ديوان الشاعر نمرمنور السحيمي (وارث الطيب) رحمه الله

من جد...!! من جد...!!

من جد.! زعلان تصرخ يامضيعني
	من جد.! من جد.! ولا مزح ياعيني!
ولا..ضميرك تحرك جاء يسمعني
	والا..بتهمه ضياعك جيت ترميني!
اصرخ من اقصى الضلوع اصرخ وسمعني
	ياجرح صرت المحطه في عناويني!
يابحر..كنت اعشق أصدافه.. تمتعني
	صاخب شواطي وملحه شهد يرويني!
ياورد والورد شوف الورد وش يعني
	ناعم ولامن لمسته عطر يديني!
ياحب..في سيرة أهل العشق طمعني
	ياحب عشته..يااجمل عشق بسنيني!
ياصوت نساني أحزاني...ومتعني
	ياصوت ماكان غيره صوت يعنيني!
ياحلم كنت بحياتي..آه وش تعني
	لكن! !من العام صدفه جرح مهديني!
وضمتني هموم لحظه حزن تصفعني
	وفي لحظتي!!قلت رح ماعاد تعنيني!
من يومها ادركت غير تزيد في طعني
	وش هوله ابقى!!رحلت أنقذ شراييني!
أقفيت ماقمت أعاتب!قلت تجمعني
	بك لحظة(ن)مثل هاللحظه وتشفيني!
خذها بخنجرك رح ماعاد تنفعني
	العام ! صدفه دريت وطحت من عيني!!

دفتر الصدر

هو نسى ولا تناسى..هجر والا..تغلي
	مايهم..بعذر غايب..عسى ربي يرده
آه..ذاك اللي حديثه..شهد حالي يسلى
	آه..ذاك اللي بعينه..سهوم(ن)مستبده
آه..ذاك اللي لياأبطيت..يمطر في محلي
	آه..ذاك اللي..مثل نايض البراق خده
آه..ذاك الصبح والضحك والراحه وظلي
	آه..ذاك الليل لاظم وجه الصبح رده
وغاب ذاك وذاك مع ذاك ماعلم(ن)وصل لي
	والأمل مات وسكن صدري المجروح ضده
آه..ياحلم السعاده..ذبل وردي وفلي
	طاح غصن بأول الدرب والثاني بسده
وضاع نصفي عام الأول..وضاع اليوم كلي
	آه يابحر(ن)نسى الشط في جزره ومده
ويش أقول..ويش ماأقول..مدري ويش أخلي
	مابقى شئ جميل أذكره يفرح..واعده
مابقى في دفتر الصدر لو صفحه تسلي
	كل صفحه تجرح القلب..لا والله تهده
ليه عاد أطردك ياهم..ياعلك تولي
	؟؟

روعه أبا بدر لاتنقطع رحمه الله وأسكنه فسيح جناته

ياأرض!!!

لاتعاندين..!! أنا اكره العند..بالحيل
	واشعر..سقوطي تحت من قمتي فوق!!
يابنت..مثلي يكره الحط والشيل
	ماني مثل شخص(ن)على البال مطفوق
واللي مروض من زمن عاصي الخيل
	ماتعجزه مهره عصت منطق السوق
يابنت وانتي الأرض كم تاخذ تشيل
	وتحفظ بذور..وتحضن أغصان وعروق
ماعلموك..ان المطر مصدر السيل
	لاساق نوه..والسماء رعد وبروق
وماخبروك..ان البحر لاهدر..ويل
	واذا تراقص..موج..في قمه الذوق
ولافهموك..ان السوالف لها ذيل
	في يوم يظهر..بين طارق ومطروق
وماحدثوك بكذب نصف الأقاويل
	الحالمه في ليل عاشق ومعشوق
ولاسولفوا لك عن رنين الخلاخيل
	اللي فضحها الصوت والمشي برفوق
يابنت..عادي نور بعض القناديل
	نوره على مخلوق..يفداه مخلوق
توك صغيره..جاهله منهو سهيل
	ياأرض تبقي تحت..لو بعضها فوق!!!

النصف الآخر..!!

