ديوان الشاعر معزي فلاح واصل السحيمي

بسم الله الرحمن الرحيم
اللواء عبيد عبدالله الخماش العتيبي تشرفت اني كنت احد افراده في احدى افرع القوات المسلحه وكان نعم المسؤول ونعم الخوي ونعم الصديق عرفته رجل من الرجال الذين يتصفون بالصفات الطيبه واستفدت من رفقتي له اشياء كثيره عرفت فيه الوفاء والكرم والصدق والتواضع وابو ماجد شاعر بكل ماتعنيه الكلمه كنا في شروره ومن هواياته القنص وكنت ارافقه في بعض طلعاته للقنص انا وبعض الزملاء وهذه إحدى قصايده ردا على قصيده ارسلتها له

خط(ن) لفاني ياهلا الله يحييه
	من كف نمر(ن) بالمواقف امجرب
يامرحبا بالخط واللي عطانيه
	خطك وصل ياصاحبي والف مرحب
ياشاعرآ جتنا اجدادآ معانيه
	ابيوت مختاره لها البال يطرب
الحر قالوا ذكره لا توصيه
	والصبر مفتاح الفرج يافتى حرب
الله من قلبآ اهمومه اتباريه
	واليا تعرض له نسيم الصبى شب
ماعاد يعرف صاحبه من معاديه
	مادام بعض الناس يصدق ويكذب
جددت جرحآ كنت اكنه ولاابديه
	اليا ذكرته صرت لااكل ولااشرب
لا وهني اللي وليفه يلاقيه
	وانا وليفي دونه اديار واشعب
ان جيت ازوره بالسنه مانلاقيه
	وانته اتزوره يامعزي على غب
سبحان خلاقه وسبحان باريه
	غصنآ افروعه طلع رمان واعنب
كل المعان الطيبه تنوجد فيه
	خالص امن التعليم يقرا ويكتب
اقوم واقعد كل ماحل طاريه
	كني قريص ابسم داب او عقرب
الجرح في قلبي وانا دايم اخفيه
	قلبي من الفرقا عليهم تشطب
ليته قريب الدار واروح واجيه
	لكان داره دونها الطير يتعب
دنيا رمتني بالتفرق وترميه
	انا مشرق وادعج العين غرب
له والدآ ياخوي ماكثر طواريه
	يخلف مواعيده وانا كم لي اخطب
مرت ثمان اسنين باللين اداريه
	يقبل ويقفي كنه الذيب الاجرب
عناني الماخوذ واحيه واحيه
	اثر القلوب القاسيه مابها طب
لو يدري الامر عن القلب وشفيه
	ليقول سافر واكد الحجز واركب
لكان اضنه دالهن في لياليه
	مثل خويك لا تولع ولا حب

