ديوان الشاعر ذاير رشيد السحيمي

حنان وحب يجذبني وأنا في حبها ولهان
	أسم طيبه على بالي بحلم وعلم يراودني أسم طيبه على بالي
يبرهن بالوفاء حبي حنون تسكن الرضوان
	وبأمر اللي خلق موسى وعيسى ما يخيبني أسم طيبه على بالي
آلا ياياه يابهجة فوادي بعدك عطشان
	ليا مني تذكرت الحنان الموت يغمرني أسم طيبه على بالي
عسى ربي يسكنها جنات بابها الريان
	علشان السعاده في سعادتها تشوقني اسم طيبه على بالي
بعد شوف الحنون اليوم عناني ترا الوجدان
	اشوف الوقت من بعد الفراق اصبح معاتبني اسم طيبه على بالي
وياما متنها مشتالني ومن ثديها رويان
	وعسى ربي يعوضها وعلى الصدقات يامرني اسم طيبه على بالي
وليا قلنا الحقيقه لو فعلت بوالديك أحسان
	ترى رد الجزاء مانته بحوله لو ملاييني أسم طيبه على بالي
تشيلك تسع وسط البطن ولها خاطرن شفقان
	وفكر في ثلاث سنين بين المتن والحضني أسم طيبه على بالي
نشى لحمي ودمي من جسدها وربنا له شان
	الا يالله يامرسي الجبال الصم سامحني أسم طيبه على بالي
وأنا راضي بحكم الله وهذي سنة الرحمان
	رضيت بسنة الوالي وعسى ربي يصبرني أسم طيبه على بالي
أسم طيبه على بالي وأحب الأرض والأوطان
	وأحب أجبالها وآطلالها بها تذكرني أسم طيبه على بالي

المناسبه ان الشاعر مشعل المطيري له معاريف مع اخي عبيدالله رشيد السحيمي

العضيله رجل ماعرفه وتذكر لي صفاته
	رجل له قيمه مع أهل الطيب ويقدر زميله
وله خويا يمدحه ترى الخوي عينه مراته
	وكل طيب له صفات طيبه ذكره دليله
عملته زينه وراعي طيب يعرف واجباته
	يوم صار الوقت قاسي ماتردى مع زميله
وله مزايا طيبه ومبرهنه من العود جاته
	شايب رايه سديد وشيخ تنصاه القبيله
قال يامشعل وصيه قال له يابوي هاته
	قال جارك ثم ضيفك والخوي فيه الجميله
ورجل لك مقدار يا مشعل عصاتك مع عصاته
	من أحترمك أغلاك يامشعل يجي ولا تجيله
قال حاضر يالزعيم اللي عباتي من عباته
	انت أبوي اللي زرعت الطيب لي لازم نكيله
جود اوصات الأبو ماهو بليد العلم فاته
	قالها قبلي خلف شبل الأسد ترا مثيله
جعل يفداه البخيل اللي مايرخص دم شاته
	لايمد ولايلد مصرصرا دايم حصيله
الولد لاصار مابه فود من جملة خواته
	لايفيد ولايثيب اخرع كما ضب النثيله

رد الشاعر مشعل المطيري

مرحبا وأفك باب البيت وأفتح نافذاته
	ان عرفنا الضيف ولا ماعرفنا نحتسي له
مرحباً بالخط ومن جابه ومن صاغ أكلماته
	عد ماتبدي نجوم وعد ماتنشي مخيله
ما عليكم زود ياقوماً مايلحقكم شماته
	وانتم السحمان أهل سيفاً حدب ومهار أصيله
من قديم الوقت يؤمن الزمن ومصادماته
	فعلكم معروف يا ذاير وشدتكم طويله
من زرع زرعاً يبا يقطف زهوره من نباته
	نبذل المعروف ون جينا لكم نلقى مثيله
ون زرعنا الطيب يا ذاير جنينا طيباته
	من رجالاً مثلكم صعبةٍ وشرهتها ثقيله
واشهد إن ابو مشاري طيبات معاملاته
	بيني وبينه تنافس طيب ما كلاً يشيله
كم حاولت أسبقه بالطيب واهزمه بذاته
	كل ماجيته بحيلة جابلي عشرين حيله
جعل يفداه الردي والخاين وتارك صلاته
	والبخيل ومنكر المعروف واليمنى الذليله
واشهد إنه ماخسر عوداً عطاه ملاحظاته
	ربو ناساً يالعل بيوتهم دايم ظليله
ياعسى ربي يعين العود ويطول حياته
	راعي اليمنى الكريمة ماهي اليمنى البخيله

