ديوان الشاعر معزي فلاح واصل السحيمي

بسم الله الرحمن الرحيم
كل الشعب السعودي يقف اجلالاً واكبارا مويداً ومباركاً وقفتك ايهو الملك الشجاع سلمان ابن عبدالعزيز ويقول شعبك الوفي نحنو رهن اشارتك وارواحنا فدا للوطن الحبيب الغالي المملكه العربيه السعوديه ولاينسى شعبك الوفي وقفت الاشقاء العرب والاصدقاء من الامه الاسلاميه وعاصفة الحزم باذن الله مكلله بالنصر تحيه اجلال واكبار لطيارينا الابطال وافراد قواتنا المسلحه المرابطين على حدود الوطن الغالي لردع من تسول له نفسه من الحوثيين واعوانهم وبمشيئة الله بوقفتك ايهو الملك الشجاع واخوتك العرب سوف تموت احلام ايران وتلاشا مخططاتها

بسم الله اللي خص بالعقل الانسان
	اللي نصلي له بليل ونهاره
سعودية الامجاد ياخير الاوطان
	يامهبط التوحيد يارض الطهاره
يادولة التوحيد مقر الايمان
	اللي نواك ابشر حدك دماره
ياقايد الامه للفعال برهان
	لبيك ياسلمان راس الصطاره
سلمت ياراس الرياجيل سلمان
	عاش الزعيم اللي اموفق قراره
يااصل الشجاعه جيشك ابطال شجعان
	وفدا الوطن الروح ماهي خساره
حنا هل التوحيد والله لنا شان
	يشهد علمنا اللي فخرنا اشعاره
الحزم عاصفته رساله لمن كان
	يابوفهد يجهل افعول النماره
ايران واللي ياملكنا مع ايران
	الحزم عاصفته عطتهم اشاره
حنا ان دعتنا الحرب هلاك عدوان
	ياقايد الامه حكيم الاداره
هلا هلا بالحرب حنا لها الان
	حنا صعاطير العزم والجساره
رجالنا لمقابل القوم ضميان
	يبيع عمره دون جاره وداره
من شب نار الحرب يصلا بنيران
	الحرب دكيناه بألفين غاره
واللي نخانا في ذرانا له امان
	زبن لاخو نوره وجته البشاره
ياعبد ربه من زبنا فلا يهان
	حقه علينا انا نرد اعتباره
واخواننا بالدين نعم لنا اعوان
	ومن شب نار الحرب يصلا بناره
حنا العرب مهما اختلفنا ترا اخوان
	اليا تكاتفنا كسبنا الصداره

بسم الله الرحمن الرحيم
مع تحية إجلال لحماة الوطن البواسل كتبت هذه القصيده

بسم الله اللي على خلقه تعالى رقيب
	إمصرف الكون بامره كل شي ابسبب
الشعر بالمعركه عن واجبه مايغيب
	كم شاعر العاصفه معها إستشاط وكتب
ياكبر حق الوطن شمر ياشاعر وأديب
	من دون حد الوطن كلن حزامه كرب
ياهاجسي حي فالك للنوادر تجيب
	دايم تصوغ القوافي مثل صوغ الذهب
مأحلى القصيده حلاها مثل ذوق الحليب
	مادامها بالوطن بالرأس نشوت طرب
ماني مسوي بيوت اهدافها ماتصيب
	إليا قروها مشاهير الشعر والأدب
يا أطهر بقاع ارض ربي ياوطنا الحبيب
	انتي بحفظ الرجال اللي لك الله وهب
وأبطالنا يوم نار الحرب شبت لهيب
	إمن الصطر كل قرماً للملاقاء وثب
الوضع ياليعربي ماهو بيخفى اللبيب
	ومن بارز الحق فإن الحق فاز وغلب
الكفر فزعة مصالح ياعجب ياعجيب
	ونقول في فزعته صادق لو إنه كذب
ياقادة العًرب قمتوا بالنهار العصيب
	سجل ياتاريخ واحفظ مفخره للعرب
ماهي غريبه تكاتفهم بوجه الحريب
	قمتم ياقاداتنا باللي عليكم وجب
قاداتنا كل ذيباً قام يزهم لذيب
	يوم إبن منصور فزعه من إخوانه طلب
بقيادة اللي يطوع كل كايد صعيب
	تهتز ذيك الدول من صطوته لا غضب
زبنت ياعبد ربه ويل من لك طليب
	انت إبذرا الصاطي اللي يرهب اشجع شنب
سلمان له ضربتاً من صابته مايطيب
	بأعداء الوطن حي والله ضربتاً له ضرب
العزم والحزم والرأي الموفق صحيب
	إبن الزعيم العظيم إبن النسب والحسب
أبشر بفزعه تزلزل يا يمنا الصويب
	يوم الخطر شب فيك ومن وطنا اقترب
والنصر بإذن الذي عونه طلبنا قريب
	لو صار بك يايمن مثل الذي في حلب
افعالنا كل راس وبأس منها يشيب
	يوم أرزمت بالبلا بقعاء نفك النشب
إيخطط الرافضي ومخططاته تخيب
	من حربنا والله انه خاسرا ماكسب
موت إبقهر ياخميني مع كلاب الشعيب
	وشر ذمتك باليمن مابين غار ولهب
يالرافضي خبت مع صالح ردي النصيب
	شبيتم الحرب واليومه لها انتم حطب

