ديوان الشاعر معزي فلاح واصل السحيمي

أقـــيس و آقــاس

يامحسنٍ للناس ياطيب أنفاس
	أبشر بدعوه من يتامى وأرامل
الادمي شعور وأخلاق وإحساس
	وبعض الاوادم صعب معها التعامل
والمجلس اللي جيته تعمس إعماس
	إن قلت أنا ماأجيه بالقول صامل
سوالف(ن) ماتجوز لي توجع الراس
	عنه أبتعد من شان عدت عوامل
يامحمد يروده منافق وهلاس
	بيت الهمل مايروح له غير هامل
إلي نظر بالناس وأقيس وآقاس
	ولا أقول مابي نقص بالناس كامل
بحدود مايعقل أجامل مع الناس
	وألا ببعض أمور ماني مجامل
الرجل لو به شي من بعض الاوناس
	مايشكي أوناسه على كل خامل
والدين للإنسان نور(ن) ونوماس
	إذا خذينا الدين كامل وشامل

رفيق عزيز وكل الرفاقه اعزاء طلب مني ان اقدم شي من الغزل وللمعلوميه جميع قصايد الغزل عمرها اكبر من سن فلاح بعدة سنوات اليكم هذه الابيات من قصايد الغزل

كل مااقبل ليل هاجوسي ضوى
	قلت علمك قال قوافي قصيد
قال اريح قلت لا مالك لوى
	لين اكمل لي طاروق(ن) جديد
وكل مايهب نسناس الهوى
	اتحرى علوم من قلبي يريد
الذي قلبي بحبه ماغوى
	وللغلا نار(ن) يذوب إبها الحديد
وادري انا ويش قلبه لي نوى
	وصح من حقه باامر يبقى عنيد
واهني اللي ليا ضمي ارتوى
	يارد الماء وبيده الحبل الجويد
الوصل تراه للعاشق دوى
	ياالذي حبك جرى بعرق الوريد
لو حشايه من لضى الوجد انكوى
	بس اشوفك في سعاده تراني سعيد
هل ترى نعيش بالدنيا سوى
	ياالذي قربك بدنياي الرصيد
لوبقيت ايام مشلول القوى
	باابتسامه للوجيه ازعل واكيد
اللي آهاتي لمبغضني روى
	ويتصور كل ايامي يوم عيد
ان سمعت الشعر فسر ماحوى
	نظم شعري لك عن احوالي يفيد

صديق قال لي ماتتعب وماتمل من الشعر قلت ايه والله يااخي انه يتعبني ولكن انا اللي معني نفسي بالشعر صدقني يااخي اني في بعض الاوقات يطري علي هاجس اسوي قصيده واخذ لي كم يوم وانا عاصب راسي ومصدع ولاتمشي معي القصيده فااتركها وفي بعض الاوقات تجيني فكرة القصيده وحين ماابدا بااول بيت منها تجيني قوافيها تركض فاانظمها بدون تعب وبعد يومين من نقاشي انا وصديقي جاتني فكرة هذه الابيات لعل يكون فيها شيئآ من الفائده

بدايت كلامي دايم اقول بسم الله
	وابدخل بجو الشعر واقول ماياتي
يقولون كب الشعر واقول لي معاه
	صداقه وخوه والشعر شي من ذاتي
انا كيف اكب الشعر وانا رفقتي وياه
	لها فوق خمسة واربعين امن السنواتي
خوي(ن) قديم وله معزه وقدر و جاه
	اموثق معه من صغر سني علاقاتي
اقدم له اليمنى ليا مد لي يمناه
	وياخذ مطاليبه ويحضر طلباتي
ليا قلت له مشتاق لك جاب لي ماابغاه
	خوي(ن) وفين فيه ماتخيب هقواتي
مادامه وفي(ن) لي انا له محب اهواه
	ونظم القوافي فيه بعض الملذاتي
مادامه ليا ناديت له قال لي هاه
	واحلق معه بااعلى جبال السرواتي
هلا فيه هاجوس الشعر مرحبا حياه
	هلا فيه جايب لي جزيلات الابياتي
قصيد(ن) مايبقى في عقول العرب صداه
	ابه نقص لو له صفقت بعض الاصواتي
ومادام القصيد ان مر يقال من سواه
	قوي او ضعيف اتكون عليه بصماتي
ابنظمه واسطره ثم اعيد اقراه
	وعلى مااتورى فيه اصدر قرارتي
اما مقتنع باللي نظمته وفي معناه
	والا عندي اشيله ابدرج الملفاتي
حياتك نكد وهموم ياتارك الصلاه
	عسى ربنا يهديك الك ماني بشماتي
وكل ادمي يلقى الذي قدم ابدنياه
	في الاخره مرصود له بالسجلاتي
بلا دين يامخلوق وش خانه الحياه
	اكيد الحياه تكون هم(ن) وحسراتي
من المنظر اللي كل نفس(ن) تبي تلقاه
	اللي كل ماشفته تجيب العين عبراتي
امن سكرته رحماك يارب واهآ واه
	على حالي اليا صرت من ضمن الامواتي
انا في رجا اللي مايخيب الذي رجاه
	امنزل على خير البشر صدق الاياتي
طلبته تعالى من طلب خالقه عطاه
	كريم(ن) رحيم ارجوه غفران زلاتي
إلي رب سبحانه ارجو رحمته واخشاه
	عليه اشكي اوناسي وارفع له معاناتي
إلي رب سبحانه انا محتمي بااحماه
	إلي رب واناجيه في كل الاوقاتي
إلي رب سبحانه ماخاب الذي دعاه
	اللي فضل المسلم بحفظ الصلواتي
إلي رب سبحانه ياسعد الذي ناجاه
	امصرف ماضم الكون يسمع امناجاتي
إلي رب سبحانه ربحت ان كسبت رضاه
	الا ياقريب امجيب تجيب دعواتي
ياسامع كلام اللي ياربي رفع شكواه
	وانته فوق عرشك فوق سبع السمواتي

