انا رفيقي ما اسمع اللي حكابه

أنا رفيقي مسمع اللي حكابه
لو جاتني منه السوالف مضاريع

أقراء مفاهيمه وحسب حسابه
وأشوف مدخال القدم والمطاليع

ماني بعجول (ن ) بازعل في غيابه
قدام مسمع منه معطي ولا ابيع

لا خير في رفقه بلياء حبابه
ولاخير في جمع القلوب المواجيع

ورفيقك الغالي تحمل عتابه
واحلم عليه الياء دفعته دوافيع

شيع ثناه ولا تبين عيابه
عاره يعورك يابعيد المراميع

وأن كان دون مرافقك صك بابه
لقه قفاك وخل مشيك مع الريع

خله على بعدك يسرح ركابه
يقضي سنه ولا شهور(ن) وأسابيع

وأذا طلبك الصلح يامرحبابه
سهل طريقه لا يجيله موانيع

واحفظ السانك عنه وأستر جنابه
لاتجرحه بين الذياب المجاويع

ترى اللسان ملكعاً بندعابه
مثل الحصان اللي يبيله مصاريع

واجعل على هرجاً تقوله رقابه
عقل يصرف طايشات المواضيع

والصمت في بعض المجالس مهابه
يكفيك شر أهل الفمي الواسيع

عن كلمة يقضب خطاها قضابه
يركض عليها مصنع الهرج تصنيع

خله يروح ومنك خاي جرابه
يرجع كما المفلس بسوق المطاميع

واحفظ صداقت طيبين القرابه
ربعك الياء قلت عليك المشاريع

سيف نهار الضيق تقضب نصابه
يقاك من حدب السيوف البواتيع

ولا جفاك الدار مالك ومابه
رزقك على اللي طوع الكون تطويع

مقعدك في حزم تطارد سرابه
أخير من شوف الوجيه المدانيع

خطوا الرخوم مصاحبين الخيابه
تجار هرج وبالوازم كراسيع

الرجل مثل الذيب رزقه نهابه
ياخذ مع الدو والخلاوي قراطيع

والطيب ضلع زاميات هوا به
لريح في شامخ ركونه ذعاذيع

عسر المراقي يتعب اللي رقابه
وماياصله كود الحرار القواطيع

ولا الرداء جرف هيال ترابه
حوله لزهران المقافي مرابيع

يرقدبها الحصني ويلقاء الذرا به
والبوم بين غصون قشعه مواقيع

رجلاً على الناموس بيضاً ثيابه
ورجلاً يرقعها على المتن ترقيع

ورجلاً يلازم علته من عذابه
عيدان ناره للقريب مواليع

على ربوعه كل يوم طلابه
خماش وجه ولا لقيبه منافيع

ورجلاً مع الأيام ماينصخابه
عون الرفيق لياء صفعته صوافيع

غيث على من جاه يمطر سحابه
عشبه على روس النوابي مفاقيع

ورجلاً كما ليثاً عطيباً صوابه
من دون حقه سنع الخصم تسنيع

طيب وعصمان الشوراب تهابه
يرجا وتخشاه الرجال الصعاصيع

ومن لا درا بالناس محد(ن) درابه
ماله على سجل النشاما تواقيع

ومن لا يحوش النعم بأول شبابه
في شيبته يحسب حساب المراضيع

وختامها ذكر النبي والصحابه
واستغفر اللي مايضيع ولا يضيع

الشاعر مفرح الضمني المطيري