ديوان الشاعر ذاير رشيد السحيمي

حنان وحب يجذبني وأنا في حبها ولهان
	أسم طيبه على بالي بحلم وعلم يراودني أسم طيبه على بالي
يبرهن بالوفاء حبي حنون تسكن الرضوان
	وبأمر اللي خلق موسى وعيسى ما يخيبني أسم طيبه على بالي
آلا ياياه يابهجة فوادي بعدك عطشان
	ليا مني تذكرت الحنان الموت يغمرني أسم طيبه على بالي
عسى ربي يسكنها جنات بابها الريان
	علشان السعاده في سعادتها تشوقني اسم طيبه على بالي
بعد شوف الحنون اليوم عناني ترا الوجدان
	اشوف الوقت من بعد الفراق اصبح معاتبني اسم طيبه على بالي
وياما متنها مشتالني ومن ثديها رويان
	وعسى ربي يعوضها وعلى الصدقات يامرني اسم طيبه على بالي
وليا قلنا الحقيقه لو فعلت بوالديك أحسان
	ترى رد الجزاء مانته بحوله لو ملاييني أسم طيبه على بالي
تشيلك تسع وسط البطن ولها خاطرن شفقان
	وفكر في ثلاث سنين بين المتن والحضني أسم طيبه على بالي
نشى لحمي ودمي من جسدها وربنا له شان
	الا يالله يامرسي الجبال الصم سامحني أسم طيبه على بالي
وأنا راضي بحكم الله وهذي سنة الرحمان
	رضيت بسنة الوالي وعسى ربي يصبرني أسم طيبه على بالي
أسم طيبه على بالي وأحب الأرض والأوطان
	وأحب أجبالها وآطلالها بها تذكرني أسم طيبه على بالي

هذه الابيات القيتها في حفل السحمان ناركم حيه

نيابه عن قبيله حرب والسحمان لي ربوع
	ياريف الجار وريفا للخوي والضيف في زاده
هلا عداد ماهل المطر واستبشرت برجوع
	عدد طلع النبات وعد مزنا زاد رعاده
االا يامرحبا باللي حضر من كل فج جموع
	وحضرت هالنشامى هي ربيع القلب واعياده
وسلام الله على اللي صيتهم مثل العلم مرفوع
	ملوكا من ملوكا من سلايل عود واولاده
اهل دينا واهل شيخه عريف وشورهم مطيوع
	يحلون القضايا من عصور العود واجداده
رجال اهل العطاء واهل السخاء في صدورهم مزروع
	وشواهد من مواقفهم تاريخ العلم وامجاده
الا يامستجيب لكل مسلم منحني بركوع
	تحفظ الدين وتحفظ الوطن وملوك له ساده
ترى حب الملك مع الوطن في قلوبنا مطبوع
	نبايع بالولاء لله ثم للملك وبلاده
وطنا ياوطن غالي وطن عنك العدو مدفوع
	نبيع الحال دونك ياوطن واعمار سداده
وطن نعيش في بلاده وطن عنه الدفاع مشروع
	بيوت الله وقبله كل مسلم دين وعباده
فديتك ياوطن دار العروبه ماش شكلك نوع
	وعسى ربي يحفظ اخوان نوره للبلد قاده
ويفكك من شرور اهل الحسد والمبغض المقطوع
	يادار المسلمين اللي حجاج البيت رواده
الا ياراعي الارهاب ياللي بالعقل مصدوع
	انا بنشدك عن دمعه صغير ابوه معتاده
ذبحت ابوه وش مكسبك لا نافع ولا منفوع
	تدمر بالنفوس وبالبلد ومطيع حساده
تدمر في بلدك اطهر بقاع وضامرك منزوع
	خساره ياخساره مانت عارف دين وجهاده
نصيحه ياشباب اهل الوطن هذا غزو مخدوع
	غزو للوازع الديني غزو من الغرب واحقاده
عليكم طاعه الله ثم طاعه للمصطفى المتبوع
	ترى طاعه ولي الامر واجب حق ياافراده

