ابكي حياتن صافيه مابها غيم ... وين المحبه والقلوب السليمه

‏​‏​ممدوح البقمي كان
مسجون
مر من أحد الممرات
( ريم وأمها ) داخلين لزيارة أبوهم السجين
سمع صوت الأطفال فتذكر أبنائه
فدمعت عينيه

شافته( ريم ) وقالت لأمها :
بكل برائة يمّه الرجال يبكي

أبكي وعيني تسهر الليل يا ريم	مدري بلاها الشوق والا الظليمه
يا ريم دمع العين مدري على الريم	والا على قلبن تواكل صميمه
تقول لاطمني على نونها سيم	أبكي وعندي لأزرق الدمع قيمه
ويمكن يكون الدمع للعين تكريم	ويمكن يكون إلها عذاب وحريمه
والله يا لولا دمعتن كنها الديم	راحت ضلوعي من عذابي حطيمه
ودام البكا يا ريم ما فيه تحريم	يا عنك والله لأرخص الدمع شيمه
وابكي على حالي من الوجد وآهيم	لين الزمن يخلف عليّه نسيمه
أبكي قهر وابكي من الغبن والضيم	وابكي من طعونن بقلبي قديمه
غدر الزمن خلّى بوجهي مراسيم	وما يذبح الرجال مثل الهزيمه
بعض المصايب شرها ياكل الهيم	وشلون بكبود الرجال الكريمه
وبعض المصايب يخلفن المفاهيم	تبغى على ما قيل صبر وعزيمه
مظلوم بالدنيا وغيري مظاليم	من عرض ناسن لبسوهم جريمه

ما عاد أبي من سود الأيام تعليـم=عقب العذاب اللي كلاني جحيمه

اخي / خالد عايد السحيمي اشكرك على نقل هذه القصيده الجزله وللمعلوميه يالغالي هذه القصيده للشاعر ممدوح البقمي حيث إني سمعتها بشيله للمنشد المبدع عبدالله السحيمي وقد شارك بها في هذا الموقع الشامخ بالقايمين عليه ارجوا التاكد من صحة الشاعر ونسبها له لحفظ حقوق الشاعر هذا حسب علمي والله اعلم تقبل مروري يالغاااااالي

هلا ومسهلا ابو مرجي وكما تفضلت فعلا القصيده للشاعر ممدوح البقمي وتم تعديلها
شاكر لك ملاحضتك وتوجيهك ومرورك لاخلا ولا عدم ... تحياتي

أختيار موفق يابو شهد لكن وين الحياه الصاااافيه بهــ الزمن
الله يعين ممدوح البقمي ويفرج همه ...
سلمت يالغالي على النقل وتقبل مروري ...

صح السان شاعرها وتسلم يمين ناقلها

سلمت يمين ناقلها وصح لسان شاعرها --- يعطيك العافيه اخيتار رائع

الله يفرج لكل مسلم .. ابو شهد تسلم يديك وصح لسان شاعرها

دمت بكل خير

شاعرر عملاق شكرا على نقلك القصيدة المميزة والله يفرج هم كل مسلم

الشكر موصول لك اخوي ابو ريان وبعيد الهقاوي وابو فيصل
وابو منصور وابو بادي نورتو بإطلالتكم لاخلا ولا عدم