اليا صفن وروقن فيك الافكار

ياالراس شف ليه امن اخر قصيدك
	اليا صفن وروقن فيك الافكار
وش فيه لو بينت بعض جديدك
	الشعر له عشاقه اكبارواصغار
عطني وهاجوس القوافي عضيدك
	شعرآ بسوق المعرفه غالي اسعار
وقبل مايمشي بالرساله بريدك
	من اطايب الكلام تنقى واختار
للشعر نقاده فحكم نشيدك
	افطن ترى للهرج مدخل ومظهار
ياالله يامصرف ومحصي عبيدك
	منك العفو والستر ياالله ياستار
يامن ماظم الكون في مسكت ايديك
	وكلنا لك يسبح لك اجلال واكبار
يالادمي احرص على مايفيدك
	بدنياك قبل انك اتسافر امن الدار
واطلب اهداية ربك اللي يزيدك
	توفيق واهدايه ولايلاه غفار
وللاخره اتعب وزود رصيدك
	اللي بها جنات مع حور وانهار
ماينفعك ولدك ولاحفيدك
	بيومآ يوزع فيه محصول الاثمار
وياابليس مايثر علي اتهديدك
	احرك لو وقفت قدمي بالاذكار
اذلف ووجه يم حزبك وعيدك
	اللى لهم تدق طبله ومزمار
اللي محبتهم جرت في وريدك
	اللي توردهم بااساليبك النار
من طاعك امن الناس هذاك سيدك
	ياكثر من دهواه شورك يامكار
لا اغويت كم انسان هذاك عيدك
	كم غافلن جريته ال شلة اشرار
اتصيد ناس وفيه ناسن تصيدك
	هبيت ياويلك من اصفوف الاخيار