هذه الحدايه هديه الى الاخ الغالي عبد لله علي السحيمي واخوانه وخواله ولكل الغصبان



بمناسبة حفل الاخ: عبد الكريم علي السحيمي

الاوله سلام يا بدن عزيز من الجماعة
	يأهل الوفا والطيب يا رجال الشهامة والشجاعة
يا كاسبين الطيبة من جد ما جتكوم صناعة
	يا ربعي الغصبان يأهل العرف و الراي السديد:
و الثانية يالشهم يا حرأ ذراعي مع ذراعة
	يأبن علي يا راعي الطالات لك سمعأ و طاعه
لا خير فينا كان راع الطايله ماله فزاعه
	و هاذي سلوم أهل الوفا ولله على قولي شهيد

رد الشاعر سلمان نفاع السحيمي

ألاوله يا مرحبا باللي يواصلنا و لا يحب القطاعة
	عن الدروب الضيقة يمشي مع دروب الوساعة
و لا عليكم زود يا ربعي و رفقتكم طماعة
	ترا النوايا من بعضها قريبه ما هي بعيد
و الثانية قولك رفيع و لك مواقف فالرفاعة
	و اللي براسه طيب تلقى الطيب دايم من طباعه
أنتم أهل الفزعات و الوقفات و رجال السباعة
	كل العلوم الطيبة توجد بكم يأبن رشيد

هذه الابيات القيتها في حفل السحمان ناركم حيه

نيابه عن قبيله حرب والسحمان لي ربوع
	ياريف الجار وريفا للخوي والضيف في زاده
هلا عداد ماهل المطر واستبشرت برجوع
	عدد طلع النبات وعد مزنا زاد رعاده
االا يامرحبا باللي حضر من كل فج جموع
	وحضرت هالنشامى هي ربيع القلب واعياده
وسلام الله على اللي صيتهم مثل العلم مرفوع
	ملوكا من ملوكا من سلايل عود واولاده
اهل دينا واهل شيخه عريف وشورهم مطيوع
	يحلون القضايا من عصور العود واجداده
رجال اهل العطاء واهل السخاء في صدورهم مزروع
	وشواهد من مواقفهم تاريخ العلم وامجاده
الا يامستجيب لكل مسلم منحني بركوع
	تحفظ الدين وتحفظ الوطن وملوك له ساده
ترى حب الملك مع الوطن في قلوبنا مطبوع
	نبايع بالولاء لله ثم للملك وبلاده
وطنا ياوطن غالي وطن عنك العدو مدفوع
	نبيع الحال دونك ياوطن واعمار سداده
وطن نعيش في بلاده وطن عنه الدفاع مشروع
	بيوت الله وقبله كل مسلم دين وعباده
فديتك ياوطن دار العروبه ماش شكلك نوع
	وعسى ربي يحفظ اخوان نوره للبلد قاده
ويفكك من شرور اهل الحسد والمبغض المقطوع
	يادار المسلمين اللي حجاج البيت رواده
الا ياراعي الارهاب ياللي بالعقل مصدوع
	انا بنشدك عن دمعه صغير ابوه معتاده
ذبحت ابوه وش مكسبك لا نافع ولا منفوع
	تدمر بالنفوس وبالبلد ومطيع حساده
تدمر في بلدك اطهر بقاع وضامرك منزوع
	خساره ياخساره مانت عارف دين وجهاده
نصيحه ياشباب اهل الوطن هذا غزو مخدوع
	غزو للوازع الديني غزو من الغرب واحقاده
عليكم طاعه الله ثم طاعه للمصطفى المتبوع
	ترى طاعه ولي الامر واجب حق ياافراده

