ديوان الشاعر معزي فلاح واصل السحيمي

بسم الله الرحمن الرحيم
القيت هذه القصيده بزواج رفيقنا مروان عايض عليان السحيمي لعلها ترقى لاذوقكم الشعريه في تاريخ 1435/10/9هجري

يامن لك التسبيح منا وتهليل
	ونطلب رضاك ومٌنك العفو نرجيه
ياخالقآ ذا الخلق جيلآ بثر جيل
	ومففنيه سبحانك وفي يوم محييه
بك البدايه والمعاني ابتفصيل
	من مبتدا الكلام يالين تاليه
امنسقه وابدا عليكم ماباطيل
	والشعر جزل اوهزل من فكر راعيه
في حفل شيخآ له مكانه وتجليل
	شيخ الخصال الطيبه كلها فيه
مقر عرف وراس منصى رياجيل
	من رؤس ربعي طول الله لياليه
ان كبرت القالات بتاع حلحيل
	وتاخذ رجال العرف رايه وتعطيه
صليب راس وباس راعي معاميل
	علي رفاده حي والله طاريه
الكفو في مدحه يزين التماثيل
	اجاهر ابمدحه وبالطيب اهنيه
اللي لربعه نعم ربعه له اتشيل
	غلا الرفيق اللي كفو يوم نغليه
تشريف له هو والعيال المشاكيل
	ذوي عليان النشاماء بنيخيه
ياحاميآ بيتك بطير الابابيل
	عبدك ابوعايض بجنتك كافيه
وحضرت والحضور واجب وتكميل
	لحقوق ربع الرجل وحقوق داعيه
اما القصيد ابعون ربي تساهيل
	اللي لكيف الشعر ضرمان اقهويه
للشعر كيفآ مثل سوق الفناجيل
	يسوقه الشاعر امبهر الباغيه
وذوقه مثل در البكار المباهيل
	جزل الشعر له ذوق لدى امحبيه
ومن منطق الشاعر تبين المحاصيل
	اما قوي والا ضعيفه معانيه
حياك ياشعرآ يجمل ليا قيل
	يبقى صدى معناه في ذهن موحيه
وافي مايلقى به عليه مداخيل
	الا الصحيح اللي امزين قوافيه
لا دندن الهاجس وجر المؤاويل
	اللي بغيته بالقصيده عطانيه
اليا ورت ارد على صافي النيل
	ولي عودتآ لابد على شواطيه
وصلو على من جاه بالحق جبريل
	شفيعنا في يوم كلن يلاقيه

بسم الله الرحمن الرحيم
كتبت هذه القصيد في زواج العيال الموافق 3\11\1435هجري

بسم الله المبتدى ربي عظيم الجلال
	امصرف الكون خلقنا الغفور الرحوم
ربآ خلقنا لتوحيده مجيب السوال
	سبحان من له نصلي كل ليله ويوم
ونيابتآ عن ذوي فلاح سبع الرجال
	هم قدموني وانا لاقمت اسد اللزوم
وهلا هلا عد مايبدي نهار وهلال
	ترحيب بالكل منكم ياهلا بالعموم
ليله تجمع رفاقتنا من احلى الليال
	وشكرآ لتشريفكم يااهل الوفاء والسلوم
وفخرآ لنا امناسبك يالجدي نجم الشمال
	ياصل الظفر والكرم من ربعنا روس قوم
يابوسعد حي والله هالذكر والقبال
	ياكاسب النعم والله يابعيد العزوم
الطيب لابس اوسامه مع قروم العيال
	ياناطح الواجبات ان صد عنها امهدوم
يمنا الكرم طايله كثر او قل الريال
	ويمنا البخل مالها بالنعم حضآ يقوم
الكفو اجاهر ابمدحه وامدحه بنفعال
	اللي من الطيب قسمه من خيار القسوم
واما سليمان وانعم له ذرى وله ضلال
	للطيب في وجه ابن مرزوق دايم رسوم
من قوم ابن موقد اللي كل نوماس نال
	شيخ وقبيله نعم علمأّ ثبات امعلوم
وياللي تبون الشعر فالشعر جاله مجال
	يالله نحلق معه بين الثرا والنجوم
الشعر حاضر هنا له في سمانا اشتعال
	وانا البيوت النوادر لي عليها اوسوم
يوم القوافي براسي صارلهن اجتوال
	ماجيب غير الذي يطرب عقول القروم
قصيدتي فال ياتي من بعدها العقال
	ننقى لكم شعر عن هزل الكلام امحشوم
جمع المطانيخ محضر له بيوتآ اجزال
	والجزله ارقابها في نايفات الرجوم
للشعر كيفآ يكيف مثل كيف الدلال
	كيفآ باسوقه على اللي مشتهين العلوم
ياشعر عط التحيه كل طيب خصال
	اللي سجله اموثق بالنعم وامختوم
اللي رقاء بالفضايل قمة اعلى الجبال
	وهايب اللي عطا هذا وذاك امحروم
اللي امتونه ليا قام ارتكت للثقال
	بالجاه والمال ومقابل لجمع الخصوم
راع المهمات والفزعات في كل حال
	مكمل احقوق الرجال امن الرجال امخدوم
اللي لربعه سند لعقدن الحبال
	لعل راس الذي هاذي صفاته يدوم
وتمت بعون المعين اللي عليه اتكال
	وشكرا لتشريفكم شكرا وحبت خشوم
وصلوا على خير خلق المنفرد بالكمال
	خير الرجال الرسول امن الخطايا معصوم

