قصيده ورد عليها

هذه ابيات الشاعر عوض ساير السحيمي كما جاراها الشاعر عليان غالي السحيمي

من الوجب حتى تجي حزم دمعان
	والجول وديار الخفق وام شيحة
وموزرة والراس الابيض وحلطان
	واطراف احامر والسهال المريحة
احبها بذات عن كل الاوطان
	لاجيتها فيها تفيض القريحة
ديرة ربوع لي كريمين شجعان
	من طيبهم يستاهلون المديحة
افرح الى قالو هذا نزل بدوان
	سوالف البدوان دايم مليحة
شبابهم وايضا هل العرف شيبان
	ربو على تقوى وحب ونصيحه
يالله عساهم بين روحن و ريحان
	وسط الجنان العاليات الفسيحة

الـــــــــــــــــــــــــــرد لشاعر عليان غالي السحيمي

هيضني الطاروق بسلوب فنان
	ذكرتني بديار ابوى الفسيحه
وصفتلي ضلعان يانسل نجوان
	وصفتها باجمل صورها صحيحه
مرحوم ياعودا سكن وسط عربان
	يسرح ويمرح بين ضلعه وسيحه
يادورة الايام ياهاك الازمان
	عودي لنا جيبي نسانيس ريحه
واليوم صارت ديرته بين جدران
	بين اللحود وبين جار وطريحه
يالله يامنزل تبارك ولقمان
	تغفر ذنوبا يوم تعرض صريحه
وختامها صلو على نسل عدنان
	شفيعنا يوم الخلايق شحيحه

بيض الله وجيه الشعراء على هالقصايد وبيض الله وجهك ابوطاهر على تنزيلها وحسن اختيارها تقبل مروري

عافاك الله أبوطاهر والله يرحم والديك على تنزيل هالنوع من القصائد
وصحت القلوب النظيفه اللي أبدعت الأبيات

صحت السنتهم جميع وسلمتك يمينك ابو طاهر على
هذا الطرح

صح السنت شعارنا على القصيد الرائع

مرحوم ياعودا سكن وسط عربان

يسرح ويمرح بين ضلعه وسيحه

الله يرحمك ياجدي عنيزان

صحت بدانكم جميع وشكرا على اطلاعكم الراااااااائع والشياب هم قبلة البيت والله يعطيهم الجنه جميع ويرحمنا الى صرنا الى ماصاروا أليه

بيض وجهك ابو طاهر
وتعديل الشطر الاول من البيت الخامس
افرح اليا قالوا هذا انزل بدوان

صح لسانك يابوماهر ..وصح لسانك يابو وسام .. وبيض الله وجهك يابوطاهر على نقل القصائد الجزله