ثــوب الـثـيّـبـه

السلام عليكم ورحمة الله وبركاته
اسعد الله اوقاتكم بكل خير

ثوب الثيبه للشاعر عبدالله الدواس قصيده لم امل من قرائتها وترديدها منذ ستة اشهر

ماني وكيل الله على خلقه ولاني نايبه...

أنا فقيرٍ من عجوزه لين رجل شويبه

واللي غرسها بظهري والله يالولا شايبه

إني عن وجيه البشر ياعنك غير أغيبه

لكنّ قولوا له مدامه يحسب إنها سايبه

يظف وجهه ظفه الله دام نفسي طيبه

ماأقبح من اللي لاحكا شق الوجيه الغايبه

وماأخس من وجه الردي لامن سكوته ذيبه

وماأعجب من اللي يبتسم لوكان كبده ذايبه

يغتال حكيه في فمه من خوف بس يعيبه

أحدٍ يجيه اللي يجيه يقول ذا وش جايبه؟!

وأحدٍ يدسم شارب اللي جاه ثم يطيبه

يانفس يبقى طيبها وإلاش نفسٍ عايبه

كب الوجيه اللي لحاها ماتسد النيبه

بخٍ بخٍ ياذا الزمان اللي طغت عجايبه

قطّع مبادينا خلاف وشق ثوب الثيبه

أمد عيني بالنظر وإن جت عيوني خايبه

أسجد وأقول إن القيامه والله أنها قريبه

ياجعل حظي بالنفوس يكون نفسٍ تايبه

وأعوذ من نفسٍ على عشق الحياة مشيبه

هديت صدري في بياحٍ صفصفٍ هبايبه

تظمني ظم الحبيب إليا أختلا بحبيّبه

وأقفيت خلفي موتري يوم المسا ذوايبه

ماذكرتني غير باللي عن سماي مغيبه

وأخذت أقلب هاجسي بالمخطيه والصايبه

ماكني إلا شايب جور الزمان مهيبه

لي اربع وعشرين عامٍ والقهر كتايبه

تاطى على وجه الحلوم وكل ظن تخيبه

يمه ولدك اللي كبر كبرت معه مصايبه

حينٍ تسريه الهجوس وبعض حين تغيبه

يمه وإلا من الزمن كثرت علي طلايبه

أبيك يمه طيبه ماأبيك بس طويبه

يمه وإذا وقفت علي الموت ماني هايبه

ماعادني هاك الصغير اللي يحب كتيبه

يسقيك ياقبري إليا من ركزوا نصايبه

وأقفوا وقلب أمي علي إنشق دم شعيبه

فاإن قيل إبن دواس مات وقيل عزوا شايبه

فلانيب أنا أول من رسول الموت جاه وغيبه

أقول نفسي طيّبه وهي وربي طايبه

لكن عشانك والله إن لاقول نفسي طيّبه