ديوان الشاعر أحمد حمود السحيمي

بسم الله الحرمن الرحيم

أخواني اعضاء الموقع الرسمي لقبيلة السحمان من حرب ( ملتقى السحمان الاجتماعي )

اتشرف ان يكون ديواني بين ايديكم وعسى ان يكون على قدر ذائقتكم ..

تحياتي لكم ..

احمد حمود دغمان السحيمي

مرثيه في الشاعر صياف الحربي

مرحوم ياصياف ياسيد القاف	مرحوم يافخري وفخر الحروبي
مرحوم ياللي بالمواقيف ماخاف	مثل الجبل ماحركته الهبوبي
مرحوم ياللي زاهيه فيه الاوصاف	عن المراجل حالفن مايتوبي
قضى حياته عز مايرجع خلاف	صادق والا قضا حياته كذوبي
انا بكيتك يوم عايش وتنشاف	واليوم انا بللت بالدمع ثوبي
الشعر من بعدك كرهته وينعاف	ماعاد من بعدك نبيله دروبي
روح معك من يوم شالتك الاكتاف	وغابت معك شمسه قبيل الغروبي
يارب ياللي بالمخاليق رواف	ترحم عزيزن مسكنه بالقلوبي
اعداد من صلى فبيتك ومن طاف	واعداد ماحزنت عليه الحروبي

ثورة حنين

السيف الاملح فيه ياثورة حنين	مهمته للي تدربي روسها
اللي تروع فالبلاد الامنين	واللي تدمر فالبلد وتحوسها
نعرف مقاصدهم وحنا عارفين	اللي تمول فالظلام عسوسها
دعاة فتنه فالبلاد وخارجين	طغمه اذله والخزا ملبوسها
سورالوطن حصنٍ على المفسد حصين	وشعبه على شانه تبيع نفوسها
الدار ماهي سايبه يالطامعين	نخلة عدل ماثر عليها سوسها
بلادنا محفوظةٍ في كل عين	بجبالها واهضابها وطعوسها
ان قالها الله يالحثاله خاسرين	نهين رئيسها على مريوسها
وحكامنا لهم الولاء يالخائنين	لظلم مانلقاه في قاموسها
ماهم مثل حسني وزين العابدين	حكام ودروب الصعاب تدوسها
هذول عز العرب والجنب المتين	ولغير ربي ماتنزل روسها

زين العابدين

من بعد ماقاموا عليك الغاضبين	ومن تونس الخضراء بدت ترحالها
طيارتك حامت يازين العابدين	وسط السماء قامت تدور لحالها
قامت تدور يسار مرات ويمين	ولحدآ سمح فالعالم استقبالها
باجواها تايه ولامعك العوين	وتقول هالدنيا وهذي حالها
زبنت لك يالتونسي حصنآ حصين	دار الملوك ومزبن اللي جالها
الدوله اللي قبلتآ للمسلمين	والدوله اللي كلبونا فدى لها
دار الحرار ودار طلقين اليدين	اللي تكرم لحيتك وسبالها
هذي بلاد الخير قصد الطامعين	ربي من الخير الوفير اعطى لها
ملاذ للخايف على مر السنين	ياكثر من ضاقت معه يلجى لها
ديرة هل العوجا كعام المعتدين	الديره اللي مانريد بدالها

اركب على اللي ماتشمه لو تطير	الا فلوسك في رصيدك زايده
جيبآ ولا ماله مع العالم خشير	متميزآ باسمه وذي عوايده
شفته وانا واقف على باب السفير	الوقفه اللي ماوراه فايده
لوهو قديم شوي لكن شي غير	كل الجدايد في حظوره بايده
هيبته ياحاتم تقل هيبة امير	الهيبه اللي مالقاها قايده
اليا وقف بين المواتر ياخطير	كن المواتر حاضره بتعايدة
لونه مثل لون القمر لاصبح منير	عشاقته في هالزمن متزايده
اليا اشتغل هادي ولاتسمع صرير	اصلن ماكنه مشتغل من قايده
واليا مشى بهوين جذاب ومثير	أغراء للي يهتويه ورايده
واليا قحص من دعسته ملعون صير	كنه صعيدي فازع لصعايده
مسرع ولاهمه كبير ولا صغير	ساهر عجز عنه ولا هو صايده
ضني لازاد بسرعته يمكن يطير	ويصير رايد للفضاء يارايده
في خوته وافي ويصلح لك شوير	ماكنه الا خوةالرشايده
ياراكبه لاجيت ابو قلبآ كبير	نسل الشيوخ ولا عليه مزايده
هذاك ابن فاهد زبون المستجير	الكايده ماهيب عنده كايده
يزبن عليها لو يصير اللي يصير	في راسه الفزعات فكره سايده
محمدياً في طيب وفيه خير	يافزعة المضيوم ياسنايده
قله ترى بن حمود يذكركم بخير	ويذكرك دايم لاكتب قصايده

بالعافيــــه ... !

