ديوان الشاعر مسلم بن غالي السحيمي

هذة الابيات من الشاعر الخال مسلم غالي السحيمي مرسلها الى العم الشاعر علي بن رفاده السحيمي

يابو معلث عند ربعك حشيمي
	لك عندهم منزل كبيراً ومقدار
معروف رجلاً بالمواقف حكيمي
	مع الكرم والدين ساطي وبيطار
أبن رفاده خابرينه قديمي
	طيب لربعه والبعيدين والجار
ومن النمائم بالاوادم سليمي
	رجال عرف وميز ماهو بثرثار
وسيع بال واخلاق قلبه رحيمي
	لكن عند المخطيه سيف بتار
حبيت ابين في صفات السحيمي
	عساه دائم من طويلين الاعمار
يالله يامحي عظام الرميمي
	عساه مايعرض على صالي النار

هذه ابيات رد على الابيات اللي ارسها الخالي الشاعر مسلم غالي السحيمي الي الشاعر العم علي رفاده السحيمي وجريتها في هذه

هيضني الطاروق بزيين الوسيمي
	فيها الوفاء والطيب من بين شعار
ابيات شاعر ساكن بالنسيمي
	الله يفكه من صواديف الاشرار
الكل منهم رجل عرف وفهيمي
	يازين رفقتهم طويلين الاشبار
منصاوطيب ولرفاقه حليمي
	عمي وخالي من رجال لهم كار
يالله يامسقي هميد الهشيمي
	تحفظلنا شيابنا قبلة الدار
وصلاة ربي ياكريماً عظيمي
	على نبياً صفوة الرسل الاخيار

هذه القصيده لشاعر كان يعمل بالجيش السعودي يوم كان بالاردن
وجاه خبر ان احدا اولاده مريض وتمثل في هذه الابيات يطلب بها
الاذن من ريس السريه النقيب ثواب صالح العتيبي واخذ الى رتبت لواء كان بالطايف ويثني عليه ثناء كثير في حموته ولايبقاء الا الطيب
والعلم الغانم مع الرجال الكلام هذا له اكثر من خمسين سنه

البارحه كني عطيب الصوابي
	اونس بكبدي كن فيها لهايب
والكبد ماتقبل طعام وشرابي
	بعد الخبر دموع عيني سكايب
تكفا يابو صالح ترا القلب ذابي
	على ضعوفً عنهم اليوم غايب
الشاهد الله جاي منهم خطابي
	مذكور شياً يدعي الراس شايب
بينت لك ضروفنا يثوابي
	بلاك مثلي لك عيال وحبايب
والله مازليت حرف بجوابي
	وتراي ماشي ماحسبنا حسايب
والرزق عند الله منشئ السحابي
	ماهو على خلقه بعيد وقرايب

سوى احدا ابناء الشاعر بيت شعردوانيه هديه لوالده وهو مصلح مسلم السحيمي وتمثل والده في هذه الابيات
يقول

ابتمثل يوم جالي مجالي
	بيتً مشيد للمساير والضيف
يرتاح بالي فيه وشوف الدلالي
	يعيش من بناه ليه على الكيف
بناه مصلح مادفعت الريالي
	عساه يسلم من جميع الصوديف
والى جتمعتم كلكم ياعيالي
	تراي انا برتاح وبغى سواليف
والمشكله لاصار جالس لحالي
	تجمعة فيه هموم وتصانيف
وقمت اتذكر ماعلى الارض زالي
	ربعي الحشام اهل القلوب المواليف
وامي وابوي وكم غالي وغالي
	وقامت عيوني تذرف الدمع تذريف
واليا ذكرت الموت وقبرً هيالي
	القلب كنه ينهشنه خواطيف
يالله يامولاي تقبل اعمالي
	وعملي بلا رحمتك ياربي اضعيف
وانك تناجيني بجيم وسوالي
	ومن الصراط اللي احداً من السيف