ديوان الشاعر محمد بن مشعان

يامحمّد ليتك تشوف ام جودي	الهنوف اللي هذا طول رقبتها
العيون وساع والحجان سودي	من طبيعتها كذا ماغيرتها
مالها حليا مع الشعب السعودي	مدري القدره علي كيف اعرضتها
ياوجودي يوم ركبت ياوجودي	مال جنب اللكزس اللي من جهتها
امتعديتن بالاوصاف الحدودي	من مناصير ابو ظبي وباديتها

الــــرد؟

يالعتيبي مرحبا وارقا سنودي	والمعاني لاتعدى مرحلتها
كيف قلبك هزته ذيك العنودي	وانت توك ماتمريت طخمتها
غرك الحاجب وغرتك الخدودي	والشحوم الزايده ماجملتها
وزنها فوق الميه100مثل القعودي	والدليل اللكزس اللي ميلتها
مير دوّر رافعه واحسا النقودي	والديانه زين والله لاشالتها
ولا دور لك بلنقوا مع عامودي	واطلب الرحمن يعطيك بركتها

[/poem]

عند الكريم اللي يروم المعالي	تركي ولد بادي كريم الخصالي
يامرحبا ترحيب غالي بغالي	يصرف لكم بالطيب صرف الريالي
ترحيبة ٍ تضفي على كل الاخيار	مثل السحاب اللي غشانا بالامطار
اقولها حشمه1وشيمه2 ومقدار3	لسبالكم يامكرمين السبالي
في بيت منهو يكرم الجار والضيف	اللي يخسَر ولايحسب التكاليف
راع الكرم والجود ماهي سواليف	تنشرله البيضاء بروس الطوالي
ابو طلال ان عوّد العلم يمه	ينقل حمول شعيل ويزيد همَه
مثل القليب اللي يروّي مجمه	يسقيك من نبع القراح الزلالي
ولاصاروا العدوان مثل العصاابه	ياسعد منهو حط تركي عصَابه
عنّز عليه ولاتجيك المهابه	سعد ليا ضامتك سود الليالي
(من ربعي السحمان بيض النوايا)	(اهل الحميّا مفحمين السرايا)
(ربعي ولاجات اللوازم عصايا)	اسند عليهم عزوتي راس مالي)
نمشي على ساق الشيوخ المطانيخ	اللي لهم بالمجد ماضي وتاريخ
شيوخنا مثل الجبال الشواميخ	(عيال راشد محتمين التوالي)
واولاد مسفر مبعدين الهقاوي	اهل الوفاء واهل النقا والعزاوي
براوشه؟ماهي مجرد حكاوي	افعالنا تشهد لنا اول وتالي
انا احمد الله ماتبعنا هفيّه	وحبالنا عند الموارد قويّه
سم ٍ على كبد المعادي واذيّه	ستر القرايب والصديق الموالي
وانتم كمانا بالليال الشديده	تزمون مثل طويق فوق البديده
يانعم والله بالعقول الرشيده	اللي تحل معقدات الحبالي
وختامها يامرحبا بالزحازيح	والله يحيكم على هبّة الريح
وعلى الدلال الكايفه والمفاطيح	(عند الكريم اللي يروم المعالي)

