البارحه مندوب للشعر جاني

بسم الله الرحمن الرحيم
كتبت هذه الابيات وانا لاابري نفسي من الاخطاء والنقص سوى بالشعر وغيره فالكمال لربنا سبحانه

بك المعونه ربي المستعاني
	يامن لاقلت لشي كون ابيكوني
يامخاطب امحمدابصدق البياني
	يامن هل التوحيد الك يسجدوني
البارحه مندوب للشعر جاني
	عطاني اعلومه وحرك شجوني
بعد تقهوى قال بالله ثواني
	من وقتكم بعض الدقايق عطوني
قلت اهرج اهرج بالعلوم السماني
	قال ايه اهاتي ليه ماتسمعوني
قلت اسمع اسمع جونا الان زاني
	وان كنت مستعجل اخذ تلفوني
واللي تريد ابشربه الان الاني
	ابشر اوصل علم عليه اموني
نداك لا ماصك عنه الاذاني
	ياصل عمالقة الشعر في لحوني
وبعد نقاشي معه ساعت زماني
	اللزمني ان اكتب كذا صدقوني
الشعر هو كم له وكم له يعاني
	امن القهر يقول شابت اعيوني
يقول انا عالي امن اصلي مكاني
	وفي كل موقف معتبر تاجدوني
يقول انا طبعي مااحب الطماني
	ياجاهليني ليتكم تتركوني
يقول انا مفروض ياناس اصاني
	يااللي تبوني منوتي تفهموني
يقول انا قام ايتعثر احصاني
	من كثر ماالمستشعره يركبوني
يقول انا ليه وليه اماني
	البعض ابي عن سكتي يبعدوني
يقول يامن لابغاني عطاني
	حقي انا غالي فلا يرخصوني
يقول يا العمالقه ياكياني
	عن مستوى مايليق بي ارفعوني
يامااكثر الشعار بس المعاني
	ياضعفها وكسر القوافي اغبوني
مااعم اخص اخاف زلت الساني
	واهل المعاني مقصده يعرفوني
عن الشعر كتبت علمآ لفاني
	وسلامت الجميع ختم الحوني

الله يعطيك العافيه يابو فــــــلاح على طرح
هذه القصيده الرائعه الجميله صح لسانك
وقواك الله ابيات روعه وكلمات معبره
وحروف ذهبيه مبدع ومتميز دام ابداعك
وتميزك سلمت الايادي وسلم نبض قلبك
اختيار موفق راقي
تقبل اعطر واجمل التحايا وازكاها
كان هنا بعيد الهقاوي

والله جازت لي بالحيل أبوفلاح وصح لسانك عليها

الطيب شرواك مايجيب الا الطيب

صح بدنك ابو فهد الله لايهينك ويطول بعمرك بارك الله فيك على التعليق الجميل والرد الراقي اقدر لك ما قلته عن القصيده وهي انشالله كذالك لك كل تقديري واحترامي دمت بحفظ الله

صح بدنك ابو ريان بارك الله فيك على المرور والتقييم طابت اوقاتك بالخير والمسرات دمت بخير من الله

صح لسانك ياشاعر المنتدى وبيض الله وجهك قصيده جزله من شاعر
جزل والله يحفظك يابو فلاح

صح بدنك ابو طاهر ووجهك ابيض دايما اقدرلك مرورك دمت بخير وعافيه