مجاره بين بدر المطيري و لافي الغيداني

:: السلام عليكم ورحمة الله وبركاته ::

هذه مجاراه بين شاعرين وهما :
( بدر شامان المطيري >و< لافي حمود الغيداني )


**********
يــقــول بــدر:

ياشذى عطر القصيـد اقبـل ورش بيوتـه
شفني ارسم قاعـدة شعـر النبـط وابنيهـا
راكب اللي لمعـة السبـع علـى كبوتـه
ويش اوصفها ياربـي ويـش ابـا احليهـا
كنها شاطـي بحـر يـوم يتطـارد حوتـه
او كما خبرا على الطينـه صفـا صافيهـا
جيب لكسز برمجة سلفـه علـى ريموتـه
يستمـد الـلـوان فضـيـه ويستمديـهـا
كن واجهته من اصناف الذهـب منحوتـه
لمعـة جنوطـه وبوديـه تـمـرا فيـهـا
ان نطحتـه تقـل هـداف ٍ هدفـه يشوتـه
وان قفيتـه شبـه ذيـب ٍ غارتـه ناويهـا
وان تعـرض كنـه اللـي سبقـه مفلوتـه
اشقر ٍ يهوي علـى الصيـده ولايخطيهـا
وداخلي الكشـن صالـة محتكـر تايوتـه
صالـة ٍ عبـد الطيـف بماحتـوت بانيهـا
سـاع حطـت مويتـه ومرايتـه وزيوتـه
حي والله هالجيوب وحـي مـن يشريهـا
ان مشى صحرا من السرعه طغا طاغوتـه
وان مشى بالمدن حسـاده طغـى طاغيهـا
لو تحط اذنك لشكمانـه ماتسمـع صوتـه
يمكـن انـك تستشـك ودقـتـه تثنيـهـا
سايقـه مافـت فـوق المرتبـه بسكوتـه
ولاعـرف طعـم الكبتشينـو ولايشريهـا
استدار مـن الريـاض وطرقتـه منعوتـه
المخـارج للقصيـم ليـاسـرى يعطيـهـا
ومع اذان الفجـر قـدام الصـلاة تفوتـه
واصل ٍ دخنه صـلاة الصبـح ويصليهـا
وعقب ماصلى الصلاة الساعـه الموقوتـه
نحره كسـاب قولـة نعـم هـو راعيهـا
واحد ماصار عـرض لهرجـة الشاموتـه
فاتـح ٍ بـاب المضيـف وكلمتـه حاميهـا
ماقعد يحسب خسايـر ماخسـر بكروتـه
ماحسـب مخسـار حايلهـا ولا حاشيهـا
لافي اللي فايـت ٍ بالطيـب قبـل يفوتـه
ذخر قوم ٍ نهج حاضرهـا علـى ماضيهـا
ذخر حرب أهـل فعـول ٍ كلهـا مثبوتـه
كاتـب التـاريـخ يمليـهـا لمستمليـهـا
وعقب مانها ضيافته والعلم جـات وقوتـه
سلمه زرف القضيـه قـال انـا قاضيهـا
قصة المرسـل يفكـر والهمـوم تشوتـه
اسمع الدعـوى بصوتـه ليـن تستوفيهـا
اشتكي خسران ماني مـن خسـر بيلوتـه
خاسر عـذرا يهيـض خاطـري طاريهـا
مالهـا جـوال حتـى اسجلـه بالنـوتـه
بنـت بـدوان تصـبـح دار وتماسيـهـا
شفتها صدفه وبهـت وفرصتـي مبهوتـه
وقلـت ويـش انتـي وتاتعلـم ولايمديهـا
وعقبهـا تربـع ديرنـا والديـر موقوتـه
وتكثـر الحـوال نازلهـا علـى ماشيهـا
واتتبعـهـم وادور نـزلـهـم لافـوتــه
جالهـا عامـيـن يـالافـي ومتباطيـهـا
ويـوم جيـت ليالفريـق بويتـه وفروتـه
ولنهـا تزهـم علـى المقهـور ويباريهـا
واتحـرى فرصتـه فـي لفـة ٍ ملفـوتـه
ودي اخذ عهدهـا وابـدي علـى واليهـا
ولاش فرصه والعرب شماتتـن مشموتـه
وخفت ممن يشعـل الفتنـه ومـن يحييهـا
ياعليم بسـر نجـوى الهرجـه المخفوتـه
باسمك أبدا .. وابتديها .. وانتهي .. وانهيها

.
.
*
*
الــــــرد
*
*
.
.
.