بسم الله الرحمن الرحيم

يامن جميع الخلايق تاقف امامه
	رحماك في يوم لانعلم متى اوانه
الموت كل الخلايق تطعم الآمه
	الدايم الله ابجروته وسلطانه
وكل آدمي ماعمل يلقاه قدامه
	في ماقفاً عند رب الخلق سبحانه
وابيلس بكتاب ربي قال بقسامه
	افادنا ربنا بقوله بقورانه
بدروبنا ماحيينا يزرع الغامه
	لين القيامه ابشره يشعب احصانه
حتى القيامه بكيده راكز اعلامه
	لغواينا اعوذ بالله منه واعوانه
وتارك صلاته اشك ابصحت اسلامه
	تارك عمود الفرايض ناقص ايمانه
تارك صلاته وش المكسب من اصيامه
	وشلون يرجو عفو ربه ورضوانه
ماجور ياشايباً تراقل اعضامه
	لبيت ربه يعّضده خير ورعانه
يازينها مشيت الشايب وهندامه
	لو انها ترتجف بالمشي سيقانه
كمل ثمانين في ذي السنه عامه
	الله يثقل نهر العرض ميزانه
في طاعة الله امشمر يكرب احزامه
	ويرجو كريماً نجا من طق بيبانه
افضل شهور السنه متغانم ايامه
	ويطلب من ايلاهنا عفوه وغفرانه
جنات رب الوجود اهي اكبر احلامه
	وبذكر ربه مايفتر دايم السانه
ومع التقا الطيب كله لابس اوسامه
	وعالي مقامه ياكبره بالعرب شانه

بسم الله الرحمن الرحيم
ابيات اخاطب بها فلاح

الهاجس اللي بيوت الشعر رتبها
	لاطق بالراس مالي جاز لي جابي
فلاح خذها بيوت ابوك والعبها
	اضبط لحنها وكلفتها على احسابي
لي صحبتاً من بعيد الناس واقربها
	اللي من اقصاء العرب واللي من اقرابي
اهل التقاء والوفاء الله لي حببها
	وبالطيب معهم تدرهم دايم اركابي
يازين جلسه ودله معهم اشربها
	ويازين مرقاي معهم كل مرقابي
واذا القدر بندقه علي زهبها
	وصابت سهومه شكيت لخالقي مابي
واهل الحسد والنمايم ماتغاربها
	اليا اهرجوا في هرجة سوء بغيابي
يهبوا بعض ناس ماخبثها وماكذبها
	اذا التقينا تبسم لي وهلابي
ومن يوم ماقفي حبكها فيّ وركبها
	الهرجه اللي تروق الكل كذابي
ابليس مطيته بالشر يشعبها
	بين الاوادم ويشعل كل مشهابي
الطيبه يافلاح أي بله اكسبها
	الطيبه تلزمك مع بعض الاشنابي
الطيبه ياسمي ابوي مااطيبها
	وعيد النظر في تعامل بعض الاصحابي
اليا بخصت العرب ميزت مذهبها
	وعرفت وش في صدر غالب وغلابي
الصاحب اللي مع الاصحاب خربها
	في جيرة الله بلا تفسير الاسبابي
العاقل اللي ليا فكر وحسبها
	عاف النقاش العقيم وقفل البابي
وابوك نفسه ياكبر اليوم مطلبها
	عفو الذي من لجا بحماه ماخابي
واللي مع اللي خلقها نفسه ادبها
	يطلب توافيق خالقنا من اترابي
كلام من لذة الطاعات جربها
	يارب عفوك ياهازم جمع الاحزابي
من سكرة الموت واشيباه مصعبها
	الموت ذكره يكدر كل ماطابي