حياتنا ذي بعدها موت بعده حياه

حياتنا ذي بعدها موت بعده حياه
	ياالادمي وش بها دنيا النكد والغرور
الا بتزودك لليوم الذي ماوراه
	الا نعيم اوجحيم(ن) من غضبها تفور
سعيد من وفقه ربه وفاز إبرضاه
	واهني من يكرمه يوم استلام الاجور
جنات ربي جعلها لكل عبد أتقاه
	اعوذ بالله من دار الشقا والثبور
والنار للملحدين الجاحدين الطغاه
	المنكرين الأله اهل الكفر والفجور
يارب ناجاك عبد(ن) رحمتك هي مناه
	وانت الغفور الكريم وكل عبدك قصور
يامعتلي فوق عرشه فوق سابع سماه
	ياموجد الكون كله يالعظيم الغفور
ياخالقن ذا الوجود امدبرن مااحتواه
	ومفنيه محييه سبحانك ليوم النشور
يامصرف الخلق سبحانك ماغيرك اله
	محصي مابالارض واللي بالسماء والبحور
يامقسم ارزاق خلقه ياجزيل إبعطاه
	يامزين الارض مده في خضار وزهور
يامكرم اموحدينه بالعفو والنجاه
	اليا بعثت الخلايق من بطون القبور
يامن مايخفون خلقه يعلمه ماخفاه
	سبحانك المطلع بااللي خفا بالصدور
ياواحدن مايخيب المومن اللي رجاه
	ابدون عونك مانفلح في جميع الامور
الحمد لك يامجيب الداعي اللي دعاه
	على المرض والكدر والعافيه والسرور
ومن بعد ذا يافلاح ازهمك لي قول هاه
	ركز معي في بيوت امرتبه في سطور
كانك تحب المعاني عطني الانتباه
	خذ لك من القافيه فنجال كيف امحكور
الرجل مدحه وذمه مرتبط بجلساه
	ياطير ياطير خلك من خيار الطيور
واطلب من الخالق الوهاب ستر وغناه
	وفي طاعته يافلاح اذهن يجيبك فتور
اهم شي إبحياتك يافلاح الصلاه
	حافظ عليه ويوفك اللطيف الشكور
يعيش كل السعاده من ايلاهه هداه
	أي والله ان الهدايه نور للعبد نور
وترى الكدر والقلق طاعة ايلاهك دواه
	وخلك على قاسي الايام رجل(ن) صبور
الوقت مايدوم في مره ولا في حلاه
	عيشه وبالله توكل والليالي تدور
وزلة رفيقك تراها ماترخص غلاه
	عضدك ليا وصلت الدعوى مماسك نحور
والضيف حلو النبا له قدمه مع عشاه
	في واجبه لايسبوك العيال الصقور
والجار ياكبر حقه به حديث(ن) رواه
	شفيعنا لاتجمعنا ليوم العبور
اما الخوي يافلاح ادخيل عمره فداه
	وفَعَلّ انويشي من اجله فعل طيب امخبور
فعل(ن) ينومس قبيلة حرب باقي صداه
	من فعلهم كل حربي والله انه فخور
ولي يم موضوع باقي يافلاح اتجاه
	البندق الطايشه من يمنا ماتثور
الشعر ينخى عمالقته اجيبوا نداه
	يشكي على اللي على كسر القوافي غيور
ويقول فكوه من لايعًرفه وابتلاه
	باسلوب راقي مايجرح للاوادم شعور
يامدعين الشعر لاتنزلو مستواه
	ترى الشعر له مكانه من قديم العصور
الشاعر اللي بشعره شجعوه ازملاه
	شعره ركيك ويعيبه ضعف معنى وكسور
اذا ماشعره قوي لايطيع راي اخوياه
	لو قصدهم حسن نيه له يبون الظهور
يمر شعره ولا له ذوق ولاطراه
	لو صفقو له مجامل بالقصيد الحضور

نبغى ياجيبى لنا مشوار

البيت ممل مجلاسه
	نبغى ياجيبى لنا مشوار
القلب لادق هوجاسه
	بالراس تزاحم الافكار
والليل لاهب نسناسه
	سريت بسم الله الجبار
ياراكب اللي قوي باسه
	جيب(ن) يسمونه الجكسار
على المواتر خذا رياسه
	وعند الرياجيل له مقدار
من يملكه شامخ(ن) راسه
	والعيب به غالي الاسعار
اباانشله وابعد ارماسه
	عمار يافزته عمار
عليه ابدور اناسه
	من ديره اسج لي بديار
الراس مايطير اعماسه
	ياكود بالبر شبت نار
في فيضت(ن) يصفي احساسه
	من ريحة العشب والازهار
والرجل مايشكي اوناسه
	الا علي ربه الغفار
والرجل يزود نوماسه
	بكرامه الجار والخطار
وكلن مماشيه مع ناسه
	والحر مايماشي الا احرار

أنا إليا مـن بالـي ضـاق

أنا إليا من بالي ضاق
	أزبن على مجري الافلاك
يامصرف الكون يارزاق
	يامالي إكفوف من دعاك
يامنشي(ن) بالمزن براق
	يامنزل الغيث من سماك
قبل ماتلتف ساق بساق
	رحماك ياخالقي رحماك
كل إجتماع وبعده إفراق
	الموت ياغافل بدنياك
ولا زان جوي وفكري راق
	ياهاجس الشعر لي معاك
جلسه وأسطر على الاوراق
	بعد أتهرج أنا وياك
ماجاء براسي وليه لاق
	علم(ن) براسي هلا حياك
والناس مختلفه الاذواق
	ماجاز لهذا ماناسب ذاك
والكبر والحسد والنفاق
	أمراض للآدمي هلاك
والخلق في دبرة الخلاق
	وش لي بذولا ولا ذولاك
ويامرحبا بطيب الاخلاق
	بك ياهلا وياهلا بشرواك
ترحيب والله من الاعماق
	يااللي ينومسني مخاواك
ياأبو هلا لجيتك مشتاق
	يااللي تحوش النعم يمناك
يااللي على الطيبه سباق
	الناس تفاخر إبغلاك
من صغر سنك لها عشًاق
	مرحوم ياشايب(ن) رباك
ويامعود(ن) نفسك الإنفاق
	أفضل شهر بالسنه ناداك
بالجود حلق مع الآفاق
	كم دمعت(ن) سايله تنخاك
أجبر خواطر وبل أرياق
	بالمد من مد من عطاك
وأطلب من إيلاهنا الاوفاق
	وربك بما تقدمه يجزاك
بيوم(ن) تطاطا به الاعناق
	من هوله أطلب عفو مولاك
وياالشاعر الناقد العملاق
	ياواسع العرف والإدراك
أبيات نظمتها على آق
	وسلامتك ختمها وإعفاك

