ديـوان الشاعـر عبدالعزيز عـواد السحيمي

	الصبر انا ويّاه نحْسَبْ بنـي عـم الصبر انا ويّاه نحْسَبْ بني عم واخْوان فالاسلام ومْنَ الرضاعه إلْيا مشينا مع بعض بيّن الدم والجد واحد وارثينٍ طباعه ولْيا تفرّقْنا تغشلاني الهم في خاطري ما انْساه في كل ساعه أنا اشهد انّه راعيَ الوجه الاكرم الطيّب اللي كلّ منقود باعه لو جانيَ اللي شايل الهم والغم أقول له منصاك بيت الشجاعه منصاك ابن عمّي ,ليا جيته اسلم وسلّم عليه ولا تضيع الوداعه اللي تبي تلقاه عنده مولّم كلّ الكنوز مْزهّبَه في متاعه ينصفْك مايحرمْك من كلّ مغنم ويعطيك مايعطي شيوخ الجماعه

	لـي الفــخر لي الفخر يوم ان كل تفاخر لي الفخر لني فالاسلام والعرب ولي الفخر لني من اهل الجزيره ولي الفخر لني سمي صقرها الذرب هذاك ابو تركي حميد الخصايل وانا اشهد انه باللقا فارس الحرب ولي الفخر لني من اهل المدينه جار النبي في ديرةٍ ما بها كرب جار الحرم لو ماملك ريال وجنيه اخير من مليون في ديرة الغرب ولي الفخر في كل دارٍ وديره لني من السحمان وسحيم من حرب

المصالح والمعاريف بالصرف

الله من عين غذاها على الذرف	فالخد همال وبالصدر ولوال
الله واكبر يازمان على جرف	قفا وقفوا معه ذربين الافعال
يقطعك يامعروف مبني على عرف	ولا وساطة صاحب راعي اموال
أثر المصالح والمعاريف بالصرف	مع صرفة الدينار تلقى لك رجال
اللي يعرفك حطك بداخل الطرف	مجامله ولا حيا بعض الاحوال
ومن لا يعرفك يجرفك سيلها جرف	من لا يعرفك مايسوق الك فنجال
حتى لو انك تغرف من البحر غرف	علم ومعرفة وسمح بالاقبال
لا صار مانته حامل في يدك زرف	ارحل عن الدنيا مقفى بلا اقبال

قصيدة في قبيلة حرب

هاضت بي الافكار وافكاري وساع	هي من صميم القلب ماهي نهابه
إليا ومرت الشعر لي القلم طاع	يكتب ولا تصعب عليه الكتابه
الشعر له بيبان والوان وانواع	والشعر للمداح مفتوح بابه
صيتن لكم يا حرب بين البشر ذاع	يالابتي ياحرب ياخير لابه
امدح قبايل حرب زينين الاطباع	اللي لهم بالقلب قد ر ومهابه
دروبهم درب الوفاء دون مهزاع	والطيب معهم سيف داخل نصابه
ساس لهم محفوظ بالشبر والباع	ملازيمنن له ولبسوا ثيابه
والحق هم للحق كفو ولا ضاع	الحق ياأهل الحق كلً رضابه
وفالسلم كلن ماشين دربه شجاع	كلن تهنى في طريقن مشابه
ولادن طبل الحرب جاك الف فزاع	على اسمهم وأن قيل حرب الحرابه
سيفن لهم في ماضي الوقت قطاع	ضد المعادي والعدو مانهابه
عدونا للسم لاشك جراع	ومثله يسوا في جميع العصابه
في وقتنا الحاضر وربعن هاك الساع	رقولهم مرقاب محدن رقابه
وباق القبايل كلهم قومن سباع	مابه قصورن في جميع الذيابه
وصلوا على المختار ياللي له اتباع	إعداد ماصلوا عليه الصحابه

هذه المساجله ممازحه بيني وبين احد زملائي
هو يقول:

الله من رجلن يعشي ضيوفه	أربع بنات الديك في راس مرقاب
ياعيد تكفى لاتجي من صفوفه	يعديك بذبح الدجاجه للاجناب

ورديت عليه:

الشاعر اللي هيضتني حروفه	مصبوغةٍ بالماس ماهي من تراب
على طرب ترقص بدقة دفوفه	جتني عصير مسيره تطرق الباب
حيا الله للي منطقه من وقوفه	يحمل صروح الغيظ شرهات وعتاب
غيضه قديم ومرتكٍ له يحوفه	و والله يلولا حلفته مالي جْواب
يابن علي ما نيب طالب مروفه	ولاني بجاهل بالعوايد والآداب
عيني تشوف اللي عيونك تشوفه	و راسي يطول ولا تعثره الاصعاب
انا الذي كانك نسيت معروفه	ابن عبيدالله تواريخ وانساب
لا والله الا الحرب سلت سيوفه	السيف ابو حدين قطاع الارقاب
ياللي رقبته ما احْمَلتها كتوفه	ودموع عينه ما تغطيها الاهداب
وشلون تشره ياسريع النكوفه	وانته علومك بين مخطي وصواب
مير اسمع علومي ولا به حسوفه	يطيب لك ولا على غير ماطاب
كلٍ على قدره تجيه معسوفه	هذا الصحيح وكل شيٍ له اسباب
أحدٍ قبل يجلس يقلّّط خروفه	و احدٍ ولو يجلس ترى ماله حساب
و احدٍ تطيب علومه اللي بجوفه	ومن طيبها يرهي علينا بالاطياب
و احدٍ علومه من رداه مخفوفه	يطير به ويهبها كل هباب
وانته على قدرك لفتك معكوفه	يالاجنبي ياللي توسطت الاقراب
يابو عيونٍ لو تميزت شوفه	تبلص بلايصها على نور قلاب
كليت الاربع جعلهن مخلوفه	طحنتهن ما بين ضرسك والانياب
لعلها بالعافيه ومعطوفه	وليا ضرمت الْها لك الفين ترحاب

مشاركة الشاعر عبدالعزيز في ملتقى قبيلة السحمان الاول في المدينة المنورة

أجتمعنا والغلا فقلوبنا له رنه	رنةً يبعد صداها والحرم منشاها
الله انه لايفرق مجتمعنا لنه	راعي الفكره على صم الصفا نقاها
أجتماع اليوم روضه من رياض الجنه	التكاتف والتحالف والسلام بناها
مرحبا في مرحبا والكيف فايح بنه	مرحبا باسم السحيمي ردةً غناها
في ذرا التوحيد والاسلام وأهل السنه	تحت راية سيدي تمت على علياها
المليك اللي جنوده ماتخيب ظنه	فالجزيره والجزيره نادراً حلياها
اذكروا سلطان سرج الخيل والاعنه	قايد القوات والموات كثر احياها
دون داراً مال أهلها عن سهلها منه	محتمين الاوله والثانيه واتلها
واذكروا نايف على مبداه ما اصعب فنه	محتمي روس الجبال الشامخه وحماها
مير قولوا للهزيل الخرب راع الخنه	لايقرب داراً حنا تكانفناها
والمدينه في سكينه ما نشدنا عنه	دونه عبدالعزيز وروسنا ودماها
ياحفيد اللي عدود الشر ما يرونه	لين يقطع شرها ثمٍ يصفي ماها
الديار اللي صداها ونةً في ونه	لو تخير من يسود حدودها برضاها
كلبوهن عقبن القوم واختارنه	الحكيم اللي يكحل عينها بدوها
العقيد اللي على الافات شن الشنه	ثم قص ارقابها ماهي على علباها
واستعاد المجد والتاريخ يضحك سنه	للبلاد اللي عز وشرف مبداها
كيف لا وهو الذي للحرب طبله دنه	كيف لا وهو الذي هد الصعاب وجاها
يانجوم الليل في نجوم الضحى لك سنه	شاهديها واضربي ممشن على ممشاها
اصبري صبر الجمال اللي لهيب الكنه	مايردي عزمه والا يرد خطاها
ذا وصلى الله على المبعوث لنس وجنه	النبي المصطفى المرسل محمد طاها