بسم الله الرحمن الرحيم
اقامت قبيلة الوهوب من قبيلة حرب بحفر الباطن حفل للشيخ الدكتور عبدالله رشيد ابن عريعر السحيمي هو ومن قام معه من شيوخ قبيلة حرب الاوفياء تكريمآ وعرفانآ لهم على موقفهم النبيل في انهاء قضية السجين فهد حمود الوهبي شاركت بهذه القصيده لعلها ترقى لاذواقكم الشعريه30\2\1436هجري

بسم الله اللي له نصلي نطلبه ليل ونهار
	سبحان من شرفك ياطيبه ومكه بالحّرم
جزل العطايا اللي بمده زين ارضه بالخضار
	رب الوجود اللي خلقنا جل شانه من عّدم
الليله الهاجس معه علمآ مهم وشب نار
	نار القصيد اللي حطبها افكار رتبها القّلم
بعد تناقشنا بعلم امهم وانهينا الحوار
	قال انت تبغى اللي تجمل قلت عطنيها نّعم
انا استشرت اهل المعاني وانت ليه مستشار
	الجزله الجزله طلبنا والرياجيل الحّكم
ايه اتخير ماتورى دام لي الاختيار
	لادندن الهاجس وطق الراس والفكر اسّتلم
واذا القوافي مامعانيها تطاير له شرار
	ماللقصيده ذوق في حفل الرجال ولا طّعم
الشعر له وقفات يالشعار مافيه انتظار
	وفي حفل حرب الحرب يالشعار لي معكم سّهم
سلام ياربعآ لهم مقام عالي واعتبار
	امن المدينه للحفر قدرآ لكم سار القّدم
دعوة وفاء لاهل الوفاء من حر من ماكر حرار
	يابوفهد ماهو غريب الطيب علي القّسم
ياحرب ياحرب الفخر عمار جمعتكم عمار
	يامن لكم باالمجد فوق اعلى جبل رفرف عّلم
ياجاعلين الكايدات اللي كبار امن الصغار
	يامن لكم وزن وثقل بين القبايل والامّم
وقفاتكم فزعاتكم ثمارها خير الثمار
	ايسولفوا فيها العرب ويترجموها للعّجم
وفي ماضي الازمان كم قصه لنا فيها افتخار
	منها فعل دخيل ونويشي كبيرين الهّمم
دون الخوي والجار قتل النفس للحربي شعار
	وبالناس فيه امثالنا ياأهل المواقف والشّيم
الله يبيض وجه راع الطيب في كل الديار
	راع الفعايل والجمايل له مقام ويّحترم
طير السعد معه السعد رف ابجناحينه وطار
	انا اشهد ان ابن عريعر قام بالعلم الاهّم
صحيح من قال المواقف للرياجيل اختبار
	واللي خذا وسام النعم مدحه على الشاعر لّزم
ابن عريعر وقفته جاء صيتها في كل دار
	قال السحيمي واجب الحربي على الحربي زّهم
والرجل له ميقاف عنّه مستحيل الاعتذار
	وانا لها ولغيرها كم قدمت يمنى الشّحم
وانا من السحمان ياربعي لنا شان ووقار
	اهل الحميه والمواقف والشجاعه والكّرم
لاقال عبدالله رشيد ابن عريعر علم صار
	قال ابشروا ياحرب تم العلم والامر انّحسم
ماللكبار امن القضايا غير نطاح الكبار
	انهى القضيه يوم ابوعواد شمر واحّتزم
وذاير رشيد ايضا كسبها يوم صلى واستخار
	من ربعي السحمان دايم معتلي رؤس القّمم
سعى نخى سوا البيوت اللي بها نخوه واثار
	تفاعل اهل الطيب شكرآ له على بيوتآ نّظم
الاجر والنوماس دايم مكسب الرجل الخيار
	ولاهي غريبه وقفة السحمان فوق اعلى هّرم

