العذر والسموحه

شافت عيوني قبل يومين لوحه	بين البقيع وبين حي العوالي
دقت على قلبي وصحت جروحه	من عقب كان القلب داله وسالي
لو بشرح الموضوع طالت شروحه	ولو بخفي الموضوع ياويل حالي
في داخلي بركان يزداد فوحه	اليا ذكرت الموقف اللي جرالي
وتعبت نفسي بين جيه وروحه	في زحمة العالم وكني لحالي
شربي قراح وخالطته الملوحه	وأصبحت بين أمرين مرٍ وحالي
وبنيت حلمٍ شامخاتٍ صروحه	وأنهارت بدمعه من عيون غالي
نفسي عزيزه والاماني شحوحه	ولا ودي أخذلي قرار أرتجالي
وقررت ارد القلب واكبح جموحه	وأحط نفسي بالمواقف مثالي
وأبعثر الاحساس وقتل طموحه	وتصير ذكرى عالقه في خيالي
وسرٍ علق بالقلب وشلون أبوحه	مالي جدى الا الصبر والاحتمالي
وأقول ياقلب العذر والسموحه	وتلقى العوض في مقبلات الليالي