أحب البر واشد الرحايل

أحب البر واشد الرحايل=وأدور قلب ضايع في البوادي

وأشيد خيمتي والدمع سايل=وأنوح بصوت وأزقر بالحوادي

وأحمس البن مابين المقايل=غريم الشوق والورقه تنادي

وأسلي خاطري بأحلى المثايل =من الليعات وأصفق بالأيادي

وأنا في دار ذربين الفعايل= سناد الضيف يالي بهم سدادي

لكن الحب خذني بالدغايل= وخلاني معذب في ودادي

زرعت الحب في أرض المحايل=وقمت أسجيه من لولب فؤادي

لقيت الارض مافيها صمايل=هشيم وزرعها مثل الرمادي

صبرت أيام وسنين طوايل = وشفت الدرب والمرسى حزادي

وكم هويرت في شمس القوايل=وكم سهرت يوم الليل هادي

ومن عقب التعب رديت فايل=وغيري نال قصده والمرادي

وتم الجيل في ختم الرسايل =عدد ماخط بحروف المدادي

اسمح لي ابدي اعجابي بقلمك وتميزك واسلوبك الراقي وتالقك

الف شكر لك اخوي على المرور الرائع
الذي انار متصفحي هذا