بسم الله الرحمن الرحيم
ان لله وان اليه راجعون رحمت الله عليك ايهو الملك العادل الرحيم الصادق التقي النقي عبدالله ابن عبدالعزيز هذه ابيات فيها شي من مافي النفس في تاريخ 8\4\1436هجري

لا اله الا انت سبحانك ياحد مالك مثيل
	ياكريم اكرام خلقك من عطاك الها تجود
اف يادنيا الفنا ويش المكاسب والحصيل
	غير طاعت من خلقنا واله سوفا نعود
كل مخلوقآ جعله ربنا ساعة رحيل
	ومايخيب اللي لامنّه مات له ذكر امحمود
حزن شعبك يابومتعب لحبك دليل
	للمحبه مواري والوفاء له شهود
لو منته فقيد ادموعنا ماتسيل
	ذي دموع المحبه غرق(ن) الخدود
مت وانته رحمك الله بقلبك تشيل
	هم الامه معك حتى دخلت اللحود
ندعو ايلاهنا ايضلك بظل(ن) ضليل
	الذي مالنا غيره ايلاه امعبود
ياسعودية الامجاد صبرآ جميل
	البقاء للعظيم ايلاه هذا الوجود
غيب الموت سيف ابتر وسيفآ صقيل
	استلمها وله منا الولاء والعهود
راح صقر العروبه والسعد بالبديل
	ياسعودية الامجاد دار الاسود
استلمك الذي لعل عمره طويل
	به شبه مسس الدوله عريب الجدود
الولاء ياوطنا جيل يعطيه جيل
	بالتلاحم مع القايد يموت الحسود
دام عز الوطن محمي وفي حفظ الجليل
	في ذرا سيدي سلمان مايشوف اللهود
والذي فكره امسمم علينا دخيل
	ماهو منا هذاك ان ماهداه الودود
ياعدانا تبون وماتبو مستحيل
	من نوانا بشر انهايته بالحدود
نقطعه راس من خان الوطن والعميل
	واستعنا برب اوجيهنا له سجود

بسم الله الرحمن الرحيم
كل الشعب السعودي يقف اجلالاً واكبارا مويداً ومباركاً وقفتك ايهو الملك الشجاع سلمان ابن عبدالعزيز ويقول شعبك الوفي نحنو رهن اشارتك وارواحنا فدا للوطن الحبيب الغالي المملكه العربيه السعوديه ولاينسى شعبك الوفي وقفت الاشقاء العرب والاصدقاء من الامه الاسلاميه وعاصفة الحزم باذن الله مكلله بالنصر تحيه اجلال واكبار لطيارينا الابطال وافراد قواتنا المسلحه المرابطين على حدود الوطن الغالي لردع من تسول له نفسه من الحوثيين واعوانهم وبمشيئة الله بوقفتك ايهو الملك الشجاع واخوتك العرب سوف تموت احلام ايران وتلاشا مخططاتها

