جتنا عجوز(ن) قلبها مشبهاني

امس الضحى في مجمع السوق جاني

غرو (ن) يسل الروح زين امشيانه
شفته يناظرني ويضحك وزاني

واشوف فيه من المحبة بيانه
اخذت لي ساعة وانا في مكاني

وهو يناظرني وهو في مكانه
مشيت يمه والغضي مادعاني
ابنشده وش حاجته ووقفانه
قلت انت وش حاجتك يامودماني
ياعوق من مثلي رمى به زمانه
ضحك يقصر كلمته به نفاني
وليا ضحك يظهر طويرف ثمانه
يقول انا لولاك ماجيت عاني
جرحك بقلبي قد تبين ضمانه
جحدت حبك لين حبك فضاني
خفيت من عقب الحيا والوثانه
قلت انت اظنك جاهل (ن) معشراني
قلبك عالضحكة وسيع (ن) بطانه
تقول هذا شافني واشتهاني
لاشك ابا اضحك له وازيد امتحانه
قال انت في حبك تعادل اخواني
انا قتيل الحب مابي لعانه
محد(ن) ومرني لك ولاحد(ن) نهاني
اعرف صحيح العلم كانك تكانه
قمنا نسولف بالرجا والتماني
كل (ن) ركد قلبه وهان اخفقانه
نبي نثبت موعد(ن) يوم ثاني
مستانسين ولا علينا عيانه
جتنا عجوز(ن) قلبها مشبهاني
هي ماكر الظن الردي واعرفانه
شيبا من العجز الطوال المحاني
ذرعانها اضعف من عصا الخيزرانه
ماهيب من بعض الحريم الوثاني
ملقوفة (ن) ماظن فيها ديانه
قالت وراكم ياخباث المعاني
ماتستحون من العبث والشطانه
قامت تهددني بعلم (ن) كواني
خلا هوى بالي يزيذ اوحشانه
تقول هذا غادر(ن) قلب ثاني
ياما لعب في قلب غيرك وخانه
قلت اسمحي يامال برد الجناني
ياعمتي سدي معك بالامانه
الناس في عيد(ن) تدور الحساني
حتى السجين يواجهونه اخوانه
خافي من الله يوم عيد ارمضاني
وش لك بسد المبتلي واكشفانه
والله ماناشت ثمانه ثماني
وش لك علينا باللغى والاهانه
امشي على فالي ولا حد(ن) دعاني
من عرض ناس (ن) كل زول (ن) بشانه
قالت نعرفك يانظير العياني
مانيب من تغبى عليه الذهانه
ان عاد شفتك عايد (ن) هالمكاني
والله لاقول فلان باغي افلانه
دريت مافيها صخاه وحناني
واعطيتها علم(ن) قريب الهدانه
قلت ابشري يوم ان ظنك دهاني
انا بحفظ الله وانتم بامانه
اقفيت اذاود عبرتي بمشياني
والقلب كنه ترتكز فيه زانه
ياعل من سلط عليه وحداني
يحدى على مكوى حديد(ن) سنانه
يصبر على جزره وهو مايداني
من سم داب (ن) شقرتين (ن)لسانه
وليا خلص مكواه زاد اكفخاني
سمه علق بالكبد قبل اكويانه
تأخذ لها ساعة تجر انهتاني
قبل الولي منها يشيل الامانه
تقول بايحني وانا قول ماني
مثلك علينا مايجوز اشرهانه
انا ليا متي وجا يوم ثاني
والله لجي قبرك وازود دفانه
واقول هذي حوبة المولعاني
هذي سبايب حرته واحسدانه
منتي بمثل العجز يم النواني
العجز فيهن قشر وبهن ليانه
وانتي عن العربان فرقك بياني
كان العجايز تمر انتي خنانه

الشاعر المعروف مرشد البذال

وتقبلو تحياتي
بعيد الهقاوي

اسمح لي ابدي اعجابي بقلمك وتميزك واسلوبك الراقي وتالقك

الله الله يابعيد الهقاوي .. رائع بكل حضورك
صح لسان شاعرها وتسلم يديك .. لاعدمناك

نقوه هالقصيده يابوفهد لاعدمناااااك !!
صح لسان الشاعر وسلمت يمينك على أختيارها

تقبل مروري

الف شكر لكم جميع على المرور الرائع

يا بعيد الهقاوي هذاي عجوز شاذه والا العجز هن الخير والبركه : صح لسان شاعرها وسلمت ياناقلها

ههههههههههههههههههه
الف شكر لك ابو عواد على المرور الرائع

سلمت يمين ناقلها وصح لسان شاعر اتمنى منكم تنسيق القصيده حتى تكون رائعه بروعة ناقلها

الف شكر لك الاستاذ فهد على المرور الرائع والجميل