نصيحه لأبنائي

نصحتكم ياعيال بقافا مسويه
	باصوغ قيفانه لكم مستعدا
تمعنوا قافا قويه معانيه
	ذكرت فيه من النصح مايسدا
اقروه لوانه بعيده مغازيه
	والعلم يبقى شامخا مايهدا
اقروا جوابي وافهموا واعتنوا فيه
	وكلا بحبله يالنشامى يمدا
نصيحتي لاتضيع وقولا منقيه
	لايغركم طيش الجهل عين رمدا
ترا الفتى كلاعلى ساس ماضيه
	مابين ابوه وبين خالا وجدا
ولافيه طيرا دون ماكر ربا فيه
	ولافيه مبدا دون عزم ومشدا
اربع الى جات بالولد عز تغنيه
	مع البشر تلقى احترامه مبدا
الصدق والتقوى مع الرجل تحميه
	ومجد الكرامه والشجاعه لابدا
الرجل له مبدا وعرفا يقديه
	والعارفه يقدا ترا مايقدا
احدا على المبدا قويه مباديه
	واحدا يركبها على غير مبدا
العارفه لو تاه يقصر تماديه
	كبوت حصان وللغلط مايردا
الثور يكفي قول عنتر وطاريه
	تجنبه واذهن لصوبه تلدا
من شب على العوج بان العوج فيه
	يبقى عوج في هرج هزل وجدا
والعود الاعوج مايتعدل لراعيه
	تعديلته كسره لايمكن يمدا
كد قالها شاعر تجارب تكفيه
	ابن عمران اللي مع الوقت عدا
من ربعي الغصبان له قاف توجيه
	في قافه الحكمه وزين المشدا
وهرج النقيلي لاتشيله وتوشيه
	واذهن الى جات الوازم تردا
وتراالحسد نارا لاجاء الرجل يعميه
	لاتحسد المسلم بشيا يودا
الى عطيت من العطاء لاتراعيه
	كد قالها حجرف لاجاء الرزق سدا
وابن جزاء وابا الشيوخ لك نسميه
	يعطون ولا يمن العطا كان مدا
اذكرلك ابن غنيم ماكثر حسانيه
	شال العشاء واطعم ضعيفا مخدا
من لاتحزم للمراجل تخليه
	مايرتوي لوهو على جال عدا
مثل الضحاح اللي لاجاء الليل يخفيه
	ولاينفع الكسلان نوم المخدا
ولو المناظر ترفع الرجل وتوفيه
	يكفيه من عرض البشر عود ندا
ولا كل من زين عقاله يهقويه
	ولاكل من يزرع لزرعه يجدا

هذه القصيده ارسلها الشاعر العزيز نياف العمري الحربي عليه

مبداي بااسم الذي بالضيق نلجاله
	خالق جميع الملا عالم خوافيها
فكري تهيض تقلنه صابته حاله
	روابعن نوب مدري وين أوديها
من شافني قال هذا فاضيا باله
	ماهو بداري عن هموما نعانيها
عزي لنفسي من الايام مهتاله
	يافكرتي فالأعباد وفي مماشيها
بيصير عقيل وقته مثل جهاله
	يوم أكثر الناس صدت عن مباديها
كان الولد يفتخر في عمه وخاله
	وأفعال ربعه بحاضرها وماضيها
واليوم صار الفخر لبسه وجواله
	وملابسه أستحي ماني مسميها
ملابس أهل الوطن ماعاد تزهاله
	حتى الأصاله تركها مايدانيها
كثرت عيوبه ومعها شايفن حاله
	عوايد أجدادنا مايعترف فيها
والناصح اللي يبي له خير ماصغاله
	بصيرته تقل رب الناس معميها
لومع خواته جلس في بيته اشواله
	ولايغضب اللي سواته مايسويها
مأقول كل الشباب أشباهه وأشكاله
	فيهم رجاجيل مايسوى مواطيها
فيهم عيال تحب الطيب وأفعاله
	متوارثه طيبها من طيب أهاليها
وياللي تمرون ذاير هاكم رساله
	له القصيده مصخرها ومهديها
عسى دايم وطيب الفال يبداله
	شرواه ناس تنومس من يخاويها
قافا كتبته ولا لي مقصد آسعاله
	ولا ودي إنه عن أشغاله يبديها
وأغلى تحيه مع الأبيات تهداله
	واللي يتسمع لها بلسان ملقيها

الــــــــرد:

بديت بالخالق اللي منشي أخياله
	بامره خياله نشى والأرض يسقيها
ومن بعد ذكرى الولي القاف نبداله
	وجزل المعاني على كيفي أنقيها
أصوغها بالوفاء والطيب لرجاله
	ومن حشمته طيب القيفان نبنيها
حي الرساله وحي القول ومن قاله
	وحي القصيده ومن نقح قوافيها
الصاحب اللي يريح صدر من جاله
	أخلاق مع خوتا بالطيب حاويها
ياراعي الطيب خل الضايع بحاله
	مدام نهج الرجوله مايراعيها
خله يولي مهفه لا تحفواله
	لا تتعب النفس في نصحه تعنيها
ترا مصب الذهب تطلع له أحثاله
	ماعم كل العرب والرب واليها
ولا فيها طير بلا ساسا ومرباله
	واللي يعرف السنع نفسه يربيها
الحر همه إحرار بعالي جبال
	وبه طير همه تضابيحن يغنيها
ماكل من لبس ثوب وكيس إعقاله
	حوا الرجوله وفرض الله يصليها
من لاعرف لازمه ماينفعه ماله
	الطايله دايمن معروف راعيها
النفس مثلك من الأيام مهتاله
	قدامنا مريبد أيامه هجا فيها
جرب وعاصر مرور الوقت واجياله
	جرب مع الناس قاصيها ودانيها
الوقت هذا غريب وصار يرثاله
	متخلط ذيبها ونمر وحصانيها
وقال المثل ملح بيت الشعر بجزاله
	والكلمه الطيبه من حظ راعيها

هذه ابيات مجارها مع الشاعر سعد دومان المحمدي

بديت بسم اللي رحم للذبيحين
	واطفاء لهب ناره وانجا خليله
وكون اجسام وقسم عقول قسمين
	علام في غيب القلوب العليله
ومن بعد ذكر الله ادات القلم وين
	بنرضي اللي له معاني جزيله
حي الجواب اللي على بحور شقرين
	فيه الشعر مع السطر مايبيله
سلمت يالحربي عقيد المسمين
	عصاه عصاتي عصاتن اصيله
الوقت هذا مايبي ناس عجلين
	مايهتجي جيعان بكل البليله
دنيا يابو تركي كما السيف حدين
	وش جاب عود العاج من راس فيله
مرفوع راسك لاقريت الدواوين
	ماتهزنا وان جات كلمه هزيله
نقدر الطيب على الراس والعين
	ولاالردي لابد يلقى عميله
ولنا عصا فولاذ هاذي عناوين
	الكيف فيها ذوق مع كيف هيله
حذرا تبيح السد للي مطلين
	ولك سيف يبتر في معاني جميله
لاهنت جاتك من ابن اخيك بيتين
	رموز رؤس اقلام وقافه كفيله

هذه الابيات ثناء على اهل الطيب القيتها في حفل عند علاث المحمدي

سلام الله على اهل الحفل واللي حاضرن ماجود
	تحيه طيبه بالمسك والعنبر نقدمها
دعيتونا محبه والمحبه كل يوم تزود
	وابو وليد من ربعي رجالن دون لازمها
بني سالم اهل الطالات واهل الطيب واهل الجود
	ربوعن يزرعون الطيب والجيره تقيمها
مشافيقن على الطيب وفي وجه الخصيم اسود
	ولاتكفي قوافي في بني سالم منظمها
قبيله طيب ومروه لها رايه وفعل مشهود
	ولها تاريخ وامجادن وقوانينن تحكمها
قوانينن توارثها النشاما وتبذل المجهود
	ترا هاذي صفات الخير ورب الخير منعمها
وانا من ربعكم مسروح رجالن بالملاقا فهود
	سحيمي والسحيمي عزوتي والجود محكمها
ذخر نجوان معروف الفعايل من قديم جدود
	عريب الساس ريفن للهجافى في مطاعمها
قوي الجاه فولاذن عضيدن بالليال السود
	الى دارت مقادير الليالي شبل ميدمها