بسم الله اللي خص بالعقل الانسان
	اللي نصلي له بليل ونهاره
سعودية الامجاد ياخير الاوطان
	يامهبط التوحيد يارض الطهاره
يادولة التوحيد مقر الايمان
	اللي نواك ابشر حدك دماره
ياقايد الامه للفعال برهان
	لبيك ياسلمان راس الصطاره
سلمت ياراس الرياجيل سلمان
	عاش الزعيم اللي اموفق قراره
يااصل الشجاعه جيشك ابطال شجعان
	وفدا الوطن الروح ماهي خساره
حنا هل التوحيد والله لنا شان
	يشهد علمنا اللي فخرنا اشعاره
الحزم عاصفته رساله لمن كان
	يابوفهد يجهل افعول النماره
ايران واللي ياملكنا مع ايران
	الحزم عاصفته عطتهم اشاره
حنا ان دعتنا الحرب هلاك عدوان
	ياقايد الامه حكيم الاداره
هلا هلا بالحرب حنا لها الان
	حنا صعاطير العزم والجساره
رجالنا لمقابل القوم ضميان
	يبيع عمره دون جاره وداره
من شب نار الحرب يصلا بنيران
	الحرب دكيناه بألفين غاره
واللي نخانا في ذرانا له امان
	زبن لاخو نوره وجته البشاره
ياعبد ربه من زبنا فلا يهان
	حقه علينا انا نرد اعتباره
واخواننا بالدين نعم لنا اعوان
	ومن شب نار الحرب يصلا بناره
حنا العرب مهما اختلفنا ترا اخوان
	اليا تكاتفنا كسبنا الصداره

بسم الله الرحمن الرحيم
مع تحية إجلال لحماة الوطن البواسل كتبت هذه القصيده

بسم الله اللي على خلقه تعالى رقيب
	إمصرف الكون بامره كل شي ابسبب
الشعر بالمعركه عن واجبه مايغيب
	كم شاعر العاصفه معها إستشاط وكتب
ياكبر حق الوطن شمر ياشاعر وأديب
	من دون حد الوطن كلن حزامه كرب
ياهاجسي حي فالك للنوادر تجيب
	دايم تصوغ القوافي مثل صوغ الذهب
مأحلى القصيده حلاها مثل ذوق الحليب
	مادامها بالوطن بالرأس نشوت طرب
ماني مسوي بيوت اهدافها ماتصيب
	إليا قروها مشاهير الشعر والأدب
يا أطهر بقاع ارض ربي ياوطنا الحبيب
	انتي بحفظ الرجال اللي لك الله وهب
وأبطالنا يوم نار الحرب شبت لهيب
	إمن الصطر كل قرماً للملاقاء وثب
الوضع ياليعربي ماهو بيخفى اللبيب
	ومن بارز الحق فإن الحق فاز وغلب
الكفر فزعة مصالح ياعجب ياعجيب
	ونقول في فزعته صادق لو إنه كذب
ياقادة العًرب قمتوا بالنهار العصيب
	سجل ياتاريخ واحفظ مفخره للعرب
ماهي غريبه تكاتفهم بوجه الحريب
	قمتم ياقاداتنا باللي عليكم وجب
قاداتنا كل ذيباً قام يزهم لذيب
	يوم إبن منصور فزعه من إخوانه طلب
بقيادة اللي يطوع كل كايد صعيب
	تهتز ذيك الدول من صطوته لا غضب
زبنت ياعبد ربه ويل من لك طليب
	انت إبذرا الصاطي اللي يرهب اشجع شنب
سلمان له ضربتاً من صابته مايطيب
	بأعداء الوطن حي والله ضربتاً له ضرب
العزم والحزم والرأي الموفق صحيب
	إبن الزعيم العظيم إبن النسب والحسب
أبشر بفزعه تزلزل يا يمنا الصويب
	يوم الخطر شب فيك ومن وطنا اقترب
والنصر بإذن الذي عونه طلبنا قريب
	لو صار بك يايمن مثل الذي في حلب
افعالنا كل راس وبأس منها يشيب
	يوم أرزمت بالبلا بقعاء نفك النشب
إيخطط الرافضي ومخططاته تخيب
	من حربنا والله انه خاسرا ماكسب
موت إبقهر ياخميني مع كلاب الشعيب
	وشر ذمتك باليمن مابين غار ولهب
يالرافضي خبت مع صالح ردي النصيب
	شبيتم الحرب واليومه لها انتم حطب