بسم الله الرحمن الرجيم
طلبت مني هذه القصيده في حفل زواج زياد عبدالهادي السحيمي

بديت بسم الله واستغفر الله
	لعل لي بحبال عفوه مقاضيب
منه اطلب التوفيق وارجوه واخشاه
	وعفوه نهر العرض كل المكاسيب
يامكثر الشعار يالشعر كثراه
	ويختلفوا الشعار منهج واساليب
كلً تجيب افكاره اللي توراه
	والشعر من جزل العطايا مواهيب
والجزل عراف الرياجيل تبغاه
	الجزل يلقا له قبول وتراحيب
وكلً بشعره مقتنع يوم سواه
	لا كان جمهور الشعر له مطاليب
بعض الشعر مثل الحبال الملواه
	ياباغي المفيد صفرً بتكعيب
ودعوه من ابوزياد جتنا وجيناه
	على الرفاقه للرفاقه مواجيب
اللي بحبه للجماعه عرفناه
	تشريف لاابوزياد وزياد ماغيب
اجي له ابوزياد واجي لشرواه
	دعوة رفيقي ياهلا لازم اجيب
وانسابنا المغاذيه يأهل الجاه
	والنعم فيهم ياعريب المناسيب
والنعم فيهم بالكرم والملاقاه
	انا اشهد ان المدح في ربعي امصيب
وحنا وهم من حرب والحمدلله
	المعدن الطيب عديم العذاريب
مالومه اللي قال لاوحلالاه
	على قصص بكتاب ولف بترتيب
وسمعتها في كل ديره من ارواه
	ودي بها ومن حظ شقر المخاليب
اخذت قبيلة حرب بها المكافاه
	فخرً لها ليومً من اهواله انشيب
وذا الليل يابوزياد مبروك محلاه
	حلاه جمعت ربعنا والاصاحيب
عمار ياجمع الرجال المسماه
	بسمً تفاخر به من اسامي الذيب
ومن قالي سحمان هو ويش معناه
	كل الخصال اللي بها قمة الطيب
المجد له قمه ومنزالنا اعلاه
	دايم منازلنا برؤس المراقيب
ومع القبايل صيتنا حي طرياه
	هالحين وبذيك السنين اللواهيب
وقتً مضا لجدادنا مالحقناه
	يوم الملاقا بالرهاف المحاديب
يوم اللعين ابليس يشعب مطاياه
	بين القبايل خاب خبث الهناديب
يشوش راس اغلامنا يوم يقراه
	وانشوف في وجهه اعلوم وتعاجيب
وبالناس فيه امثالنا اقروم وادهاه
	يامكثر اهل الطيب عكف الاشانيب

بسم الله الرحمن الرحيم

ابتدي باسم الله الرحمن عليه اعتمادي
	الرحيم اللي يجازي كل نفسً في عملها
من ذكر بالرجل مابه ماكذب حسب اعتقادي
	والصراحه كان تزعل ناس ماشقاني زعلها
ماحسب ان فلان يوم انه نخا ابن افلان غادي
	لين جاب العلم رجلً يحتمي كلمه نقلها
لو وصلت اعلى المناصب يابن هن انسان عادي
	آدميّ امن الاوادم والشهاده كم حملها
وادري انك من عرب وانعم لها سلوم ومبادي
	والسلوم الطيبه لابتك ماتقبل بدلها
البياض اقول مدري كيف خالطه السوادي
	التكبر والغرور ان صاب له نفسً خذلها
شفته اسمك ضمن من ينصون في ليل الهجادي
	والنعم كلمه كبيره ماتقال الا لهلها
قالها اللي جابلي من عندك العلم الوكادي
	راح لك حقه عليك وغيرك الطاله فعلها
هن يابن هن ما لبيت صوتً لك ينادي
	وانت قادر تفعل المعروف في قمة جبلها
مانصاك الا وهو حاديه يابن الناس حادي
	نوخ اركاب الهقاوي قدم مجلسك وعقلها
والهقاوي يوم وردً صدرً صفر الايادي
	الضنون اكبار لاكن ياحسايف خاب املها
مايقوم ابماقفه ياكود مطنوخً قيادي
	ان نصوه اهل اللوازم فز وعضوده فتلها
بيض الله وجه كاسب نعم جعله بالمرادي
	الثقيله والخفايف شالها غارب جملها
والختام العون والتوفيق من رب العبادي
	والكبار امن القضايا مانطحها الا بطلها

