ديوان الشاعر ذاير رشيد السحيمي

مساجله بيني وبين الشاعر ناجي الجهني

يا راكب اللي من مديله عشقناه
	الفين وواحد من طراز محبوكي
صنع الخواجه وأتقن الصنع يمناه
	أف آي تكميله ونوعه بيوكي
يشدا لحر معربن ساس مجناه
	جذت مخاليبه وتهيا الفكوكي
يا صل لمنهو من معزه ذكرناه
	معزة ما هي معزة نموكي
ناجي ليا منا نوينا نصيناه
	راعي الكرم معروف ما به شكوكي
والطيب ما بين النشاما كسبناه
	والا الردى لعفن النضا و الرموكي
والشعر وان جاشت خوافيق جبناه
	نصوغهن صوغ الذهب بالسموكي
وانتم رجال الجود والجود شفناه
	شفناه ما هو قول وبالعلم نوكي
أهل الكرم والطيب وأن قيل قلناه
	يوم بعض الناس صابه ضنوكي
والقاف مع قاف النشاما بينناه
	نبغى نتسلى بالمزح و الضحوكي
يفنى العمر و قتنا ما عسفناه
	ما ينعسف وقتٍ مخاليب شوكي
جرب بديوي وقتنا أقصاه وأدناه
	جرب و ينسجهن نسيج السلوكي
لو كان نرسى كالفوالذ طحناه
	يطعن بحربة زان حبل الوروكي
كم واحدا قفى زمانه بكيناه
	وياما غداء لحنيك فوج إمحنوكي
لكن ابنشد ويش رجلن كتبناه
	رجل تعشم به و ثائق صكوكي
له بنت مكرمها وله ناس تقراه
	ولا يغتني عنها بكل الشروكي
أيضا له غليم كم الحلم تلقاه
	نوع الضحاح ومنطوي وسط بوكي
والشيب يركله ولو كان يطناه
	ثم يتجدد مثل رصد البنوكي
يالضيغمي هذا جواب نسخناه
	وترى الجمل يصعب عليه البروكي

رد الشاعر ناجي الجهني:

يا مرحبا في شعر واضح قريناه
	أذني لسمع الشعر ما هو صنوكي
حي البيوك ألفين واحد كشفناه
	اختارها ماهي صناعة لزوكي
سواقها ذاير عسا ما عدمناه
	من الجميح اختارها عن شروكي
شاعر لقال الشعر ياقو معناه
	ما هي سوات اللي لشعره يلوكي
الطيب من بين النشامى حسبناه
	والا الردي يفداك علك معلوكي
أنتم هل الطالات قولا ظمناه
	لاهنت يا صقرا رفيع السموكي
الشعر لادنت هجوسه نظمناه
	نظم الجواهر بالسلوك الدروكي
ما كل واحد يجد اللي تمناه
	ادور به دنياه دور الفلوكي
العمر يفنى وقتنا ما كسبناه
	كلن بهذا الوقت صار محشوكي
الوقت ما يعسف لونا شيكيناه
	ما ينعسف غير الصعب في الشبوكي
قافا على قاف النشامى وزناه
	والشعر فتل ونقض للي يحوكي
اللغز واضح يالسحيمي عرفناه
	مرسوم لغزك مثل رسم الكروكي
الشعر في معناه واضح فهمناه
	بنته تراها صورته بالسموكي
و غليمه شعر الخيال ان وصفناه
	نسج الخيال اللي يجيب الشكوكي
الشيب يركله لونا تركناه
	وتشيبه ناسِ لخشمه فروكي
يا ويش رجل يخبر الى نشدناه
	رجل يحفظ العلم ما هو فكوكي
له بنت تكشف سره اقصاه وادناه
	تامر عليه بحد سيف محكوكي
أيضا له غليم ليا صابه أفناه
	يقضي على عمره بكل الملوكي
والشيب يبعد عنه و إنكان صناه
	إن طال عمره صار فيه اللكوكي
هذا جوابك يالسحيمي شرحناه
	إستقبل إرسالي من إرسال نوكي
وختامها من قافنا اللي بديناه
	من حرف نون وقافه التالي أوكي