بسم الله الرحمن الرحيم

يامن جميع الخلايق تاقف امامه
	رحماك في يوم لانعلم متى اوانه
الموت كل الخلايق تطعم الآمه
	الدايم الله ابجروته وسلطانه
وكل آدمي ماعمل يلقاه قدامه
	في ماقفاً عند رب الخلق سبحانه
وابيلس بكتاب ربي قال بقسامه
	افادنا ربنا بقوله بقورانه
بدروبنا ماحيينا يزرع الغامه
	لين القيامه ابشره يشعب احصانه
حتى القيامه بكيده راكز اعلامه
	لغواينا اعوذ بالله منه واعوانه
وتارك صلاته اشك ابصحت اسلامه
	تارك عمود الفرايض ناقص ايمانه
تارك صلاته وش المكسب من اصيامه
	وشلون يرجو عفو ربه ورضوانه
ماجور ياشايباً تراقل اعضامه
	لبيت ربه يعّضده خير ورعانه
يازينها مشيت الشايب وهندامه
	لو انها ترتجف بالمشي سيقانه
كمل ثمانين في ذي السنه عامه
	الله يثقل نهر العرض ميزانه
في طاعة الله امشمر يكرب احزامه
	ويرجو كريماً نجا من طق بيبانه
افضل شهور السنه متغانم ايامه
	ويطلب من ايلاهنا عفوه وغفرانه
جنات رب الوجود اهي اكبر احلامه
	وبذكر ربه مايفتر دايم السانه
ومع التقا الطيب كله لابس اوسامه
	وعالي مقامه ياكبره بالعرب شانه

بسم الله الرحمن الرحيم
ابيات اخاطب بها فلاح

الهاجس اللي بيوت الشعر رتبها
	لاطق بالراس مالي جاز لي جابي
فلاح خذها بيوت ابوك والعبها
	اضبط لحنها وكلفتها على احسابي
لي صحبتاً من بعيد الناس واقربها
	اللي من اقصاء العرب واللي من اقرابي
اهل التقاء والوفاء الله لي حببها
	وبالطيب معهم تدرهم دايم اركابي
يازين جلسه ودله معهم اشربها
	ويازين مرقاي معهم كل مرقابي
واذا القدر بندقه علي زهبها
	وصابت سهومه شكيت لخالقي مابي
واهل الحسد والنمايم ماتغاربها
	اليا اهرجوا في هرجة سوء بغيابي
يهبوا بعض ناس ماخبثها وماكذبها
	اذا التقينا تبسم لي وهلابي
ومن يوم ماقفي حبكها فيّ وركبها
	الهرجه اللي تروق الكل كذابي
ابليس مطيته بالشر يشعبها
	بين الاوادم ويشعل كل مشهابي
الطيبه يافلاح أي بله اكسبها
	الطيبه تلزمك مع بعض الاشنابي
الطيبه ياسمي ابوي مااطيبها
	وعيد النظر في تعامل بعض الاصحابي
اليا بخصت العرب ميزت مذهبها
	وعرفت وش في صدر غالب وغلابي
الصاحب اللي مع الاصحاب خربها
	في جيرة الله بلا تفسير الاسبابي
العاقل اللي ليا فكر وحسبها
	عاف النقاش العقيم وقفل البابي
وابوك نفسه ياكبر اليوم مطلبها
	عفو الذي من لجا بحماه ماخابي
واللي مع اللي خلقها نفسه ادبها
	يطلب توافيق خالقنا من اترابي
كلام من لذة الطاعات جربها
	يارب عفوك ياهازم جمع الاحزابي
من سكرة الموت واشيباه مصعبها
	الموت ذكره يكدر كل ماطابي