مساجله شعريه هذه قصيده للشاعر / عيسى العصيمي الحربي مهداه لابو عساف

نحزن على فرقا الرجال المناعير	ونفرح ليامن الردي راح عنا
الطيبين اهل الوجيه المسافير	الثله اللي نادره في زمنا
راع الوافا والدين دوره تدوير	اللي على سنة محمد تسنا
تلقاه جنبك فاليال المعاسير	ويفز لك فاللازمة ما تونا
يشتال حملات الزمن كنه ابعير	يشيل حمله لوثقل ما يحنا
راعي كمول ولايجي منه تقصير	وليا نخيته فالشدايد تعنا
بيبان بيته عامره بالمسايير	يفوح فيها الكيف هيلن وبنا
لاغاب له بين الرياجيل تاثير	وليا حضر له فعل واضح ومعنا
هذاك له عندي معزه وتقدير	نتعب على شانه ونبذل جهدنا
ماهو سوات اللي تقل فيه تخدير	اللي عظامه فالشدايد ثنا
ما منه مكسب غير جلب المخاسير	نقصن على ربعه عساالله يمنا
بقعا تصافق به سوات المعاصير	اتصافقه فالوجه منا ومنا
يسحب شليله كل مايضوي اعصير	وجهه عبوس وبدنيته ما تهنا
يمناه تقصر ما تصل جمة البير	خيب تعب من قال هذا ولدنا
تلقاه دايم في توال الطوابير	اليا استوينا للصلاه واعتدلنا
هذاك انا باحذرك منه تحذير	الله يقطع دابره من وطنا
واليوم يابندرعساك فالك الخير	عسالك تلقا ياخوي ماتمنا
اشهر على رووس المراقيب ياطير	ولاخاب منهو للمعالي تعنا
واصل مسيرك وانتبه تقطع السير	عانق نجومن فالسماء يلمعنا
نبغاك تاصل للنجوم المشاهير	حتى نشوفك ساطع ( ن ) ياقمرنا
وحنا معك لو فرقتنا المقادير	وقت اللزوم كلبونا حضرنا
وختامها مني تحيه وتقدير	تبقى على طول الليالي تغنا

رد الشاعر عبدالعزيز

حي البيوت اللي لفن والتعابير	المحكمات اللي لفنا بفنا
الطيبات الفاتنات الغناتير	الصايبات اللي من الشيخ جنا
محملاتن بالسحاب المزابير	مسمياتن والقلوب أرجهنا
لاشك عندي ماتعد بدنانير	معسول مرسول الحبايب وصلنا
يامرحبا ترحيبتن جوها غير	مضمونها باقصى الضماير يكنا
أبديتها في محكم القول واشير	عسى يوفي كل ماشيف منا
للصاحب اللي مانرى منه تنكير	ساس الرجال اللي ليا بان بنا
على النقا معه العلوم التباشير	ماهو سوات اللي تقل فيه جنا
اللي معك وقت الرخا والتياسير	متقربن متمردن ممتحنا
ووقت الشقا ماله معانا مشاوير	أطول حباله فالصعب يقصرنا
هذاك خبل فالشديده معيثير	عسى رجوله فالوطن مايطنا
يبن العصيمي مالفا منك تقصير	عسى الولي يجزاك بالخير عنا
واطلب من المولى ولي التدابير	ييسر امورن عليه طرنا
وختامها صلوا على داعي الخير	اللي دعانا بالعدل واعتدلنا