هذه الابيات تعبر عن نفسها

بديت باللي عالمن كل الاسرار
	محصي عدد خلقه على كل صوبي
كلن على رزقه سكن فج الاقطار
	للي شمال وشرق واللي جنوبي
ذي حالت الدنيا مصيفن ومعبار
	والرابح اللي مانغمس بالذنوبي
ياطير يانادر على كيف صقار
	العيب عن زند الشجيع محجوبي
حنا لنا ماقف مشاهد الانظار
	ولاحان وقته مانجي له نحوبي
انا عضيدك كان حطت بالازوار
	ونته عضيدي كان عندك حكوبي
وراع النقيلي مالنا فيه مسعار
	ضحاح قاع وهيفت به غروبي
خامس وارحب فيك حشمه ومقدار
	تحيتن منا بصدر رحوبي

[color="indigo"]

هذه الخواطر حملت في يوم من الايام ركاب صوب سكاكا الجوف موتري مكروباص
ولا امشي الا ميه اذا زاد المشي راح مثل خصلت الشفا حتى وصلت ركابي الى سكاكا وابغاه يرجعني الى المدينه المنوره بس يزود المشي وتعبني يعلم الله وبجيب ابيات مختصره
لي والموتر يرد علي وانشالله تحوز على رضاكم



صاحب الموتر

ياموتري من امس متحمل
	والشمس غابت وانا اداريك
غابت ونا بدومت الجندل
	ممشاك هاذا ماهو مسريك
اسرع وقوتك لك مكمل
	ثم هات طبلونك اللي فيك
مرتاح لك كم يامدلل
	والشمس بالبايكه ماتجيك

الموتر

لاتسبني فيك متجمل
	وامشي ميه ليش ماترضيك
عليك بنزىن لي فلل
	وانا علي واجب اوديك
امشي وممشاي مايختل
	وامن الطرق بالمشي يجازيك
وساهر ترا بالمناطق حل
	ويروح راتبك مايكفيك

مساجله بيني وبين الشاعر ناجي الجهني

يا راكب اللي من مديله عشقناه
	الفين وواحد من طراز محبوكي
صنع الخواجه وأتقن الصنع يمناه
	أف آي تكميله ونوعه بيوكي
يشدا لحر معربن ساس مجناه
	جذت مخاليبه وتهيا الفكوكي
يا صل لمنهو من معزه ذكرناه
	معزة ما هي معزة نموكي
ناجي ليا منا نوينا نصيناه
	راعي الكرم معروف ما به شكوكي
والطيب ما بين النشاما كسبناه
	والا الردى لعفن النضا و الرموكي
والشعر وان جاشت خوافيق جبناه
	نصوغهن صوغ الذهب بالسموكي
وانتم رجال الجود والجود شفناه
	شفناه ما هو قول وبالعلم نوكي
أهل الكرم والطيب وأن قيل قلناه
	يوم بعض الناس صابه ضنوكي
والقاف مع قاف النشاما بينناه
	نبغى نتسلى بالمزح و الضحوكي
يفنى العمر و قتنا ما عسفناه
	ما ينعسف وقتٍ مخاليب شوكي
جرب بديوي وقتنا أقصاه وأدناه
	جرب و ينسجهن نسيج السلوكي
لو كان نرسى كالفوالذ طحناه
	يطعن بحربة زان حبل الوروكي
كم واحدا قفى زمانه بكيناه
	وياما غداء لحنيك فوج إمحنوكي
لكن ابنشد ويش رجلن كتبناه
	رجل تعشم به و ثائق صكوكي
له بنت مكرمها وله ناس تقراه
	ولا يغتني عنها بكل الشروكي
أيضا له غليم كم الحلم تلقاه
	نوع الضحاح ومنطوي وسط بوكي
والشيب يركله ولو كان يطناه
	ثم يتجدد مثل رصد البنوكي
يالضيغمي هذا جواب نسخناه
	وترى الجمل يصعب عليه البروكي

رد الشاعر ناجي الجهني:

يا مرحبا في شعر واضح قريناه
	أذني لسمع الشعر ما هو صنوكي
حي البيوك ألفين واحد كشفناه
	اختارها ماهي صناعة لزوكي
سواقها ذاير عسا ما عدمناه
	من الجميح اختارها عن شروكي
شاعر لقال الشعر ياقو معناه
	ما هي سوات اللي لشعره يلوكي
الطيب من بين النشامى حسبناه
	والا الردي يفداك علك معلوكي
أنتم هل الطالات قولا ظمناه
	لاهنت يا صقرا رفيع السموكي
الشعر لادنت هجوسه نظمناه
	نظم الجواهر بالسلوك الدروكي
ما كل واحد يجد اللي تمناه
	ادور به دنياه دور الفلوكي
العمر يفنى وقتنا ما كسبناه
	كلن بهذا الوقت صار محشوكي
الوقت ما يعسف لونا شيكيناه
	ما ينعسف غير الصعب في الشبوكي
قافا على قاف النشامى وزناه
	والشعر فتل ونقض للي يحوكي
اللغز واضح يالسحيمي عرفناه
	مرسوم لغزك مثل رسم الكروكي
الشعر في معناه واضح فهمناه
	بنته تراها صورته بالسموكي
و غليمه شعر الخيال ان وصفناه
	نسج الخيال اللي يجيب الشكوكي
الشيب يركله لونا تركناه
	وتشيبه ناسِ لخشمه فروكي
يا ويش رجل يخبر الى نشدناه
	رجل يحفظ العلم ما هو فكوكي
له بنت تكشف سره اقصاه وادناه
	تامر عليه بحد سيف محكوكي
أيضا له غليم ليا صابه أفناه
	يقضي على عمره بكل الملوكي
والشيب يبعد عنه و إنكان صناه
	إن طال عمره صار فيه اللكوكي
هذا جوابك يالسحيمي شرحناه
	إستقبل إرسالي من إرسال نوكي
وختامها من قافنا اللي بديناه
	من حرف نون وقافه التالي أوكي

ورديت هذه البيتين حليت بها لغز ناجي الجهني

اللغز حله ياصحيبي لقيناه
	جهاز كمبيوتر يخدم الملوكي
وبنته ترا الفاره على راس مبداه
	ويلعبه الفيروس لعب المكوكي

هذه ابيات قديمه ارسلتها الى الاخ العزيز الغالي الشاعر عبدالله سالم الشريف

يا طير يا للي بالجناحين رفا
	يا ليت لي مثلك جناحن أزوعي
لا واهني الطير بالجو زفا
	يا خذ مع الاجواء مسافة رفوعي
قفا بجنحانه وريشه يضفا
	يا خذ مراده وانحدر بالكسوعي
شبيت نار بالحشا ما تطفا
	يا طير عيني جاوبت بالدموعي
الله من همْ بقلبي مخفا
	همْ تحاشا بين حدب الضلوعي
طواريٍن تأخذ على القلب لفا
	تراكمت واصبحت منها جزوعي
تواردن قلبي على شكل صفا
	ما ينوصف همي على كل نوعي
يا لله يا منشي السحاب المصفا
	كونت ماه وبه حيت به جذوعي
جذع النبات اللي عن إلمي جفا
	واسقيت عرقه وازهرت بالطلوعي
تفرج لمن هو حفه الوقت حفا
	يا لله يا لمعبود ما أنته قطوعي
والطيب ما بين النشامى مضفا
	وصفات راع الطيب نفسا ًقنوعي
ومن لبس ثوب الطيب فاز وتدفا
	وثوب الردى ماله علينا سنوعي
وثوب الردى خله لعله يذفا
	و كنز القناعه بالشرف و الطبوعي
ومن حمد ربي بشت ثوبي مضفا
	من عالي الهامه الى حد كوعي
ياإبن الشريف ارسلت قافٍ معفا
	عفيف ما تاقع عليه الدنوعي
عبدالله الشريف قافه مكفا
	عجبني بقافه ورده قنوعي
لو كان مالي بالتماثيل شفا
	يجبرني الخافوق ولا هو بطوعي

الرد

اهلاً عدد مالاحْ برق يرفا
	واعداد ما جمع حصاد الزروعي
باللي شكا هما بقلبه مخفا
	والهم يفرجه الكريم الشفوعي
إن كان ما تندب صديقا توفا
	باق المعاني كلها طرد جوعي
وإن كان تطلب فزعتي ما تخفا
	تجيك مني يالسحيمي فزوعي
نمشي على وضح النقا ما نلفا
	هذا و لا نرضي عليك الهزوعي
وإن كان همك من غزالن معفا
	اعجبك بوصافه حسين الطبوعي
نمشي معك بالجاه لأهل الملفا
	اللي مجالسهم سوات الشموعي
والحر عن درب الخطا يستكفا
	حتى يميز مدخله والرجوعي