل ولا اعيش مهموم	بين الرجال اللي تغث الكبودي
اصبحت ضحكه في يدي كل مسموم	العلم واضح مايبيله شهودي
لانيب لاحاكم ولانيب محكوم	بعيش وحداني يالين اللحودي
ومن الخطا الأدمي غير معصوم	هذا قراري بين نقص(ن) وزودي
الناقصه مارضى بها وانت محشوم	وسط الخلا الخالي افضل قعودي
من زود همي يابدر كاره النوم	بفراقهم يمكن إني اطلع سنودي
برتاح من هم(ن) له اسنين مكتوم	في وسط صدري ياعريب الجدودي
لهم سلام الله ولانيب ملزوم	على مقابلهم عسى مايعودي
تحرم علي مقابلتهم من اليوم	مادام يوجد ناس تكره وجودي

ياشلة التأليف خلوكم ركود	خلاص مكشوفين ماعاد يحتاج
مهنتكم الترويج بالهرج والزود	وتصدقون الكذب من فم هراج
هل تعلمون؟ الحرب نارن وبارود	وهل تعلمون؟ إنكم على غير منهاج
إن كان ماتدرون بعطيكم الفود	إنتم باخر صف مافيكم إنتاج
واللي زرع زرعن على غير محصود	ماينفعه زرعه لياوصله عجاج
وفي هالزمن زي بعضها البيض والسود	ومافيه بحر إلا تصافقه الأمواج
ما ينقد العربان رجال منقود	ولاني على حق المخاليق دواج
الناس واجد بين حاسد ومحسود	واطلب من الله الولي سرع الإفراج
عين الحسود احط فيها مية عود	مافي باب إلا وله الف مخراج
واللي دخل ولاخرج رجل مضهود	تبقى حياته كلها إحراج في إحراج
اسال مجرب جرب الشاب والعود	ماهوب دكتور(ن) يسكتك بعلاج
هذا كلام الحق والعمر محدود	يقولها اللي مالتفت لأهل الأزعاج
إن كان عادت للشعر ياهل الجود	أنا لها فنن وتصوير وإخراج