يالله عسى يوسف علينا يعودي

هذه القصيده للخال العزيز الشاعر مسلم عبدالله السحيمي ينصح بها ابنه الدكتور يوسف مسلم عندما كان مبتعث بالخارج

البارحه يوم الخلايق رقودي
	قمت أتذكر غائب ارجيه محبوب
يالله عسى يوسف علينا يعودي
	ياعايدن يوسف على أبوه يعقوب
وتكفنا من شر حسد الحسودي
	ياعالمن بالغيب والأجل مكتوب
تكفا يايوسف ياعريب الجدودي
	تراك من ربعن عزيزين منجوب
من طاع نفسه للمهالك تقودي
	ومن قادته نفسه من العقل مسلوب
هذا كلامن مايبيله شهودي
	الله يامنا نقصت العقل عذروب
وتراك لك مقدار ماله حدودي
	وتراك عند أبوك والربع محسوب
وباغيك لا قالوا تخرج سعودي
	قالوا سحيمي ذاك دكتور موهوب
وباغيك تمشي بالعلا والسنودي
	بالعلم مع دينك هذا منك مطلوب
والعلم كلا باغيا منه زودي
	حتى العذارء لابساتن منه ثوب
ومالي ومال الصادره والورودي
	ابطلب الله يغفر الذنب واتوب
والخوف والله لادخلت اللحودي
	يارب تغفر ماعليا من ذنوب
وصلو عدد مابان مزن ورعودي
	على نبيا جا بالاسلام مندوب

شكرا لك ابو طاهر علئ تنزيل هذه القصيده الجزله الموثره لخالي الغالي الشاعر مسلم ابن غالي السحيمي ونسال الله ان يبارك بالدكتور يوسف وان ينفع بعلمه وطنه وولديه وقبيلته انا اعرف ان ابو غالب شاعر يتصف شعره بالحكمه والنصح لعله يتكرم بتنزيل بعض من قصايده في منتدى القبيله العزيزه ولو كان نزله ديوان اكيد فيه فايده كثيره لمعرفتي بجودة شعره الذي يتصف بالنصح والحكمه دمتم بالخير

كلمات في منتهى الروعة والرقة
سلمت يمينك على هذه الحروف
التي تستحق منا التصفيق لجمالها
دمتِ ودام ابداعك وتميزك

صح لسان قايلها وسلمت يمين ناقلها قصيده رائعه

ابو فلاح وابو فهد وابو فيصل صحت ابدانكم جميع
ونتشرف في وجود قصيد الخال الغالي ابو غالب
وديوانه رجل حشيم الله يحفظه ويحفظ له الابن
الغالي عند الجميع الدكتور يوسف ويجي بالسلامه
نشاءلله

صح لسااان ابوغالب وأبيات جزله ومؤثره وفيها الكثير من المعاني الطيبه

شكرا أبوطاهر على الإختيار الموفق

صح بدنك يابو ريان اطلاع مشرف الله يحفظك يابو ريان