مساجله بيني وبين الشاعر نواف المحمدي

هذه القصيده ارسلها الشاعر نواف ربيع المحمدي

على القروب الذي نتواجد به

المناسبه مع كثر الظروف انشغلنا عن الطلعات مع بعض قطعه ايام

وهاضت قريحه الشاعر نواف الله يحفظه في هذه القصيده

يااهل القروب اللي جمعنا على الطيب
	واهل العلوم الغانمه والعذيه
شوقي لكم سبب بصدري لواهيب
	والشوق نسب نسبته فوق ميه
يازين شوفة روس هاك المراقيب
	في حزة المرباع باارضن خليه
قفرن وموسومه بها كل ترغيب
	كل مانزلنا دعب مافيه زيه
خوة نشاما
	وهم مهابيب
ماهم من اللي هرجهم له مخاليب
	اللي مبانيهم جماجم وسيه
لاوالله الا رجال ذيب بثر ذيب
	يفداك واحدهم بروحه وحميه
خوة نقى مايختلطها مطاليب
	ياغلوهم عندي ورب البريه
ان قلت هيا قالو جهزلنا الجيب
	الجيب الاول لك وهذاك ليه
مجهزه بالاجهزه والكواليب
	نراسل بعضنا ونبدع السامريه
ولاوصلنا شغلنا صار ترتيب
	وكلن يقول ارتاح هاذ عليه
كلن تحيزم يبذل الجهد ويجيب
	هذا ذبح وهذا دلاله مليه
نارن سناها بيننا يلهب لهيب
	وهذا يسوي للنشاما شويه
وسوالفن مابيننا مابها عيب
	ماهما مزحنا بيننا مقدريه
ان جاب احد شوره يقابل بترحيب
	ونفوس حلوه وكل نيه مطيه
لو يبعد المشوار كنه لنا قريب
	مايهمنا كثر الوعر والشقيه
وليا رجعنا صار بالجو تكريب
	من زينها محد يحسب مجيه
هاذي حلات الخوه اللي بها طيب
	وايضا على ماقلت خوة عذيه

وجاريته بهاذي القصيده

حي الجواب وحي راع المكاتيب
	وحي الكلام اللي لفانا هديه
مرسول من نواف راع المواجيب
	ابو محمد مايكدر خويه
خليت خافوقي بليا مقاضيب
	بين الحنايا ونته داخليه
انا دخيلك ياقوي المضاريب
	ياللي مع الخويا بنفسن رضيه
يابن ربيع انت رجل عرف واديب
	ان طعتني لاتكسب الذنب فيه
والله شهيد وعالم السر والغيب
	ذكرتني في خوة الصيرفيه
جضرة نشاما معرفتهم مكاسيب
	اهل العلوم الطيبه والوفيه
ماهم من اللي يخطي الهرج ويصيب
	هرجن وقار وبالمزوح الطريه
ولانلحق المقفي بحش العراقيب
	بين الخبايا والقصايد ثريه
افز اليا قالو ترانا محازيب
	ونبي المبيت وبه مسافه شويه
فيه موقعن حصاه مثل المشاهيب
	موقع دماث تحسله قابليه
بارد هواء والعشب ريحه تقل طيب
	وارضه خصاب وله منابت مريه
وان هيف الغربي وجاله هباهيب
	نسنس هواء ويزين بعد العشيه
ريح الخزامى مثل طيب الرعابيب
	يفوح نويره بريحه زكيه
وعذوق شيح الخيل مالت مهاديب
	مع النفل والقحويان وسميه
ومدام في راس الفتى حلحل الشيب
	العمر مقفي لو حياتك هنيه
اكسب رضى ربك بتقوى لك تثيب
	ويمناك في مد المكارم سخيه
حرك هواجيس الحشا راعي الجيب
	ويقاه رب البيت من كل سيىه
وصلوا على اللي ماتجيه العذاريب
	شفعينا ونبينا بالوصيه

صح لسانك يابو طاهر .
وصح الله لسان الشاعر نواف المحمدي

صح بدنك الشاعر بدر شرفني اطلاعك ياغالي

ومدام في راس الفتـى حلحـل الشيـب
الـعـمــر مـقــفــي لـــــو حـيــاتــك هـنــيــه
اكسـب رضـى ربـك بتقـوى لـك تثيـب
ويـمـنــاك فــــي مــــد الـمـكــارم سـخــيــه

دائما مفيد أبوطاهر وصح لسانك ولسان الشاعر نواف المحمدي اللذي ندعوه لمشاركتنا والتواجد بين إخوانه