قلوا تمنى قلت وجدي تمنيت

السلام عليكم ورحمة الله وبركاته
هذه ابيات جديده مع هذا الجو الطيب وجلسة نشامى شرواكم

قالوا تمنى قلت وجدي تمنيت
	جلسة نشامى في محاجير وادي
النار مشبوبه وللكيف سويت
	مهيله فيها العويدي مرادي
يبعد عماسي ذوقها لتقهويت
	شقراء وحمستها سوى بالجوادي
تريح الخفوق جلسه بتوقيت
	ريحة ذعاذيع الهواء جو هادي
لاهيفت شمس العصر غرب وامسيت
	ريح الخزامى مع نسانس برادي
البال رايق واذن وقمت صليت
	واديت حق الله بالاذكار بادي
وسويت للجمري حكرته وسميت
	متخاشرين بطيب نفسً وزادي
ربعاً على طيب الاخوه لهم صيت
	حضرة نشامى مدلهين الفؤادي
ماهم من اللي فرصته فيك لاقفيت
	يضحك ووسط القلب شامه سوادي
هرج النقيلي ماصغو له مصانيت
	جزلين عن درب الغبا بالسنادي
وزانت لنا السمره ومعهم تسليت
	وزان القصيد وخافقي له ينادي
قمت اتخير باحسن الشعر غنيت
	بين الرجال اللي غلاهم وكادي
اختار في بحوره على ماتوريت
	مسحوب ولابالهجيني مقادي
اقدى ويسبقني خفوقي على البيت
	واطرب لراحلته صدى البيت سادي
وياللي نشدتوا ذا مرادي لك ابديت
	ماراح من عمر الفتى مايعادي

صح لسانك يابعيد المشاويح

صح السانك يابعيد المشاويح على هذه الابيات الجزله بالصراحه جازت لي جدا واذا تبينا انتمشى يابوطاهر مع نزول الامطار انا حاضر لي جهه تتوراها دمت بحفظ من الله

اي والله ان ماراح من عمر الفتى مايعادي ابوطاهر وصح لسانك وجعلك دايم وانت جوّك رايق وخاطرك منشرح وترى أي سجّه مع ابوفلاح بدوننا ممنووووعه

شرواك الطيب ابوطاهر وصح لسانك وبيض الله وجهك هيضتنا للمكشات تقبل مروري

صح السانك ابو طاهر على هالقصيده الجزله تقبل مروري

صح بدنك الشاعر بدر الحربي وشرفني اطلاعك يالغالي

صح بدنك شاعر المنتدي والله يحفظك يابو فلاح والله ماتزين لا فيك انت وابو ريان الى لاجيت يكون خير يالغالي
انا بالرياض ماجود الان وشرفني اطلاعك الله يحفظك يابو فلاح

ابشر يابو ريان والله ماتزين لا معك انت وابو فلاح يالغالي بس خلوها ايام تزين الارض نشاءالله
وشرفني اطلاعك الله يحفظك يابو ريان

الشاعر عبد المجيد عوض السحيمي شرفني اطلاعك الله يحفظك وجهك ابيض يالغالي