ياللي بعدك الحب مايسوى جنيه	وياللي بعدك انوار قلبي طافيه
خل المشاعر صاحيه من دون ليه	مابغى المشاعر لو دقيقه غافيه
الوقت هذا من زمن كنت احتريه	يوم المشاعر والمحبه خافيه
جوي معك ياما تمنيته وابيه	افضل من اجواء الربيع الصافيه
يدك بيدي ماهمنا بعض الوجيه	مابي خلاف ولا عليك خلافيه
وش فيه لو قمنا نغني ويش فيه	ابياتك اللي دون وزن وقافيه ..!
حتى القمر سطحه اذا تبغى نجيه	لو قلت لي هاالارض ماهي كافيه
انته معي واكلك كلك وش عليه	وانا معك كلني عسى بالعافيه

هذه القصيده القيتها في حفل تكريم الشاعر لهاب الوسيدي في محافظة حفر الباطن ..

مشيت من دار النبي متوجهاً قبل الغروب	يم الديار اللي كساها الطيب عرض وطولها
ملبين دعوة هل الطولات صافين القلوب	اللي ينومس ذكرها بين العرب وفعولها
ربعي وفي كل المحافل افتخر فيهم وانوب	عنهم وانا قد الحمول ولو تزيد حمولها
حربي ليا من قلت حربي ياكرم من كل صوب	حربي ليا من قلت حربي انطنخ واقولها
حربي من اهل المعرفه حربي ليا قلت الحروب	ازحول الارض اليا ذكر بين الرجال ازحولها
اللي كرمهم شمس مافيها كسوف ولا غيوب	اللي على وضح النقاء عاداتها واصولها
اهل المكارم والشيم والطيب والصدر الرحوب	تسمع تراحيب المطر بالقوم قبل اوصولها
قوم المعزه بالملاقى نار لاشبت شبوب	ومن السطر حتى المنايا حوضها وردولها
وكل القبايل والنعم والصدق مافيها عيوب	اقولها والناس مثلي للرجال تقولها
اهل المدايح تستحق المدح راضي ومغصوب	والمرجله صعبه والا كل الرجال تنولها
والعقل له سلطه على الرجال والفعل محسوب	دام الرجال يخلد التاريخ طيب فعولها
قد قالها ( لافي ) وهو شاعر مقدر ومحبوب	الفرق ماهو باللحى الفرق فرق عقولها
والشعر قد قالوا ثقافه من ثقافات الشعوب	واليوم سلعه تنشرى وتباع عند خبولها
صارت وسيله يم ناساً همها ملي الجيوب	ماهمها شعر الجزاله همها محصولها
واللي تقيم ماعرفت درب الشمال من الجنوب	تجهل عروض الشعر في علم الادب واصولها
ماقول من قيم صدق ماقول من قيم كذوب	بس الاكيد ان الصحيح ابعيد ماهو حولها
وشلون والهاب الوسيدي قد مشى كل الدروب	فالنظم والقلطه بعد واجه كبار فحولها
شاعر جزل شاعر جبل ماهزته ريح الهبوب	وانا اشهد انك يالوسيدي هامتن ياطولها
لاجيت محفل عن قبيلة حرب ياوسيدي تنوب	مالك ومال اللي تقرقع فالظلام طبولها
والله لو ماحرص على الحسنات واخاف الذنوب	يافيه كلمه خافيه بالصدر كان اقولها
لكن ابختم والسحيمي تاج راسه يالحروب	زحول الارض اليا ذكر بين الرجال زحولها

هذه القصيده القيتها امام امراء حرب وضيوفهم واعيان منطقة المدينه المنوره في حفل الشيخ / محمد بن فاهد المحمدي الحربي رحمه الله يوم الاربعاء 12 / 10/ 1428هـ

