مجاراه مع الشاعر سعد المحمدي

بسم الله الرحمن الرحيم

قرأت البارحه مشاركه للشاعر الكبير سعد المحمدي ( العسكري راتبه مايصرف عياله ) وأعجبت بها فجاريتها بهذه الابيات عسى ان تنال اعجابه واعجابكم

قال أبو تركي وأنا شاقتني أقواله
	صدق ابقوله سعد ميه على ميه
ياأبو فهد كان تعرف رقم جواله
	عطنيه أبخاطبه باأبيات منقيه
الله يحييه والابيات مرساله
	في ملتقى ربعه اللي نارهم حيه
أنا بجاريه في قافٍ ليا شاله
	راع الولع قال ليت القافيه ليه
طرقٍ ابا الحنه ثم اتوحاله
	بالله شيلوه ليه ياالهواويه
الكيف مابيننا مشروب فنجاله
	ببيوت شعرٍ على طرق الهجينيه
جزل المعاني وسيع العرف تهداله
	سعد أجاريك ببيوتٍ سحيميه
كم واحد الفقر ياأبو تركي اغتاله
	لو كان للطيب بالرجال ماريه
لو كان بالجود راس طويق منزاله
	وابلشته في حوايجه الضروريه
لو هو كبير العرب ملفى لمن جاله
	الله يمده بعونه طيب النيه
الطيب مايدركه منهو ردي خاله
	لو انه أكبر هوامير الغناويه
اللي عن اللازمات إيصرصر رياله
	بينه وبين الكرم دايم حساسيه
يمناه لو حاولت تردها إشماله
	عن المكارم على عينه ضبابيه
والعسكري ياكبر بالقاده آماله
	اللي بحد الوطن بخطوط أماميه
الجيش درع الوطن من ينكر أفعاله
	إيوالله الجيش وقفاته بطوليه
الجيش قد كنت أنا واحد من أبطاله
	خمسه وثلاثين عام وفوقها شويه
ترى الوطن هيبته من قوة إرجاله
	برجالها الدار بإذن الله محميه
اللي طمع في وطنا نقطع إحباله
	أرض الرسالات والكتب السماويه
واللي براسه يخرب لايوراله
	وراه حتى تجيبه قوه أمنيه
وتمت بعون اللي أنا أجيه وآساله
	اللي بعفوه محى بالحسنه السيه

جزل المعاني وسيع العرف تهداله

صح لسانك وعتلا شانك يابو فلاح انته وابو تركي
وتقبل اطلاعي

صح بدنك ابو طاهر وطابت اوقتك بكل خير وشكر لمرورك

الاخ الشاعر معزي فلاح

صح لسانك
عز الله يا اخوي هجينيه تطرب البال

بيض الله وجهك والله يا اخوي يشرفني ويبهج صدري لما اقرا قصايدك
مع احترامي لجميع الشعراء لانهم فعلا مبدعين ويستحقون الشكر بس الظاهر يا اخوي ان عمر الانسان له دور ويمكن مزاجنا قريب من بعضنا

تحياتي للجميع

أنت والله اللي وقفاتك بطوليه يابوفلاح ..

صح لسانك وانها جازت لأبو محمد هذا يسد لحاله عن أي تعليق

تقبل مروري

ابو ريان صح بدنك وبارك الله فيك واذا مشاركاتي تضمنت شي من الفائده فهذا واجب علي شرفني مرورك دمت بخير من الله

الاخ العزيز ناهض مثيب اهلاوسهلا والله يا ابو محمد عزيز ورفيق غالي وصح بدنك اسال الله الكريم ان يبهج صدورنا وينير عقولنا جميعا بطاعته وكما تفضلت السن له دور فكل صاحب موهبه مع تقدم سنه يكمن يجيد اكثر مافي شك ياابومحمد مزاجنا قريب من بعض جدا ولك كل الاحترام

الشاعر معزي فلاح السحيمي
صح لسانك وبيض الله وجهك
على المجاراه الراااااااائعه
والنعم فيك وبربعك
وربعك ربعي الله يبيض وجهك
ياراعي الطيب
اجمل التحايا لشخصك الكريم

بسم الله الرحمن الرحيم الاخ العزيز الشاعر سعد المحمدي اسعد الله اوقاتك بكل خير وصح بدنك ووجهك ابيض دائم اما قصيدتك يا ابو تركي لو ماتستحق المجاراه ماجاريتها فاقصيدتك من نوادر الشعر والفكره الذي بنيت عليها القصيده ايضا لك كل الشكر على اختيارها ارجو ان تكون مجاراتي لابياتك موفقه وعذرا منك ان لم تكن بمستوى ابياتك الرائعه دمت بخير من الله ولك كل التقدير والاحترام

المشاركة الأصلية كتبت بواسطة معزي فلاح واصل السحيمي

بسم الله الرحمن الرحيم الاخ العزيز الشاعر سعد المحمدي اسعد الله اوقاتك بكل خير وصح بدنك ووجهك ابيض دائم اما قصيدتك يا ابو تركي لو ماتستحق المجاراه ماجاريتها فاقصيدتك من نوادر الشعر والفكره الذي بنيت عليها القصيده ايضا لك كل الشكر على اختيارها ارجو ان تكون مجاراتي لابياتك موفقه وعذرا منك ان لم تكن بمستوى ابياتك الرائعه دمت بخير من الله ولك كل التقدير والاحترام

كفيت ووفيت يابن العم مجاراه جزله من شاعر جزل
الله يبيض وجهك