لك بالوفاء صيت ومكانه ومعروف

هذه القصيده للشاعر نايف سليمان الطريسي العمري الحربي
يمدح بها قبيله عوف ونايف شاعر راعي وفاء والوفاء من صفات الرجال
وجازتلي هذه القصيده الجزله وجاريتها بابيات

والله لأمدح عوف واثني على عوف
	واشيد وامدح كل من قال عوفي
واهوم وارقى واعتلي راس شفشوف
	في مدح عوف معدلين الجنوفي
اللي عن دروب السنع تقل مصدوف
	ويهز راسه للعرب مثل كوفي
ماني عن الواقع مقيد ومكتوف
	انا صريح وللمجامل عيوفي
وليا مدحت امدح بواتير وسيوف
	مامدح مساكين الملا والضعوفي
ماني على المسكين مجبر ومكلوف
	المدح للي فالمهمات يوفي
واللي بعوف وشايفه ياملا شوف
	ان ماذكرته يقصر الله بشوفي
ولو ماذكر الله بس نبذه من الجوف
	يكفي عن اللي يجتول وسط جوفي
قبيلتن رجالهم يقتل الخوف
	كنه يقول الخوف من عوف خوفي
ورجالهم كنه على الموت مشعوف
	ماشال هم حساب كثر الصفوفي
لاقام يفنيله جماعات وصفوف
	صميدعا وقت اللقاء مايروفي
وليا زهمته للقاء تقل شاحوف
	كنه يقول الموت غاية شفوقي
يرسون فالميقاف لاهب عاصوف
	اليا هباء عن موقفه كل صوفي
والمال ماهم ذاخرينه لجل نوف
	للموقف اللي في مقامه كلوفي
سبعه عشر مليون فالبنك مضيوف
	لجل الحويفي فالحساب محذوفي
قلت الصحيح اللي من الجوف مقطوف
	ماني عن القول الصريح معسوفي
قلته وانا ممنون ماحافني حوف
	مادام عوف طيور شلوى سيوفي
لا جيتهم قامو علشاني وقوف
	وشلون لو اشكي عليهم ظروفي
والله لو حملي ملايين والوف
	لاجيتهم شالوه فوق الكتوفي
رجالهم في كل الاحوال معروف
	وليا ذكرت اسمه تكامل حروفي
المدح فيه يليق والطيب مخلوف
	وعليه فعل النايبه ماتطوفي
له وقفتا يسعد بها كل ملهوف
	وله مدتا فيها تضيع الوصوفي
ماهي بتسكيته ولاهي بمصروف
	مدت يمين الله كريم وعطوفي
كم ذاق من مداته ايدين وكفوف
	تجود كفه عند شح الكفوفي
يسعد بها اللي يشتكي هم وظروف
	لاقال تكفى يازبون الضيوفي
فيه الوفاء والجود واضح ومكشوف
	وشمس الحقيقه ماكساها خسوفي
وله سيرتن ماطالها كل ملقوف
	يدرك مداها كل رجلا عروفي
يسعى الوصول لقمه المجد ويطوف
	اليا قصر عنها جليس الهنوفي
له بالوفاء صيت ومكانه ومعروف
	ذخرا لحرب ومفخره كل عوفي
قلته وانا ممنون ماحافني حوف
	مادام عوف اهل المواقف سيوفي
لا جيتهم قامو علشاني وقوف
	وشلون لو اشكي عليهم ظروفي

الرد

ياللي خلقت لحي من ضلع معكوف
	اقصر ضلع بين الحنايا معكوفي
منشى السحاب وقاد طوف وراء طوف
	ورودم خياله وانهمل بالدفوفي
احيا هميد ونورت غرت الدوف
	وبعد الدهر صارت مهاديف دوفي
الطف بنا في يوم جامع وبنا روف
	يالله يارحمن فينا تروفي
ومن بعد ذكر الله بدا النظم بحروف
	الفرخ جاهز والقلم والزروفي
شعرا بلا معنى مع الوقت محذوف
	الى طال وقته مع بطاه معيوفي
وشعرا ترا يبقى كما النحت بكهوف
	ماينمحي نحت الصخر بالكهوفي
ونايف نقش صم الصفاء باجمل الموف
	مثل النجف صوغ الدرر بالصنوفي
يصوغهن باحلى نظم كافهن كوف
	عساه يسلم من جميع الصدوفي
نايف على اسمه نايفن راس هفهوف
	في عالي القمه ولااني زهوفي
عديت قول الحق في عزوتي عوف
	ولاهمك الحاسد عساه الذلوفي
بين الملا تثني على عوف بكثوف
	ويشهد على قول الربيقي ولوفي
وربعي وربعك كلنا راس وكتوف
	الراس حربي وعز راسي كتوفي
طرسان من ربعي ذرا كل مهجوف
	يشهد لكم تاريخ فعل معروفي
بيت ذراه بقمه المجد ملفوف
	ريف الدخيل اللي ذراه مخلوفي
منكم ولد مطلق مع الترك حذروف
	اضفا الذرا على دخيله ضفوفي
ودون الدخيل افحل شنب صار منتوف
	وتباشرت بنتن بابوها العطوفي
ونعمين يالطرسان ذا قول منصوف
	مايجحد المعروف غير الخروفي
ومنكم درع فارس توطابها حيوف
	من فوقها فرخ النداوي يلوفي
وجات الذلول بدربها الطيب مدفوف
	والطيب من صفات نفسن عزوفي
وصلو على اللي وحد الدين وصفوف
	اعداد من زار الحرم به يطوفي