التجارب

صحيح من قال التجارب دروسي
تكفيك عن خبرة ثمانين دكتور
التجربه مدلولها حد موسي
دليل قاطع للمجرب ومذكور
ماهي كتابه فوق بيض الطروسي
علمن عليه اثبات والوقت دستور
ومن لا حصله من زمانه عكوسي
يجهل بماقالوه ويعيش مستور
وانا من الايام ذقت التعوسي
واخذتلي مع جور الاقدار لي دور
علي قامت في رحاها تدوسي
وشنت علي حراب الايام والجور
بالدرب صكتلي وساع النسوسي
يلين حدتني على ضيق السور
وعرفت منها عاشقين الفلوسي
اهل الردى اللي بالردى تنفخ الزور
اهل المصالح زاهيين اللبوسي
قومن على كسب الردى طبعها البور
وعرفت فيها طيبين النفوسي
اللي لهم بالطيب ميقاف مشهور
اهل الوفاء اللي للصعايب تروسي
تاريخهم في ماضي الوقت مخبور
اهل المواقف بالنهار العبوسي
ليا اعتزيت بهم لك يجون طابور
ذولاك فيهم ترتفع كل روسي
وان مر طاريهم تبالج له صدور
وعز الله اني توطابت اهجوسي
والفكر توه راق والبال مسرور
وتو استوى للقاف وقت الجلوسي
وفزيت من مركاي للشعر مجبور
وارسلت مندوب المعاني عسوسي
يجيب من جم البحر در منثور
برضاه والا بامهات الضروسي
ليا دعيته للندى فز مذعور
وجذبت له من طيبات الرسوسي
نبعن زلال وراهين ماه معمور
من فيض وجداني نقي ومحموسي
عن الهزل والنقص محمي ومحظور
وبينت في المعنى خفايا دسوسي
وميزت في ماقلت بالراي بالشور
واخترت منهم طيبين الغروسي
اللي لعيني ترخص المال بالفور
وخسرت في دنياي عرف الطفوسي
قومن مامنهم خير وفراقهم نور
البعد عنهم عيد و القرب موسي
ابعد وخل العور تدله مع العور

الشاعر/عبد الرحمن الرشيدي