ديوان الشاعر / عادل سليم ماطر السحيمي

يا صاحبي عيّاش مليت ياخوك
مليت من ديره تصافق بالامواج
ديره على شط البحر تخلي البوك
كسبان من فارق عملها ولا داج
بترابها ودروبها الرزق يحدوك
كنك كسير العظم للطب محتاج
حول الثلاث اعوام فيها تقل شوك
مرّت وانا فيها تطايرت بازعاج
لاني بعبدٍ ولاّ للناس مملوك
حرٍ ولي شان بحياتي كما التاج
صافي ذهب ماهو لجل بيع صبّوك
مار البلا من هالزمن صار مرّاج
يحمل لنا حظٍ وبالقفل مصكوك
مصكوك صكّة باب يالله الافراج
تفرج لنا في كل ديره ونرجوك
من وضعنا اللي صار زايد بالاحراج
بسبّت عمل وفكل ديره يحطوك
مبعود عن دارك وربعك بالافواج

 

يازين هرج الصدق والصدق منجاه
منجاه من كل المشاكل غلبها
راعيه صافي صافي الوجه تنصاه
كل الموده والمحبه كسبها
مثل السحاب الواضح اللي تبنّاه
ربٍ على هالخلق عارف نسبها
نصيحتي ياراعي كثر المحاكاه
والثرثره والكذب واضح صاحبها
اترك هروجٍ مالها غير نقصاه
مسود وجه اللي مشيّل طلبها
اصدق وخلك واضحٍ انت كسباه
كاسب جميع الناس جاني رطبها
ويالله ثبّتني على الصدق رجواه
رجواك ياخالق الانفس حاسبها
باعدادها وانسابها دون تركاه
في رزقها من دون جري لتعبها
هذا ختام الصدق والصدق منصاه
لراحة الانفس وراحة نشبها

 

ياناشدٍ عن حال واحد من الناس
حالي تدهور وانا من دون الاردن
في وحدةٍ للجيش واشكي الاتعاس
حظي تمايل والامالي تردن
والعمر توّه دون عشرين بالراس
مدورٍ للمرجله مار شردن
كل العزوم اللي على البال جلاّس
مسير وكل الليالي يحدّن
يم الشقى يم التعب يم الافلاس
مار اطلب الله يكتب حظوظ يردن
عذب القراح اللي على الكبد نبراس
هذي مشاعر داخل الراس يجدن
ولاّ الصبر الحمدلله ياناس
نفسي صبوره للمصاعب مودّن
وهذي خلاصت وضعنا اللي بالاتعاس
وكل الامال اللي عن البال شدّن

 

الصاحب اللي يعتلي فالطويلات
الله يجيره من صدوف الزماني
الصاحب اللي يرتكي للثقيلات
ماقال سنّدها على شخص ثاني
يابن سليم انت السند فالمهمّات
وانت الرفيق اللي عليه الضماني
لو كان مابيني و بينك مسافات
تبقى واعدك واحدٍ من اخواني
وتم الكلام اللي بدعناه بابيات
عساه يسلم ياطويل اليماني


الرد


تسلم يابن سلمان في صوغ الابيات
راعي نظر تصخر جزيل المعاني
ابشر ولك فزعه تحل الصعيبات
من واجب اللي مثلكم فالزماني
مااصد عنكم يازبون المروات
انت من اهل العز واهل المكاني
من دونك الاموال والنفس بالذات
من دون مطلوبك نجي في ثواني
تسلم على بدع المثايل بالابيات
ولك الموده ساكنه فالمحاني

 

هذه قصيدة بمناسبة زواج أبناء الشيخ / نايف فيحان ... ونظراً لضيق الوقت ليلة الزواج وكثرة الضيوف المشاركين لم يتسنى طرحها


حان القصيد وزان بدعه بالاوراق
توثيق لاجل الحفل ماننكر الطيب
نبدا بزينات النوايا بميثاق
ونكتب صحيح القول وزنٍ وترتيب
واليوم حفل اثنين بادي بالاشراق
له مبتدى باهلين مرحب وترحيب
عز الرجال وعز روس ٍ بالاعناق
الاد ابن فيحان جزل المكاسيب
كاسب زمام المرجله بعز شواق
والنبت من بذره وطلعه تعاجيب
متسلسل من شيوخ للحق نطاق
يمينهم دسمه ببذل المواجيب
عيال راشد يوم يبْسن الارياق
مدرّكين الصعب وقت الاصاعيب
مرحوم ياشيخٍ بنى فوق الاشهاق
مجدٍ مورث لاجل عكف الاشانيب
واليوم يومٍ للرخى وامن من ساق
في ظل دولتنا وحكم المعازيب
حكمٍ بشرع الله على الخير سباق
فيه التراحم مبتدى حكمه وتهذيب
وانا ارجي الله خالق الخلق رزّاق
جاعل وقار النفس من بادي الشيب
يوفق الاخوان دربٍ بالاوفاق
فيه السعاده تعتلي قمّة الطيب
ويوفق اللي للحفل شد الارواق
وجمع زحاحيل الرجال المناصيب
ولكم سلام القلب من صم الاعماق
سلام باسم الدين رحمه وترحيب