بسم الله الرحمن الرجيم
طلبت مني هذه القصيده في حفل زواج زياد عبدالهادي السحيمي

بديت بسم الله واستغفر الله
	لعل لي بحبال عفوه مقاضيب
منه اطلب التوفيق وارجوه واخشاه
	وعفوه نهر العرض كل المكاسيب
يامكثر الشعار يالشعر كثراه
	ويختلفوا الشعار منهج واساليب
كلً تجيب افكاره اللي توراه
	والشعر من جزل العطايا مواهيب
والجزل عراف الرياجيل تبغاه
	الجزل يلقا له قبول وتراحيب
وكلً بشعره مقتنع يوم سواه
	لا كان جمهور الشعر له مطاليب
بعض الشعر مثل الحبال الملواه
	ياباغي المفيد صفرً بتكعيب
ودعوه من ابوزياد جتنا وجيناه
	على الرفاقه للرفاقه مواجيب
اللي بحبه للجماعه عرفناه
	تشريف لاابوزياد وزياد ماغيب
اجي له ابوزياد واجي لشرواه
	دعوة رفيقي ياهلا لازم اجيب
وانسابنا المغاذيه يأهل الجاه
	والنعم فيهم ياعريب المناسيب
والنعم فيهم بالكرم والملاقاه
	انا اشهد ان المدح في ربعي امصيب
وحنا وهم من حرب والحمدلله
	المعدن الطيب عديم العذاريب
مالومه اللي قال لاوحلالاه
	على قصص بكتاب ولف بترتيب
وسمعتها في كل ديره من ارواه
	ودي بها ومن حظ شقر المخاليب
اخذت قبيلة حرب بها المكافاه
	فخرً لها ليومً من اهواله انشيب
وذا الليل يابوزياد مبروك محلاه
	حلاه جمعت ربعنا والاصاحيب
عمار ياجمع الرجال المسماه
	بسمً تفاخر به من اسامي الذيب
ومن قالي سحمان هو ويش معناه
	كل الخصال اللي بها قمة الطيب
المجد له قمه ومنزالنا اعلاه
	دايم منازلنا برؤس المراقيب
ومع القبايل صيتنا حي طرياه
	هالحين وبذيك السنين اللواهيب
وقتً مضا لجدادنا مالحقناه
	يوم الملاقا بالرهاف المحاديب
يوم اللعين ابليس يشعب مطاياه
	بين القبايل خاب خبث الهناديب
يشوش راس اغلامنا يوم يقراه
	وانشوف في وجهه اعلوم وتعاجيب
وبالناس فيه امثالنا اقروم وادهاه
	يامكثر اهل الطيب عكف الاشانيب

بسم الله الرحمن الرحيم

ابتدي باسم الله الرحمن عليه اعتمادي
	الرحيم اللي يجازي كل نفسً في عملها
من ذكر بالرجل مابه ماكذب حسب اعتقادي
	والصراحه كان تزعل ناس ماشقاني زعلها
ماحسب ان فلان يوم انه نخا ابن افلان غادي
	لين جاب العلم رجلً يحتمي كلمه نقلها
لو وصلت اعلى المناصب يابن هن انسان عادي
	آدميّ امن الاوادم والشهاده كم حملها
وادري انك من عرب وانعم لها سلوم ومبادي
	والسلوم الطيبه لابتك ماتقبل بدلها
البياض اقول مدري كيف خالطه السوادي
	التكبر والغرور ان صاب له نفسً خذلها
شفته اسمك ضمن من ينصون في ليل الهجادي
	والنعم كلمه كبيره ماتقال الا لهلها
قالها اللي جابلي من عندك العلم الوكادي
	راح لك حقه عليك وغيرك الطاله فعلها
هن يابن هن ما لبيت صوتً لك ينادي
	وانت قادر تفعل المعروف في قمة جبلها
مانصاك الا وهو حاديه يابن الناس حادي
	نوخ اركاب الهقاوي قدم مجلسك وعقلها
والهقاوي يوم وردً صدرً صفر الايادي
	الضنون اكبار لاكن ياحسايف خاب املها
مايقوم ابماقفه ياكود مطنوخً قيادي
	ان نصوه اهل اللوازم فز وعضوده فتلها
بيض الله وجه كاسب نعم جعله بالمرادي
	الثقيله والخفايف شالها غارب جملها
والختام العون والتوفيق من رب العبادي
	والكبار امن القضايا مانطحها الا بطلها