ياهاجسي بالله توكلت هات

من اشعار معزي بن فلاح بن واصل السحيمي
اعجبتني القصيده واعجبتني رسايل بالقصيده واردت ان انزلها في ديوانيه الشعراء بما انه عضو فيها .:

ياخالقآ ذالكون خلق ونبات=ومفنيه وانت الباقي الك الدوام
ومحيه ياخلاق بعد الممات=ليومآ به الكافر يعض البهام
يارب في ذاك النهار النجات=لطفك وعفوك في نهار الزحام
دنياي منها المكسب الصالحات=امغادر الدنيا بمترين خام
يامرسلن جبريل بالبينات=الى شفيع الخلق خير الانام
ايخاطبه بااياتك المعجزات=مني عليه ازكى صلاة وسلام
يامكلف المسلم بحفظ الصلات=وكلفته ابحج وزكاه وصيام
ياعالمن بصدورنا الخافيات =يامسير الكون الفسيح ابنظام
بسمك بديت وحلو الابيات جات=تجي القوافي لي على مايرام
باذن الله ارقى قمة الشامخات=اللي عليها الحر وقع وحام
حي القوافي تركض امرتبات =نظمي من الجزلات ماهي هلام
ياهاجسي بالله توكلت هات=شعر ابمعاني مثل رمي السهام
امن القوافي عطني الغاليات= فيها المعاني مثل ضرب الحسام
ليه تنقى طيب المفردات=لي صوغهن مثل الذهب بالتمام
للشعر يالعَريف ذوق وطرات=يااهل المعاني والولع والغرام
اما قصيد امفيد ولا السكات=اخير والحكمه من الله الهام
شعرآ يروح ابسلة المهملات=وشعرآ سوات النور يجلى الظلام
بعد التفاتاتي لكل الجهات=اخاطب اعقول الاسود الحشام
اهل العقول الكيَس الراجحات=اللي لهم شان ومكان ومقام
ياعيال نجوان الرجال الدهات =سلام ياربعي وعندي كلام
اقول ياكسابت الطيبات =بالطيب ياربعي لبستم وسام
عندي علومآ من فمي الروات=طاول بها راسي لقمة سنام
يامن لكم في عالي النايفات=ذكر ايتفاخر فيه منا الغلام
كلآ على الاخر اله واجبات=يامن دخيل ابيوتكم مايظام
عسى السعد باايامنا المقبلات=انشد فيه اطناب كل الخيام
يازين رفقتنا بذي الحيات=تكاتفآ مابيننا واحترام
جمع القبيله فيه خير وغنات=والتفرقه ضعف وغباء وانهزام
رفقه لنا بسنيننا الماضيات= يازينها اللي قبل سبعين عام
يوم الليالي بالشقى امحملات=ماياجد المخلوق نوب الطعام
يوم البعض ملكه بعيرآ وشات=هذا لهذا بالنوايب احزام
في صفنا لايدخلون الوشات=تكاتفوا تالفوا يالكرام
وياكثرهم والله هل الطايلات=من يجحد افعال القبايل يلام
والوقف لعله تحقق ثبات=تكفون ياالربع الهمام الهمام
الوقف يبغى فكر وامساهمات=ويقوم بجهودالرجال العظام
وان قام بامر امكون الكاينات=خيرآ نحلق فيه فوق الغمام
وخَتمتها والعلم فيها ثبات= وازكى تحياتي لكم بالختام

شكرا لك اخي منصور لتنزيلك هذه القصيده بديوانية شعراء السحمان اطيب التحايا لشخصك الكريم دمت بحفظ الله

سلمت اخوي منصور على هذه الاشاده ويستاهل ابو فلاح كل علم غانم واشادتك هذي
ونقلك لقصايد هذا الشاعر حق الرفيق على الرفيق وبيض الله وجهك والشاعر معزي من الشعراء
المتمكنين بالمفرده وحسن الصيغه بالتعبير وصوغ القوافي مع الخبره في مجال الشعر
والقصايد الاجتماعيه وبدون مجامله لو شهادتي فيه مجروحه