قصيدة راقت لي

الحق مايزعل زحول الرجاجيل	وكل على ما قيل من دون حقه
ومادام لي حق عن الحق ما اميل	مهما لقيت من التعب و المشقه
الرجل ودك حزة الضيق حلحيل	وبعض الموافق ما تعامل برقه
ماني بمن يرضى على النفس تذليل	من الذل ما ارضى لو بمثقال بقه
ولاني بمن يركض ورى القول والقيل	ولاني من اللي لاخذا العلم بقه
ولا التفت لحقوق غيري ولا اعيل	والثوب نستر خملته ما نشقه
والراس راس ولا يعود على الذيل	و الذيب ينهش باللحم ما استرقه
والكدش ما تحسب ليا عدت الخيل	ولا يجبر المسمار كود المدقه
والشمس نور ونورها يجلي الليل	والنار تبدا بكل ما تستدقه
والجدي مرجع والعرب عشقها سهيل	والنوخذه يفهم بغبه ورقه
والكيف هيل ودلتين وفناجيل	وبن ونجر لا نضا البن دقه
من شب له من نور غيره قناديل	يستر على نفسه قبل لا تعقه
من صد من غيضه عساها تساهيل	نقضي ولا نتعب ورى كل نقه
يزعل وترضيه الليال المقابيل	وان كانها بالحق حنا نحقه
والا فانا ماجاه مني بهاذيل	وكانه زعل من موقفي يستحقه
يشد حيله بالزعل كان به حيل	وفي طوفته لاضاق راسه يطقه
ما همني لو فصل الهرج تفصيل	نجم علا ما كل عين تحقه
اشره على بعض الرجال المشاكيل	ما ميزت ما بين جله ودقه
والا الخبول اللي ترد الأقاويل	الكل منهم منته وسط رقه
يا جاهل كثرة عليك الغرابيل	من الشوايب ضايع الفكر نقه
اتعب على كسب الرجال الحلاحيل	والا الردي له عرض الأكتاف لقه
وقت الرخا يعجبك بالحط والشيل	من السطر يرقص على كل دقه
يذبح ويصلخ في كلام وتضليل	وينهار لا من اشهب الوقت رقه
الرجل ما يخدع بزيف وتمثيل	ولا يخاوى كل من كان عقه
عليك باللي يفهم العدل والميل	اليا حصل عن جور الايام وقه
ينفعك لا صكت عليك المحابيل	هذاك حطه فوق راسك ورقه

الشاعر / سعود الردعان

كلمات نثرتها. من إحساس جميل تخطيت بها مشاعرنا ليبقى داخل قلوبنا عزفت به على أوتار المشاعر .... بريق وروعه أضاءت مساحتك الراقيه
أبدعت وتالقت.

تقبل مروري

اشكرك على ابداعك اللا متناهي
اسعدتني اسطرك وما حملته بين طياتها
بإنتظار القادم

أشكرك بن معوض / والاخ بعيد الهقاوي ... الحضور والتميز مروركم لمتصفحي وتواجدكم الدائم