قصيده بمناسبة حفل المعايده الذي اقامته الغصبان في هجرة المنشار عام 1434هـ

هلا يامرحبا ترحيب مفروش بذهــــب وورود
في ليله من ليالي العيد يا مطيب تهانيهـــــــــــا


عساكم عايدين وفايزين وكل حي يـــــــــــرود
بعد صوم رمضان وثم عيد الفطرقافيـــــــــــها


لعل العيد يا أهل العيد في كل السنين يعــــــود
وتفرح كل مدن المملكه بوجود غاليــهـــــــــــا


يعم محافظات المملكه يارب يامعبــــــــــــــود
قراها مع هجرها كل اهلها تجتمع فيـهـــــــــــا


وعسى ربي يتم الأمن تحت راية آل ســـعــود
وتبقى المملكه فأمان قاصيها ودانيـــــهــــــــــا


يقول الشيخ أبو ناعم وربعه ماعليـــــهـــم زود
نرحب بالجميع وتكرم اللحيه وراعيهـــــــــــــا


نعزم اللي قريب والبعيد ورمزنا موجــــــــــود
نعزم اكبارهم وصغارهم والله يحيـــيهـــــــــــا


نحييهم على البن الخضر معه الشبب والعــــود
وتراحيب(ن) كثيره لو بنحسبها مانحصيــــــها


حضرتو وسط هجرتكم ولابد الخبر مــــــردود
وحضرونا الوفود اللي من اقصى الدار ناصيها


تشرفنا الشيوخ وسلمنا مع سلمهم مــــــــــعدود
علـــــــــــى الجدان والابوان نسمعها وقاريـــها


نبي حبل التواصل والصله من بيننا ممــــــدود
ونأصفها كما فرض الصلاه اللي نصليهـــــــــا


هلا ياربعنا ياللي بلغتو غاية المقصـــــــــــــود
نهني راعي الفكره ونشكر من سعى فيهــــــــا


فرحنا بالليالي البيض واقفن الليالي الســــــــود
بعد جو الرجال اللي بيوت العز تبنيهـــــــــــــا


وحنا مانبي من بيننا حاسد ولا محســــــــــــود
ننقي كل خطرنا ونيتنا نصفيهــــــــــــــــــــــــا


عسى ربي يجنبنا الشرار ونظرة المــــقــــرود
نسمي بأسم خالقنا ورب البيت حاميــــــــــــهـا


هدفنا اللي نبيه فمجتمعنا نبذل المجهــــــــــــود
ورجل(ن) ماتبلع مرها ماذاق حاليهــــــــــــــا


نبي نصحى جميع ولا يكونون الصاحين رقود
تنادو بأسمكم يوم العرب تدعى بأساميـــــــهــا


ليا قلت الغصيبي مايجي من يمه المنقـــــــــود
ومعروف الغصيبي حاضر الهجره وماضـيها


وترى كل القبايل نعم مثل النار والبــــــــارود
يثورها الزعل وان كان جاها الطيب يرضيـها


وديرتكم وهجرتكم تراها مثبته بشهـــــــــــود
من الشام وجنوب وغرب والشرقي بأهاليـــها


لا قالو هجرة الغصبان قلنا محدده بحـــــــدود
بوسط الحجه اللي من قديم الوقت طاويهـــــــا


عسى يسقيك يا المنشار لا قام السحاب يقـــود
على روس الجبال اللي تتعب من يعديهـــــــــا


لا شفنا البروق بروق ناضت والرعود رعود
لا خيل من بحرها ثم هلت من مناشيهــــــــــا


لعله غيث خير يكون لا فاقد ولا مفقــــــــــــــود
اليا بكر ربيع الوسم وترعا به مواشيهــــــــــا


ترى عمر الفتى لو طال لازم يومه الموعــــــود
لزوم أما يصبح حفرته والا يمسيهـــــــــــــــا


لا شك الروح تذهب والجسد مرهون عند الـدود
ودنيا مزرعه تزرع وتحصد عند واليهــــــــا


ولا يا الله يارب الملا ماغير جودك جـــــــــــود
تغفر ذنوبنا يارب فأولها وتاليهــــــــــــــــــــا


واختمها بذكر الله عدد ماهب ريح النــــــــــــود
عدد ماذعذع الغربي ليا قامت ذواريهــــــــــا


وصلى الله على سيد البشر والمأقف المحمــــود
مبلغ مانزل والروح ترجع عند باريهـــــــــا

الشاعر /حامد مرزوق مهني الغصيبي

نبي حبل التواصل والصله من بيننا ممــــــدود
ونأصفها كما فرض الصلاه اللي نصليهـــــــــا

صح لسان الشاعر وعافاك الله اخوي عبدالعزيز جمعنا الله وإياكم على مايرضيه
كل عام وانتم بخير والله يرزق المنشار بالمطر والربيع وعساها عامره برجالها

صح لسان الشاعر حامد على هذه القصيدة الجزله شكرا لك اخي عبدالعزيز على تنزيلها تحياتي لك

صح لسانك اخوي عبد العزيز وبيض الله وجهك على هالقصيده
الطيبه وكل عام وانت طيب