ياحن قلبي حن خلج على ظير

ياحن قلبي حن خلج على ظير
= خلج على فرقا الظنا عقلهن فر
بأول ظناهن توهن به مصا غير
= وكل على فرقا ظناها تعبر
لمى غدى النحال مثل السنانير
= على حوار بالمضامي تعثبر
عدى عليه الذيب وسط المغاتير
= وفي غفلة الراعي جرى حادث الشر
امسلوع النيبان راسه جواز ير
= قضه بنيبانه ودمه تفجر
وحامت على تاليه عكف المناقير
= وشبعه بتالي جثته ظبعه البر
وتقابلن عليه مثل النواطير
= لين ايسن واستلطفن واهج الحر
ويوم انوسن حر الظما وردن البير
= وطردن من الماء من سبب شخص اقشر
مقرود ما هو من الوجيه المسافير
= وفي نية المعروف مادرك ولا استر
داجآ ولاجآ عقب طول المشاوير
= وعبراتهن بأقصى الضما ير تكسر
بمصافق الحولات وارد ومصادير
= والماء غريب ولمه الورد تكثر
عليك يا راعي النهود المزابير
= يابو جديل فوق متنه تنثر
عكش على الامتان شقر دعاثير
= سبحان من في خلق عبدة تبصر
والعين عين اللي دعوه الصقاقير
= عدل المناكب صيرمآ حر أشقر
وخدوده الجملات مثل النواوير
= في خايع رتع الدبش فيه مامر
بس الفجوج الخاليات المقافير
= والصيد من قل الونس ماتذير
يا صاحبي من عقبكم كيف باصير
= وانا سهير منك في الليل الاسمر
لاراح في حالي ولامن تباصير
= وانت اتفرج في عنايا واتفكر
جعل السحاب اللي مزونه مباكير
= جعله عليكم من مناشيه صدر

الشاعر جزاء بن صالح الحربي

وتحياتي لكم جميع
بعيد الهقاوي

وصف رااااائع لا يتقنه سوى الشاعر الكبير جزاء بن صالح

رجعتونا للغزل القديم انت وابو مشعل ....
سلمت يابوفهد وعافاك الله يالغالي ...

اخوي بعيد الهقاوي شكراً على اختيارك الرائع وصح لسان الشاعر جزاء بن صالح وبيض الله وجهك على النقل .

تسلم يمينك على النقل أخوي بعيد الهقاوي وبيض الله وجهك وصح لسان شاعرنا العملاق والواحد أذا شاف مثل هذا الابداع يحس بالتقصير مهما قال ،،،، دمت بود

الف شكر لكم جميع على المرور الرائع والجميل
الذي انار متصفحي هذا

كعادته بعيد الهقاوي يقدم الابداع صح لسان شاعرنا الكبير ابو صالح وسلمت يمينك يابو فهد تذكر ايام (ماني ابوزيد ولااني بعليا)

اخوي بعيد الهقاوي شكراً على اختيارك الرائع

الف شكر لكم جميع على المرور الرائع