قصيدة ( فخر واعتزاز )

بعد السلام لأبناء هذه القبيلة العريقة وعلى رأسها الشيخ / عبد الله بن مرزوق السحيمي ونائبه الشيخ / راشد بن فيحان السحيمي .
ولا أنسى أخي حسين بن مرزوق السحيمي القائم على هذا الملتقى المبارك أتشرف بالمشاركة بهذه القصيدة المتواضعة والتي أتمنى أن تنال على رضاكم واستحسانكم وأعتذر عن التقصير وتقبلوا فائق التحية والإحترام .
( القصيدة )

سلام مني للربوع المناعير	اللي لهم بالمجد تاريخ يذكر
سلام يالسحمان يمشي طوابير	ويحب ليه خشم حرٍ بعد حر
سلامٍ أحلى من حليب المصاغير	وكنه عسل صافي ولا فيه سكر
واثني سلامي يالنشاما للامير	الشيخ عبد الله زبن كل مضطر
شيخٍ بفعله سير الطيب تسيير	ولو الحمول ثقال في يديه تصغر
ويا شيخنا لك عندنا كل تقدير	دايم لنا تتعب وتشقى وتسهر
وعيال راشد كلبوهم مشاهير	أحرار نسل أحرار فالطيب تشهر
وفي بيرقه راشد تحدا المخاطير	فيه الشجاعه كنها نار توتر
وبربعي السحمان هاجوسي مغير	ربعي وانا في صيتهم دايم أفخر
جتني بنات الفكر ورد ومصادير	اسم السحيمي يطنخ الراس لامر
أبنظم الابيات فيهم بتفكير	ياهاجسي تكفى معي لا تقصر
والنعم والله يالوجيه المسافير	يااهل الجزاله صيتكم والله يسر
شجعان لاثار العسام ومساطير	عدوكم يفنى ومع الشر له شر
عدوكم يلقى السقم والمخاسير	لا قابل الفرَيس له نار تسعر
وتاريخكم يشهد لكم دون تغيير	وكلٍ يقول ونعم وبطيبكم قر
يا ربعنا سطرتم الطيب تسطير	والطيب فيكم خلقته ما تغير
ياهل الكرم واهل الدلال المباهير	فيكم كرم حاتم على الدوم يظهر
وأنتم هل الفزعه بليا تعابير	وأهل الحميا محتمين المكسر
منهو نخاكم يبشر بزين تدبير	يلقى الذي يبغاه ما يمكن يضر
يلقى الحميا تلتعب دون تاخير	ويلقى الشجاعة حوله تكر وتفر
تحميه بعد الله ويلقى التباشير	لاوالله الا بالوفاء دوم يبشر
أنتم سعد عين الخوي للخوي غير	ما يظلم أحدٍ والسحيمي محضر
وكل القبايل يعجز الفكر تعبير	عن فعلهم ما يمكن اليوم يحصر
والنعم فيهم وقبلوا لي تبرير	بَعدّ بعض المجد والقاف قصر
وصلاة ربي عد ما رفرف الطير	على نبيٍ بشر الناس وانذر