هذه القصيدة بمناسبة حفل معايدة القبيلة

إذا اجتماع الربع بالعيد تأكيد
	ترى هجوسي حضرن جاهزاتي
إن صار لي مجال مع القواصيد
	بعد ذكر ربي ماتبغون ياتي
بسم الله أبدا ماتوريت وأريد
	بسم العظيم مكون الكايناتي
اللي أردد له تعالي التحاميد
	وأطلب نهار الحشر منه النجاتي
اللي جعل لااعمار هالخلق تحديد
	مني على رسوله أزكى صلاتي
وجني مناديب القوافي مواريد
	لي يابنات الفكر ماطاب هاتي
وردن مثل ورد إمهات المفاريد
	وردن على عد الروى مضمياتي
ومدن عليه ماأشتهي من عناقيد
	ابيوت شعر العلم فيهن ثباتي
إليا نظمت الشعر بإذن الله أجيد
	حبك البيوت الندر المحكماتي
أما قصيد(ن) مثل رمي البواريد
	والا يحدر الوادي أبو شراتي
إن كان لاهرجت بالهرج ماافيد
	أخير ليه من كلامي إسكاتي
أصوغ شعر إمفيد ماهو هرابيد
	أتصوغ لي أفكاري مجوهراتي
وسلمت أقول أفكاركم ياالاواليد
	علمن فعلتوا يذكروه الرواتي
ياأصحاب فكرة جمعنا جعله يعيد
	على الوفاء بااعوامنا المقبلاتي
هذا فعل نوماس ماهو مناقيد
	ترقون به في قمة النايفاتي
ويامرحبا بضيوف ربعي تراديد
	على علوم رجال وإمفطحاتي
ولنا مع الافراح نعم مواعيد
	يوم إجتمعنا من جميع الجهاتي
جمع الرفاقه عيد لو ماهو بالعيد
	للعيد في جمع الرفاقه طراتي
طير الموده بيننا له تغاريد
	هنا اجتمعنا قلوبنا صافياتي
ياعيال نجوان الرجال الصناديد
	ياعيال نجوان القروم الدهاتي
لنا ذكر مع القبايل وتمجيد
	وكل(ن) على الاخر إله واجباتي
ترى التواصل بيننا يزيد ويزيد
	قوه تعانق قوة الشامخاتي
في صفنا لايدخلون الحواسيد
	اللي لهم مصالح من الشتاتي
يوم السنين إعجاف لنا شواهيد
	تذكروها إسنينا الماضياتي
أفعالنا مايجحدوها الاجاويد
	مع القبايل نكسب الطيباتي
وإن جت علوم ولعوها المقاريد
	ضرباتنا بخصومنا بالغاتي
واليوم في حكم الذي للعرب سيد
	نعمه وامان إنعيش بااحسن حياتي
مليكنا ويل الطغاه الملاحيد
	لو الليالي بالبلاء محملاتي
نعم ليا سند له العلم تسنيد
	له وقفة(ن) تذهل إعقول الطغاتي
وياشام يامفجوع باأشلاء المواليد
	إتهز الامه صيحة الامهاتي
إقلوبنا من ماتعاني مناكيد
	وياجروح الاقصى وغزه المرمساتي
لابد من يوم(ن) به النصر تأكيد
	هذا وعد من عالم الخافياتي
رب(ن) سجدنا له تذلل وتوحيد
	منزل على رسوله المعجزاتي
ياهازم الاحزاب لك نرفع الايد
	ودموعنا مع الدعاء سايلاتي
ياالشعب الاعزل حارب الظلم لاتهيد
	يسقط شهيد وينجبن البناتي
وتمت قوافي بالمعاني مقاييد
	شعر(ن) بلا معنى فلا له حلاتي
بعد إجتهادي يعذرون الصناديد
	إذا على قصيدي إملاحظاتي

قصيدة أخاطبها اللواء الشاعر عبيد الخماش

بديت بسم اللي يدير الفلاكا
	اللي رفع سبع وسبعآ خفضهن
يامنشي امزون المطر من سماكا
	بسمك بديت ابيوت فكري نظمهن
سر ياقلم واكتب وانا املي علاكا
	رتب لي بيوتآ على الكيف حفهن
حفهن تراني مكملن لك دواكا
	حتى يطابق كتبهنا انشاهن
لي حوفهن بالمبتدى وانتهاكا
	عسى ماينقد خطي اللي قراهن
وياواصل التومين اذا ما يعضاكا
	ان كان مايكلفك بالجيب شلهن
مشكورسلمهن كبير اخوياكا
	اللي بكلمة مرحبا يحتويهن
عطهن كبير القوم داك وشفاكا
	كاسب نعم اعطه بيوتا يشوقن
بيديه بالله سلمه من يداكا
	عسى القوافي لابو ماجد يلذن
اليا لفن عبيد شكرآ يااخاك
	مشكور وصلن ياولد منتهاهن
وصلن لقرمن بالمواقف معاكا
	كل العلوم الطيبه قد كسبهن
ياعبيد كيف الحال واسعد مساكا
	خل القوافي بيننا يستمرن
ياعبيد ياعز الدخيل ان نصاكا
	مشتاق لعلومك لمثلي يجوزن
انا هوايه مع هواك اشتراكا
	والشعر فن النا وناسآ لها فن
ان كان باقي ياعبيد بظماكا
	ظميان وعروقي من العام يبسن
الله يحقق مبتغاي ورجاكا
	عسى الليالي للمحبين يصفن
الود سقمآ للقلوب وهلاكا
	الله يعين اللي بقلبه تمكن
ودواه في قرب الذي به بلاكا
	بغيره فلا يمكن جروحه يطبن
وراعى الهوا لو قال مامن فكاكا
	لو قيل يدله ثم ينسى فلا اظن
لو قال انا بااتوب عن ذا وذاكا
	مايتوب عن هذاك شيخ المزين
ومع العرب مايكثر الحتكاكا
	ويفضل الخلوه على الانس والجن

