ديوان الشاعر نمرمنور السحيمي (وارث الطيب) رحمه الله

قصيده أهداها وارث الطيب للأستاذ عبدالرحمن بحير بتاريخ الأول من رجب 1413هـ

الفرصه

اغنم الفرصه ترى الفرصه تفوت
	قالها جدي وضاعت من يديني
تحترق ذكرى وذكرى ماتموت
	اه ... مااقسى ذكرياتي ياسنيني
للصدى كم ينعكس صوت(ن)وصوت
	لوتجاهلت الصدى صوته يجيني
وابلغ من الحرف نظرات السكوت
	من ألمها تشتكي نظرات عيني
ماتذكر ... هاالشوارع والبيوت
	عن بقايا اطلالها .. لاتسأليني
ماعشقته فن تطريز الكروت
	ياقريبه باالكروت تراسليني
ماتت الأحلام مع ليلى ونوت
	معهن الاحلام ماتت صدقيني
انشليني من بحر مليان حوت
	ابعديني عن شواطيه ابعديني
ودثريني في ورق شجرات توت
	اسألك بالله قومي دثريني
واحتويني ياخيوط العنكبوت
	يمكن أنسى ذكريات(ن) تحتويني

فنجال الغلا

ياحبيبي..ياهلا..مرحبا..اقلط تقهوى
	ذوق فنجال الضيافه وشف ويش احتوى
الغلا ثم الغلا والغلا..اشرب لين تروى
	من شراييني سكبته .. وتبشر باالروى
حالف انه غير يرويك صدر انسان تهوى
	اشربه فنجال مغليك وغيرك ماهوى
آه لامنك تضايقت .. مايفرح بسلوى
	وكل ماتبعد من البعد ضاق به النوى
وصب من مزن السوالف على هالصدر يروى
	شوف عشبه كيف بعدك؟ غدى أصفر والتوى
مابقى به غيرشجرة غلا وجذور تكوى
	من فراقك صار به جرح ينزف وانكوى
من يقول ان الحياه ان نساها الحب تسوى
	الحياه بلا محبه مثل نجم(ن) هوى

ســــــــــــر المصايـــــــــب
رائعه أخرى كتبها أبوبدر رحمه الله العام 1418هـ

الهم ياعيني كبر هامة طويق
	وشلون صدري يحمل طويق قولي
أحد(ن)يشيل الهم يومين ويضيق
	وانا همومي لابعدت جات حولي
واليوم صارت كلها بالمعاليق
	والمضغه اللي ترفع الدم طولي
للجسم بالشريان نبض(ن) بتدفيق
	وتسري مع عروقي طلوع ونزولي
تطيق ؟؟ والا عمرها النفس ماتطيق
	مافيه بين وبين ..رفضي قبولي
مافيه بين وبين .. تكذيب تصديق
	ولاهي بفصل وفصل..الأربع فصولي
همي يصبحني قبل فكه الريق
	يومي!! ماهو باسبوع شهري وحولي
ولو ان همي هم فرقا عشاشيق
	كان اتجاهل ذول واختار ذولي
ولو ان همي قلة المال والضيق
	ابعد ربوعي..لادروا بي عنوا لي
المشكله طيبي فبعض المخاليق
	اللي يمروني .. تقل مافطنوا لي
ماقول زيد وعمر..مرزوق ورزيق
	اقول بعض ..وبعض والله وفوا لي
والوضع مايحتاج له شرح تعليق
	سر المصايب من تخبط ذلولي
واحسن طريق اعقل ذلولي بتوثيق
	واضمن خروجي قبل احدد دخولي