مات أول الجرح..والثاني بدى توه
	ياهون الأول وياويلي من الثاني
على رماد المغادر.. يشتعل ضوه
	جرح(ن)مع أفراح الأول يبعث أحزاني
آمنت بالله..قدر..واللي تبي سوه
	عندك تصرف على كيفك..بشرياني
وان كان ماكفاك نزفه..يابشر روه
	بالدم..سلفه..وعندك واجرحه ثاني
وعليك بالقوه.. اللي مابها .. قوه
	النابضه تحت هالضلعين...وتعاني
لاتزعجك..لالقيت النصف متشوه
	كمل على النصف الآخر طعن..من شاني
وحيل الله أقوى..ياربي عطني القوه
	والصبر..والمن والسلوى..ونسياني
لو ان بعض البشر..في قلبه مروه
	مامات الأول..وينفخ روح بالثاني!!

متى تهب الرياح...؟؟

اذا هبت رياحك...فاغتنمها
	وانا مادري متى تهب اغتنمها
مشيت وتهت..مدري وين أوجه؟
	ياربي وين هو..منعش نسمها
تمر .. وتعترض .. ويلوح بارق
	وتقفي .. تقل به داعي زهمها
ومره ؟ لاح بارق رحت صوبه
	وغير وجهتي .. واخلف قدمها
عن الدرب الموصل للنهايه
	عن رياح (ن) يرفرف لي علمها
وتهت فبحر مظلم .. ماله آخر
	ومنه النفس تشكي من ألمها
ياربي .. ياكبر بحر الخطايا
	عريض ونفسي ازعجها ندمها
على أمواج الذنوب ابحر واسافر
	ونفسي كل موجه تستلمها
تدور بها .. ولاتقرب شواطي
	تغوص .. بغبة الذنب .. وظلمها
واهيم بظلمة الأعماق .. تايه
	بغيبوبه .. ولاغيرك علمها
وافوق .. وتقل فوقي ماء وظلما
	فبير .. وين حبلي .. وين فمها
ولامني ظهرت .. يزيد همي
	سطور اللوح..وش دون قلمها
واعود لشاطي التوبه .. وارسي
	واتوب..ونفسي الدمع يخصمها
واعاتبها وتطاوع..بس ترجع!!
	يرجعها .. رجيم(ن) مستلمها
على كيفه يمشيها .. وتمشي
	وهي ماودها .. لكن خزمها!!
وروضها وصارت طوع امره
	خبيث .. ولذه الراحه .. حرمها
يارب .. انك تساعدنا على اللي
	توعدنا .. لاجل نفسه ظلمها
ياربي كيف احارب والمحارب
	بخطه..محكمه..صعبه.. رسمها
وجيش(ن)مايشاف ارعن مدرب
	عجيب ..ومتقن الخطه فهمها!

يلعن آبو الشعر .. !!!

اشتعل ياليل شعري .. لاتطفي
	شوفها .. تسهر معك من قدها
اشتعل خل العطر .. غيمه تضفي
	فوقها .. من عودها من ندها
اشتعل للصبح .. ظنك ماأوفي !!
	لا وربي غير احرك قدها
وسجعي بالصوت بالجنحان رفي
	ياحمامه .. لارفعت لي يدها
هي تراها كل ماحركت كفي
	ترفع اليمنى دلع .. وتمدها
ولانويت المس اناملها .. تقفي
	كفها .. واليا ازعلت..تردها
ولااشتعل ليل القصيد ارجوك كفي
	وانظري وشلون شعري شدها
اتركيها تندهش .. واقفي بصفي
	والمحي حمر الورود .بخدها
وكل مازاد الخجل قالت يكفي
	بس ابشعلها .. وابيح سدها
كان ماادهشها حرام .. اوزن واقفي
	يلعن آبو الشعر ماني قدها!!