رد اللواء الشاعر عبيد الخماش على قصيدتي وللمعلوميه يقول الشاعر يارايح (الشقه) المقصود بالشقه موقع في ضواحي شروره يسمى شقة الكناور

يارايح الشقة ليا الله هداكا
	سر بلغ الغايات حتى مداهن
وصل جوابي قبل هذا وذاكا
	لابو فلاح اللي ليا اعطاك مامن
اعطه معزي غاية المنتهاكا
	ملفاك حرآ راعي الكيف والفن
وبلغ سلامي للعيال الصواكا
	وخل الحباري رابضات ابشققهن
وقله هوايه مع هواك اشتراكا
	لاكن ماينفع مع البعد لكن
لو انها بالحرب والاشتباكا
	انا لناخذهن من عند اهلهن
الله يحقق يامعزي مناكا
	واليا طلعت الرجم ياعزوتي عن
مجنون ليلي للوظيفه عطاكا
	خلاك تتبع بالمضامي ضعنهن
حاول مع اهل اللي سبايب هواكا
	خل الركايب ماشيات ابسنعهن
ذاك الغزال اللي بعينه رماكا
	اللي عيونه يفتنن من نظرهن
وان ماحصل لك من بغيت وبغاكا
	عسى الضعون المقفيه مايعودن
انسى او تناسى يامعزي هذاكا
	وعسى الليالي لك بداله يجبن
تلقى بديله في ضواحي سكاكا
	او بالمدينه اوتبوك ابحداهن
وان كان خلك من جروحك شفاكا
	انا جروحي باقيات ابلاهن
ولفك ليا ناديت يسمع نداكا
	وانا وليفي يامعزي وراعن
راعي جديلآ في يمينه اسواكا
	ابو عيون وساع محلى هدبهن
ابو ثمان امصككاتن اصكاكا
	منظومتن مثل البرد لا جلاهن
اليا جلاهن بعود اليراكا
	كن البروق الامعه من سناهن
قفيت من عنده عيونه تباكا
	محلى عيون الزين لو كان يبكن
يقول لي متى عيوني تراكا
	دايم امسافر زادك الهيل والبن
واسلم وسلم وارتعي في حماكا
	لين الليالي يثمرن بفرجهن
اما هد الله ياادعج العين اباكا
	والا عطاك مغفلن خايب الظن
قلبي بحق اللي يدير الفلاكا
	اني معك حتى الوسايل يعدمن
نفسي تراها ماتمنى سواكا
	روحي وروحك ماربح من فرقهن
هذي علوم طيب الله نباكا
	وازكى تحيات ابو ماجد اقبلهن
عند النشاما والامر مايخفاكا
	اهل ادلالن نجرها دايم يدن
والعيد جانا والعرب في حراكا
	وعيدآ بليا منوة القلب مااضن