ورديت هذه البيتين حليت بها لغز ناجي الجهني

اللغز حله ياصحيبي لقيناه
	جهاز كمبيوتر يخدم الملوكي
وبنته ترا الفاره على راس مبداه
	ويلعبه الفيروس لعب المكوكي

هذه ابيات انصح بها ابنائي في بعض الامور الضروريه للرجل في حياته

يابجاد خذ بيتين يابجاد منا
	أنته وعبدالله نصيحة على البال
المال يرخص عندنا لجل شيمنا
	يوم الردي يمناه ما ترخص المال
وتضفي حسانينا لأنفسنا وأهلنا
	وللواجب اللي لازم لكل رجال
حنا عرب والطيبه من قيمنا
	و البخل منفي من قديمات الأجيال
لاتجعل اليمنى بعنقك تثنا
	ولاتبسط اليمنى بتفريط جهال
وأصبر إليا جات المصاعب تأنا
	وتلقى لها مخراج ياطيب الفال
وسايس قسى الدنيا بحكمه وفنا
	وأعرف وقيمها على كل مدخال
وترا العرب كلاً بعقله معنا
	مجنون مع صاحي ماجاء رايهم دال
وكلا بعقله راضي يوم غنا
	وأحذر تغرك يوم سمكات الأزوال
ماكل من يلبس عمامه مهنا
	والكيف ماله كيف من دون فنجال
و لاكل من تبي على ماتمنا
	و لاكل من ماشاك باقي لك ضلال

هذه الابيات غزليه كما قالو بالمثل الغزل ملح القصيد وهي قديمه تقريبا في عام 1410ه
ارسلتها الى الاخ العزيز حمد عقلا الشراري

ياراكب اللي مازعل منه راعيه
	صنع الخواجه بأحسن الصنع فنا
أربع مع أربع كاملات تقديه
	ماتختلف توازنه لامشنا
جمس مصفح بأزرق اللون يزهيه
	وطقم التواير جعلهن يسلمنا
صنع الأمريكي يعجب اللي ركب فيه
	وعسى الليالي بوقتهن يسعدنا
فج الصباح وعارف الدرب ماشيه
	من طيبه اللي هي مرابع أهلنا
يمشي من الحمراء وراعيه قاديه
	حمر النمال جبالها يوحشنا
وفي وادي السرحان يمسي ضواحيه
	بالديره اللي سلومها يطربنا
ويمسي أربوعن من هل الطيب توفيه
	أهل الكرم كلن لنجره يدنا
وصل سلامي للشراري وعطهيه
	حمد ولد عقلا خويا تمنا
مع الخوي طيب ودايم يراعيه
	حكيم في طيب المروه حكمنا
قلبي تعنا والليالي تزاميه
	وهجوس قلبي ياحمد غربلنا
وترا الهوى ساحر على شخص ناويه
	وكثر الظروف القاسيه يجبرنا
ونارا توقد في خفوقي تصاليه
	حاولت أبنسى والهجوس أعسرنا
حاولت في قربه وكثرت بلاويه
	وصارت سيوفه بالردى يبعدنا
لوعنا خافوقي الي غدى فيه
	حبه تعلق بالخافوق وتعنا
والحل وش هو يالشراري بأسويه
	وأنته حكيم مع الخوي ماتونا
صلاة ربي عد حيا يلبيه
	على النبي المختار حقا وسنا