هذه القصيدة قلتها في حفل االباحثين والنسابه بالمدينه المنورة وهي تعبر عن محتواها

يامرحبا ترحيبة ٍ مالها امثال	تسوى الكنوز الغاليه من غلاها
ترحيبة ٍ تخضع لها كل الامثال	وتطيعها كل الحروف وتباها
يامرحبا والفال قافينه اعقال	حسب الاصول اللي ربينا علاها
ترحيبة ٍ من قلب ولسان بالحال	تنصا الرجال اللي تبارك خطاها
الباحثين بشوفهم يطرب البال	شمس النهار اللي تشعّ بسناها
اللي حكوا لجيال عن ماضي اجيال	وايام مرة واالزمان قد طواها
اهل العقول النيّره مابها جدال	مثل النجوم البازغه في سماها
عادوا لنا الماضي وتاريخ مازال	رغم الظروف اللي تزايد بلاها
مافات صندوق ٍ مقفل باالاقفال	ورموز يصعب حلّها من غثاها
مثل البحر في غبته كل الاهوال	والجوهره في قاعته! من لقاها
جوها الرجال اللي يشيلون الاثقال	مثل الجمال اللي بعيداً مداها
وحلوا رموز المشكله رغم الاشغال	وكلاً تظلل شجرته واحتماها
يوم الحضاره غيرت بعض الاشكال	والطيّبه ماعزها من شراها
كلن على كيفه يدورله اظلال	وان جاته الحسنه كلاها ونساها
ايام تاخذنا على كل موال	ولاعاد ندري ياعرب وش وراها
وايام تصفقنا من الجال للجال	غبراء وحنا نطّحن في رحاها
ياهل الحسبّ ضاع النّسب ظلم وهمال	وسلومنا ذيب الزمان اغتذاها
تلقى الولد ماغير يمشي ويختال	وليا ساألته مادرى من طحاها
لا علم لا تقوى ولا هيبة رجال	يعني بصراحه! صار يمشي بلاها
ارجوا من الله لايضيعون الاشبال	وسلومنا تبقى ونمسك عصاها
حنّا بدو ولا حضر مابها خلال	الدين واحد والبلاد نحماها
امبايعين اللي لهم بيض الافعال	وارواحنا ملك البلاد وفداها
لكن بلانا من هل القيل والقال	والعنصريه مالقينا دواها
وابليس دوّار المشاكل وجوال	والنفس لامالت بيلعن ثواها
قد حذر الله منه والناس جهّال	بعض العرب عينه يزودعماها
والفتنه امن ابليس وقرونها طوال	بنت ابو مرّه نعنبو من رباها
للمشكله حل ٍ وللغز حلّال	وانتم تراكم حلها يالنباها
لاقلامكم قدرا ً وهيبه ومثقال	وعقولكم بالعلم ربي حباها
اهل الفكر دايم ترى مظرب امثال	وابحاثهم ماينقّص مستواها
ماهم حكي الضعيفين الانذال	واذانهم ماتستمع للسفاها
واللي دعاهم باذل الجهد والمال	خيّر وكفه ماتشح بعطاها
له وقفة ٍ باقف لها كبر وجلال	حتى الحروف اتطيعله من رضاها
ماني بشاعر زيف ماني بدجال	شاعر وابرهن كلمتي واحماها
ابني على سطح القمر حلم وامال	والنفس ابروي بالمشاعر ضماها
وصلى الله وسلم على خير رسال	اعداد ماهل المطر من سماها

قم ياهجوسي قومة الذيب ولى
	ابنحرك قدم المشاعر واخليك
الليل ثلث الليل روّح وولى
	وانته على حالك وانا مبتلش فيك
شاعرك ينخى حضرتك لاتغلى
	الحرف حرفك والقوافي قوافيك
ابيك من نبض المشاعر تحلى
	وانا من دلال المعاني بقهويك
ماهو خيال تصوّره ويتجلى
	احساس شاعر من ضميره يمليك
الليل روّح والصباح اسفهلى
	وانته على حالك وانا مبتلش فيك
والقلب ضايق من همومه وملى
	ياهل ترى ماصار بالقلب!يرضيك
شوف المحاجر بالمدامع تملى
	اليا ذكرت اللي غرامه معنيك
بنت ٍ لعوب وتلت القلب تلى
	واليوم شفها بالمراقيم تكويك
لارحم ابوها كيف عني تغلى
	وشلون تجني من ثمارك وترميك
مدري بلاها ظروف ولا تبلى
	ولا خذاها الغير من دون تشكيك
عامين اثرها في غرامي تسلى
	ونا اشيلك يمها ثم اوطيك
وعامين دمعي فوق خدي يهلى
	والشوق يطويني وساعات يطويك
وعامين ادوّر من محل ال محلى
	واسجّ رجلي والبلاء من طواريك
عذبتني ياهاجسي لاتكلى
	خل المقفي دام قفا مخليك