بسم الله الرحمن الرحيم

هذه الابيات اخاطب بها الابن محمد

يامحمد توكلنا على الله سرينا
	شغل الجيب للشايب ياقرم العيال
ربي اللي يسيرنا وحنا نوينا
	اسر للديره اللي شرق ذيك الجبال
للفياض الذي فيها ليالي قضينا
	في هذيك السنه ياحلو بعض الليال
طيبت ارضآ وطيبت ناس فيها لقينا
	بين حد الحبيبه مع ابن طلال
أنص قرمآ يرحب كل ماله لفينا
	معدن الطيب كاسب نعم واف الخصال
الوفا للوفي واجب وحنا وفينا
	نكمل احقوقه الطيب كريم السبال
والقوافي تراها جات حزت مشينا
	لاصفي الجو عندي وانشرح لي بال
قول بسم الله الرحمن واكتب بدينا
	ذعدعي يانسايم هبوب الشمال
من جزيل القوافي مابغينا خذينا
	الهواجس براسي صار لهن اجتوال
يامحمد تمعن في بيوت انتقينا
	طاعة اللي خلقنا خلها راس مال
لو ما اهديتنا ياربنا مااهتدينا
	ياالله الشكر لك والحمد لك باي حال
ماكتبته وقدرته ترى به رضينا
	والمقادير باامرك ياعظيم الجلالي
اتكلنا عليك ومنك عفوك رجينا
	ربنا انك مصرفنا عليك اتكال
ومن شرور الخلايق بك يارب التجينا
	وياالله العفو منك والخطايا ثقال
يامجيب السوال اليا رفعنا يدينا
	مكرم اموحدينك بالعطايا الجزال
جناتك ياكريم اكرم بها والدينا
	وظلنا في نهارآ مال غيرك ضلال
كم بالمقبره غالي عزيزآ علينا
	والدينا ورفاقه مع عمام وخوال
بالمقابر نشوف الدمع من كل عينا
	نطلب العفو من رب انفرد بالكمال
يامحمد ترانا اموات مهما بقينا
	حاصل الموت لو العمر يابوك طال
كل يوم المنايا رايحه في حدينا
	شوفه الموت يفرس في دهات الرجال
يوم يبكى علينا مثل ماقد بكينا
	نطلبك ربنا التثبيت عند السوال
لو دنيانا عطتنا كل ما منها بغينا
	كل منا تراب القبر فوقه يهال
ربنا مايضيع سعينا اذا سعينا
	ربنا في كتابه بااصدق القول قال
من عمل صالحات وهو مومن عفينا
	عن خطاياه في يوم الفرح والهوال

ابياتي هذه بدايتها مناجاه مع ربي سبحانه وفيها شكر لمن وجب علي لهم الشكر وفيها شي من النصايح فكرتها قبل ايام كانت لمشاركة بالمنتدى وقد علق عليها بعض الاعضاء وجاء في تعقيب الاخ العزيز بعيد الهقاوي حبيب حمود السحيمي مدير عام المنتدى اريد ان اطلق عليك لقب شاعر المنتدى واكيد ابو فهد قد اخذ راي الاعضاء بهذا الامر واعلم ان فيه منهو افضل واحق مني بهذا اللقب من الشعراء الافاضل ولكن مادام نصاني فاانا قبلته واللقب لايهمني اطلاقآ انما مايهمني واحتفظ به انه رمز ودليل وفاء من اهل الوفاء

ياموجد الوجود بك مبتدايا
	يامبدل السيئه عفو منك حسنات
ياخالقي يارب كل البرايا
	بسمك اصطر لي ابيوتآ جديدات
بسمك ياعالم بالصدور الخفايا
	بديت والمضمون بالقافيه يات
يامصرفآ ذا الكون جزل العطايا
	ماضمت ارضك والبحر والسماوات
داعيك من مدك اكفوفه ملايا
	يامرسلن جبريل في صدق الايات
يامخاطب امحمد امين الوصايا
	مني عليه اطيب سلام وصلوات
سترك وعفوك ياالهي رجايا
	نفسي تطيب وتنشرح بالمناجات
وادري تجيني بي وقت المنايا
	عمري امحدد في دقايق وساعات
وانت الغفور اللي يغفر الخطايا
	رحماك لامنه بعث كل من مات
ومن بعد هذا درهمن ياالمطايا
	ترى المطايا النت في بعض الاوقات
ياالنت وصلي ابيوتآ علايا
	ابيوت شعر امرتباتاً امنقات
ياابو فهد اليك كل التحايا
	الشكر للجميع مضمون الابيات
مني تحايا لقايدين السرايا
	مني للاعضاء كل ابوهم تحيات
واقول ياربعي انضاف النوايا
	يامن لكم في قمة المجد وقفات
جتني هديه من اكبار الهدايا
	امن الوفاء منكم عليها علامات
لقب ولاني منزوي بالزوايا
	في منتدى ربعي ترى لي بصمات
ولاني خوي امروجين الحكايا
	مالي مع قوم النمايم علاقات
اصحاب فيه وقال ماهم اخويايا
	اهل النفاق املفقين الاشاعات
بعراض خلق الله تقول الشظايا
	لفظ السنتهم يحسبونه ملذات
اوجيه بني ادم تراها مرايا
	بااللي تكن اصدورها فيه اشارات
وبالناس شر وخير وابو البلايا
	اللي من الخلاق عليه لعنات
فتان واعوانه وجنده رعايا
	اموزعين ويرفعو له بلاغات
باليوم والليله وكم الضحايا
	اللي حدرهم مع شعيب المتاهات
يضحك علينا ماضحك بالثنايا
	ايزين الاثام لنا بنكهات
يجري معانا في جميع الخلايا
	ويفتلنا بكيده احبالآ ملوات
وباايات ربي نحرقه بالكوايا
	ونعطيه بالاذكار بالوجه لكمات