الـــــــــــــــرد

بسم الله أبدا وأبتدي وانتهي فيه
	علام غيبات علينا خفنا
علام مايبديه عبده ويخفيه
	ياالله على عسر الصعيبات عنا
سر ياقلم بالبوك والقاف نمليه
	أمليك وأكتب ردنا لاتونا
ردا على اللي شوقتني معانيه
	أبيات من نظم السحيمي لفنا
من فوق جمسا جرهد القاع يطويه
	عناه من حمرا النمال لو طنا
يامرحبا بالجمس واللي معنيه
	والسايق اللي بالرساله تعنا
جانا المساء مندوب ذاير موصيه
	رد الخبر حزه بيوته يجنا
أخاف يتحير سايقه لو نعشيه
	لولا اللزوم بواجبه ماتونا
والصبح من ثاني نهاراً لفا فيه
	قلنا ترافقك السلامه وثنا
وخلاف ذا شديت ماكنت ناويه
	ياصل لمنهو يطلب الحل منا
جيبن تخيرته على كيف شاريه
	من نوع لاند كروز باالصنع فنا
مضمون مايحتاج تفحص خوافيه
	من شركته مامرنا غير حنا
غيرت زيته يوم كملت مماشيه
	الفين كيلو بالتمام اكملنا
وقفت به عند المحطه نعبيه
	لمن جوزين التنوك إمتلنا
ولصبح قبل النور تبدي مواريه
	من وادي السرحان موطن سكنا
يمشي جنوب وعارف الدرب راعيه
	خبير في قطع الخرايم معنا
صوب اتجاه البوصله ماتقديه
	يقدي نجوما بالسماء يعتلنا
ملفاك ذاير بالكرم عز ناصيه
	من ساس قوما بالعطا ماتمنا
حروب وإن بان العدو من معاديه
	أفعالهم باللي مضا يشهدنا
اللي شكا من عنا حب غاليه
	يقول عن قربه ظروفي حدنا
عشير ذاير عن منامه مقزيه
	يومن كلا في منامه تهنا
لاعاد عرف الحب مكثر بلاويه
	كم عاشقا من جرح سيفه يونا
ذكرتني وقتا مضا كنت ناسيه
	أيام في درب المحبه مضنا
الحل ياللي تطلب الحل نبديه
	باللي عليكم في غيابه تجنا
أن كان أبوها يقبل المال نعطيه
	مايطلبه بالحال من غير منا
تمشي مع رجال القبيله وناتيه
	في جاهه لأجل رضاك له نتعنا
مانتركه حتى عشيرك تصافيه
	وتصير لك ملكه شريعه وسنا
وصلاة ربي عد من كان يرجيه
	وعداد ماغر المزون أرعدنا
على نبيا تابعا دين باريه
	شفاعته يوم القيامه زبنا

هذه ابيات قديمه ارسلتها الى الاخ العزيز الغالي الشاعر عبدالله سالم الشريف

يا طير يا للي بالجناحين رفا
	يا ليت لي مثلك جناحن أزوعي
لا واهني الطير بالجو زفا
	يا خذ مع الاجواء مسافة رفوعي
قفا بجنحانه وريشه يضفا
	يا خذ مراده وانحدر بالكسوعي
شبيت نار بالحشا ما تطفا
	يا طير عيني جاوبت بالدموعي
الله من همْ بقلبي مخفا
	همْ تحاشا بين حدب الضلوعي
طواريٍن تأخذ على القلب لفا
	تراكمت واصبحت منها جزوعي
تواردن قلبي على شكل صفا
	ما ينوصف همي على كل نوعي
يا لله يا منشي السحاب المصفا
	كونت ماه وبه حيت به جذوعي
جذع النبات اللي عن إلمي جفا
	واسقيت عرقه وازهرت بالطلوعي
تفرج لمن هو حفه الوقت حفا
	يا لله يا لمعبود ما أنته قطوعي
والطيب ما بين النشامى مضفا
	وصفات راع الطيب نفسا ًقنوعي
ومن لبس ثوب الطيب فاز وتدفا
	وثوب الردى ماله علينا سنوعي
وثوب الردى خله لعله يذفا
	و كنز القناعه بالشرف و الطبوعي
ومن حمد ربي بشت ثوبي مضفا
	من عالي الهامه الى حد كوعي
ياإبن الشريف ارسلت قافٍ معفا
	عفيف ما تاقع عليه الدنوعي
عبدالله الشريف قافه مكفا
	عجبني بقافه ورده قنوعي
لو كان مالي بالتماثيل شفا
	يجبرني الخافوق ولا هو بطوعي