خطمتها يوم عرضت واستفهمت هل من جديد	وجاوبتها حبر الورق عقداً لها يزهالها
وقيدت شراد المعاني والجدير من القصيد	هرج(ن) يصف لجانب الحكمه وينعم فالها
لاني جرير وللفرزدق لاني الشاعر لبيد	لكن ليا صعبة على الشعار انا حلالها
عنوانها يامرحبا واهلاً هلا واليوم عيد	واسطورها تزهى بكم في دقها وجلالها
يامرحبا ترحيبة(ن) يرضخ لها راس العنيد	يرضخ لها من صدقها في حلها وترحالها
يامرحبا بضيوفنا تشريفهم يوماً سعيد	النا الشرف في مقدم اهل الطيب كلن قالها
طيبه ترحب بالضيوف ونورها فيكم يزيد	استبشرت باللي تعنى من بعيد وجالها
بنيابة(ن) عن لابتي اللي لها فعل(ن) مجيد	بجنوب الارض وشرقها مع غربها وشمالها
حرب الكرامه والكرم والطيب والباس الشديد	هي تاج راسي عزوتي وافخر بها وبرجالها
اهل الديانه والتقى والعز والراي الرشيد	وان ثارت الهيجاء على وضح النقى نبرالها
حربن موثق فعلها عند القريب والبعيد	والشعر يعجز لو نقوله مايعد افعالها
والنعم في كل القبايل وافيه والله شهيد	ومدحي لربعي ماينقص للعرب منزالها
اما الولاء يم الوطن واجب ولا عنه نحيد	الله يعز الدين والدوله على منوالها
في ظل ابو متعب ذرانا ياعسى عمره مديد	صقر العروبه خادم البيتين حامي جالها
حاقن دماء المسلمين اللي مشاكلهم تزيد	فتح وحماس ودارفور ومشكلة صومالها
يضرب على الارهاب والفتنه بيد(ن) من حديد	وراع الحيل ماعاد باقي حيلة(ن) يحتالها
كل الدول متجمعه بجهود ابو متعب تشيد	خيب ظنون الزمره وطاحت بشر اعمالها
وشعبه معه بالمعركه بالفعل والراي السديد	بأمر الله انا ندفن الفتنه ومن يسعى لها
هذا وطنا مايهزه كل شيطانن مريد	هي مملكتنا عزنا وضلالنا بضلالها
الغاليه اللي غلاها جاري بدم الوريد	ولايمكن يكون الغلا في داخلي الا لها
الله يديم الامن والامان والعيش الرغيد	والله يخليها لنا ويديمها لعيالها
بدا السحيمي وانتهى والله يفعل مايريد	يالله عساي مجمل(ن) باللي وقفت قبالها
وختامها صلوا على المرسول من رب العبيد	اللي هدى الامه وعن درب الضلاله شالها

القطاع الخاص

شعب القطاع الخاص شعب المعانات	ماكنه إلا شعب عايش لحاله
ماعاد تشملهم جميع القرارات	حتى القرار اللي يخص البطاله
لو كان يشملهم قرار الاجازات	كان المصاب اخف باللي جراله
الظلم والحرمان فينا علامات	والحمل زاد وما نطيق احتماله
ظلم الاجانب ياوطن زاد بالذات	يصرف على كيفه وياخذ رياله
لا ياوطن ماعاد نبغى الاهانات	مابه وطن يرضى مذلة عياله
لاياوطن نبغى العدل والمساوات	مادام حكمك ياوطن بالعداله
موظف الدوله تجيه الزيادات	وراع القطاع الخاص ما شي جاله
حنا نعاني ياوطن طول الاوقات	ودرب العناء مال الموظف بداله
لاياوطن لو كان معنا علاقات	ماكان حالتنا من الياس حاله
حنا عيالك ياوطن سلم وازمات	ماهو جوابك لي مالي وماله
اللي مع المظلوم رب السماواتواللي معاه الله ماهو لحاله

ياللي زمانك على راسك يلف ويدور	خلك على سجتك ماهو بطايح حطب
الله هو اللي عليماً مادخل بالصدور	لاتبحث الهرجه اللي من وراها تعب
صدورنا ماتفوح اللي تفوح القدور	واسعارنا غاليه بالسوق مثل الذهب
اخلاقك اللي معك ماهي بطاقة عبور	لقلوبنا .. مير خذها طيب والا غصب
لاترفع الصوت وانته بالزمان مخبور	الصوت مايرفع الا في أذان وشبب
بضاعتك وسط سوق الطيب لازم تبور	منته بلاقي عليها وسط سوقه طلب
ماردني عنك غير القول من بعد شور	( لاطاحت بلحيتك واليا علت بالشنب )
من دون ذنب وسبب لازم تفور وتثور	وش حلها اللي تجي من دون ذنب وسبب
وجه الشبه بيننا حاصل فبعض الامور	انا قليل الدسم ... وانته قليل الادب ...!