سر يااااقلم

سر ياقلم واكتب كلامي بعد ماطال السكوت
كلمة وفا وابغاك يا راعي الوفا تفطن لها

الناس فا الدنيا تعيش وفا آخر العمر بتموت
كالشجره اللي مرها العبد وجلس في ظلها

الكل يفنى ماعلى الدنيا مقر ولا ثبوت
بعض المناوي يتعب الرجال ما ياصلّها

اهون بيوت الخلق عند الله بيت العنكبوت
واعظم بيوت الله ليا قدر هدمها كلها

تب قبل ماتطوى السنين وموعد التوبه يفوت
صم زك حج وجاهدُ وكل الفرايض صلها

اذكر نهار يصير قبرك بيت من ضمن البيوت
واهل القبور الله يعلم دوم وش يحصلها

ينزل عليك من السماء مرسول لا وصلك تموت
والروح من بين الضلوع الضيقات يتلها

في ساعةٍ والصدر مابين التضايق والكبوت
وكل العلوم اللي ترى في القلب فمك يهلها

يالله تجعل قوتنا يوم القيامه خير قوت
يامن تعز بعزتك قومٍ وقوم تذلها

هذي نصيحه قلتها مير السموحه في البيوت
أخذ النصيحه وانتفع واما القصيده خلها

نصيحةٍ بارفع بها صوتي وازيد الصوت صوت
أقولها واللي عقد روس الحبال يحلها
------------------------------------------
نأمل بأن تناااال اعجاااااابكم ....... وشكراً ،،،،،،،