قرأت البارحه مشاركه للشاعر الكبير سعد المحمدي ( العسكري راتبه مايصرف عياله ) وأعجبت بها فجاريتها بهذه الابيات عسى ان تنال اعجابه واعجابكم

قال أبو تركي وأنا شاقتني أقواله
	صدق ابقوله سعد ميه على ميه
ياأبو فهد كان تعرف رقم جواله
	عطنيه أبخاطبه باأبيات منقيه
الله يحييه والابيات مرساله
	في ملتقى ربعه اللي نارهم حيه
أنا بجاريه في قافٍ ليا شاله
	راع الولع قال ليت القافيه ليه
طرقٍ ابا الحنه ثم اتوحاله
	بالله شيلوه ليه ياالهواويه
الكيف مابيننا مشروب فنجاله
	ببيوت شعرٍ على طرق الهجينيه
جزل المعاني وسيع العرف تهداله
	سعد أجاريك ببيوتٍ سحيميه
كم واحد الفقر ياأبو تركي اغتاله
	لو كان للطيب بالرجال ماريه
لو كان بالجود راس اطويق منزاله
	وابلشته في حوايجه الضروريه
لو هو كبير العرب ملفى لمن جاله
	الله يمده بعونه طيب النيه
الطيب مايدركه منهو ردي خاله
	لو انه أكبر هوامير الغناويه
اللي عن اللازمات إيصرصر رياله
	بينه وبين الكرم دايم حساسيه
يمناه لو حاولت تردها إشماله
	عن المكارم على عينه ضبابيه
والعسكري ياكبر بالقاده آماله
	اللي بحد الوطن بخطوط أماميه
الجيش درع الوطن من ينكر أفعاله
	إيوالله الجيش وقفاته بطوليه
الجيش قد كنت أنا واحد من أبطاله
	خمسه وثلاثين عام وفوقها شويه
ترى الوطن هيبته من قوة إرجاله
	برجالها الدار بإذن الله محميه
اللي طمع في وطنا نقطع إحباله
	أرض الرسالات والكتب السماويه
واللي براسه يخرب لايوراله
	وراه حتى تجيبه قوه أمنيه
وتمت بعون اللي أنا أجيه وآساله
	اللي بعفوه محى بالحسنه السيه

