ريف الخوي والضيف والجار مكفول

هذه الابيات
اسندها الى الشاعر سعد عبدالله المحمدي الحربي

الجيب واقف كنه الصقر مفتول
	ملموم مثل الكف جكس آر شنطه
نوعه خليجي من الامارات محمول
	وصنعه تويوتا والعلامه بجنطه
مسجل مديله في حزامه ومنحول
	حزام الامان وباخر الرقم نقطه
أثنين مع صفرين وثنين مشتول
	هذا مديله في حزامه وضبطه
ماغيرن مراتبه ولكمل حول
	واللون بيج وغامق اللون ضغطه
غير جميع الزيت واملاه بترول
	خانتين فللهن ياراعي المحطه
واربع تواير وبلفها تبلس اسمول
	وشيل الغطاوي واكمل الجيب نفطه
ثم دق سلفة ينتهض نوزه يهول
	ولجم قزازه الى تساوى بخطه
تسمع جليده الى استوى الخط بالطول
	يشبه كلاشن كوف بحرف آي قشطه
بعد الزوال من المدينه على طول
	وقبل غروب الشمس هدا بمشطه
ورا القليبه مع زراج ارض سحلول
	كد عقب النقطه عضيدي بوسطه
سواقه الضيغم راعي طيب و فعول
	من قوم لهم فعل ماحدا يغطه
من لابت فيها طحاطيح وزحول
	اسود في وقت الوغاء والمشطه
حربي عقيد حروب بالفعل والقول
	اطرب لقيفانه وصوغه وخطه
سعد شاعر علم ولاهو بمجهول
	خافوق صدري منه يزداد بسطه
قصائده حكمه وله صوغ مقبول
	والنقض مع فتل المعاني هو شرطه
يازين منطوقه على الجزل مرسول
	والجزل في قافه على اوصول حطه
ريف الخوي والضيف والجار مكفول
	وريف اليتامى جزل مده وصفطه
سلمت يالحربي وعسى عمرك يطول
	معجب بقيفانك وصوغك وربطه

صح السانك الشاعر ذاير
قصيده في قمة الابداع وماهي غريبه عليك هذا الجزل

صح لسان شاعرها وسلمت يمين ناقلها

صح لسانك أبوطاهر والله يرزق بالربيع اللي تسج فيه وتوسع الخاطر مع ابوتركي وشرواه

يامرحبا مني مثل صافي الول

وقت الرخا والا بالايام شطه

احلا من الحالي مغلف ومعسول

في خط شاعر عالي الرجم نطه

لو فيه حصلنا مطبات وميول

وزريت اميز بين سمنه ويقطه

من ذاير الحربي له احكام وقبول

قرم العيال اللي بدينه نغبطه

من لابةٍ لاجردو كل مصقول

كم راس فارس بالمعارك تقطه

قبيلة السحمان شجعان وكمول

مجد الرجال الوافيه من يغطه

ياكود ياهل العرف حاسد ومهبول

دايم لسانه بالخطايا يمطه

وعن المراجل فيه كبوه ومشلول

بيضة غراب البين من بطن بطه

ياصاحبي يوم العدا جالها ضول

وكثرت ثعابين السناوي ورقطه

دمرت باالبحر الحمر عدة اسطول

عد الجنايز بين عمقه وشطه

راع الخطا صابه يابو طاهر اذهول

بعد المكابر قال صرنا بورطه

يوم انتصرت وصار عاذل ومعذول

كلن حزم لمقابل القوم وسطه

راس الجبل لو عاوده برق وثعول

هونت دام القوم عنا بغطه

شرهه وتنصى راس مقبل ومقبول

قلته وانا مالي على الناس سلطه

ماقل دل وياعسى عمرك ايطول

ونبغى السموحه كان بالرد غلطه

اسلم وتسلم من عنى كل مخيول
	هاذي شروط الشعر لو كان شخطه
كل العسل مصدر نحل ساسه الثول
	والثوب ماينفع الى بان قطه

وصح لسانك يابو تركي وبيض الله وجهك وكفيت وفيت

وبعيد عنك القصور ياوجه الرفيق الله يحفظك والدعوى تسلي وبييض الله وجهك