نصيحه لأبنائي

نصحتكم ياعيال بقافا مسويه
	باصوغ قيفانه لكم مستعدا
تمعنوا قافا قويه معانيه
	ذكرت فيه من النصح مايسدا
اقروه لوانه بعيده مغازيه
	والعلم يبقى شامخا مايهدا
اقروا جوابي وافهموا واعتنوا فيه
	وكلا بحبله يالنشامى يمدا
نصيحتي لاتضيع وقولا منقيه
	لايغركم طيش الجهل عين رمدا
ترا الفتى كلاعلى ساس ماضيه
	مابين ابوه وبين خالا وجدا
ولافيه طيرا دون ماكر ربا فيه
	ولافيه مبدا دون عزم ومشدا
اربع الى جات بالولد عز تغنيه
	مع البشر تلقى احترامه مبدا
الصدق والتقوى مع الرجل تحميه
	ومجد الكرامه والشجاعه لابدا
الرجل له مبدا وعرفا يقديه
	والعارفه يقدا ترا مايقدا
احدا على المبدا قويه مباديه
	واحدا يركبها على غير مبدا
العارفه لو تاه يقصر تماديه
	كبوت حصان وللغلط مايردا
الثور يكفي قول عنتر وطاريه
	تجنبه واذهن لصوبه تلدا
من شب على العوج بان العوج فيه
	يبقى عوج في هرج هزل وجدا
والعود الاعوج مايتعدل لراعيه
	تعديلته كسره لايمكن يمدا
كد قالها شاعر تجارب تكفيه
	ابن عمران اللي مع الوقت عدا
من ربعي الغصبان له قاف توجيه
	في قافه الحكمه وزين المشدا
وهرج النقيلي لاتشيله وتوشيه
	واذهن الى جات الوازم تردا
وتراالحسد نارا لاجاء الرجل يعميه
	لاتحسد المسلم بشيا يودا
الى عطيت من العطاء لاتراعيه
	كد قالها حجرف لاجاء الرزق سدا
وابن جزاء وابا الشيوخ لك نسميه
	يعطون ولا يمن العطا كان مدا
اذكرلك ابن غنيم ماكثر حسانيه
	شال العشاء واطعم ضعيفا مخدا
من لاتحزم للمراجل تخليه
	مايرتوي لوهو على جال عدا
مثل الضحاح اللي لاجاء الليل يخفيه
	ولاينفع الكسلان نوم المخدا
ولو المناظر ترفع الرجل وتوفيه
	يكفيه من عرض البشر عود ندا
ولا كل من زين عقاله يهقويه
	ولاكل من يزرع لزرعه يجدا

هذه القصيده ارسلها الشاعر العزيز نياف العمري الحربي عليه

مبداي بااسم الذي بالضيق نلجاله
	خالق جميع الملا عالم خوافيها
فكري تهيض تقلنه صابته حاله
	روابعن نوب مدري وين أوديها
من شافني قال هذا فاضيا باله
	ماهو بداري عن هموما نعانيها
عزي لنفسي من الايام مهتاله
	يافكرتي فالأعباد وفي مماشيها
بيصير عقيل وقته مثل جهاله
	يوم أكثر الناس صدت عن مباديها
كان الولد يفتخر في عمه وخاله
	وأفعال ربعه بحاضرها وماضيها
واليوم صار الفخر لبسه وجواله
	وملابسه أستحي ماني مسميها
ملابس أهل الوطن ماعاد تزهاله
	حتى الأصاله تركها مايدانيها
كثرت عيوبه ومعها شايفن حاله
	عوايد أجدادنا مايعترف فيها
والناصح اللي يبي له خير ماصغاله
	بصيرته تقل رب الناس معميها
لومع خواته جلس في بيته اشواله
	ولايغضب اللي سواته مايسويها
مأقول كل الشباب أشباهه وأشكاله
	فيهم رجاجيل مايسوى مواطيها
فيهم عيال تحب الطيب وأفعاله
	متوارثه طيبها من طيب أهاليها
وياللي تمرون ذاير هاكم رساله
	له القصيده مصخرها ومهديها
عسى دايم وطيب الفال يبداله
	شرواه ناس تنومس من يخاويها
قافا كتبته ولا لي مقصد آسعاله
	ولا ودي إنه عن أشغاله يبديها
وأغلى تحيه مع الأبيات تهداله
	واللي يتسمع لها بلسان ملقيها

الــــــــرد:

بديت بالخالق اللي منشي أخياله
	بامره خياله نشى والأرض يسقيها
ومن بعد ذكرى الولي القاف نبداله
	وجزل المعاني على كيفي أنقيها
أصوغها بالوفاء والطيب لرجاله
	ومن حشمته طيب القيفان نبنيها
حي الرساله وحي القول ومن قاله
	وحي القصيده ومن نقح قوافيها
الصاحب اللي يريح صدر من جاله
	أخلاق مع خوتا بالطيب حاويها
ياراعي الطيب خل الضايع بحاله
	مدام نهج الرجوله مايراعيها
خله يولي مهفه لا تحفواله
	لا تتعب النفس في نصحه تعنيها
ترا مصب الذهب تطلع له أحثاله
	ماعم كل العرب والرب واليها
ولا فيها طير بلا ساسا ومرباله
	واللي يعرف السنع نفسه يربيها
الحر همه إحرار بعالي جبال
	وبه طير همه تضابيحن يغنيها
ماكل من لبس ثوب وكيس إعقاله
	حوا الرجوله وفرض الله يصليها
من لاعرف لازمه ماينفعه ماله
	الطايله دايمن معروف راعيها
النفس مثلك من الأيام مهتاله
	قدامنا مريبد أيامه هجا فيها
جرب وعاصر مرور الوقت واجياله
	جرب مع الناس قاصيها ودانيها
الوقت هذا غريب وصار يرثاله
	متخلط ذيبها ونمر وحصانيها
وقال المثل ملح بيت الشعر بجزاله
	والكلمه الطيبه من حظ راعيها