راكب اللي سرعة اسكوده .. وباتريوتـه
مع بعضها كلهـا فـي سرعتـه يلغيهـا
لاسرى مثل اللي من أدنا السما مصلوته
ثلث ليـل ٍ غرتـه تـو القمـر باديهـا
تحت جنح الليـل يلّمـع كنـه الياقوتـه
في نحر مزيونـة ٍ فـي عمهـا وأبيهـا
تفختر .. ومن الغرور بزينهـا عنتوتـه
ماتلـد العيـن باللـي يطلبـون يديـهـا
جرمني الصنع .. يمناً تملكـه مبخوتـه
لو ماتملك غيـر مفتاحـه فقـط يكفيهـا
لادفعت فيه الدراهم .. لو بقت مبحوتـه
سجـة الفياقـرا فـي لازمـه تغنيـهـا
فستقي اللون واطـراف البـدي معفوتـه
ينطـح الريـح بجبينـه تقـل متقفيـهـا
فلسفة وصفه فصيـح حروفهـا ملتوتـه
وصفه روايـه تهمـش فلسفـة راويهـا
لاشتغل بشويش راع الصنف هذا موتـه
يكتـب بيـوت القصيـده فيـه ويغنيهـا
اقرب الاشيا لصوتـه حاجـة ٍ ممقوتـه
جايزلي وصفهـا لـو مانـي براضيهـا
كن صوته صوت سربوت ٍ بأذن سربوته
مرخي ٍ صوته بأذن صاحبتـه يخاليهـا
هرجة ٍ يشكي بهـا المشاعـر المكبوتـه
نوب توحيها ونـوب تغـدي ماتوحيهـا
وتشبه ازياك الوجه في كلمـة ٍ مبتوتـه
كل ماافكـر بضاهرهـا وفـي خافيهـا
معرض بشوت ٍ مطرزة ٍ جيوب بشوتـه
مظهريـن جيوبهـا .. ومسفـط ٍ باقيهـا
وكن باقـات الـورود بداخلـه منكوتـه
ريـح موكيتـه يـرد الـروح ويعافيهـا
ريحة اللي فوقها جرار العطـر مكتوتـه
تنتظر عريسهـا مـن الصالـه يسريهـا
كـن سواقـه ليانـاش الابنـص أبوتـه
يزهم أطيب بني اعمـه يحتمـي تاليهـا
ينطلق مثل انطـلاق الطلقـه المزتوتـه
من فم اللـي مايغـش عيارهـا راميهـا
ناص ٍ اللي مايحط الطيـب فـي تابوتـه
راسه علـوم المراجـل كلهـا حاويهـا
ماتقوبع عـن مواجيـب النشامـا كوتـه
محتـزم ويعشـي الضيفـان ويغديـهـا
من رجال ٍ يوم دوب الرجل يلقـا قوتـه
ضيفهـا يذكـر محاسنهـا ولايشنيـهـا
معه رد رسالـة ٍ ماحروفهـا معموتـه
من بـدر شامـان جتنـي والله يحييهـا
ساق لي فنجال دلـة مدحـه المزغوتـه
كـال طبختهـا .. وزودهـا وقهوانيهـا
ويشتكي فيها عليه مـن هـواء البنوتـه
بيحـت سـده بنيـة بـدون مهاويـهـا
والهوى بالوقـت هـذا سيرتـه مقتوتـه
والسوالف فيـه ماعـاد احـد ٍ يدانيهـا
مار بدر ابيض وجه ماسمعتـه مشلوتـه
ودام هذي حالتـه ماعـاد هـو ناسيهـا
بنت بدون للمختخـت ماهـي بختخوتـه
ينقطع حبل الرجا فيها .. بيـد راجيهـا
احمرار شفيهـا مثـل احمـرار التوتـه
والجمال اليوسفـي مـن ربهـا كاسيهـا
بالجمال محاصـره .. وبغبتـه مغموتـه
من تسريحة راسها لاخمص قدم رجليهـا
محفي ٍ ورا دورت ضعون اهلها سبوتـه
ويتحيـن فرصـة ٍ مـا الله لـه مهييهـا
البدو ماتمرح .. وتصبح وهـي مبغوتـه
بلش بدر بعودهم .. وببنتهـم . وأخيهـا
رجلهم عكروت فطنه والمـره عكروتـه
يذبحون الذيب دون الشـاه قبـل يجيهـا
يقنت صحيبك يابدر وسر نجـوى قنوتـه
يطلـب الله طلبـة ٍ يآمـل بـه يلبيـهـا
جعل دار اهل عشيرك ماتعيـش إنبوتـه
ودارك الله من نـزول البـدو لايخليهـا
ولالك الا ترك جروى الفرصه المسحوته
رح لبوها طران زيت وقل تـراي ابيهـا
وان عطاكيها .. يملك لك عليها الهوتـه
والمعونـه والمـه يابـدر واعطيكيـهـا

**********


ملاحظه :
مرعليكم اسم الهوته في اخر قصيدة لافي,,
ولجل توضح الصوره لكم
الهوته هو / سعود الهوته قاضي محكمة دخنه الحالي..




# تقبلوا خالص مودتي #

مساجله رائعه وجميله
يعطيك الف عافيه على الطرح الرائع

يعطيك الف عافيه على هذا الاختيار الرائع