بسم الله الرحمن الرحيم

لاشك اننا نتالم من حال اخواننا بغزة نسال الله ربنا الكريم ان يتقبل شهدائهم ويثبت اقدامهم ويسدد رميهم في وجه الطغاه الصهانيه المعتدين ولانشك ان العزه والتمكين لديننا العظيم الاسلام وهذه الابيات جات من معانات اخواننا بغزه

اثبتوا ياابطال غزه واطلبوا عون الله
	والنصر لاشك ياالابطال من عند الله
الموحد والمجاهد دايم(ن) معه الله
	النصر ياابطال غزه ولعن انواره
اثبتوا ياابطال غزه والشهيد اجناني
	ذا وعد من ربنا المتفضل المناني
واطلبوا مد العظيم الدايم الرحماني
	وقوة الله فوق ماترمي به الطياره
ياعرب ماتشاهدون اللي يصير بغزه
	وتطلب النخوة وتصرخ بالعرب معتزه
والجهاد الله اكبر راية مرتزه
	التخاذل ياعرب ماتنفضون اغباره
ياعرب غزه تصيح ويكفي اللي جاها
	والنفوس اللي نشاهد كل يوم اشلاها
من بني صهيون تكفوا تاخذون اثراها
	من يبشرها بفزعتنا عطته ابشاره
ياعرب غزه تقطع صوتها تنخانا
	هقوت(ن) فينا اليا صحت لنا تلقانا
ياعرب لبوا نداءها والسعد يبرانا
	وخير قدوه بالجهاد المصطفى وانصاره
ياعرب تاريخنا كله فخر وامجادي
	نحمد اللي عزنا بالدين هو الهادي
ياعرب قومو وثوروا والسعد ينقادي
	نعلم انه مايصد الغاره الا الغاره
ياعرب مايرد بطش القوه الا القوه
	والتكاتف والتعاضد بيننا والخوه
قوة والمجد حنا معتلين اعلوه
	ومايهجد صهيون لين إنًا نطفي ناره
واسمعوا ماقالت اكلينتن وقال اوباما
	قالوا الفزعه مع اسرائيل شي الزاما
والسلام اللي تمنونه تراه اوهاما
	افهموها ياعرب توضيح ماهي اشاره
ومن يعين اعدائنا ماللعلاقه
	معه داعي نعنبوها من صداقه
تدرو إنا لو حرمناهم وقود الطاقه
	كان اخذنا حقوقنا وانفوسهم منهاره
ومايصير بسوريا اخواننا يئلمنا
	وعن نوايا الشيعه الملعونه يعلمنا
وديننا في نجدة اخوان(ن) لنا يلزمنا
	يوم يابشار لك ذباحه وقباره
نطلب الله قايد الامه يقوم امعافا
	ماعلى الامه ليا منه تعافا اخلافا
يابو متعب وانت كل العدل والانصافا
	العرب في حاجه لوقفاتك الجباره

