عبدالعزيز المنصور بقصيدة رثاء بفقيدنا الغالي عبدالرحمن عايد عنيزان

عفوي وغلطاتك ماهي مقصوده
وطيبك يقدي فالظلام سراجه

وقلبك وطن متراميات حدوده
سماه بمزون العطا ثجاجه

وبيده موشحها النقا بوروده
وبحره صبر كن الجبال امواجه

يا ابو حسام اخصالك المحموده
متميزه كل(ن) بحسب انتاجه

ام(ن) على مثلك ترى محسوده
ياقافل بفعلك على الهراجه

هالذكريات اللي معي موجوده
وقتي عقد لي من سببها حجاجه

والحزن باصم له بكل عقوده
ارضخ له ان جينا سوا بمواجه

وانته رحلت ولا نويت العوده
وعيني لشوفك في امس الحاجه

احبال الدموع بحضرتك معقوده
لو الدموع اصلا ما ردت حاجه

وصوتي عليك يهز حيد السوده
والصوت ماياصلك رغم ازعاجه

ارثيك وعزوم الصبر مهدوده
ولا فيه فرح إلا المفارق ساجه

موتك آلم برقه يزيد رعوده
والقلب همه مايطيق اخراجه

القبر صدري والضلوع لحوده
ودعاي لله يالفقيد اسياجه

وامنت بن ايامنا معدوده
بس العقول امن القدر هجاجه


رحمك الله يابو حسام

وانته رحلت ولا نويت العوده

وعيني لشوفك في امس الحاجه

صح لسان الجزل الوفي عبدالعزيز المنصور وكلنا راحلين عسى الله يجمّلنا مع بعض بهالدنيا
نسأل الله الرحمه لأخونا عبدالرحمن عايد والله يجمعنا به في جنات النعيم ,, آآآآمين

الله يرحمه ..

وصوتي عليك يهز حيد السوده

يعطيك العافيه وصح لسانك ..

صح لسان شاعرنا مناور وسلمت يمينك يا ابو شهد
الله يرحم ابو حسام ويجعل قبره روضه من رياض الجنه
حركت المشاعر يا ابا منصور

وفي ومبدع كعادتك اخوي عبدالعزيز صح السانك ورحم الله اخينا عبدالرحمن عايد برحمته الواسعه

صح لسان شاعرها وسلمت يمين ناقلها ورحمك الله ياعبد الرحمن وسكنك الله فسح جناته

الله يرحمه
مشكوووووور والله يعطيك الف عافيه

رحمك الله يا ابو حسام