هذه القصيدة هي عبارة عن نخوه لقبيلة حرب بشان اقامة حفل كبير لتكريم الشاعر الكبير شاعر حرب راشد السحيمي وقلتها عندما تم اختياري للجنة التكريم0

ياحرب ياحرب افزعوا بالحال والوقفه سوى	في ماقف اللي ماقفه يحسب على كل الحروب
بزهم عليكم وانتخي باهل الوفاء واهل القوى	من شرقها لاغربها ومن الشمال اليا الجنوب
والطيّب اللي يحتمي ويفز لاسمِع نخوى	ولا الردي ابقلعته لاغاب ماهو بمحسوب
ماني مكلّف بالردي لاصار مافيه حموى	ولاني مدوّر فزعته لاضاقت اوساع الدروب
والتاجر اللي ماوقف مع لابته ياكل هوى	خله مع اصحاب البشوت اللي لهم ستين ثوب
سلم على اللي لاحضر في لازمه مثل الدوى	من طيب راسه فزعته تسعد بها كل القلوب
وليا سمع صوت الندى ماصد عنا وانزوى	طير السعد يوم الوعد لاجاته الدعوه ينوب
وجهه كما وجه القمر لاشع بالنور وضوى	ولا كما وجه الشمّس لاباينت عقب الغروب
احداً من العد ارتوى واحداً يصدر ماروى	واحداً يرقيها القمم واحداًينزلها الدعوب
وحنا قبيلة صامله والحبل مافيه ارخوى	مثل الجبال الرسايه لاولعت نار وشبوب
حنا الحروب اهل القنا لاقنّب الذيب وعوى	تاريخنا ماهو خفي تشهد لنا كل الشعوب
افعالنا بايماننا ماهي سواليف قهوى	انشد وتقلى فعلنا لاكذبه خطو الكذوب
بسيوفنا وارماحنا ننزع معاليق الشوى	وناطا على درب الخطر وقت المعارك والحروب
كل ٍ يحسب احسابنا لاحده ابليس وغوى	كم شيخ قوم ٍ لاعصا لاذاقها منا يتوب
وجندينا في ذمتي ياقف مواقيف اللوى	في ماقفه مثل الجبل ماهزته صلف الهبوب
وصغيرنا من طنخته يفعل ليا منه نوى	اليا تحزم واعتزا مايطرق ابواب الهروب
وختامها يالابتي لاقنّب الذيب وعوى	وقفاتكم نفخربها لاضاقت اوساع الدروب

قالت تراني رايحه يمة السوق	واذا سمحت اليوم لاتتصل بي
قلت العفو لاحدني يمك الشوق	وش السواه انفز قلبي لعبي
وقالت لي اصبر لاتعجل يامطفوق	انا اتصلبك حالفه لك بربي
وقلت الصبر ولكل مطرود ملحوق	وانا على سود اليال امتربي
واخذت لين اصبحت مالاحت بروق	واقف وقاعد والمدامع تصبي
صحيح ان البنت ماعندها ذوق	وشلون تملك خاطري وتغدربي
وشلون تزرع خنجر الشوق برفوق	وشلون تشعل نارها وتحطبي
ايه الله الله بالمحبه وبالذوق	لكن لها تبّن والفين تّبي
والله لاحرق جمرها وارتفع فوق	واترك رماده للهبايب يهبي
وان جات ارحب واتغنا بطاروق	وادعي لها كل المشاعر تلبي
واذا نستني بلعن الحب والشوق	والتوبه والله بعدها ما احبي