بسم الله الرحمن الرحيم

هذه القصيده تطرقت فيها لعدة مواضيع

بسم الله الفرد الصمد
	رافع سماه ابلا عمد
ولا اله كفواً احد
	الله رب العالمين
بك ياالهي مبتدي
	يامن لك اركع واسجدي
ولا اتكل على اجهدي
	وانته مجيب السايلين
عليك تيسير الامور
	ياعالم اسرار الصدور
انت الرحيم انت الغفور
	لك ذاكرين وحامدين
وجوي ليا منه صفا
	الشعر له هاجس لفا
ياهاجسي راعي وفا
	جايب لي الشعر الثمين
ان وجه الهاجس رموت
	تجي على ماابغى البيوت
تجي تراكض في سكوت
	والشعر نظمه لي يزين
ارتب ابيوت القصيد
	مختار لي طرقاً جديد
لعل به شيئآ مفيد
	يا خالقي بك مستعين
ارتب ابيوتآ جزال
	تطرب لها اعقول الرجال
كيفآ مثل كيف الدلال
	يضبط مزاج المضرمين
وانا بعيد اعن الغرور
	اقطف زملايق الزهور
انظم قوافي فيي سطور
	شعراً به العلم اليقين
اباتنقى ماأرى
	انه يفيد اللي قرى
ولااجيب شعر امكسرى
	ينقد علي العارفين
الشعر يطرح مسأله
	والا يعالج مشكله
وان جت معارك مذهله
	وقفت بطل صارم يبين
بالشعر شي امن النفع
	وانا بشعري مقتنع
واخذ براي المطلع
	اسمع كلام الفاهمين
شعرآ مثل صوغ الذهب
	وشعرآ يقال ولا انحسب
يااهل المعاني والادب
	اخاطب العقل الفطين
وأنا بشر اخطي واصيب
	ولا اقول انا بس اللبيب
لكن مااحدرها الشعيب
	وللشعر ناس إمقيمين
والناس شتى اذواقها
	ويعلم بها خلاقها
والطيبه عشاقها
	في سوقها متواجدين
ياكثر في هذا الزمن
	امن المصايب والمحن
بالارض ياكثر الفتن
	ضد العرب والمسلمين
ياعالمن ميت ضمير
	ماتشاهدوا ظلمآ يصير
وحنا مبشرنا القدير
	ان النصر للمومنين
ظلمآ مثل شمس النهار
	اشعوب تذبح مع دمار
ماكنه اللي صار صار
	والقصد واضح للفطين
شلال من دمآ يسيل
	في شامنا ذاك العليل
والطاغيه كم له عميل
	معه الطغاه الملحدين
والقدس له ستين عام
	صابر ويتمنى السلام
وفي يوم فيه الانتقام
	ياويل صهيون اللعين
تهبون يااعوان اليهود
	يااخس اوادم بالوجود
وبك استعنا ياودود
	حنا بنصرك واثقين
قالوا علامك كم يوم
	لاباس ياابوي امهموم
قلت الاجابه والعلوم
	لا اللي علي املاحظين
ماهي عليكم خافيه
	تقرونها بالقافيه
دنيا ماتبقى صافيه
	ضحكاتها معها الونين
في حال تبقى ذا محال
	واعمارنا مع الليال
تبيد لو العمر طال
	وهذا سعيد وذا حزين
عطتني الدنيا دروس
	صبري على لفح الشموس
لو حسني بعض الحسوس
	ولا جمايل حاسدين
ولااسير في درب امعكوس
	ولاارافق اخباث النفوس
وعن تجربه قل الفلوس
	مارد جود الغانمين
اسج نوب اتخيلي
	امي وابويه ياعلي
صاروا بذاك المنزلي
	وكل الخلايق ميتين
اللي رعوني بالصغر
	ويبغون نفعي بالكبر
اللي بخدمتهم ظفر
	ياكبر حق الوالدين
اطلب لهم ربآ كريم
	ياالله عساهم بالنعيم
وماخاب من ناجى الرحيم
	اللي بهديه مهتدين
ورجعت لايام الشباب
	فيها خطا فيها صواب
ونفسي مااحملها عتاب
	راحت بمافيها السنين
فيها صفاء وفيها شقى
	واللي لمولاه اتقى
هذاك بالعليا رقى
	ومشى بركب الصالحين
وهلحين باايام المشيب
	اللي بها نفسي تطيب
في طاعة الرب الرقيب
	منك المعونه يامعين
ياالله يارب الثبات
	ياخالقي حتى الممات
ويارب في ذيك الحيات
	اكون ضمن المكرمين
وترى السعاده والنجاح
	في طاعة الله يافلاح
دايم ونفسك بنشراح
	خلك بصف المتقين
واذا كلامي له قبول
	ابغاك تفهم ويش اقول
صحبتك لنظاف العقول
	إطيب مع الطيبين
اللي لهم قدر وقار
	وبالمجتمع لهم اعتبار
عمار رفقتهم عمار
	اللي على نهج الامين
بالناس عاقل وامهبول
	ومتكبرآ قلب امعلول
ينظر بك ابعينين حول
	والاصل طين وماء مهين