الرد

اهلاً عدد مالاحْ برق يرفا
	واعداد ما جمع حصاد الزروعي
باللي شكا هما بقلبه مخفا
	والهم يفرجه الكريم الشفوعي
إن كان ما تندب صديقا توفا
	باق المعاني كلها طرد جوعي
وإن كان تطلب فزعتي ما تخفا
	تجيك مني يالسحيمي فزوعي
نمشي على وضح النقا ما نلفا
	هذا و لا نرضي عليك الهزوعي
وإن كان همك من غزالن معفا
	اعجبك بوصافه حسين الطبوعي
نمشي معك بالجاه لأهل الملفا
	اللي مجالسهم سوات الشموعي
والحر عن درب الخطا يستكفا
	حتى يميز مدخله والرجوعي

هذه القصيده من الاخ العزيز الشاعر سعود عويض السحيمي ويخص بها قبيلته اهل النخوه قبيلة السحمان بدون قصور بالقبايل الاخرى
ومعجب في تلاحمهم وتكاتفهم مع بعض وينصح بها ان لا يتغير مسيرهم ويؤيد لهم نجاح المشروع ان شاء الله
ونقول حفظك الله يابو نشمي كما جاريته في قصيدته

أبدا بذكر الله واعلن أعلاني
	ال السحيمي جعلهم لي يلبون
نجوان ابوهم مسيسن له كياني
	نعم الموسس له بفخر يعدون
اسحيم اخوهم به تسمى الاخواني
	نعم الاخوان اللي على العهد يوفون
اهل الحميه مزبنت كل عاني
	صارت لهم شهره على الموت يردون
بانين خوتهم بحب وتفاني
	سبع اخوان بجملة الخير يدعون
بيضاء سرايرهم انظاف اليماني
	ولابينهم من كان بالبغض مشحون
فابعث رسالة حب واسمى التهاني
	لربوعي الغاليين ظاهر ومكنون
أحب ربعي باالخفى والبياني
	وارجو عسى ربعي بمثلي يحبون
ربعي هل النخوه ورفض الهواني
	مايقبلون الضيم بالعز يبقون
واطلب ربوعي كل قاصي وداني
	نبني لنا راين موحد ومضمون
مبني على تقوى وعهدن وأماني
	معاهدين الله مالعهدنا نخون
ونصير مثل الصالحين الاخواني
	كلن على الاخر مفوض ومامون
ولانختلف من شان زلة لساني
	ولانصير لعبه لكل جاهل ومجنون
وان كان يوجد شي ماض الزماني
	رواسب الماضي ومافيه مدفون
ياربعنا ياعارفين المعاني
	حذرا التفكك كيف بلواه ترضون
جسم بلا راسن سليمن يعاني
	وجسمن مريض يتعب الراس ويهون
اميرنا نبغاه بأعلى المكاني
	ونلتف حوله هو واللي يعرفون
ونبني لنا صرحا عزيز المباني
	بالحب والتقوى على ماتريدون
متعاونين بكل حالن وشاني
	على طريق الحق وابليس ملعون
ترى الزمان إماحداك اوحداني
	وانا مدان لك وانت لي مديون
ياخوي أنا بحماك وانت تحماني
	وقت الشدايد والقسى يفرض العون
العون بالدنيا ترى العمر فاني
	وبالاخره كلن به الحال مفتون
حياتنا معدودتن بالثواني
	ومن لا يقدم خير خاسر ومغبون
والأقربين أولى لنا بالأحساني
	واجب علينا حقهم غير ممنون
بالعزم تاصل غأيتك والاماني
	والضعف ياتي صاحبه دون في دون
طريقنا واحد ولافيه ثاني
	هذا الهدف وانتم بشانه تحكمون
وصلو على المختارياهل الايماني
	محمد رسول الله نوربه الكون