بسم الله الرحمن الرحيم

الطيب ماكل رجالً لبس تاجه
	من حظ من واقبه رؤس المراقيبي
عبدالجليل ان نصاك امدور الحاجه
	لاتعتذر وانت قادر تفعل الطيبي
نصاك واثق وروح يضجك احجاجه
	ان قمت له يالسحيمي قومت الذيبي
اليا نشدوه العرب بك قال ماواجه
	كمل لناصيك يالقرم المواجيبي
والناس بالناس وانا ابوك هراجه
	لاتصغي اذنك لشذاب العراقيبي
وان حل بك ضايقه خلاقنا ناجه
	ارفع يدينك ويعطيك المطاليبي
دنياك لو اضحكت لك ضحك غناجه
	خداعتاً صفوها زيفٍ واكاذيبي
حياتنا اكدارها بيديننا اعلاجه
	طاعة كريمً رجانا فيه مايخيبي
واصحابك ان شفت منها اعلوم منعاجه
	بالناس ماتعدم اخيار الاصاحيبي

بسم الله الرحمن الرحيم
شاركت في هذه القصيده في زواج الاخ مرزوق رزيق البركاني في تاريخ 3/10/1437هجري

بسم الله الدائم وغيره وجه ربي مايدوم
	الخالق الوهاب عالم بالصدور الخافيات
يا الله منك العون والتسديد عونك يالرحوم
	يا خالقن خلق وحيات وموت من بعده حيات
وبعد السلام ورحمة الله وابركاته للعموم
	صلوا على خير البشر مني عليه ازكى صلات
والحفله اللي تجمع اهل الطيب لو ليله ويوم
	يابوزبن يبقى لها ذكرى من احلى الذكريات
ومرزوق واللي مثل مرزوق ابيض الوجه امخدوم
	علي في حفل الرجال اللي دعوني واجبات
وبعونه الفرد الصمد معبودي اسد اللزوم
	زهمت جزلات البيوت وجن لي امهرولات
جينا انشرف ربعنا والشعر جاء معنا امعزوم
	معي احضرن النادرات الوافيات امرتبات
الجزل مطلبكم وغيره منطقي عنه امحشوم
	ما للقصيد ان ما لقي ترحيب ذوق ولاحلات
والشاعر اللي دائم الجزله عليها له وسوم
	ماجاب غير اللي صداها يدخل اعقول الدهات
في حفل ربعي ياشعر صافح بمعناك النجوم
	نبغا المعاني ضرب بندق من افمي المفردات
يا رحامنا يا ربعنا افراحكم عسا تدوم
	لاهل الوفاء جموع الوفاء ياتون من كل الجهات
يا رحامنا يا ربعنا ياهل المبادي والسلوم
	يشوش راسي وانطنخ وانا هنا ابحفل ابركات
اعيال ابن مرزوق كسابت نعم عوق الخصوم
	ضرباتهم يوم الملاقا بقبلاهم بالغات
اعيال عوداً وزعته بالطيب من خير القسوم
	ومن لابتي حرب الحرايب كاسبين الطايلات
من قوم ابن موقد ومن يجهل ببن موقد اعلوم
	ينشد اكبار القوم والاخبار بصدور الروات
يوم القبايل بالجزيره قوم تنطح جمع قوم
	ومطارد الفريس بظهور الخيول المسرجات
يوم المغازي والفقر والجوع والامن امعدوم
	لطريس ابن موقد فعايل بالدليل امثبتات
ومرحوم مشعان الظفر والدين زيزوم القروم
	فيه المدايح بالصحيح امعقلات اموثقات
ما للكبار امن القضايا الا قويين العزوم
	تصغر لمشعان الكبار وبه تهون الكايدات
وانا من اللي من يقابل كونهم طاح امهزوم
	وكل الخصال الطيبه فازوا بها علمن ثبات
سحمان يوم الطيب منه الناس معطى وامحروم
	مع القبايل صيتهم رؤس الجبال الشاهقات
اسجلهم في كل علم ايبيض الوجه امختوم
	في وقتنا الحاضر وفي ذيك السنين المرمسات
ومن يهضم احقوق القبايل يلحقه شرهه ولوم
	كل القبايل فيهم الوافي ومحمود الصفات
وتمت بعون الدائم اللي غير وجهه مايدوم
	وصلوا على خير البشر مني عليه ازكى صلات