وارث طيب جداني

يااللي على بالي .. الى جاتك أخبار
	تقول ماني مثل ماني ..من أول
لاتكذبين العلم .. دار الزمن دار
	ماهو باالأول .. شكل الأول تحول
ماتت سنابل .. والمطر كان مدرار
	وشلون تحيا .. والمطر مايطول
أحوال ماتبقى على حال يندار
	دولابها .. وتصير ماضي يقول
لايغرك ان قالوا بي الطيب ماصار
	بالطيب أهول!! كنت بالطيب أهول
صحيح وارث طيب من ماتوا احرار
	جداني اللي .. كفنوا عام الأول
عاشوا على وضح النقا دمهم حار
	ياطيبهم .. ياصدقهم كانوا أول
كانت وصاياهم الى ضقت في دار
	اترك أهلها .. سج .. وابعد تجول
وان كان ماتطرق حديدك وهو نار
	حول وغيرك يطرقه نار .. حول
وبالطيب وصوني ووصواعلى الجار
	وعلى الخوي والضيف..حيه وطول
وضاعت مبادي كانت احلامنا اصغار
	وانت وانا والناس..صرنا نهول
وصار الخضوع الطيب..هذا اللذي صار
	لا .. لاوبعد سموه ذل وتسول
لاتصدمك في ه الزمن بعض الاخبار
	ترى زمنا .. يشهد الله يهول
ركب الرديف وصار بالسيف مغوار
	وراع الشداد.. مسلم الأمر حول!!

يقول ابوبدر رحمه الله..
تذكر عزيزي ( ان بعض الظن اثم...وليس كل الظن اثم... )

صدق ظني وهنتي يالمصيبه
	أسيئ الظن وتهون المصايب
غريبه..! لاعهد ماهي غريبه
	زمن ماعاد تدهش به غرايب
عجيبه..! ليه تحسبها عجيبه
	وهو ماعاد باقي به عجايب
توقع هالزمن كل شئ يجيبه
	يجيب اليوم والا الغد جايب
جروح أحزان وهموم ومصيبه
	عذاب طعون تجريح ومصايب
صحيح أحيان ينعش نفح طيبه
	ولكن..! مايدوم بيوم طايب
تخيلها بعيد..!! وهي قريبه
	توقعها...طعن خنجر قرايب
توقعها جروح من الحبيبه..!
	تصورها عذاب أغلى الحبايب
وبدل ماتعيش بهموم المصيبه
	أسيئ الظن وتهون المصايب!!

رزقنا الله واياكم بر والدينا وفي ذلك يقول وارث الطيب رحمه الله..

ست الحبايب....أمي

أمي ومن غيرها ست الحبايب
	حضن الدفا والوفا صدر الأحبه
ياحب صادق وانا حاضر وغايب
	ياقلب في نبضه احساس ومحبه
ياعين تسهر معي ليل النوايب
	وحنانها بلسم فصدري تصبه
شلال ماينقطع به شهد ذايب
	يطفي لهب صدر همومه تشبه
وياكثر ماطفت أمي من لهايب
	في قلب حمر الخناجر تلتهب به
حتى نزف من ألم طعن المصايب
	ويزيد نزفه لاصد البعض..كبه
وتقول ست الحبايب والقرايب
	لاتشيل همك... كفيل الخلق ربه
ولاغبت تمطر حزن ترعد نحايب
	واذا غفت من هناء النوم..اتنبه
والبعض غرقان بأفراحه عجايب
	يقول( فرقاي عيد) لمن يحبه
ياصدر بعده وهم بيض التوايب
	وعطش لمن قال يقاسمك المحبه
لو خدمتي لك مثل وبل السحايب
	مارد لك لو ربع مثقال حبه
ومن فاز برضاك ياست الحبايب
	يبشر بفوزه بفردوس الأحبه

من روائع وارث الطيب اللتي لاتنقطع قصيده بعنوان...
( عمري ثلاث سنين )

عمري ثلاث سنين وشهور وأيام
	والماضي اللي فات ماهو بعمري
ودونت تاريخ الولاده بالأرقام
	يومه..! وشهره وأربع أرقام هجري
الحظ قام... ويسعد الحظ لاقام
	توي دريت اني ... مكفن فقبري
قبل اربع أشهر واربع أيام وأعوام
	ثلاث فاتن..! وانكشف نور فجري
وشعرت كني مالك الكون بزمام
	والهم فارق نبض دمي وصدري
واليوم في دنيا السعاده والاحلام
	شفت الفرح .. ربي كتب لي نصري
ماهو فرح بالحب والعشق وهيام
	بدري أعلي اللي لاجله آهيم..بدري
ألا رميت الحب في بحر الأوهام
	اللي غرقت فغبته نصف عمري
قبل ثلاث سنين وشهور وأيام
	عشر أربعه خمسة عشر عام هجري