ربعي السحمان تقهر باللقاء الصاطيني

البدايه بااسم ربي خالقي سبحانه
	بااسم ربي مبتديبه كل صعب يليني
يامقدر يامدبر ياعظيم بشانه
	كل مالي تكتبه ياخالقي مرضيني
يامضل المومنين برحمته وامانه
	ماطلبت الا انت يامعبود وانت امعيني
للقصيد ان جاء مجال وفتحن بيبانه
	ياحلو قاف(ن) على المعنى مع التلحيني
والكلام اللي بلا معنى ولاله خانه
	بااتركه عني يسار وعنه اروح يميني
والقصيد اليا نظمته حابكه باأوزانه
	دلوي إن ميلتها مع الدلي ترويني
جيت أشارك مع الشعار في ميدانه
	جعل لي راي(ن) مع الشعار ويقديني
باأنتقي مايليق للجمهور من بستانه
	يابنات الفكر هاتي والعرب توحيني
يالله بقاف(ن) يجمل والوفاء عنوانه
	وإن نزل سوق المعاني غالي التثميني
يالعل بيوت شعري هادفه مليانه
	ياالله بقاف(ن) يجمل طالبك تهديني
للعقول اللي لشعر(ن) هادف(ن) طربانه
	ياهجوسي هندسي قاف(ن) ملي وأعطيني
الشعر معنى وهدف ماهو بيا دانه ولايادانه
	والرجال إذهان أنا داريبها وصاحيني
وكان قلنا شي من لولوه ومرجانه
	من فضل ربي ولي خبره معه تكفيني
وبسم إبن مرزوق عبدالله وبسم أعوانه
	مرحبا بضيوفنا وأربوعنا وأهليني
عد منهو زار بيت الله وحب أركانه
	ياهلا بربوعنا الادنين والقاصيني
مرحبا من قلب كل إسحيمي(ن) ولسانه
	زادنا تشريفكم أنس وفرح ذا الحيني
مرحبا والكل ندري له مقام وله مكانه
	مرحبا بوافين جو لمناسبة وافيني
حفلنا يبهج وجمع الربع والله زانه
	ووقفتي قدامكم ياربعي أتنشميني
ترفع الرجال لمت لابته وأخوانه
	مرحبا باأهل الوفاء ترحيبة الغاليني
ويوم كل(ن) يفتخر بوصوله وجدانه
	السحيمي يفتخر في طيب الجديني
يوم فعل القوم يظهر باللقاء برهانه
	ربعي السحمان تقهر باللقاء الصاطيني
في زمان الرجل متعب بندقه وحصانه
	يوم كل(ن) يعتزي لاجاء النهار الشيني
والنفوس إمن الطمع ومن الجهل وجعانه
	قوم تنطح قوم تهبا يازمان البيني
والقبايل كلبوها إبعضها طمعانه
	لابتي مع القبايل ذكرها يعليني
ومرحبا والبيت ماياقف بلا عمدانه
	وكلكم غالين مثل إعيوني الثنتيني
والتحيه من معزي بالختام لعزوته سحمانه
	من سما طيبه الى صبحا الى الضلعيني

أبيات مرسله الى اللواء عبيد الخماش العتيبي عام 1400

قال الذي قافه عن الميل قاديه
	يدرس معاني منطقه قبل يكتب
بااسم الله اللي خالق الكون مفنيه
	ولا لنا غيره إله(ن) ولارب
وسر ياقلم راعيك سطر قوافيه
	قول(ن) نظمته لي حوفه مرتب
ويارايح(ن) للفوج تكفى توديه
	وده لمنهو بالمواقف إمجرب
وده لحر(ن) نفتخر به ونغليه
	كاسب نعم في كل موقف إمشبب
وصل لاأبو ماجد كلام(ن) منقيه
	الطيب اللي خوته لي مكسب
القرم ناخذ منه جابه ونعطيه
	وأدري كلام الرجل عليه يحسب
عليه موضوعي أبقول وأبديه
	وأبغى مرد الطيب اللي محبب
أنا بلايه آدمي مولع(ن) فيه
	غلاه في وسط الضماير تشعب
صدفه تقابلنا على عد واديه
	وصار الغلا مابيننا والهوى هب
منه الغلا ليه بدت لي مواريه
	وماأدري لو إنه بالعشاشيق يلعب
بالوصل واعدني وشاريني أشريه
	أبو خديد(ن) بالبلد نور كهرب
يغار منه الظبي سبحان معطيه
	جمال منه الريم لامر يغضب
إيدمر العشاق بسهوم عينيه
	بقلوبهم يشعل جحيم(ن) تلهب
ياحلو منطوقه إليا جيت احاكيه
	وعقله رزين وفي كلامه إمودب
مخلوق يازينه إيلاهي محليه
	على خواته بالحسن فوق كوكب
سطى على قلبي وشاله باأياديه
	ابو جديل(ن) بالشمطري مخضب
الله من شر أهل الحسد يحميه
	أنا أشهد أنه بالهوى فيه أذنب
جرح الهوى اللي منه ماأحد(ن) يداويه
	الا وصاله يوم لي به تسبب
يلومني خبل(ن) إكبار(ن) علابيه
	ماذاق لوعات الهوى مابعد حب
ماهمه الا اكله إمن الميز يابيه
	ياعنك ماهو من هوى البيض متعب
وربيع قلبي في دواثر حراويه
	ولا هم من الصيعر ولاهم من أكرب
نعم بشرع الله أحبه وباغيه
	ومن غير هذا من إيلاهي إمراقب