مساجله مع الشاعر مبارك ابو ضهير

على شان همزه يامبارك رفيع الشان

فدتك القصيده يامبارك وكاتبها

علينا الجواهر وضعها داخل الدكان

حسب فهمنا مافيه حاجه تعيبها

بعيد النظر في شاشة العرض بالميدان

حروف الهجاء لو بعثروها يرتبها

يميز بغلطه مطبعيه من النقصان

مايبلش بكلمه واضحه كيف يعربها

ترى الاجنبي في دار الاجناب يابليهان

لابده على داره يوجه نجايبها

ويعد السوالف وانت فاهم وسيع أبطان

علومي تحدد وين يالقرم مضربها

تحية وفاء والمعذره والمعين أيعان

بمان الكريم أستاذنك يامعزبها

غلاكم بقلبي لو رحلنا مع الازمان

ماتمحاه ياريف النشاما هبايبها

ياروس الرجال مرجحه كفت الميزان

تحية لكم بالعود الازرق مخضبها

يقوله من الشعار شاعر فصيح ألسان

جميع البشر حسب لغتها يخاطبها

رد الشاعر الكبير مبارك ابو ظهير

فداك الردي يامحمدي ماني بزعلااان

ولاأبيك تزعل والتفاصيل جنّبها

وأنا الحمد للي خالق الناس والأكوان

بعيده هقاويّي عريبه مناسبها

إذا زل في حقي عزيز ٍ من الخلان

أطوّف له الزله ولايمكن أحسبها

وإذا عاد كررها .. فأنا أحط فالحسبان

حقوقي ولا أتْنازل وأشرق وأغربها

وإذا أخطيت في حق الخوي أعتذر منشان

أقوي صداقتنا ولايمكن أشذبها

لأنّا بشر نخطي وذا طبعه الإنسان

بشر والبشر دايم تفاخت مذاهبها

مهو عيب لاختلفت على بعضنا الأوزان

لنا حق نسأل والتفاسير نطلبها

أنا والله إني فاهمك صح ياكحيلان

قريت القصيده صح ماني معذربها

أنا قلت أبي توضيح إن كان بالإمكان

علشان بالتوضيح نبعد مثالبها

سؤال ٍ سألته ماهقيته يثير أشجان

على طيب نيه .. ونيتك مانشك ابها

وتفاجأت في ردة فعل منك ياهديبان

وأنا محترم نفسي .. وقايم بواجبها

ولو ترجع لردي ترى ماني بغلطان

إذا فيه كلمه غثتك أبشر أسحبها

وإذا كنت ناوي في رحيلك على ماكان

فلاباس وإكرام النفوس بمطالبها

غلط ماغلطنا وإن حصل نعتذر والآن

أمام الملا بس غلطتي ياسعد جبها

ردي على الشاعر الكبير مبارك ابو ظهير

هلا يامبارك عد ماغاب نجم وبان

تحية وفاء باأحلا الجواهر مذهبها

مثل عقد ماس بعنق فاتن من الغزلان

لازاحة عن الوجه الحياوي ذوايبها

قضت عمرها بالشام مدري جبل لبنان

سوات الاهله يامبارك حواجبها

نحيلت خصر والعود من طيبها ريان

تعامل بعفويه مع اللي يخاطبها

أنا ياوسيع العرف يامعرب الجدان

على الطيب والمعروف نفسي مهذبها

أقيس البحور بعمقها واعرف المرجان

وأدل العدود اللي عذيه مشاربها

لساني حصاني مخلط الثوم بالريحان

أقيس الرجال بطيبها لامناصبها

ماحب المكابر والمزايد بلا برهان

دروب الخطاء مبطي زميلك مجنبها

أسج الركايب من بلادي ليا خيطان

ظهور الركايب يامبارك مشيبها

نحتنا على صم الحجر رايع القيفان

بضايع بوسط السوق ضامن مكاسبها

وانا داري انك تصخر القاف يالسرحان

بيوتك رجال الذوق والفهم تطربها

لقينا لكم ياراعي الطيب بالديوان

قصايد جميله سالمه من شوايبها

نهاية مطاف السالفه نقفل البيبان

قضيه ماتفسد حب ناس لحبايبها

سعينا وطفنا يامبارك وانا الربحان

انا المستفيد وكلمة الحق ماطيبها

الاخ الشاعر سعد المحمدي صح لسانك ولسان الشاعر ابو ظهير على هذه المساجله فعلا مساجله تستحق القراءه لعدة مرات لقوة معانيها تقبل مروري

اقتباس:
المشاركة الأصلية كتبت بواسطة معزي فلاح واصل السحيمي
الاخ الشاعر سعد المحمدي صح لسانك ولسان الشاعر ابو ظهير على هذه المساجله فعلا مساجله تستحق القراءه لعدة مرات لقوة معانيها تقبل مروري


الاروع والاجمل
مرورك الراااااااائع

صح السانك اخوي الشاعر سعد المحمدي وصح لسان الشاعر مبارك ابو ضهير

صح لسااانك أخوي سعد المحمدي وصح لساااان الشاعر أبوظهير

قصيدك جزل أخوي سعد ونتشرف بوجود ديوانك الشعري ضمن دواوين الشعراء وديوان الشاعر فهد صمدان البشري العضو اللذي نتمنى تواجده وعودته ...

دمت بخير

اقتباس:
المشاركة الأصلية كتبت بواسطة حسين مرزوق بن راشد
صح لسااانك أخوي سعد المحمدي وصح لساااان الشاعر أبوظهير

قصيدك جزل أخوي سعد ونتشرف بوجود ديوانك الشعري ضمن دواوين الشعراء وديوان الشاعر فهد صمدان البشري العضو اللذي نتمنى تواجده وعودته ...

دمت بخير



الشرف لي الله يبيض وجهك
وماعليك زود لاهنت على المرور الرااائع

اقتباس:
المشاركة الأصلية كتبت بواسطة بعيد المشاويح
صح السانك اخوي الشاعر سعد المحمدي وصح لسان الشاعر مبارك ابو ضهير


لاهنت على مرورك الاجمل

يعطيك الف عافيه ابو تركي
على هذه المساجله الرائعه وصحت السنتكم جميع
ومثل ماقال ابو ريان نتشرف بوضع ديوانك الرائع وجميع قصايدك

اقتباس:
المشاركة الأصلية كتبت بواسطة بعيد الهقاوي
يعطيك الف عافيه ابو تركي
على هذه المساجله الرائعه وصحت السنتكم جميع
ومثل ماقال ابو ريان نتشرف بوضع ديوانك الرائع وجميع قصايدك



هلا وغلا وهذا من طيب معدنك يابن العم