ملت ذاك السوق باغي(ن) لي حاجه

ملت ذاك السوق صدفة باغي(ن)لي حاجه
	وانطحتني فاتنه مدلعه غناجه
من رمته اعيونها بسهوم صعب اعلاجه
	ليتني ماملت سوقك ياهذاك السوقي
بالجمال الانثوي يازينهالمخلوقه
	كامله بالزين لكن كنها مطفوقه
والهواويه اظن اقلوبها محروقه
	الحلاوه كم واحد وده الها يذوقي
جيت ابقول استحي لاكان من نظرتها
	اللبيب يبين له مقصودها وغايتها
ولي نيه والله اعلم ويش هي نيتها
	كم ضحايا رميتك بالعين يامخلوقي
المكان اللي تمره كل ابوه اينور
	ونظرت(ن)من عينها ياسرع ماهي اتعور
لانظرت بالنجل فيه كم سهم اتثور
	مخطر(ن)يجن منها العاشق المطفوق
لو شرحت اللي بها شفت الكلام ايطول
	لجمال اللي بها يلفت نظر ويهول
كنها ريم(ن)سمع صوت القنص متزول
	والمولع ينمزع قلبه من المعلوقي
الجمال اللي عطاها ربنا مطغيها
	يالعل ابليس مايلعبها ويغويها
ليتها تخزيه ثم اتخاف من باريها
	ياولي امر الجميله فتش الصندوقي
وأرسلت وحده معاها لي كلام بهمسي
	يعني ان اليوم ماهو ياولد مثل امسي
مالك ومال الاوادم في ظلال او شمسي
	وقف الغرنوق يهرج هو والغرنوقي
قلت انا المسلم يابنت الناس صاحب غيره
	ومن جهل في درب منا واجب(ن)تبصيره
والخطا يصير لكن مايجب تكريره
	وراحن الثنتين يمشن مشيهن برفوقي
بعد هذا استغفر الله واخزي الشيطاني
	لاتوسوس ياعدوي قافل البيباني
مستعين الله عليك ايلاهي الرحماني
	لاتزين قطفة الازهار والزملوقي
راحت وفهمت منها دون ماتكلمني
	والذي فهمت ريحني ولا يالمني
يالله انك منها وامثالها تعصمني
	بس ابسوي بذا المزيونه الطاروقي
يعني اني شايب(ن)هواوي(ن)مطور
	وانني عاقل ولاني طايش(ن)متهور
والهوى انا ويش لي به ويش منه ادور
	وحر نعم حر لكن في يدي اسبوقي
من كلام الثانيه فهمت بالاشاره
	ان نفس الادمي بالسوء له وماره
والتقى والعف تظهر بالوجيه اثاره
	وترفع الانسان دايم يامعزي فوقي
ياهلا ويامرحبا في هاذي الاوصافي
	ومن تمسك بالمكارم ماعليه اخلافي
يالله اني طالبك قلب(ن)تقي وستر منك ظافي
	وكان لانفت الذكر معشوق لي معشوقي
وادري اني بالتقى وحسن السريره سامي
	والحلال الله يعوض كان خالطه الحرامي
ياايلاهي باغي العليا وامس احزامي
	والمخافه منك والله جاريه بعروقي
من لجى بك ياكريم الجود لا ماخابي
	ومن عبادك ياايلاهي واعمل الاسبابي
رحمتك يارب لامني خذيت كتابي
	يوم هذا في نعيم وذاك في نار اللظى محروقي
واسمحولي ياالرجال الغانميني
	بقفل الموضوع الاول واسمعوا هالحيني
يايلاهي للكلام الصايب ان تهديني
	يابنات الفكر هاتي ياهجوسي روقي
ودي احكي ياجماعه مايدور ابالي
	استفيد ويستفيد اللي بعد قاري مقالي
والقصيد ان كان له معنى مايرخص غالي
	ياعساني وان هرجت اصيب في منطوقي
اسمعوني يااخواني اسمعني ياخواتي
	الحياه اللي بعدها موت من بعده حياتي
ليش فيها مانتزود من جميع الصالحاتي
	حثنا بالخير هذا الصادق المصدوقي
ماخلقنا الله عبث لا لا ورب الكايناتي
	وش بقي من خير فينا كان ضيعنا الصلاتي
جددوا تاريخنا اللي بالعصور الماضياتي
	ونرهب اعدانا اقبلانا اهل الغدر والبوقي
قدسنا ياربع يصرخ كل يوم ينادي
	ومايصير ابساحته يفت يفتت الاكبادي
كيف نهنى بالمنام وكيف ناكل زادي
	وحقنا يوخذ نهابه غصب لا مسروقي
وفتنه ابغداد ترهب نارها مشبوبه
	وبوش اخو صهيون والله عارفين اسلوبه
خطت(ن)يقصد بها قتل المبادي والعروبه
	وبتكاتفنا ترى للنصر لاح ابروقي