مجاراه مع قصيده الشاعر الشيخ راشد ابن مكتوم كما قام بمجاراتها شعراء كثيرين من المملكه العربيه السعوديه

اساوير الذهب سارت وسار سيرها تدليل
	تسر السرور بسيرها سرت القاري
وسيم عليه اوسام مع امسيه تعليل
	وسايم لها الوسام بالوسم يحتاري
سطرها سطر سطر وسطر سطرها تجميل
	سطر والصطر تسطير أساطير الاخباري
سهول السهل سهله و يسهل لها التسهيل
	تساهل تساهيلن مع أصغار و أكباري
سمح والتسامح سامحه و السماحة كيل
	يسامح و يسمح سامعه كل مراري
سخاها سخا ساخي وسمى مع التهليل
	ويسخا السخا ساخيه سخا للابراري
وسهجهن سهوج الساهجه مع سهوج الويل
	تساهج مساهيج السهل سهل الانظاري
نسيمن نسانيسه و نسنس نسيم النيل
	وناسه نسانيسه رومنسي للازهاري
سلايل تسلسل سلسلة سلسبيل مهيل
	سلايل وخمسه سلسلة نسل الاخياري
وسايس سياسه وأسس مسار لهذا الجيل
	سياسي يسوس أسياس وهو سيف بتاري
سمرها سمر سامر سمرها سمر بالحيل
	مسامير سماره و فولاذ مسماري
سوالف سوالفين يسولف بها حلحيل
	وتسولف بها الاسلاف سواليف الاحراري
وسربن سربهن سربلا مع سروج الخيل
	تسرب وسرب سربهن سرب الاعماري
وسبعه اسباع وسابع السبع بالتكميل
	وسبعن مع السبعه سبع غادر الجاري

هذه ابيات مجارها مع الشاعر سعد دومان المحمدي

بديت بسم اللي رحم للذبيحين
	واطفاء لهب ناره وانجا خليله
وكون اجسام وقسم عقول قسمين
	علام في غيب القلوب العليله
ومن بعد ذكر الله ادات القلم وين
	بنرضي اللي له معاني جزيله
حي الجواب اللي على بحور شقرين
	فيه الشعر مع السطر مايبيله
سلمت يالحربي عقيد المسمين
	عصاه عصاتي عصاتن اصيله
الوقت هذا مايبي ناس عجلين
	مايهتجي جيعان بكل البليله
دنيا يابو تركي كما السيف حدين
	وش جاب عود العاج من راس فيله
مرفوع راسك لاقريت الدواوين
	ماتهزنا وان جات كلمه هزيله
نقدر الطيب على الراس والعين
	ولاالردي لابد يلقى عميله
ولنا عصا فولاذ هاذي عناوين
	الكيف فيها ذوق مع كيف هيله
حذرا تبيح السد للي مطلين
	ولك سيف يبتر في معاني جميله
لاهنت جاتك من ابن اخيك بيتين
	رموز رؤس اقلام وقافه كفيله

هذه الابيات ثناء على اهل الطيب القيتها في حفل عند علاث المحمدي

سلام الله على اهل الحفل واللي حاضرن ماجود
	تحيه طيبه بالمسك والعنبر نقدمها
دعيتونا محبه والمحبه كل يوم تزود
	وابو وليد من ربعي رجالن دون لازمها
بني سالم اهل الطالات واهل الطيب واهل الجود
	ربوعن يزرعون الطيب والجيره تقيمها
مشافيقن على الطيب وفي وجه الخصيم اسود
	ولاتكفي قوافي في بني سالم منظمها
قبيله طيب ومروه لها رايه وفعل مشهود
	ولها تاريخ وامجادن وقوانينن تحكمها
قوانينن توارثها النشاما وتبذل المجهود
	ترا هاذي صفات الخير ورب الخير منعمها
وانا من ربعكم مسروح رجالن بالملاقا فهود
	سحيمي والسحيمي عزوتي والجود محكمها
ذخر نجوان معروف الفعايل من قديم جدود
	عريب الساس ريفن للهجافى في مطاعمها
قوي الجاه فولاذن عضيدن بالليال السود
	الى دارت مقادير الليالي شبل ميدمها