بسم الله الرحمن الرحيم

هو كيف يفهمك والافكار متصلبه
	ونصاب ومهايطي رفع له المال شان
لاتناقشه ياوسيع العرف لاتغلبه
	وقله اموفق يالو خالف لراي الخوان
نيتك ياهن يابن هن متقلبه
	واذا الصراحه تزعل يالله المستعان
راياً يتعبك ولا راي تدل به
	درباً يوصلك بالممشى لبر الامان
مادام ذاك المكان امناسبك ضل به
	في قمة الضلع والافي سفوح الطمان
عندك حلالك وبالروض الخضر فل به
	وترا الليالي تقلب ماعليها ضمان
ماني امنشد ضمير افلان وش حل به
	مايخصني شان مع ذول او لذوليك زان
ابياتي ان راق لك مضمونها هل به
	وان كان ماراق لك قل ذي زلة السان
الرجل يحسب عليه الهرج لو زلبه
	وماجاز لفلان يمكن مايناسب افلان

بسم الله الرحمن الرحيم
دعاني الشاعر متعب علي الترجمي الحربي لحفل التراجم الذي مقرر اقامته في 27\1\1438 وأجل لوقت لاحق فكتبت هذه القصيده

بسم الله المعتلي باأعلا سماواته
	الخالق الرازق الغفار بادبيه
ياهاجس الشعر علمن لي طرى هاته
	أقلط تقهوى وعلمك بالعجل جيبه
الشعر ملزوم به لاجات حزاته
	والان ملزوم في نظمه وترتيبه
الشعر جاله مجال وزانت أبياته
	بختار لي طرق يطرب من أيغنيبه
متعب دعاني وحي الله دعواته
	الشاعر اللي اتنومس حرب أساليبه
قريت ياعوف قبل أسبوع جزلاته
	يازين طقه ومضمونه وتركيبه
متعب ومثله أتنومسني أمخاوته
	اللي لربعه نعم وافي لاصاحيبه
أبدعوته جيت طاب وطابت أوقاته
	مادام ربعه وربعي هم معازيبه
العزوه اللي يرف المجد راياته
	باأفعالها وطيبها ياحرب أماريبه
الطيب ياربعنا فيكم علاماته
	قوماَ أتكمل لناصيها مواجيبه
ذا الليل يامطيبه ياحلو ساعاته
	لمة رفاقه وجمع الله أمواصيبه
بضيافة اللي مع أهل الطيب بصماته
	وتاج النعم يالتراجم من مكاسيبه
شيخاَ أتشرف قبيلة حرب وقفاته
	الشيخ تركي احمود الترجمي طيبه
ماهو أبتوه أموثق من سلالاته
	الشيخ حربي أمجوتاَ مناسيبه
الله يبيض نهار العرض صفحاته
	طير أعماس الطراقي حلو ترحيبه
ولو قلت ماغير حرب الطيب ساداته
	زلت لسان الرجل منطوقه أتعيبه
الطيب بالناس الا ياكثر قاداته
	وفعلن ماشفناه لاهل الطيب نوحيبه
واختامها كمل الهاجس أمهماته
	اللي أبراسي لها وجه مناديبه
وسلمني الوافيه وأخذ أمكافاته
	اللي ينزل مقام الشعر ماليبه