هذه القصيده معانيها فيها لعلها ترقى لااذواقكم الشعريه

يامن رجايه فيك يارب مايخيبي
	يامن كفوفي من عطاياك ممليه
يامن بي اأمرك تطلع الشمس واتغيبي
	يا منفرد ياربنا بالالوهيه
لعل لي بحبال عفوك مقاضيبي
	ياعالمن بصدورنا كل مخفيه
بديت بك وارتب الشعر ترتيبي
	اقول بسم الله وانظم قوافيه
من هاجس(ن) مع كل مخرام يعطيبي
	اتروح بي مع كل فج(ن) طواريه
ياكاتب اكتب لي ورتب هناديبي
	ابيوت شعرآ تطرب البال منقيه
طرق(ن) لياشلوه لي اللواعيبي
	مع شيلته يشعاك صوت الهواويه
الهاتف اليومه بدال المكاتيبي
	اليوم يكفي عن رسالات خطيه
يرسل علومي للرياجيل ويجيبي
	منهم علوم ايجيبها هاتفي ليه
ياابو هلا ماانته غشيم(ن) بااساليبي
	واضح وصادق مالي اعلوم ملويه
ماجيتني لو ماانت واثق وهاقيبي
	وانا اعرف اللي مايخيب هقاويه
مع الصقور امدسمتني مخاليبي
	ابشر بما تملك إيدي ومساعيه
عرفت خيار القوم فود ومكاسيبي
	واهل الوفاء معهم فاانا صافي النيه
واللي رقى بالطيب عال المراقيبي
	لي هقوت(ن) يمه وله هقوت(ن) فيه
انا ليا مني بدت لي مطاليبي
	انظر وافكر ثم أقرر مماشيه
ذكرت ربعي بالطلب والاصاحيبي
	باالاردن او ابديرتي بالسعوديه
انص الذي ليه قبول وتراحيبي
	اللي يهلي كل ماجوه طرقيه
الطيب بين الناس ساس ومواهيبي
	ومايكسبه ياكود نشمي ونشميه
وماهو غريب الطيب من معدن الطيبي
	ياهل البيوت اللي على العز مبنيه
لو إنها شانت إبحال المشاريبي
	من فضل ربي كل الامور مقضيه
الله يجمل حالكم يامعازيبي
	جانا طلبنا يااخوان السنافيه
الكل منكم يجتلد كنه الذيبي
	وكلن يقول ابشر بما تملك ايديه
مدين انا لمكملين المواجيبي
	يوم إن بعض الناس لا ذي ولا ذيه
وتم الكلام اللي نظمته إبترتيبي
	وعلى النبي صلوا وتمت معانيه