بديت باللي عالم ماخفاني
	عالم خفايا كل شيٍ يخفون
صنف عدد خلقه بذاني وذاني
	والعرف ماحطه على الشكل واللون
وقافن قريته شاقني يوم جاني
	وأنا سحيمي عزوتي قوم يوفون
ياللي بنيت القاف قافك لفاني
	القاف هيضني بصوغه و مازون
وأنا طربت لشاعرن مادعاني
	وأقدمك سن بخبرت الوقت يدرون
القاف له مع حاضن العرف قاني
	اللي ليا سمعوا نداكم يجيبون
أنت تنادي يافصيح اللساني
	وأنا معك بنداي مع اللي ينادون
صدى الندى ياصل لكل الخواني
	اللي جنوب وشرق بالصوت يوحون
سنين تجري مثل جري السواني
	كم واحد منكم فقدتوه تبكون
نقول ياهل الكيف بالزعفراني
	تشاوروا بالعرف في ما تورون
جمع القبيله عز ياأهل العناني
	اليا تصافوا والحسد ماله منون
مايجيبهم هرج النقيلي مداني
	والبغض ما يقضي مواجيب وديون
عز القبيله بالجبر والمجاني
	لو الجهل عقد حباله يحلون
والعرف والحكمه تراها ضماني
	ترى الجماعه مع ليانك يعزون
اللين ماعيب عصا الخيزراني
	وحسن التواضع للرفاقه له فنون
وامير بلا عزوه لابد مايداني
	لو هو قوي ياقع للأضراس مطحون
لو كان يروي الزان وقت الكواني
	يبني وربعه للمباني يهدون
واميرنا محشوم وحقه يصاني
	مصيون عن كل العذاريب مصيون
ربعه معه مايقول هذا عصاني
	غصبن على الحساد بالعز يمشون
له رِبعةٍ يثنون دون العواني
	أجمع ذخرنجوان قوم يسدون
زبن النوايب بالقسى واللياني
	أفعالهم فيما مضى وش تقولون
أهل السخا والجود ربعٍ ذهاني
	ريف الرفيق اليا انتخى جوه يسعون
وصلوا على اللي بوجهه النور زاني
	في سنته ما تدخله شك وضنون

من لايشكر الناس مايشكر الله
فهذه القصيده ثناء في الاخ العزيز الغالي عبدالله علي الغصيبي السحيمي
من ربعي السحمان اهل النخوه وعبدالله حفظه الله طيبه خلاني اذكر ربعي الغصبان كلهم بالقصيده
من غير قصور بربعي السحمان عموم اهل النخوه

بيضاء على الغصبان عد الملايين
	تبقى لهم رايه ذخر في ضناهم
وأعداد من حجو لمكه ملبين
	واعداد ما تمطر مزون بسماهم
واعداد ما ترجي شيوخ المسلمين
	يرجون رباً ما يخيب رجاهم
واعداد خلق الله بكل الميادين
	اللي ببطن الارض واللي وراهم
واعداد مادارت من اشهور واسنين
	من خلقت ادم لين موعد لقاهم
بيض الوجيه اللي علينا عزيزين
	حقن علينا اليوم نكسب رضاهم
ربعاً لهم ماقف وشيمه وغالين
	والله ما نسى طيبهم من غلاهم
اهل القراء واهل الشرف والقوانين
	اللي على الضيفان قدم أقراهم
لي ربعتاً وان جاء الملقا صلاطين
	أنشهد اني افتخر في عطاهم
عسيمين الارياء مبعدين المطانين
	ما تنكسر وقت اللوازم عصاهم
سدا منيع و في صطاهم قويين
	حدب السيوف اللي قويا صطاهم
ربعا لهم طالات ما هم شحيحين
	اللي على الجزلات حاشت ايداهم
قوما عساهم مع اهل الخير باقيين
	الطيبه هي ساسهم ما تعضاهم
أهل الكرم وأهل المعزه حشيمين
	واهل الرداء يا جعلهم من افداهم
عندي كما الافديع عند القحاطين
	واغلا من ابن حميد مع من سواهم
انشهد انك يالقطامي على الزين
	يا ريف من جاه القوى ثم نصاهم
يا كاسب النوماس بين المسمين
	ربعي اهل النخوه عصايه عصاهم
لو الرجوله بتباهي وتزايين
	كان الرجال مقربن من تهاهم
يمدي العذارى عمرن بالغلاويين
	وتلقى رجال مشروبه من عشاهم