إهداء إلى كل أبناء عمومتي

يا طيب ابن عمي بعيد الهقاوي

اللي ليا جاتك كبار الدعاوي

يساندك ميعاندك ,,,,درع وحزام

رجلٍ على الشِّدَّات والصبر قاوي

طبيب طيب ولا شكى هم الاقدام

صدره وسيع وله ضميرٍ نقاوي

وليا هرج ياليت هرجه بلا خْتام

يفداه من بين العرب كل واوي

ويفداه حرا في علو السما حام

وانا كما عدٍّ قراحٍ رهاوي

مقدام عند اللي على الطيب مقدام

إليا نهاني,,قلت قلبي صفاوي

وليا ومرني,,قلت صاحبك عزام

هذا صحيب لابْتَلَتْه البلاوي

نشيلها ونزيلها عنه مادام

قلبه على درب الموده شقاوي

إن سار يم الشرق وان سار للشام

ما هو كما اللي باوسط البيت ثاوي

وليا زهمته قال طيب ولا قام

وليا بغاك بحاجةٍ جاك ضاوي

وليا قضى من حاجته ماله خْطام

يا كثرهم لكنّ ماني رجاوي

لهم,, ولاني كان جوني بلوّام

أكنّها بالصدر مانيب عاوي

بها,, ولاني عند الاصحاب زوام

ولاني على دار المقفّي نحاوي

إن غاب وان ماغاب,,مانيب منظام

الطيب وهبه يوم ينزل سماوي

يرقى براع الطيب عامٍ ورى عام

ولا الردى ما جاب غير المساوي

دايم لبيت العز لو طال هدام

[/poem]

إيهبّ يادنيا العنا ولّ مَقْواك

حلاك مر وكل ما منْك مرّا

لا اقْبلت لك تعطين وجهي مقفّاك

وانا على الوجه المقابل مضرّا

وليا ضحكتي قلت يا طيب مجناك

وفي ضحكتك خيرٍ مخالطْه شرّا

وليا زعلتي ولّ يا مَصْعبِ رْضاك

رْضاك عسْر ولا معِ رْضاك برّا

سيّتْك قشرى ماهيِ بْمثل حسْناك

واللي عرف نيّتْك منْكِ تبرّا

حنا سمعنا كل من جاك يشناك

واطيبهم اللي قال سرّا وضرّا

وفيهم من اللي قال حذراك حذراك

إليا غويت تجرّك البنت جَرّا

إخْذ الحذر ثم الحذر طول ممشاك

في وسطها جوٍّ وبحرٍّ وبرّا

يابنت شومي واستري كل بلواك

لا تبْتَلَيْن بْمسلمٍ عنْك فرّا

اللي يبيك اخْذيه,,واللي مَيَبْغاك

خلّيه ماله فوق ظهرك مقرّا

عز الله انه عارفٍ يوم خلاّك

يبغى السلامه والسلامه تَحَرّا

وانا سواته ماليِ حْلول ويَّاك

ابنْتظر حتى الليالي تمرّا

مير الحقيقه كل من جاك ينساك

ان شاف خيرٍ منْك وان شاف شرّا

عندما عاد خادم الحرمين الشريفين سالما معافا

الحمد لله كلبونا نقوله

الشيب والشبّان واللي بعدنا

حتى العجوز اللي بسن الكهوله

قامت تهجّد ليلها تنتقدنا

شكر وثنا لله ماهي مهوله

جميع من في مملكتنا من ادنى

حمداً على عودة زعيم البطوله

الفيصلي راع المواقف سندنا

لا حل عبدالله بعرضه وطوله

يقفي ويقبل في نواحي بلدنا

يكفيك عن جملة كلامه فعوله

وحنا رأينا بالعيون وشهدنا

مادام في خيرٍ تشيله رجوله

حنّا بخير وكلّبونا سعدنا

الكلمه اللي من شفاه مْعسوله

نقولها ونردها ما نشدنا

فرحة وطن تاخذ فالاضلاع جوله

فرحة وطن في كل دارٍ تجدنا

الاوّله في قوة الله وحوله

والثانيه لنّا وفينا عهدنا

يوم التعرّي حلّ في كل دوله

حنّا على عات الهبايب صمدنا

وحنّا لنا في ماضيَ الوقْت صَوله

وحنّا لردّات الثنا ما جحدنا

يا أمّة الإسلام لو لم نطوله

الراي واحد باذلينٍ جهدنا

عاد المليك اليعربيّ افرحوا له

ليث الاسود الضاريات وفهدنا

ليت العرب تبْصِر وتسمع لقوله

وتلاحظ ان اللي زرعنا حصدنا

تهزني كلمة عرب فالمقوله

وللي حصل من حولنا ما بردنا

لكن عبدالله يغطي حلوله

على جميع همومنا ما تردنا

[/poem]