ديوان الشاعر عليان رفاده السحيمي رحمه الله

بسم الله الرحمن الرحيم

اخواني الاعزاء في هذا الصرح الشامخ
السلام عليكم ورحمه الله وبركاته وبعد:
احب ان اضع في هذا الملتقى الشامخ قصايد للشاعر المرحوم ان شاء الله
العم عليان رفاده السحيمي رحمة الله عليه وادخله الله فسيح جناته

هذه مساجله محبه وفاء وثقه بين كلا من الشاعرين رحمهم لله الشاعرعليان رفاده السحيمي والشاعر العقيد بادي عواد السحيمي

يالله انك تغني الجندي عن الجنديه
	يامعيش النمل ياللي تنشي الامزاني
كل ليله يمسك النوبه مع الدوريه
	والصباح يلفه النايب على الميداني
وعذابه كيف مايرتاح لو عصريه
	كل مافك العمل هذا بدا بالثاني

رد الشاعر بادي عواد السحيمي رحمه الله:

ياموزع في بريد الحره الشرقيه
	لو سمحت ان تبتدي في حاره السحماني
وصل الخط المسجل قدم ذيك وذيه
	خط عاجل وانت خابر شفقت العجلاني
صاحبي يشكي ظروفه مير وش بيديه
	ذي دنيا ياسمي كلن بها تعباني
من تعب نال المكاسب واستضل ابفيه
	مايصلي عبد غير يدور الغفراني
عام الاول ليش ماسجلت بالليليه
	وانت مالك عذر لاشايب ولاعجزاني
مدري انت ماقدرت لمنهج الاميه
	ولااظنك ماتبي تدرس مع الشيباني

رد الشاعر عليان رفاده رحمه لله

ياهلا يامرحبا يامرحبا وتحيه
	عد ماهل المطر من صادق الامزاني
ياهلا عداد نبت الصيف والوسميه
	من محبة خاطري والا الطرب ماشقاني
جاني الخط الشريف بطائره جويه
	وسرني يوم اتجاهه جاي من الظهراني
عندنا الاخبار يابادي مشت سريه
	ناشت الاجناب واختصو بهاالصدقاني
البدل والسوق ساير والثمان اشويه
	زيدهن خمسه ويرضي الحاضر الزعلاني
وان طلبته ينقص المبلغ يقول ابليه
	كيف ينقص من ثمن بشتي وانا برداني
مير انا عندي هديه كان تسمع ليه
	الفروض الخمس فيها لاتجي كسلاني
وفيه حاجه غيرها ماحللت شرعيه
	اسمها الاصلي حرام ولقبها الدخاني

هذه القصيده للشاعرعليان رفاده رحمه الله وقام بمجاراه هذه القصيده اخيه علي رفاده السحيمي

البارحه عديت في الحيد يانور
	من حمد ربي ماعليا دعيه
امسيت لامصوب ولا اقول مكسور
	واجحد صوابي بين هاذي وذيه
ياليتهم يعطوني الجيش طابور
	ويصفهم ماثل صباح وعشيه
وطالع يدربهم يقول الوراء دور
	واما عويض قايد المدفعيه
معهم ثمان الآف بندق وناظور
	والفين جندي حامل البندقيه
ومعهم سلاحن غيرها ماله حكور
	اربع مية مدفع سلاحن قويه
متخبرين الدرب مافيهم قصور
	ويصلحون الراي قاعة طميه
ميه يعدن الضحى فام ناطور
	ياقربهم من زيد صافي الثنيه
وميه تبي الابيض على مدهل الخور
	ومالو من الابيض على التنضبيه
ومن الشمال يحدهم هضبه القور
	ومن اليمن يقصر على السايبيه
ثم انهبولي صاحبي طيرت الحور
	غصبن ولابرضاه هاتوه ليه

رد الشاعر علي رفاده السحيمي

مشكور ياللي تبني القاف مشكور
	عندي فزوع كانها بالحميه
ومن الشمال يحدهم حقل والصور
	وتقبلبهم يم الحجاز الحويه
نبي اناطحكم برشاش وسبور
	قدم تفرق قومكم من جويه
ان كانهم صدقان مانيب بمنكور
	نوماس للصدقان منهم وليه
وان كانهم عدوان مانخلي السور
	مايشذ منهم من ينادي خويه
وفرارهم يقفي من الضلع وحدور
	مصباحه الاكواخ والناصريه

رد الشاعر عليان رفاده السحيمي رحمه الله

ماذم جمعك مير شيبان وبزور
	ومن وين بدور لاجمعك مطيه
وسلاح جمعك غير مرسى وخبور
	ماتفهم الرشاش والبندقيه
واللي يتعرض ماني عنه مقصور
	اعطيه مايعطي صواب وخطيه

جينا مع الغاير دروب عساير
	والهم حاير فالضلوع الحواني
جينا نبي المقطاع نبي نعطي الارباع
	حداني الزراع دون المثاني
وقلت ابلع الشيمه ياملا الحريمه
	مايستوي زرع بليا سواني
عسى محول الذود للخبت مايعود
	لاواهني سعود بارض رحماني
ماصفق الاذواد يأغض الانهاد
	متربع مادون هذا وذاني
ياحزام وتلي على شوق خلي
	هرجه يسلي في ضميري سقاني
اتل العهد ياحزام في شوفه العام
	واليوم تذكر في شعيب سحباني
يقوله عنيزان هرجا برهان
	مع ايمن العوجان صاف الثماني
عديت في راس المراقيب واجيب
	على الردي والطيب مبطي مساني
لو سرع ماأعدي واغني غير اشيب
	لاخذت ساعه دقني راي ثاني
ولا ياليت الموت مالله خلق موت
	ولا لمات الزول وانه اجناني
القلب ابأرده انا ليش موده
	ياخذ منه مالح والعمر فاني

هذه الابيات ارسلها الشاعر عليان رفاده السحيمي رحمه الله الى شيخ قبيله السحمان مرزوق ابن راشد السحيمي رحمه الله
ورحم الله الجميع واسكنهم فسيح جناته

ليت مرزوق السحيمي يكشف اسرار القضيه
	يوم كلن منعكس رايه على غير النظامي
مافعلنا في جماعتنا مفاعيل رديه
	كلن اخذ حقته ياابو سعد والحكم طامي
مانبي من مالهم ياابو سعد ربع الوقيه
	مير نبغاهم ليا جينا يردون السلامي
يوم كلن شالته نفسه كبر ضلعة طميه
	والسبب ماشي سبب شيطان علقله وسامي
يوم اخذنا حقوقنا صارت بلش واكبر خطيه
	ياجماعه خير عساها ماهي لقمة حرامي
والبلى ماهو من الشايب من الربع البقيه
	ياعسى الجنه تبسط من عضاه ومن عضامي
مابلشنا بالنفاق اللي نزل من كل نيه
	البلش بالحفره اللي كنها قطعة ظلامي
صرفوها وافهموها ياالرجال الصيرفيه
	ربعوها بالحديد ولحموها بالحامي
الله اللي ينجي المظلوم من شر الوريه
	في نهار فيه راع القلقله جيعان ضامي
ياخوالي وش حصل من نقص والساعه رخيه
	الزعل عشرين عام وكنها ستين عامي
كان طاعوا شوركم ماشي سبب يوزم حميه
	وكان عيوا زيدهم مني تحيه واحترامي