هذه الابيات
اسندها الى الشاعر سعد عبدالله المحمدي الحربي

الجيب واقف كنه الصقر مفتول
	ملموم مثل الكف جكس آر شنطه
نوعه خليجي من الامارات محمول
	وصنعه تويوتا والعلامه بجنطه
مسجل مديله في حزامه ومنحول
	حزام الامان وباخر الرقم نقطه
أثنين مع صفرين وثنين مشتول
	هذا مديله في حزامه وضبطه
ماغيرن مراتبه ولكمل حول
	واللون بيج وغامق اللون ضغطه
غير جميع الزيت واملاه بترول
	خانتين فللهن ياراعي المحطه
واربع تواير وبلفها تبلس اسمول
	وشيل الغطاوي واكمل الجيب نفطه
ثم دق سلفة ينتهض نوزه يهول
	ولجم قزازه الى تساوى بخطه
تسمع جليده الى استوى الخط بالطول
	يشبه كلاشن كوف بحرف آي قشطه
بعد الزوال من المدينه على طول
	وقبل غروب الشمس هدا بمشطه
ورا القليبه مع زراج ارض سحلول
	كد عقب النقطه عضيدي بوسطه
سواقه الضيغم راعي طيب و فعول
	من قوم لهم فعل ماحدا يغطه
من لابت فيها طحاطيح وزحول
	اسود في وقت الوغاء والمشطه
حربي عقيد حروب بالفعل والقول
	اطرب لقيفانه وصوغه وخطه
سعد شاعر علم ولاهو بمجهول
	خافوق صدري منه يزداد بسطه
قصائده حكمه وله صوغ مقبول
	والنقض مع فتل المعاني هو شرطه
يازين منطوقه على الجزل مرسول
	والجزل في قافه على اوصول حطه
ريف الخوي والضيف والجار مكفول
	وريف اليتامى جزل مده وصفطه
سلمت يالحربي وعسى عمرك يطول
	معجب بقيفانك وصوغك وربطه

رد الشاعر سعد عبدالله المحمدي

يامرحبا مني مثل صافي الول
	وقت الرخا والا بالايام شطه
احلا من الحالي مغلف ومعسول
	في خط شاعر عالي الرجم نطه
لو فيه حصلنا مطبات وميول
	وزريت اميز بين سمنه ويقطه
من ذاير الحربي له احكام وقبول
	قرم العيال اللي بدينه نغبطه
من لابةٍ لاجردو كل مصقول
	كم راس فارس بالمعارك تقطه
قبيلة السحمان شجعان وكمول
	مجد الرجال الوافيه من يغطه
ياكود ياهل العرف حاسد ومهبول
	دايم لسانه بالخطايا يمطه
وعن المراجل فيه كبوه ومشلول
	بيضة غراب البين من بطن بطه
ياصاحبي يوم العدا جالها ضول
	وكثرت ثعابين السناوي ورقطه
دمرت باالبحر الحمر عدة اسطول
	عد الجنايز بين عمقه وشطه
راع الخطا صابه يابو طاهر اذهول
	بعد المكابر قال صرنا بورطه
يوم انتصرت وصار عاذل ومعذول
	كلن حزم لمقابل القوم وسطه
راس الجبل لو عاوده برق وثعول
	هونت دام القوم عنا بغطه
شرهه وتنصى راس مقبل ومقبول
	قلته وانا مالي على الناس سلطه
ماقل دل وياعسى عمرك ايطول
	ونبغى السموحه كان بالرد غلطه

