يارجم أنا بينـي وبينـك علاقـه

يارجم أنا بينـي وبينـك علاقـه=علاقـة ً بينـي وبينـك قديمـه
أنت الاشم اللي حفظت الصداقـه=ماغيرك حر الزمـان ونسيمـه
مبداك يارجم العنا لـي عشاقـه=له في صميم القلب يارجم قيمـه
لو كأن مالي في حجا الرجم فاقه=لكن قلبي همه أحـرق صميمـه
رجمٍ سفر قبلي له سنيـن واقـه=وغنا بقافٍ يشبـه الـدر ريمـه
قـافٍ تناقلـه الرجـال برواقـه=أهل المواقف والقلـوب الفهيمـه
وقال السديري فيه والقاف ساقـه=نهار شاف الضلع كاسيه غيمـه
ثارت أهجوس الفكر والرجم شاقه=وغنا وذم أهل النفـوس الذميمـه
وأنا على نهجي وعندي طلاقـه=شاعر ولي مبدا ورأي وعزيمـه
شرهة قدم رجلي على عظم ساقه=مع الرجال أهل السلوم العظيمـه
شعري يجمل ماخذيتـه أسراقـه=أذكر به أمجاد الرجال الحكيمـه
حقاً على أذكـر أمجـاد الرفاقـه=أهل الشجاعه والنوايـا السليمـه
مافي هل الطالات قطـاع ساقـه=أمجادهم مثـل الجبـال المقيمـه
ربعاً ماتاتـي بالعلـوم الدقاقـه=أهل المواقـف كاسبيـن الغنيـه
سموا البقوم اللي ماوخذوا إعلاقـه=يوم الحرايب والامـور الوخيمـه
ألهم على لطم المعاديـن طاقـه=مايعرفون الغطرسـه والنميمـه
حرابهم دائـم مايصفـي مذاقـه=أما قتـل والارجـع بالهزيمـه
ودقلاتهم بحراً يهـول أصطفاقـه=أليا التطم ثم وصل حـده وتيمـه
ماحدٍ من هل العرف والطيب هاقه=يهول من يفهم ويسمـع وشيمـه
ربعي كعام اللي خذتـه الحماقـه=ومنصى وملفى للرجال الحشيمـه
وعون الذي كتف ووخـذاً نياقـه=وخذاً بحد السيف غبـن وظليمـه
ودخيلنا يامن وتصفـي أخلاقـه=نحميه لو جار الدهر من غريمـه
وقصيرنا منـا ونكـره أفراقـه=يظيمنا اللي في زمانـه يظيمـه
وخوينا يمشـي بعـز ورشاقـه=عن الغلط يكرم ونلطم خصيمـه
وكل القبائل نعم طيـب ولباقـه=قبائـلٍ وإلهـا فعـولٍ جسيمـه
واليوم في عهـدٍ وسيـعٍ نطاقـه=الله على الشعب السعودي يديمـه
عهد الملوك أهل الوفاء والحذاقـه=أهل الشجاعه واليديـن الكريمـه


مهل الرياحي