تعدلـوا ياهـل القلـوب المواليـف

فيه اخوان اثنين واحد راعي دين وامام لمسجد الديره اللي هم فيها، أما الثاني راعي هوى وراعي صيد،
وكل صباح راعي الصيد ياخذ الطير والسلوقي ويراح للقنص وفوق هذا قلبه خضر ومولع في بنت خالته،
وهم الاخوان يتمان امهم وابوهم متوفين ولهم خاله بعيده عنهم شويه يعني متطرفه، راعي الصيد هذا
يخدم خالته والخاله هذي عندها بنت مزيونة والرجال يحب البنت بنت خالته (يعني يخدم الخاله عشان بنتها)
ويبيها على وضح النقا، المهم جاء الليل سوا العشاء وزينه وجاه اخوه الكبير(الامام) وقال طالبك مطلوب قال
الهواوي انت اخوي انت الكبير لاتطلبني امرني امر، قال له الامام انا طالبك وقل تم انا ابروح احج وابيك
تمسك المسجد لين اجي قال الهواوي تعرفني انا اروح الصيد وانت خابرني ماني حول مسجد وانت عارفني
اخدم خالتي قاله الامام خالتنا مرها يوم الجمعه لان ماعندنا جمعه في الديرة هنا انت تصلي من يوم السبت
للين يوم الجمعه الفجر وبعدها تروح للخاله تخدمها وترجع العصر قال الهواوي اذا جاء الصباح يصير خير
ماندري عن خوياك يمكن يهونون ولا يصير شيء الله اعلم، المهم جاء الفجر قام الامام في المسجد وقال ياربع
بعد ما صلابهم سامحوني وبيحوني انا ابروح احج قالوا له الله يستر عليك وتجي بالسلامه مير من يمسك المسجد
قال اللي بيمسكه اخوي فلان (الهواوي)، شافوا جماعة المسجد اخوه، الرجال ماهو راعي مسجد ولا راعي صلاة
قال إن شاء الله فيه خير وقال الامام لخوه الهواوي تراني معود الجماعه بعد العصر بحديث او حديثين انتبه تترك
هالعادة، المهم مشوا وتوادعوا ودراء الهواوي ان الحبال مسكته والرجال اللي هو الهواوي له صوت زين مررررره
وليا جاء يقول الحديث يمده ويلحنه بشكل غريب، قالوا الجماعه ماشاء الله صوتك زين وطيب وليت اخوك مبطي راح الحج
المهم اخذ ثلاث او اربعة ايام فقدتهم الخاله طلعت تسأل قالت يامن يسأل لي عن اليتمان ويش دنياهم وويش
اخبارهم قالو اليتمان بخير ولابهم شيء واحد في الحج والثاني في المسجد قالت الخاله اكيد اللي حج فلان اللي يجينا
(الهواوي) راعي الطروق قالوا لا اللي راح الحج الامام وفلان (الهواوي) في المسجد قالت فلان في المسجد قالوا نعم
فلان في المسجد قالت الخاله الله يهدي من يشاء وفلان ماني خابرته راعي مسجد المهم الخاله مشت وراحت البيت وعلمت
البنت بالسالفه قالت البنت انا ماصدق قالت للأم ابيك تسمحين لي ابروح اتأكد، المهم راحت البنت للمسجد في وقت صلاة العصر
وهذا اليوم السادس تقريباً، ويوم دخل الهواوي المسجد قال للمؤذن اقم الصلاة ، ويوم اقيمت الصلاة ويجي الهواوي
ويقول استوو وبيقول اعتدلوا وعلى التفاته وانه يشوف بنت خالته، كان يجر الصوت بلحن ممدود وصوت عذب ويقول:
تعدلـوا ياهـل القلـوب المواليـف
وصيروا ورى القراي خمسة صفوفي
احلف بربٍ حيـزم الغـرس باليـف
مرجع بصر يعقوب بعـد الكفوفـي
انـك منـاي بلابسـات المشانيـف
واللي كـذب يالله عسـى مايشوفـي
الله اكبر وصلى بهم ويوم سلم من صلاته، وان وراه واحد من عيال عمه لكيع قال يافلان قال نعم قال طالبك انك تعيد
الحديث اللي قلته قبل ما تكبر للصلاة قال الهواوي لا يافلان هذا الحديث اسناده ضعيف ولا يعاد .ابداً.