هذه ابيات جديده وهي تخص شباب شعرا جدد من الفخذ اللي انا منها من قبيلة السحمان جازت لي ابيات ارسلوها لي
والصراحه بدايتهم قويه ولهم مستقبل انشاء الله ومنهم فلاح معزي وعبد الطيف عوض وعبدالمجيد وعايض عوض و
بدر محيسن

واقول في هذه القريحه ويستفيدون منها اكثر. حفظهم الله علما انهم لهم قصيد احسن من قصيدي

يابحور الشعر صدري ترا ماهو شحيح
	القريحه لابدينا مايصعب طرقها
البحور اشكال تمشي على دربن فسيح
	مانضيقها يجي غربها مع شرقها
اتخير في بحرهاوبالي مستريح
	ومفرده تقطع ضمايه يافكري نقها
الشعر يبغى معاني مع لسانن فصيح
	مايبي كوره سماء طقها وارتقها
من طرد للقارعه مالقى شيئا فليح
	السمين عن الهزيله مبين فرقها
لابغيت النادره مستهله بالمديح
	قارتن في راس قمه تحيزم وارقها
الثمينه لاتجي دونها حذرا تطيح
	ولاعليكم من اهل الطعطعه مع حرقها
خل شوحك للجواهر لها معدن نصيح
	واسق كبد اللي يحب الفريده اسقها
الكلام الزين بلغه عن الهرج القبيح
	هات كلمه طيبه والرديه بقها
قبلنا جاب الحويفي من الشعر المليح
	وابن جدلان القصيده عطاها حقها
مايجيب الجوهره غيرغواصن نضيح
	والهزيله جامدن دمها في عرقها
ومن يصور للمعاني على غير الصحيح
	ريحو من نقض فتل البيوت وطقها
كل منطق واقعي واقعي ماله نطيح
	والحقيفه مع حقاق المخيله برقها

هذه ابيات قلتها معايده للزملاء من اهل ينبع وبدر عند الاخ العزيز مسفر الاحمدي في قرية الفقره

بالنيابه عن شجاعا بالكرم والطيب نال
	أبو سامي له صفاتا طيبه والطيب ناله
فيه صدق وفيه خوه وله مروه مع الرجال
	بين أبوه وبين جد وبين عم وبين خاله
لالفيته في محله بالنبا زين القبال
	له تحيه تريح الخافوق و لك يرتاح باله
عامره ناره وزين الكيف في وسط الدلال
	عامره ناره وكله خير وكل الخير فاله
الله اللي كرمه بالطيبات من الخصال
	الله اللي كرمه بالطيب وأعطاه الجماله
ويا سلام الله نيابه عد ماساق الخيال
	وعد ماهل المطر وأعداد مارودم خياله
وعد خلقه من جنوب وغرب الى حد الشمال
	وعد من تشرق عليه الشمس ومن صلى يساله
لأهل ينبع وأهل بدر اللي لهم كل أحتفال
	عيدكم مبروك ياهل الطيب يارجال الشكاله
يا رجال أهل الشهامه معرفتكم راس مال
	ويفرح الرجال إليا صار النشامي راس ماله
قالها قبلي رجل ومجربن في كل حال
	منور اللي قال من حظ الفتى خيرة رجاله
مرحبا في مرحبا في صناديد العيال
	بالنيابه عن رفيقه قالها ذاير جزاله